2024年3月29日星期五

豆豉鯪魚炒油麥菜 + 燒汁焗排骨 ( 25-MAR-2024 )




( 25-MAR-2024  MON )

尋晚半夜去完廁所   之後都好快瞓到   點知隻手右前臂好痛   加上又比里奧大人鼻鼾聲嘈醒   所以瞓得唔係咁好   但感恩 7 點 28 分起身都精神   本身諗住 7 點 50 分先起身添 ~

煲埋薑茶先沖涼   咁樣完成咗一樣嘢   沖涼會開心啲   哈哈哈哈 ~

早餐食芝士條    尋日係 A1 買㗎   不過我覺得唔夠芝士味呢 ~


食完就靈修 10 分鐘   之後番工喇 ~

菇場忙咗陣   呢排都 3D   所以個個都好開心   哈哈 ~

Lunch Time 食牛筋河   食完又行 15 分鐘   但已經流哂汗   所以番菇場喇 ~


唔忙又做自己嘢   咁就好快放工㗎喇 ~

放工即走   番到屋企即預備晚餐   我覺得用 40 分鐘都算快 ~

是日晚餐 - 豆豉鯪魚炒油麥菜 + 燒汁焗排骨

豆豉鯪魚炒油麥菜每次煮呢個餸   佢都會話好味過出街食   話出面食係無味   我覺得珠江橋牌先好味 ~

燒汁焗排骨 - 特登焗㗎   咁里奧大人就有 Lunch Box 喇 ~

洗埋碗再整熱蕃薯糖水比里奧大人食   我就食雞屎滕 ~

好煙韌呀   下次會買比家姐同佢工人食   我覺得佢哋都會鍾意食   哈哈


我唔食蕃薯糖水   但就飲杯薑味勁重嘅糖水   飲完個身好暖好舒服


食完抖陣就開機洗衫   之後沖涼休息喇   因為里奧大人幫手熨咗衫   我做少一樣家務呢 ~

睇 Youtube 睇到想瞓   但 10 點太早啦   會半夜起身   所以睇到 10 點半先瞓呀 ~

2024年3月28日星期四

豉汁蒸排骨 ( 24-MAR-2024 )



( 24-MAR-2024  SUN )

今朝里奧大人 6 點 55 分就起咗身   咁就好喇   我都起埋身啦   我都係校咗 6 點 58 分起身 ~

感恩車程暢順   好快可以到酒樓呢 ~

我話想食珍珠雞   家姐話估唔到我鍾意食


鳳爪排骨飯係姐夫自己食哂   因為我同家姐朝早好少食飯   不過其實好細碗㗎咋


我話同家姐 Share 食   佢話一粒點 Share ?!   我話妳夾開一半囉   一係咬一半都無問題   之後佢用筷子夾開一半   咁啱有邊係多咗啲皮   佢包番實去   好似完整半粒咁   我話點解妳咁做 ?!   佢話咁樣靚啲   哈哈


我鍾意食蝦腸


家姐話鍾意食鯪魚球   我哋會加甜豉油同胡椒粉   明明好似好清但實質係重口味   哈哈   山竹牛肉一上枱   姐夫即刻夾咗一粒   我見家姐縐哂眉之後話姐夫呀   我話唔緊要喎   我都影到呀


家姐問食鮮蝦腐皮卷定蝦春卷 ?!  我話腐皮卷   家姐話估唔到   咁今朝家姐又想叫鳳爪   我話唔想食呀真係   佢問咗兩次我都話唔食   今朝佢成日都話估唔到我食咩   真搞笑   同埋次次食啲唔同嘢嘛


襯家姐傾電話   我一手拎起張單   點知唔夠力   家姐又搶番   將張單拋上拋落咁   我哋都忍唔住笑   好似玩緊遊戲咁   最衰我左手無力右手又痛   唔係一定拎到 ~

一入屋   Berry 當然係咁撲我啦   又係咁大聲吠   如果人類好似咁都幾搞笑   即係我一入屋   家姐係咁叫阿妹阿妹阿妹   哈哈哈哈 ~

等 Berry 冷靜完   我就會即灘喺梳化   去家姐屋企最舒服   因為咩都唔駛做   呵呵 ~

頭頂係啡色   好似禿頭咁   哈哈


跳完一輪又坐低   坐低一陣又會跳來跳去   狗性難測


我同家姐講話今朝都精神呀   上星期嚟就好攰   因為瞓得唔好 ~

之後我話今朝早咗起身   本身 6 點 58 分㗎   家姐問做咩咁零丁 ?!   我話覺得 6 點 55 分太早   但 7 點又遲   所以校 58 分   家姐話我黐黐哋   差嗰兩分鐘   哈哈哈哈 ~

等咗三百年   呢隻肥豬仔終於肯挨落我度喇


我係咁輕輕力搓佢個豬身


佢唔係咬我   係舒服都吖大個口   哈哈


我叫家姐唔好郁同出聲   佢話佢好慘   唔明點解佢唔可以郁囉   哈哈哈哈


真係瞓着咗


之後醒咗又瞓番   瞓咗 20 分鐘都有呀


家姐話佢咁樣坐好得意喎   所以影佢   之後我見手機有成個百張相   唔怪得家姐叫我 Delete 啲相啦


家姐好似用緊連環快拍咁   哈哈哈哈


依家 Berry 食完佢兜狗糧   就要比零食佢食   如果唔比就會嬲喎   其實只係成日望住妳   又怪叫咁啫   點算係嬲呀 ?!

咁尋日帶 Berry 打針   醫生要 Berry 減肥呀   隻肥豬每年見 2 Kgs 呀   初初最驚佢唔食嘢唔肥   依家中年發福啦   要減喇 ~

喺家姐屋企住   佢自己肥啦   工人又肥埋   依家連隻狗都肥埋   所以里奧大人成日都話家姐   養咩都肥   哈哈 ~

家姐話要換梳化喇


衰眼


佢應該仲係好眼瞓



Berry 女無啦啦又成隻挨埋嚟   我又托住佢個頭仔   之後我同家姐要細細聲咁傾偈   Berry 又瞓咗 20 分鐘呀


瞓醒就咁樣


咁樣都好樣衰下   哈哈


打完喊露


今年 11 月就 6 歲喇


阿婆樣   哈哈


差唔多 12 點幾都走喇   陪 Berry 行陣先去搭車 ~

咁啱陳老二咁啱打比家姐   家姐話要送阿妹搭車   可能陳老二覺得奇怪點解阿妹今日嚟   因為平時係星期六先嚟嘛   所以家姐好強調話阿妹嚟探 Berry ~

里奧大人未咁快放工   咁我都去街市買凍肉同菜先番屋企   我覺得好耐無去街市咁呀   覺得好有新鮮感   哈哈 ~

番到屋企分好哂所有嘢   之後里奧大人話放工   時間啱啱好 ~

我話去大家樂食下午茶   依家鍾意出去食   感覺放鬆好多   因為食完唔駛又執又洗   哈哈哈哈 ~

檸檬脆豬好味呀   假期整下都好   如果記得嘅話


里奧大人食叉燒瀨加炸雞肶   我都好奇怪   以為佢好餓啦    雖然佢鍾意食肉   但都唔會食咁多肉   仲要係炸嘢   原來佢話諗住同我 Share 食㗎   但見我話食另一個餐   又以為我好肚餓   我話下次你早啲講話同我 Share 嘛   因為我星期日朝早多數飽   晏晝唔駛食咁多嘢都得㗎 


食完就番屋企   里奧大人就沖涼瞓晏覺   我又唔攰   所以熨 3 機   好感恩自己應該回復番啲氣力呀 ~

咁見有時間又瞓唔到   所以煲埋蕃薯糖水喇 ~

5 點半都預備晚餐   不過差唔多 6 點半先開得飯呢 ~

是日晚餐 - 豉汁蒸排骨

豉汁蒸排骨 - 好耐無整呢個簡單又好味嘅餸   里奧大人直頭食得好快添呀   咁我就開心喇 ~

洗埋碗就叫里奧大人食糖水   我就唔食喇   因為要食糯米糍 ~

里奧大人見到碗糖水   話唔係咁多嘛   其實每次食糖水   我都只會每人半碗飯   咁就可以留肚食糖水呢


里奧大人抖半個鐘就去做運動   我本來一齊去㗎   但佢話我腰痛就唔好做運動住喎 ~

咁我都即刻開機洗衫   沖埋涼就食甜品喇 ~

花生糯米糍只係 $12 咋   估唔到都幾多餡料   下次會再買   好過自己整


睇下電視又睇下 Youtube   今晚 10 點半瞓覺先喇 ~

2024年3月27日星期三

譚仔三哥 @ 紅磡 ( 23-MAR-2024 )

過橋米線 - 依家唔敢再食咁辣   所以今次要煳辣 5 小辣就算喇   每次食呢個米線   里奧大人一定比哂豬潤同牛肉比我食   話要補血   佢真係好搞笑


花生木耳 (追加 $12) - 我要重慶口水汁   里奧大人成日話個汁好辣   但我真係覺得一啲都唔辣喎


黑芝麻奶蓋豆乳特飲 (追加 $12) - 幾好飲喎   起碼唔係無味   哈哈


( 23-MAR-2024  SAT )

本來 7 點 50 分起身   但里奧大人 7 點半鬧鐘響咗   佢今日係唔駛番工囉 ~

咁我都起身喇   之後佢話醒咗   同我出去食早餐   不過我話買咗麵包喇   叫佢瞓下好過 ~

早餐食丹麥條   咁大條真係好夠飽   絕對可以頂到 2 點 ~


今朝菇場無咩人番工   阿花見到我   話好少見我着褲   其實我係着牛仔褲   咁件衛衣比較短   所以一定唔會着 Legging 啦   唔想影響市容   哈哈 ~

無嘢做就做自己嘢   其實勁想睇 Youtube   不過一定唔會啦   我覺得有啲過份 ~

依家已經成為一隻肥啤梨


家姐 Whatsapp 我講早晨   同埋叫我唔好恰眼瞓   咁我覆佢: 我在家   之後佢即刻打比我   佢話以為話我係 OC 暈呀   哈哈哈哈   我話其實我打緊公司係我家   之不過佢打嚟   我 Send 唔到住囉 ~

咁又傾咗 25 分鐘   坐多陣就好快放工喇 ~

放工又去惠康買 6 Pack 鈣思寶同 2 包洗衣珠   今日有 92 折都抵   同埋我揹背囊   可以放 2 Pack 落背囊同 2 支洗潔精   其實勁驚整爛個背囊呀   到時真係得不償失   哈哈 ~ 

2 點家姐又打嚟   以為乜事   因為多數 Whatsapp 先嘛   之後話想聽下我把聲   佢真係以為我朝早唔舒服定啦   下次都係唔整鬼佢喇 ~

同里奧大人去飯堂食午餐   好似好耐無去過咁 ~

我好鍾意食呢啲花生


我拎嘢拎到出哂汗    所以要飲杯凍酸梅湯


里奧大人要我食多啲魚


之後我叫佢再叫另一個餐啦   佢又話要我食牛肉補血


我唔知係比啲花椒定辣椒   刺激到喉嚨   咳咗成 2 分鐘呀   勁辛苦


里奧大人問我點解叫十二味 ?!   我話唔知喎   我話十二味加多劃就變十三味   咁多一樣味就勁啲咁   之後佢話加多一撇   變千二味仲勁啦   呢下好笑呀   哈哈哈哈


番到屋企就執嘢啦   呢排都買咗好多嘢   但無力力去執   我覺得今日好精神又有力氣   所以就要執好哂啲嘢入櫃喇 ~

又執咗兩個鐘   里奧大人問啲嘢放哂喺邊 ?!   我話櫃囉   唔係邊呀 ?!

呢度 16 Pack   其中 3 Pack 係送嘅   但我仲有 3 Pack 喺菇場未拎   不過我唔拎喇   喺菇場飲好過   反正要飲嘛


我仲有 2 包洗衣珠喺公司   但見有洗潔精送好似好抵咁   同埋我又可以比 2 支洗潔比家姐   咁都唔錯吖


抖多陣就番崇拜   條腰嚟料啦   好痛呀   哈哈 ~

崇拜之後就去食嘢   今晚到我想去譚仔食米線呀 ~

番到屋企即開機洗衫   之後沖涼休息 ~

睇下 Youtube   今晚 11 點都瞓 lu ~