2007年9月30日星期日

鴛鴦餃 + 油麥菜 + 超甜南瓜粟米栗子豬展湯




里奧大人的記事簿





尋日同里奧大人食完 tea...就周圍行下再去街市買餸就番屋企 lu...唉...里奧大人由讀書開始我地最大既娛樂就係手牽手行百佳...街市...因為近屋企...可以快 d 番屋企做功課嘛...

番到屋企真係做到無停手...醃肉...煲藥...煲湯...燙衫...執野...統統都係我一手一腳搞掂...因為里奧大人要拚命做功課...我都想讀書做功課...但真係無時間可以插得入...所以決定全日做屋企野...留番星期日先讀書做功課...我幾為頭家呢...hahahaaa...(籍口)...

是日晚餐 : 鴛鴦餃 + 油麥菜 + 超甜南瓜粟米栗子豬展湯

鴛鴦餃 (韭菜豬肉水餃 + 粟米南瓜豬肉餃)
霎時間諗唔到想整咩餸...所以就整餃喇...里奧大人成日話水餃皮好厚身同好飽肚...所以今次好好彩咁買到雲吞皮喇 ($5/半斤 - 約 30 塊)...見次次都係單整一樣餃...又見煲湯材料都有多....所以試整下幾隻粟米南瓜餃無咁悶...同埋好似好健康咁呢...不用雲吞皮真係有難呀...d 皮太薄喇...同埋我唔想剩雲吞皮...包左好多餡...包到脹卜卜...最慘我唔識包雲吞嘛...求其封左口楂埋一舊就當係雲吞包法...見人呀....我都接受唔到咁核突啦...所以求鬼其對摺就算喇...之前仲特登死搵爛搵個餃子夾...原來四方型既雲吞皮係唔得架...要圓型餃子皮先用得呢個餃子夾架咋...今次落左雞粉黎做湯底...感覺無咁淡...但我覺得 d 味好似我細個病既時候...媽咪煲通心粉 d 味咁...超難頂呀...

油麥菜
係大前日剩既...放左喺雪柜...無謂嘥左嘛...掉左又黃又老果 d...都食得既...就咁淥黎食就算 lu...

超甜南瓜粟米栗子豬展湯
買左3斤南瓜 ($9) + 豬展 ($22) + 栗子半磅 ($5) + 粟米 3 條 ($10) ...由於"我會煲好呢個湯"....所以就好有心機好辛苦咁將 d 粟米續粒續粒咁拻出黎....d 南瓜又切到細細件...之後...煲左兩個鐘就搞掂...

開飯喇...見到里奧大人狼吞唬嚥咁掃 d 餃...真係好開心呀...但係 d 皮太薄...好易散哂...所以好難夾呢...下次都係用番餃子皮包好 d...包同食都方便嘛...而個南瓜湯呢...真係好茸好甜呀...杰撻撻咁好正呀...最正係 d 粟米係脹卜卜...咬落去係 "o必" 哂 d 湯出黎架...真係辛苦都值得呀...umm...個菜就無特別啦...

洗埋碗沖埋涼成十點...睇下電視又到十一點幾...之後里奧大人話食埋個冰皮月餅喎...見佢咁有興緻...咪陪佢食囉...唉...肥 c 嚤...臨瞓前食野...仲係要甜品添...

今朝十點要起身喇...因為唔想成日趕頭趕命咁食完野番祟拜...早 d 起身 me me 犘犘慢慢食野好過呀...我地又去左熟食街市食點心...蝦餃 + 雞扎 + 春旦燒賣 + 山竹牛肉 + 馬拉糕...$38...唔知係咪今次唔係咁肚餓呢...我同里奧大人都覺得 d 野麻麻地...下次應該唔會再喺度食點心架喇...

祟拜完之後就行下大眾書店...好開心呢...因為會員買野有 8 折...所以買左記事簿同 schedule book...本 jungle emperor leo 記事簿係我精心挑選比里奧大人架...因為我好鍾意呀...果隻獅子既動態好似我深愛既朱朱咁呀...里奧大人都話好得意...但...一話係買比佢用就好大反應話...下??唔係??我用??男人點用呀??我陰陰咀笑話喺屋企用又唔係帶出街駛咩驚啫...同埋佢見我楂住咁耐又唔放手...所以好無奈咁話唉...好啦...唉...比人知道就 c...粉紅色的記事簿...

之後又差唔多時間 tea 喇...去左大家樂食 tea...我食左燒鴨瀨 + 涷奶茶小甜...里奧大人就食左叉燒瀨 + 可樂...滿足滿足滿足...

2007年9月29日星期六

孤獨三寶 (牛丸河 + 菜心 + 可樂)


尋晚一放工就走...諗住時間啱啱好啦...點知等左半個鐘頭車呀...心急死我咩...想行一陣街家買 d 野家嘛...打亂哂我 d 計劃...激死...我覺得尋晚好大風...幾驚落雨呀...le le 拿拿去食野之後番學喇...因為我唔想買遮又唔想淋濕個身軀呀...求其搵間麵舖食...食左我既孤獨三寶..牛丸河 + 菜心 + 可樂 ($22)...我真係好攰...想食米粉...點解叫左河粉...激死...因為食河粉個胃會好漲...如我所料...食左半碗粉個胃好漲...抖左陣再慢慢食...好在食哂啫...

番到學校已經覺得好眼瞓好攰...番左幾堂我都無呢 d 感覺...所以好驚會洽眼瞓...因為我坐係較前位置....實睇到妳個衰樣...唉...個 hall 又涷...個 mic 又差...窒下窒下咁...又小左 d 同學比反應....種種因素下...我一路"中"一路聽牧師教講義....我估我應該可能瞓着左...真係極度樣衰呀...唉...如果唔係晏晝同同事 farewell...我絕對唔會喺要番學既日子出去食飯...因為一出一入好攰同好熱架...唔攰至奇...對於我黎講...


終於放學喇...好好彩一出去就有車...所以都好快番到屋企仲買左辣魚旦 + 燒賣 + 白蘿蔔...$12 番屋企同里奧大人一齊食...唔知係咪因為第日係星期六...所以情好好...d 野都好味呢...

之後同里奧大人傾下計...傾到我火都黎埋...事緣係我話同同事朝早喺pantry 洗杯時傾左 10 分鐘計...里奧大人第一句係語氣重重咁話"妳地都好得閒傾成 10 分鐘計..無野做既咩"...大佬...吊頸都要抖下氣啦下嘛...我好反感同里奧大人講...好討厭好討厭你講呢句說話...講真果句...傾計唔代表妳得閒...忙亦唔代表妳多野做...如果我同家姐咁講...佢會好開心咁話"妳就好啦...可以傾下計...我好多野做呀亞妹"...我真係感覺到佢感受到我既開心囉...所以係咪一定要用埋 d 咁既語氣呢...老細見到同事傾計都唔會咁講啦...激死...男女大不同呀...

由於星期六既關係...車程特別順暢...真係可以慢慢嘆早餐喇...點知去開果間無開到...去左另一間...食左沙爹牛肉 + 炸菜肉絲麵 + 涷檸茶...$19....我有個好奇怪既習慣....就係食出面既炸菜肉絲同雪菜肉絲係唔會食 d 肉絲...我覺得食完之後個身會好 dirty...試過食左 1 條仔咁大把...搞到我周身唔舒服....所以以後唔會再食 d 肉絲...其實都幾煩...因為要嘥喺時間 "new" 走 d肉絲出黎... 

番到公司有野做...但無 mood 呢...突然有班大陸廠既管理級人員到左 office...成班自由行呀....最肉酸係企定定比老細介紹比佢地識...仲要上鏡呀...星期六我係超無敵 casual 家嘛...又唔 jel 頭...今期塊面又多粒粒...仲着埋灰色衫添...又肥又肉啦...由於佢地成班人要去飲茶...公司要清人...所以 12:55 可以走喇...5 分鐘都好過無啦...

諗住同里奧大人食 tea...平 d 嘛...橫掂番到屋企都要成兩點...無理由唔食 tea 丫...但仲有成 15 分鐘先到兩點...咪同里奧大人行百佳買野囉...諗住買豬展...點知買下買下又百幾蚊...唉...之後同里奧大人食 tea 喇...食左星洲炒米 + 涷奶茶 同 豉椒排骨飯 + 涷檸茶...$48...嘩...之前食係$18 (涷飲加 $2)...依要 $22 呀...貴左 $4 呀...咩都加...好慘呀...真係要慳 d 洗喇...

2007年9月28日星期五

金龍船 - 龍躉乳豬宴 (半席)

鴻運乳豬全體 - 好好食...d 肥膏入口即溶...但 d 乳豬醬好咸...

柚皮魚湯浸龍躉球 - d 魚好腥呀...

蒜香龍躉頭腩 - 無咩特別...又無野點黎食...乾爭爭

xo 醬帶子螺片 - ok 啦...xo 醬好食嘛

威尼斯海鮮卷 - 好脆...但好油...

鮑蔘翅肚羙 - 無咩特別...旨在食醋...

珍珠軟殼蟹 - d 蟹唔脆既...但 d 珍珠米好甜囉...可能連埋粟米粒一齊食...

鹽焗黃油雞 - 雪藏既...因為有血...好得人驚呀...

清酒一口小籠包 - 咩味都無...

三文魚石窩湯麵 (變身前)

三文魚石窩湯麵 (變身後) - ok 啦...好熱囉..因為太飽喇...

南北杏燉津梨 - 我 d 雪梨水好飲過佢多多倍...

迷你旦撻仔 - 唔熱唔鬆脆既...等我仲叫媽咪襯熱食鬆脆 d 添...

深愛既朱朱 (喺我心目中最完美既狗狗)

尋晚放工真係異常興奮...因為可以見到深愛既朱朱同埋可以同親愛晚屋企人食晚飯...

放工即搭車番媽咪屋企見深愛既朱朱...當然仲要同佢狂影相啦...haha...次次都影到張 memory card 差唔多爆哂...不過無計啦...見相如見狗嘛...

之後同埋媽咪...工人一齊去酒樓lu...無幾耐家姐..姐夫同里奧大人都到 lu....家姐仲醒左我兩支"余均益"辣椒醬添呀...正正正...我地得 6 個人...所以叫左個龍躉乳豬宴 (半席 $950 包 6 罐汽水同半支紅酒)...個名就勁...但係 d 野食就一般...因為好多炸野呀...我地一路食一路傾...不知不覺咁已經過左兩個鐘 lu...係時候埋單找數喇....講明話我同家姐補番同媽咪做節 share 家嘛....點知家姐係都要搶住比...塞番 d 錢比佢又唔要...激死...咁唯有下餐我請番啦...一人一次嘛...

番到屋企都即刻沖涼瞓覺 lu...good night...

今朝早左一個字番到公司附近...所以可以慢 d 食我既早餐...腿旦治烘底走牛油 + 熱央...$15...好耐無試過慢慢食喇...very very good  ...

今朝居然有野做....不過又係好快做完呢...

晏晝同8個同事一齊同vv farewell...去左美心皇宮食...無野食既...來來去去都係果 3 架車...我食左 1 粒干蒸牛肉 + 1 件魚雲 + 1 隻韭菜餃 + 1 隻素餃 + 半條牛腸 + 半件芋頭糕 + 1 個奶皇包 + 細細件旦散 + 4條 菜心 + 半個糯米包...唔夠飽呀...要狂飲茶先得呀...人家 expect 會好多野食家嘛...

番到公司又要種菇喇...

今晚要番學呀...得自己一個人孤零零食野...如果里奧大人可以相陪就好啦...食野買野佢比錢找數嘛...

2007年9月27日星期四

雪菜火鴨絲炆米 + 蒜泥油麥菜 + 牛蒡甘筍豬展湯






yiya...瞓到成 11 點呀...好在太興既早餐時間係至到 11 點半咋....唔係又要我出手煮丁丁架...

同里奧大人 share 食黑椒雞扒配厚多士 + 熱檸茶 & 火腿絲通粉拚旦配多士 + 熱檸茶 ($42)...好 relax 呀...我勁鍾意同里奧大人喺太興食早餐...其一 d 野食有水準...其二係 d 坐位好舒服...唔駛咁逼狹...食完就逼里奧大人同我去超市買野...再去街市買重型物品...鴨梨...豐水梨...富士蘋果...講真...我自己一個人真係唔會買咁多生果...因為實在太重喇...而且...里奧大人好自豪有對強而有力既雙臂...這樣子...無謂嘥左佢啦...係咪??...

番到屋企之後...又要再去家品店買 d 野...買完野行經飛髮舖時...里奧大人見到無咩人剪髮...所以話想去剪髮喎...唉...難得放假又去剪髮...好在我番到屋企都好忙...因為要拖地...抹野...執屋等等...仲有燉肉汁...煲川貝雪梨水...無一刻停過呀...時間過得真係好快...沖埋涼已經係 3 點幾...又要食晏喇...所以就咁煮左東東水餃 + 魚腐 + 生麵就算喇...食完坐多陣又到 4 點半喇....又要開始煲湯喇...整完睇左陣報紙又開始煮飯喇...我覺得真係好充實呀...無嘥過一分一秒呀...由於里奧大人想跑步操 fit 身型...所以我要早 d 煮飯...

是日晚餐 : 雪菜火鴨絲炆米 + 蒜泥油麥菜 + 牛蒡甘筍豬展湯

雪菜火鴨絲炆米 - 米粉浸軟...雪菜浸半個鐘至九個字...我試過浸左一陣...食果陣時好咸呀...將燒鴨...雪菜...韭王切絲...我多數會放哂材料兜一陣先放米炒...再加老抽同生抽黎炒炒炒...炒到我認為熱為止就上碟...

蒜泥油麥菜 - dir 碎蒜蓉再加小小磨豉醬黎炒...簡單又方便...

牛蒡甘筍豬展湯 - 牛蒡同甘筍係上次剩左既...唔好嘥...加多舊豬展..果皮同幾粒蜜"早"煲個幾兩個鐘搞掂...我係用日本出既??炭煲煲既...好處係只需煲一個半鐘 (大火半個鐘...之後細火一個鐘)...同埋唔會流失湯既營養...但我見有時間...所以煲左成兩個幾鐘...嘥氣...咁駛鬼買呢個煲咩...

我覺得次次整雪菜火鴨絲炆米都好好食...可能我由細到大都好鍾意食...里奧大人唔駛講都實鍾意食 (我覺得)...之後食菜時...我望到里奧大人食到擰擰頭...原來佢話無咩點做野就無左成日...cher...嚇 c 我咩...仲以為好難食添...無理由丫...用蒜頭磨豉醬黎炒無理由難食家嘛...
又係咁...里奧大人又係話"等我洗碗啦"...我又係咁話"唔駛啦...我洗得喇"...人家講下啫...你可以再問多一次家嘛...

抖左半個鐘就同里奧大人出去跑 lu...不過街好焗...跑左半個鐘就番屋企...沖埋涼就食埋之前買既綠茶紅豆蓉冰皮月餅喇...ha...跑完步食甜野係好好好容易吸收架...所以跑左等如無跑...

今朝食左芝士火腿菠蘿包 (走皮) + 涷奶茶 (小甜)...$15...其實走皮既菠蘿包係咪真係無咁肥架??我唔想肥肥上加肥喎...而 lunch 呢...又係尋晚 d 米粉呀...好悶呀呀呀呀呀呀...唉...番工又悶 (但可以賺錢)...食飯又悶 (但可以慳錢)...咁唯有諗好果方面囉...無野做真係好慘好慘呢....真係搞到悶悶不樂同埋反應都遲鈍 d 架...又唔方便成日周圍行喎...搞到坐圍成 40 幾 50 吋...

不過我依好開心...因為今晚同媽咪...家姐...姐夫...里奧大人去金龍船食晚飯...補番同媽咪做節...咁今日先叫做有番 d 人生樂趣咋...唔係都唔知點捱到 5:30 呀...

你知啦...個個都忙...邊樹敢打擾人家黎陪我丫...

2007年9月26日星期三

酒樓做節

由於尋日中秋佳節放 4 點...所以就約埋里奧大人既三家姐同晴晴去 APM food court 食雪糕再出發食晚飯...果度既雪糕係 $20/scoop 同埋 $25/double scoop...咁我當然食 double scoop 啦....多 $5 多款口味喎...所以食左 mint chocolate & ritz cheese...都幾好食....之後傾多陣計就出發同里奧大人屋企人食晚飯 lu...好慘呢...因為好多好多人等車..排左成半個鐘先上到車咋...仲係坐下層倒頭車既位添呀...好在我唔怕啫...唔係又要再等下架就 c 囉...

去到酒樓真係好多人呀...做節既食肆真係好旺...亦即代表會係食垃圾...所以我最憎正日做節...又逼又唔好食服務又差...簡直係貼錢買難受呀...佢地叫左沙薑雞 + 椒鹽豬扒 + 蒜蓉西蘭花..鐵板茄子 + 薑蔥蟹...仲有幾款唔記得喇...通通都難食...(所以費事 show 個名出黎)...不過點難食都好...始終都會再去呢間酒樓...因為里奧大人屋企人有咩節目都會去呢間食...食左 8 年架喇...好佩服佢地可以唔悶架...一個字...勁
...

食完番屋企 lu...里奧大人好開心話快 d 沖涼先...要趕住睇電視喎...原來係 cable 做 "鬼馬狂想曲"...其實之前喺戲院睇左...之後再喺 cable 度睇...依又睇...仲一路睇一路喺度笑...唔係化...睇 3 次都咁好笑??不過我都好開心既...難得里奧大人放低功課 relax 下...

2007年9月25日星期二

茄汁蝦碌 + 梅菜蒸肉餅 + 油麥菜 + 豆腐魚頭湯


尋晚終於可以睇中醫喇...睇到 7 點...咁啱家姐要開 ot 到 7 點...所以可以一齊番媽咪屋企食飯...又見到我深愛既朱朱喇...

由於太肚餓...所以去左超市買d野食...買左兒時回憶既童星點心麵...薯片...朱古力...仲有榴槤添呀...因為里奧大人唔係咁食...所以我襯人多食就即刻買...太肚餓喇...所以坐車時食左包童星點心麵...點知番到屋企唔想食飯...但唔食會比媽咪鬧死...好在 d 餸都 ok 咋...有茄汁蝦碌 + 梅菜蒸肉餅 + 油麥菜 + 豆腐魚頭湯...個湯好好飲呀...因為係奶白色...但真係唔明點解我次次煲魚湯都唔係奶白色既????我依足方法黎煲架噃...why??
尋晚好攰呀...10 點 8 就瞓喇...同埋我 7 點要起身同家姐...媽咪...深愛既朱朱食早餐呀...同家姐share 食左腿旦治烘底 + 五香肉丁火腿雞亦米 + 熱央...飽飽飽....為我平時唔會咁早食早餐架...

番到公司做左小小野就開始種菇 lu...但有好消息...就係今日中秋節放 4 點
...

晏晝同同事 vv 食粉...又係食粉...食左牛孖筋米粉 ($17)...本來唔想出去食既...但佢做埋今個星期尾...咁算啦...咪一齊出去食囉
...

祝大家中秋節快樂

2007年9月24日星期一

鴻星飯局







星期五晚要番學...所以要自己食晚餐...又係食粉...牛丸米 + 腐乳通菜 + 可樂 ($22)...食到好悶呀...因為實在太早食飯喇...唔食又唔得....因為 9:30 先放學...唉...番到學校真係好攰...好想番一半就走...但唔得呢...因為里奧大人接我放學呀...

一出學校門口無幾耐...見到有巴士...即刻跑跑跑去追啦...跑到站度佢居然開車呀...激 c 人呀...兩副老骨頭散哂喇...果晚又焗喎...見到里奧大人一路企一路流汗...好心痛呀..因為我覺得佢好似好老好辛苦咁...好在等左無幾耐就有車咋...喺車度傾下傾下好快番到屋企lu..果晚好想食糖水潤下...所以就去左屋企附近度食糖水 (彩虹同雜果涼粉)...食完真係好心涼...但好赤呀...大拿拿四十八蚊呀...所以我地只可以每季豪一次食果度既糖水咋...

星期六 day off...所以瞓到成 10 點先起身...即刻洗頭沖涼換衫走人...去見我深愛既朱朱...去到媽咪屋企附近先行食早餐...奶油多 + 涷央 $13...後就上媽咪屋企坐下...讀下書等里奧大人放工...再一齊同埋深愛既朱朱食 lunch 喇...差唔多兩點就去大排檔等里奧大人 (由於要帶埋深愛既朱朱...所以食既地方只局限於大排檔)...離遠見到里奧大人...仲見到佢拎住細細既紅色盒仔...係 MTR 既 giroro 黎架...好開心呀...之後拿拿臨叫野食...其實我早餐都未落格...但唔食又比里奧大人鬧...所以就食左碗齋米算喇...清清地...食完又拿拿臨走喇...因為實在太熱熱熱喇...

食完就上番媽咪屋企抖一陣...再出發探媽咪喇...好好好好攰呢...見到媽咪都好精神...心情都唔錯....都好d....因為住醫院真係會好悶同埋好驚既...明白明白...我地探到7點就要走喇...因為約左家姐一齊去紅磡既鴻星同婆婆等人做節呀...去到差唔多 8 點...諗住有得食...但差唔多成9點先開席...唉...大佬...星期日唔駛番工啫...但都攰架...所以好怕同婆婆飯局...左等右等..但都係唔齊人...都係一路食一路等...咁點解唔 8 點食呢??開席時個個都好肚餓...食左乳豬全體..帶子...龍蝦...蟹皇翅...個個都仲係覺得好肚餓....搞笑...之後就黎魚...鵝掌...雞...就開始叫做飽喇...好驚訝呀...因為有我最鍾意食壽包食呀...心諗做節會有壽包既咩...然後突然成隊兵楂住酒杯咁入黎...向我亞 e 一個人敬酒...哦...原來婆婆訂位時話亞 e 生日要加壽包...真係第一次見架咋...婆婆又幾細心噃...hahaha...

...嘩嘩嘩...食完成 11 點 4 呀...番到屋企沖洗完成點幾呀...好攰呀...

赤丸 @ 德福


尋日實在太攰...所以都無番到教會喇...瞓到 11 點先起身...出面已經無早餐食 lu...所以就煮左丁丁...加多杯咖啡...又慳錢又方便 (係里奧大人)...之後喺我洗碗其間...里奧大人就主動話燙衫喇...因為我地又要趕住出去陪深愛既朱朱喇...hehehe...

由於要幫媽咪去東海堂買麵包同旦糕...所以要去地鐵站入面買...里奧大人突然行得好快話等陣先...我心諗...我唔夠瞓已經掹掹地架啦...仲有...地鐵有咩野好睇呀??之後見到里奧大人喺服務中心排隊...原來係換 tamama 比我呀...真係又一驚喜呀...好...感...動...呀...怪錯左佢添...嘩...原來星期六係買 giroro 既 last day 黎架...好在里奧大人有先見之明買左比我咋...唔係我就慘喇...hahaha...

深愛既朱朱...為左....又要再去大排檔...好...悶...呀...不過見到妳開心...里奧大人又見到我開心...佢都應該好開心既...(我覺得)...我真係唔想再食粉喇....所以食左快餐..黑椒牛扒腸仔飯 + 涷奶茶 $20...已經叫左小飯...但都食唔哂...好嘥呢...不過無辦法...真係無咩胃口...

唉...番到媽咪屋企已經成 4 點...咁即係代表抖個幾鍾又要出發探媽咪喇...其實我之前計劃好星期日唔探媽咪...想休息同執下屋...點知主診醫生約左星期日晚 8 點講解裝機情況...咁無計啦...最慘都係家姐同里奧大人...因為家姐星期日都要開 ot...唔開唔得...而里奧大人又做唔到功課...唉...

去到醫院...見到有護士主管同媽咪講解點解要裝接駁器呀...個接駁器係點架等等問題...好左咁啱到左咋...真係感謝神呀...之後再同護士主管講約左主診醫生 8 點...講解病人需唔需要裝機喎...佢話咁不如睇下主診醫生會唔會早 d 黎啦...點知主診醫生 7 點就黎左 lu...話睇番病人情況唔係咁急切要裝機...因為喺可能病人兩年前入院...入院既時候有好多病一齊引發左出黎 (e.g. 血壓高...哮喘...)...咁 d 醫生咪將每一種病既藥都加重左令到心跳慢左...所以依兩日幫番病人減輕番d藥...而病人心跳 ok 番好多...無咁慢...可以食藥控制到...不過裝機都係遲早既事...而呢..裝機好處係會幫妳調節到正常既心跳....唔好處喺病人可能幾年後先裝機..但依家裝左..部機幾年後已經無哂電...要換電池....即係要再做多次咁解...天呀...你想我點呀...有係你地 3 個醫生見議裝...之後主診醫生你話唔係咁急切裝機...裝唔裝係睇下家人既意願...醫生...我見你係想聽你意見咋噃...咁樣我地仲有無信心聽你地講野呀...一時一樣咁...有無離譜 d 呀...真係人都顛呀...不過聽醫生 d 語氣...再加上食藥可以控制到...所以決定唔幫媽咪裝機喇...媽咪聽到話唔駛裝之後開心到不得了呀...咁我地都係既...

之後同埋家姐一齊去 APM 既赤丸食烏冬...家姐話 d 烏冬煙煙韌韌好好食...咪試下囉....好在等左 20 分鐘有位...3 個人叫左熱烏冬加大 + 兩個冷烏冬 + 吉列朱扒 + 日本餃子 + 燒排骨 + 煎肉腸 + 脆爆雞粒 + 天婦羅日本南瓜...個冷烏冬真係好好食呀...煙煙韌韌再試下食熱烏冬...好"林"呀..一 d 口感都無...好在里奧大人話食熱啫....唔係 share 就慘喇...不過見自己同家姐食d 烏冬咁好味...而里奧大人個烏冬又"林 patpat"...覺得佢好似好慘咁...其他小食都 ok 既...細細碟又快...因為間舖頭好細....同埋選擇既野食又唔多囉....過我覺得好抵喎...埋單$115 唔駛加一...我下次會再去....因為 d 烏冬真係好好食呀...

今朝遲大到呀...所以買左 $10 燒賣粉果番公司食...再沖多杯咖啡...搞掂...晏晝無咩胃口...所以去左食白粥 + 炒米粉 $13...抵...

今日 cc 放假...無得 msn..公司又無野做...悶 c 我囉...

好在媽咪今日出院...唔駛再樸黎樸去咁辛苦喇...不過我都會去媽咪屋企食飯同過夜...因為里奧大人本應要喺廠開夜會同過夜...但有個客突然間話要第日早上見...所以咪可以趕番黎香港囉...但之前已經同媽咪講左話會過夜..同埋 d 功課又放左喺媽咪度...所有費時滕黎滕去...索性瞓埋呀...橫掂里奧大人好恨好恨有自己既 free time...

2007年9月23日星期日

鉄板 TEPPAN @ APM

刺身盛合 8 款  

大阪長芋 - 雜錦燒餅  


鐵板日式餃子  


燒雞軟骨串 + 雞腎串  


鐵板雞扒湯拉麵  


$1,888 個西瓜...食左唔知係會點既呢

尋日成日都喺度種菇...種到收工...之後就即刻搭車睇媽咪喇...


好好彩即刻有車...但...我叫落車時...個司機係舉手應我....點知去到醫院附近唔停仲行多成條街...我咪話醫院有落喎唔該...佢喺半路中途停比我...仲係度細細聲 ee 哦哦...我真係頂頂頂頂頂頂佢個肺丫...自己衰左仲咁樣....唔係見你係亞伯同埋...唔係我趕住見媽咪....鏟到你飛起呀...當我落左車發覺四圍都無行人燈...d 車係咁飛黎飛去...d 司機又喺度好疑惑咁望住我....唔係以為我係傻嘛....唔係以為我想自殺嘛...極度樣衰呀我...連黑兩野...係咪咁呀...

去度醫院好在見到媽咪都精神...又食野...個心都定 d...之後又係話好驚好驚...搞到我又驚....我一驚就會控制唔到情緒係咁鬧係咁話家嘛...唉...其實覺得自己都好衰...因為比着我...我都有小小驚既...係小小咋噃...之後心諗我之前做手術係全身麻醉添啦...我唔驚做手術...最驚係要種豆同吊鹽水...d 感覺好恐怖...因為我動作大....好驚扯斷呀...但同媽咪講都係唔明架喇....佢果一刻係唔洗咁驚...因為有人傾計分散左注意力...之後咪又係一樣驚餐飽...

無耐里奧大人同家姐都黎埋...同埋媽咪傾下計...眨下眼就 8 點喇...要走 lu...唉...媽咪呀媽咪...妳知唔知妳一入院我就頂級擔心架...呢幾日我真係身心俱疲...個頭又好重重重呀...

好想食日本野...所以去左 APM 既 TEPPAN...橫掂未試過...一望無咩人既??好驚喎...唔通唔好食??APM 既食肆無理由會咁靜架噃....不過唔理喇....照衝入去....我地三個人...坐o係兩張拚埋一齊既二人枱...最頂癮係得三張椅囉...古古怪怪咁...由於里奧大人生"飛滋"...所以特登叫左碗鐵板雞扒湯拉麵...因為拉麵得兩款..另外一款係吉列黑豚肉...咁熱氣...咁無計啦....而家姐又極度極度肚餓...所以 order 左最快既燒雞軟骨同雞腎串先..之後再 order 鐵板日式餃子 + 刺身盛合 8 款 + 雜錦燒餅 (厚燒)...overall 都 ok 既....除左件雞扒 (乾爭爭)...同埋個燒餅...唔係唔好食...係因為好鬼厚啫...成 2 吋厚呀....簡直係成底糕咁....不過..我地唔想嘥野...咁就每人cut d cut d 咁哽哂囉...所有野都清哂...呢餐家姐係都爭住請...話係補番里奧大人生日果餐飯喎...好在食滿 $220 用恆生卡有88折...原本 $420... discount 左就 $370 搞掂...雖然係家姐請...但我都覺得好貴呢...因為一個人比哂...不過我食得好好好開心喎...可能同埋家姐一齊食啦...

呢幾日好好瞓呀...可能樸黎樸去呀...但都係唔夠瞓呀...不過都好過瞓唔好既...呢兩朝里奧大人唔係上大陸就係聽講座...得我孤零零一個人搭車番工....好失落呀...

今朝食左菠藺油 (走皮) + 涷咖啡 (小甜)...$13...油油油油油油呀...晏晝就會喺公司淥米粉再加尋晚自己求其煎既成塊雞扒...唉...塊雞扒星期一已經醃左...呢排成日探媽咪都無時間煮野...唔煮又驚會"叔"...所以尋晚咪十二萬分既唔願意下煎埋塊雞扒用黎做 lunch 囉...咁大塊...食 c人摩...

諗起聽日 day off 可以瞓晏 d...又可以見到深愛既朱朱...好開心呀...

今日睇頭條...晴天霹靂呀...車路士領隊摩連奴劈炮呀...同球會雙方同意下提早解約呀...人家覺得佢好帥家嘛...睇車仔除左睇舒夫真高同波歷克就係睇佢...因為覺得佢好真性情...靚佬...依家無得睇佢喇...唉...

今晚要番學呀...好攰添...

2007年9月20日星期四

車仔麵 @ 大埔



尋日晏晝家姐話我知...醫院打電話黎話媽咪喺度喊...好驚...情緒好唔穩定咁...聽完之後搞到我無哂心機...媽咪...真係妳驚我都驚架...本來諗住睇中醫都唔睇喇...唉...

由於里奧大人又喺大陸既關係...所以只有我探媽咪咋...好在公司附近有車到醫院...所以好快可以陪到媽咪...見到佢無厘精神...肯定驚左成日...無幾耐有醫生黎左...話建議媽咪裝心臟起伏器...因為媽咪係心跳快先要入院...食藥可以控制...等佢慢 d 唔好跳得咁快...但因為媽咪本應係心跳慢...食埋藥變相慢上加慢...比較危險..所以醫生有咁既建議...同埋醫生話呢個係手術仔...只需局部麻醉...一至兩個鐘就搞...傷口約兩吋長...咁呢...個起伏器壽命大約 8 年右....所以 8 年後又要再叉電既...而價錢約 3-4 萬...唔洗咁擔心...

之後家姐黎到...同番佢講醫生頭先話建議媽咪裝心臟起伏器...家姐都話好...然後媽咪話好驚...家姐就問妳驚 d 咩??佢又答唔出...連個工人都話做囉...醫生叫妳做咩咪做咩囉...唔洗驚噃...咪係囉...有咩好驚??做左係對自己好仲駛咩諗咁多啫...仲有喎...妳話做都要等專科病房check 左...再 book 手術室...唔係話做就做...做咩再要拖啫...之後婆婆同大舅父都黎左...唉....婆婆行動不便都黎探媽咪...搞到我都好心痛添...我又要再詳細講多次醫生話咁咁咁比佢地知...婆婆同大舅父諗都唔駛諗就話做啦...做左身體好仲駛咩諗咁多啫...媽咪又喺度喊...又話好驚...驚到朝早無知覺喎...點知大舅父話妳無知覺??咁又點會有知覺話自己無知覺呀...比妳激死...佢咁講我都係度笑...大舅父仲話妳唔做比佢做呀...又話妳咁驚...我地陪妳一齊每人裝一個喇...hahaha....講到痴哂線呀...之後叫我去 book...唔好比媽咪諗咁多喎...但家姐話等媽咪自己親口話做先 book...唔係一陣話好驚都係唔做仲煩...媽咪比我地車輪戰一輪終於話做喇....我就拿拿臨出去同護士 confirm 做手術...隔無耐有個高級 d 既護士同我地講係咪我地同意媽咪做手術...我地話係...但佢話最終都係睇病人同唔同意...媽咪同護士講好驚...護士話個個人做手術都驚係人之常情...明白既...咁妳做唔做手術丫...好在媽咪話做咋...幾驚...

番屋企途中...家姐打黎話媽咪已經轉左專科病房...太好喇...快 d 做埋個手術...咁就大家都安心喇...

個人無咩心機...同里奧大人又唔知食咩好...但又想食 d 濕濕地既野....所以就食車仔麵喇...最緊要係平嘛...我食左辣魚旦 + 豬腸 + 魷魚 + 生菜 + 米粉 ($21)...里奧大人就食左魚旦 + 牛腩 + 生菜 + 米粉$ (16)...再加罐西柚味汽水...正到痺呀...食完拿拿聲番屋企...因為我實在太攰喇...可能頻頻樸樸同埋又擔心媽咪...真係好攰好攰呀...沖埋涼...睇睇下書已經進入睡眠狀態...非瞓不可呀...

今朝喺巴士度又唔想洽...所以拎本書出黎睇...又 ok 噃...無謂嘥左 d 時間嘛...同埋我覺得朝早睇書會入腦 d...因為咁早唔會有任何野諗嘛...

又係咁...又係要食快哽早餐...食火腿芝士菠蘿包 (走皮) + 涷央 (小甜)...$15...very very 飽....但唔緊...因為要幫媽咪買冬薑...橫掂又無帶飯...順便出去食埋同行下...放下 d 悶氣...
lunch 出去食豬手米加菜 ($18)...其實頭先一路行一路諗食唔食好...想食豬手係因為有骨膠原...但又驚係一隻豬手咁第埋黎...之後又喺度諗 d 豬好可憐呀...第時仲買唔買豬肉好呢??好驚呀...但我又唔想食其他果 d 野喎...終於都鼓起勇氣叫左碗豬手米加菜喇...好在唔係成隻豬手咁第埋黎咋...唔係唔知點算好喇...

食完就起程買冬薑...好黑仔呀...諗住去優之良品買...點知執左...咁退而求其次去百佳買檸汁薑...又係無得買...唔係嘛...搞到我好熱呀...之後諗起附近有間舖係買 d 咸酸濕野...就即刻去買...好在有開咋...即刻買左包冬薑同金桔...但我驚唔好食...所以再去 market place 買多包糖...不過估唔到自己會有收穫喎...就係買左支菜油呀...我搵左支菜油好耐架喇...又唔想特登為左支油去 baking d 地方買...所以頭先買到好開心呀...都唔敢同里奧大人講買左支油呀...唔係又話我顛架喇...山長水遠咁重買支油番屋企...umm...都唔明白人地既...

番到公司又喺度種菇 (悶到發霉)...頭先又行到香汗淋漓...依家好眼瞓呀呀呀呀呀呀...

唉...好煩呀...買唔買 MTR 既 giroro 狙擊風扇好呀??八十蚊呀...見到真身又幾得意喎...但八十蚊太貴喇...都係日日去...睇到厭就唔想買佢就算喇...

2007年9月19日星期三

食棧 @ 大埔

越式拚盆

越式蒸粉包

絲腐乳生菜

尋晚放工即刻去睇媽咪 lu...喺醫院樓下間便利店買d報紙雜誌同日用品比媽咪...cashier 話多謝 $30...好開心啦...以為又有 2 個叮噹 chop...點知原來果間係 OK 黎架...唉...空歡喜一場添...

去到探媽咪果層樓...好奇怪...因為係老人科病房...老人科病房??同埋唔係應該入內科既咩??其實一路行一路都好擔心...因為驚見到媽咪係好無精神同好辛苦咁既樣...好在...見到媽咪都好精神...後一齊傾計...媽咪仲笑到流眼水添呀...真係放下心頭大石咯...然後媽咪又講番因為醫院內科無床位...所以要住老人科病房...之後仲好開心咁話...推佢個嬸嬸話做左咁耐...妳係最後生既一個呀...因為佢推親入黎果 d 都係 80 幾歲老人家喎...咁樣媽咪可能已經開心左成個下晝呀...為媽咪唔鍾意人叫佢做亞婆喎...原來...咩野年紀都係鍾意人讚架...而男人都係一樣...

之後媽咪又叫個工人煮 d 咩咩比家姐食...買 d 咩咩咩...我即刻同媽咪講...妳唔好再諗呢 d 喇下...咁大個人識架啦...唔煮咪出街食囉...唔駛咁擔心架...咁大個人...喺醫院就抖下...由得工人自由發揮啦...佢識煮咩咪煮咩囉...唔駛為呢樣野煩喎....??之後媽咪真係無再諗喎...淨係諗自己聽日想食 d 咩野咩野...咁咪好囉....放鬆嘛....過左陣家姐又黎埋...一齊陪媽咪到 7 點半就走 lu...
走果陣時好鬼肚餓...腦海全部係食物...壽司...車仔麵...燒賣...辣魚旦...牛什河...越南菜...朱古力...不過一坐車個人就好鬼眼訓...me 埋眼想瞓果陣時...表妹打黎...傾左陣...之後再 me 埋眼想瞓時...到家姐打黎...又傾左陣...真係想"洽"下都唔得呀...因為已經差唔多到屋企附近...係時候叫里奧大人落樓一齊食晚飯喇...最後...我都係揀左食越南菜...因為好想食佢果 d 醋...

一入到餐廳...即刻叫左個越式蒸粉包 + 椒絲腐乳生菜 + 越式拚盆....可能真係好肚餓既關係...所以覺得碟菜好好食....之後黎個粉包...又係好好食...因為可以撈醋一齊食...但一見個拚盆就好驚...因為我覺得太多熱氣野同埋太多肉...個拚盆有扎肉 + 越式燻蹄 + 炸雞各 4 件...一塊大豬扒...3 條越南春卷...講真..除左條春卷令我想食之外...其他真係唔想食...因為我好憎食扎肉同越式燻蹄...見里奧大人又唔係點郁...將 d 野 "new" 下 "new"下咁....我就問頭先你有無食小小野等我呀...佢話有呀...淥左個福麵食囉...我即刻話食皇帝蕉嘛...唔好食麵咁飽嘛...之後佢好笑笑口咁話都有食幾隻蕉呀...天呀....咁已經係一個晚餐黎啦...早 d我講嘛...因為本來想叫沙爹...但驚唔夠...所以叫拚盆多 野 嘛...最後咪將 豬 同雞亦比我帶飯囉...太多肉添...但唔帶又嘥...

尋晚真係好攰...沖埋涼睇陣書已經好攰...十點八就瞓喇...一覺瞓天光呀...好開心呢...但點解都係咁攰既...

今朝又係食左個快哽早餐...腿旦治 + 熱央...$14...死啦...又飲咖啡...上左癮添...又係無無聊聊...咁悶...真係一日飲廿杯咖啡都無用呀...晏晝帶左飯...係尋晚食剩既豬扒同雞亦..同埋星期一食剩既炒飯...希望唔會肚屙啦...

之後....又係無野做等放工...

2007年9月18日星期二

指天椒梅菜炒豬肉 + 炒飯 + 蒸茄子 + 酸齋







尋晚放工突然好想食酸齋...同埋驚無咩餸...所以就去左"自家素食"度買左 $10 酸齋同齋鴨腎...其實果度 d 齋麻麻地好食...但無其他選擇...所以算吧啦...

尋晚可以好他條咁買餸呀...因為淨係買蔥同指天椒...不過都好黑仔...因為我喺街尾落車...諗住街頭有得買指天椒...所以行去街頭...點知無...又要行番街尾...喺度行黎行去...之後見到有皇帝蕉...就買左一梳 $10 孝敬里奧大人喇...

唔知係咪星期一既關係...所以做咩都無咩心機...諗住 d 野唔難煮...所以比自己抖 5 分鐘休息先開始煮飯...是日晚餐 : 雜豆菜脯粒炒飯 + 指天椒梅菜炒豬肉 + 蒸茄子...  

其實炒飯 / 蒸茄子 / 炒豬肉都係好易 (因為豬肉已經醃好左)...但...由於所有配料都要切粒粒...所以即刻變左唔易...

首先我將菜脯...蔥...指天椒...蒜頭切粒...再浸下 d 甜梅菜 (其實唔知要唔要浸既...但我覺得浸左會乾淨 d)...由於我喺唔會用菜刀 (我驚切親 d 手指呀...把菜刀一年都唔知有無用到一次)...所以我次次切粒都係用較剪仔剪既...可想而知要用幾多時間呢...

剪哂d配料就開始炒飯喇...將菜脯粒...蔥粒...雜豆加豉油老抽一齊炒...very good 呀...搞掂之後就整梅菜炒豬肉...因為我鍾意食甜既梅菜...所以用好多糖炒甜 d 梅菜...ok 之後再落 4 隻指天椒同埋 d 豬肉一齊炒...試下味...點知辣到條脷痺左...即刻 "new" 番小小指天椒碎出黎 (因為驚里奧大人頂唔住)...之後教慢火炒...由於時間關係...所以我炒豬肉既時候已經煲滾左水....再跟住個蒸茄子既 recipe 做...煮既時候才將茄子切條...因為茄子一早切定會變啞色 (好肉酸)....放上碟再將蒜蓉碎舖面...蒸十分鐘...之後加蔥花...淋 d 熟油再加豉油...一齊搞掂喇...8 點可以開飯...有進步呀...用左一個鐘咋
...

今次對自己既廚藝都頗為滿意...所以就好有信心咁問里奧大人好唔好食呀...里奧大人話好食呀...仲話估唔到 d 茄子蒸出黎白雪雪...又好味喎...又話之得唔買好盒齋啦...嘥左....要夾硬食...因為有好多炒飯...我帶埋飯仲有一大碗剩呀...所以我黎緊呢兩日 lunch 都係食隔夜炒飯架喇...

好攰呀...又好悶呀...因為一食完飯..里奧大人就會即刻入房做功課...之後就得我一個人喺廳度睇電視睇書...唉...呢 d 日子仲要有成年半比我捱呀...

今朝又係好趕...所以食芝腿治 + 涷檸茶...$16....好貴呀...仲要係趕頭趕命食果隻添...因為我唔想成日坐喺公司...好悶啫...喺食早餐既時候....聽到有一對男女 (40歲掛) 對話...個女食油多時見到塊牛油就同男講想要把刀...男就要黎做咩...女就話想查平 d 牛油....男就好悔氣咁話食油多喺咁成舊食架啦...之後個女就成舊咁食喇...果一刻...我即刻諗起里奧大人...因為佢唔會咁對我囉...如果我要 d 咩既話...佢會問要 d 咩...然後就會第一時間舉手叫人攞既...所以果一刻...覺得里奧大人好好呀...


唉...媽咪入左院添...心律不正同肺有 d 水呀...唉...搞到我無哂心機添...好想快 d 睇媽咪呀...橫掂又無野做...

2007年9月17日星期一

牛蒡紅蘿蔔豬展湯 + 煎釀孖寶 + 沙茶醬炒脆肉瓜





尋日十點要起身喇...因為要番教會呀...咁唔想食西餐...所以就同里奧大人去左熟食街市度飲茶...好 relax 呀...食左雞扎 + 燒賣 + 粉果 + 山竹牛肉 + 咸水角...好飽呀...埋單 30 幾蚊咋...真係好平呀...但...可惜去左一間無咁好食既呢...

崇拜完就同里奧大人逛下個冷氣街市...難得里奧大人又陪喎...所以買左好多野...最開心係買到越式春卷皮..泰國青檸..糖冬瓜...因為唔駛特登出九龍城買嘛...hahaha...其實我買糖冬瓜係因為想整千層糕比媽咪食...但成日唔見有所以唔整 (籍口)...依家買到...係咪即係暗示要我快d 整...嘩...行下行下就挑起左我條掃貨筋添...所以買埋 d 屋企附近街市有得買既野...午花茶..酸梅湯包 + 甜麵豉 + 南乳 + 餃子夾...仲想再買其他野架...但...給里奧大人阻止了
...

之後去 jusco 買左 d 雜糧同埋冰皮月餅...其實想自己試下整架...但係無時間同無咩信心...所以都係買番黎好 d...買左里奧大人鍾意食既味道...就係紅豆綠茶同綠豆蓉喇
...

唉...其實一心諗住同埋里奧大人一齊買餸買生果既...但因為之前買左一袋二袋...里奧大人無手再拎...唯有叫佢番屋企先啦...咁等我自己孤零零買啦...唉...生果好重家嘛...係喎....點解里奧大人唔話不如一陣再一齊落黎買野既??


番到屋企又喺時間食晏喇...所以煮左里奧大人至愛丁丁喇...再加埋支檸樂...正正正正呀...


抖左陣就開始煲湯同燉湯 lu...因為個燉盅買左成幾個月...再唔用就比里奧大人鏟到上天花板架喇...死要買又唔用...所以咪燉 d 肉汁比自己補下囉
...

是日晚餐 : 牛蒡紅蘿蔔豬展湯 + 煎釀孖寶 + 沙茶醬炒脆肉瓜...好清好健康呢...我覺得...

今次唔再高估自己煮野既能力...所以 6 點半就開始預備喇首先係切好青椒同茄瓜...再釀鯪魚肉入去 (雲吞麵舖買的)...之後再切埋 d 脆肉瓜...開始煮野喇...我將 d 孖寶一路煎一路加水同獻汁 (因為驚 d 青椒同茄瓜唔熟)...所以比較嘥時間同埋煮出黎果樣比較衰 d 囉...之後就用左紅蔥頭 (切碎) + 蒜蓉 + 一湯匙沙茶醬黎炒脆肉瓜...終於煮好哂野喇...煮餐咁既餸都要成8點先有得食呀...個幾鐘呀...係要作出檢討呀...

ha...里奧大人一見我拎碟孖寶時就話好香好靚呀...咁都有 d 安慰...問里奧大人呢餐晚飯好唔好味呀...話好味話...d茄 瓜索哂 d 獻汁好好味呀...d 獻汁好好味呀...我話 d 獻汁係現成買番黎..唔係我煮架...之後里奧大人嚇到唔咁再出口讚 d 餸...默默咁喺度食飯...之後我再問 d 湯好唔好飲...里奧大人好真誠真摰咁話好好味喎...真係好清甜呀...講真...d湯又真係好清甜喎...所以我決定黎緊都係煲呢隻湯先...橫掂仲有牛蒡剩番喺度...hahaha...


因為晏晝喺 jusco 買左個大壽包...所以就留肚食...雖然唔係好好食...但食得都好開心囉...唔知點解我一見到壽包就好開心同埋好想食佢呀
...

食埋又到時間睇亞蘇....睇完又到時間瞓覺....星期日真係超級容易過呀........


今朝食左走皮既菠蘿芝士火腿包 + 涷檸茶 (小甜)....$15....勁勁飽 + 勁勁趕呀....今朝好忙呀....所以好快就到左 lunch咁....晏晝又係食番尋晚既餸..............咁點都好過出街食既........


頭先嚇死....家姐話媽咪心口痛....心跳得好快....血壓二百幾....嚇到我心都離埋....好在後尾媽咪打比我話無事咋....話可能頭先驚個工人仲未買餸....煮唔切喎....同埋天生係緊張型....無計....呢樣我都信架....因為我都係嘛....好似初初結婚時....煮完飯成日都心口痛....因為驚d餸唔好食....唔係煮d咩喎....獨弧一味係雜豆 or 梅菜炒肉粒 + 咸旦節瓜瘦肉湯....咁都驚餐死呀....所以依家一煮呢兩樣餸就會不期然諗起初初結婚煮飯時既慘痛經歷....點解慘痛??????係因為里奧大人話好悶呀....來來去去都係呢兩味餸呀..