又係元綠壽司

尋晚要去抽血驗 FT4 同 body check...所以已經諗好咗晚餐係簡單炒飯...但去到化驗所度要等等等...搞掂要成七點幾...打比里奧大人又未放工...條街又寒又涷又落雨...真係唔願行去 jusco 買燒雞亦...所以都係唔煮飯出街食喇...


里奧大人於八點九先番到屋企附近...我又想食拉麵...但里奧大人強調首要條件係唔可以距離屋企太遠...所以唯一選擇嘅就係元綠壽司...
食咗中華沙律 + 拖羅手卷 + 炸天婦羅蟹柳卷 + 太卷 + 海蝦天婦羅卷 + 原味日式叉燒拉麵...$125 找數...天寒地涷食壽司都係第一次...
聽聞尋晚新界區得 5度...加上又落雨...真係一路行一路涷到想嘔呀...真係未試過咁涷...所以番到屋企第一件事係叫里奧大人枱個暖爐出黎...開咗真係差好遠呀...記得幾年前用暖爐...開得耐都會覺得熱...但尋晚真係覺得開極都唔係好暖咁...但都好過唔開囉...
尋晚終於可以十一點瞓喇...其實上床瞓覺係好爭扎架...因為張床同張被係超級涷...而里奧大人又未咁早瞓...所以都幾攞妳命... 

      

唔知係咪開咗暖爐無咁涷嘅關係...所以都幾好瞓...今朝食吞拿魚治烘底 + 朱朱力 (15)...居然唔係咁飽...

番到公司都幾忙...但都係唔多想做嘢...
晏晝全公司同同事去仿膳 搞 farewell lunch...公司比錢...仲要食到兩點幾...太好喇!!今次食套餐...有賽磅蟹...小籠包..素菜包...炸膳.雞絲粉皮...雲吞雞...五柳魚...雪菜毛豆等等...最開心係有我最鍾意嘅片皮鴨...食咗兩片...但已經好滿足喇...

今晚仲開心...因為提早同媽咪去食團年飯呀...

鐵板豬仔骨 (黑椒汁) + 海南雞飯 @ 大家樂

尋日為咗煲失敗芝麻糊耿耿於懷...整日嘅心情都好似趺落谷底咁...very down down down...再加上朋友 cc 又忙到唔得閒 msn...無得講我 d 傷心事...又無得問點解佢話佢媽咪煮得好好食...而我煮嘅就

唉...因為濕疹...所以我 "r" 到手指 d 關節位損哂...一彎曲損咗嘅傷口就會裂開...痛到 c...但唔想成日貼膠布無空氣比佢抖抖...所以到我抖抖唔煮飯喇

同里奧大人講好想飲咖啡...佢 say no...再話想食越南菜...點知佢又 say no...係都要去大家樂...我話做咩鬼成日要去大家樂呀??佢話近屋企...想快 d 食完快 d 番屋企做公司嘢喎...唉...咁唯有去大家樂食晚飯啦

唔食得咁多牛...所以退而求其次食豬仔骨鐵扳餐...再加一個我想食好耐嘅海南雞飯...豬仔骨好唔掂...d 肉好林..口感相當恐怖..海南雞 ok..但碟豉油好苦...同埋 d 飯好硬...不過算啦...對快餐店唔可以有咁多要求...
食到好飽...所以圍繞商場一週...經過 jumpingym...真係好想入去玩番轉...但...講過要戒...所以睇人玩下便算...諗起 jumpingym 就諗起以前同里奧大人真係玩到顛...特別係推錢機...食完早餐就玩...玩完食 lunch...番屋企抖下又去玩...玩到食晚飯就停喇...初初用積分玩到嘅只係 d 文具仔...後尾玩到泥足深陷到可以用積分換百佳現金卷...熨斗...調味樽...百醒牌電子探熱針...暖爐...米奇嘅茶杯茶壺套 / 相架 / remote control 架 / 信架等等等等...個個星期都玩千幾蚊咁好唔掂...所以就戒玩喇...
我最感動係有一次我唔舒服...里奧大人就話去 jumpingym 玩...又主動 "唱" 埋 $500 token 比我玩...話見我唔舒服等我開心下喎...依稀記得玩咗無耐就走...因為實在唔舒服要番屋企休息喇...換轉依家呢...入去睇下人玩佢都先下手為強話要戒...唔可以再玩...再 "lur" 呢...就會用極沉重嘅語氣話 : 嘥錢...又話儲錢!! 咩 mood 都無哂啦

番到屋企做下家務...之後就翻熱埋剩餘嘅芝麻糊...由於我將芝麻糊過篩...所以今次好滑又無渣...好好食...勁開心呀

      

 

   

今朝食炸菜肉絲芝士腸出前一丁 + 熱奶茶  ($18)...勁飽...所以晏晝同同事食粉...食豬手米粉 + 菜心...食完落雨...又無帶遮

東菇臘腸蒸雞亦 + 大碌菜心 + 畢生難忘芝麻糊

   

好早已經想整芝麻糊...亦都問埋朋友媽咪點煮...但平時又要煲藥又要滾湯...咁多嘢搞所以唔想整...但又驚唔整唔整就以後唔想再整...所以尋晚下次決心要整芝麻糊做睡前甜品呀

其實之前已買咗一包仔黑芝麻...但唔知幾多份量 (因為朋友媽咪提供嘅係以"兩" 做單位)...所以要再買半兩黎教份量...半兩 $16...檔口 d 人話依家黑芝麻好貴...唔好買咁多...但我無辦法啦...因為我要跟 recipe 嘛

番到屋企第一件用電子磅磅下一兩有幾 gram...之後就續份咁分開...都幾麻煩...
是日懶餐 : 東菇臘腸蒸雞亦 + 大碌菜心 + 畢生難忘芝麻糊
東菇臘腸蒸雞亦 - 雞亦用雞粉醃一晚....臘腸兩條 + 10 數隻小冬菇...由於浸冬菇時間唔夠耐...蒸極都蒸唔 "林"...所以索性掉咗唔 "林" 嘅冬菇...可惜...
大碌菜心 - 1 斤菜心...唔知點解咁大碌...但好甜喎...
畢生難忘芝麻糊 - 以為好簡單...點知同里奧大人食後感就係 "出去食好過" 囉...
跟足朋友媽咪 recipe...係我朋友講得唔清楚 (佢無煮嘢天份) 定係我理解能力有問題呢??應該大家都有問題

(5 人份量)
材料 : 4 兩黑芝麻 + 1 杯米 + 2 湯碗水
做法 : (1) 將米加 1 湯碗水用攪拌機攪勻...待用
   (2) 白鑊炒香黑芝麻...再加 1 湯碗水連同 (1) 一齊搞勻 
   (3) 放落煲煮滾...加片糖 (按自己口味)...最緊要一路煲要一路攪 (因為好易痴底)
    佢有講過 "過篩"...但無講過係邊個 step 做...而我又無問係邊個 step 做...
    淨係懶醒話佢知呢樣嘢係叫 "過篩"...
第一次整結果係衰咗...因為唔知要攪幾耐...淨係叫里奧大人開機攪...我以為米係因為要有口感...所以攪咗 2-3 分鐘就停...個心好期待會煮得好好味...點知一路煮一路攪再試味...天呀...口感係食緊生米同原粒黑芝麻...點食呀...嚇到我成煲掉哂...心都痛埋

第二次結果係好好多...今次里奧大人主動研究點整...所以就稍為改動一下 recipe d 份量...又好好多噃...總之里奧大人話一覺得杰就加水...所以我就一路攪佢就一路加水...之後再落 3 條片糖就攪掂...雖然都有 d 一 pat pat...但都叫做食得落口...仲可以留番 d 第晚食添

呢煲芝麻糊令到我心力交瘁...不過我仲有黑芝...所以我會搜尋大量芝麻糊食譜...務求整到佢最好...
                       
今朝里奧大人北上...一個人搭車壓力好大...因為想瞓而唔敢瞓...今朝想食甜嘢...所以食咗芝腿菠蘿包 + 涷奶茶 ($15)...個包硬個我個頭...難食到爆!!
突然好忙...所以非常開心...但公司廁所麻 mood 煩...成鬼日都爆咸水...要成日行過隔離公司放水 (我公司是合併...所以有個吉單位喺隔離)...好在我唔係懶人 xx 多咋...天寒地涷...經過條走廊真係絕對攞妳命三千...

晏晝帶飯...食完又出去行陣...唔想成日坐喺度唔郁呀...

黑椒炒金菇肥牛 + 隔夜湯

黑椒炒金菇肥牛 + 隔夜湯

尋朝真係好唔願起身...但都要起身...因為要番祟拜...
同里奧大人食燒賣腸粉做早餐...之後就打的去教會...祟拜完又係到街市熟食中心食嘢...食魚旦粉 + 魚旦麵 + 油醬多 + 珍珠奶茶 + 可樂...埋單 $56...又係好滿足咁捧住個肚走...之後再去街市...因為係有冷氣嘅街市...所以好乾淨...我好鍾意...行都行得開心 d...最緊要係唔駛自己拎嘢嘛...尋日最大收穫係買咗兩盒藍草梅 ($30 / 2 盒)...又大粒又甜...真係好難得...之後又買下呢樣買下果樣就走咗...行到半路先記得其實去街市最主要目的係買豬肉同菜...因為果度比較新鮮...

番到屋企又係要大掃除...今次主要清潔係廳...鞋柜...洗手間...雪柜...non-stop 又洗又抹又執...時間唔經唔覺已經到咗七點...又要煮飯喇...
是日懶餐 - 黑椒炒金菇肥牛 + 隔夜湯
黑椒炒金菇肥牛 - 本來想整金菇肥牛卷...但洗牛肉時比我整散哂包唔到金菇...所以索性求其炒就算...但出奇地好味...再配埋珍珠米...真係好味到頂點呀!!
做完嗮嘢...諗住 "灘" 喺梳化睇報紙嘆下...點知隻右手酸痛到不得了...搞到咩心機都無嗮

 

                       
今朝又係超涷呀...早餐要食飽 d...食咗鹹牛治烘底 + 熱啡 ($15)...做埋小小手尾又開始發 mou 喇...悶 c 我呀

晏晝帶飯...食到好飽...所以出去 shiseido 買保濕用品...唇膏...指甲油...又用咗 $890...我覺得好貴...但女人唔護膚唔扮靚又唔得

次次經過投注站都諗起自己買六合彩 d 低 b 白痴嘢...第一係家姐叫我買六合彩...我居然答話都唔仲嘅...唔買...家姐聽完 O 哂咀...講完我都覺白痴...第二就係有次感冒...食藥食到暈陀陀...拎住自己寫咗 no. 果張紙 (我多數係寫低 no. 黎買) 黎對電腦飛...仲好細細聲口震震咁拉住我 frd 隻手講我仲咗六合彩頭獎...我 frd 叫我冷靜 d 先...佢好清醒咁問我對果張紙係咪自己寫 no.果張呀??我如夢初醒咁話係喎...真係白痴到爆...不過以為自己仲咗六合彩果下感覺真係有 d 不能承受...原來係好驚架

火腿絲炒米粉 + 麵辣豉蒸鯇魚 + 青紅蘿蔔海底椰豬骨湯

做咁大陣仗嘅家務...所以會煮 d 比較簡易嘅餸...
是日晚餐 - 火腿絲炒米粉 + 辣麵豉蒸鯇魚 + 青紅蘿蔔海底椰豬骨湯
火腿絲炒米粉  - 火腿切絲..唔知點解次次炒出黎嘅新竹米粉都好怪咁...已經剪碎咗...但炒起黎都係一舊舊...唔似廣東米粉咁樣...所以里奧大人次次食都話古古怪怪...好在今次係最後果包啫...
辣麵豉蒸鯇魚 - 一心諗住用甜麵醬...以為屋企果樽係甜麵醬...點知原來係辣麵醬...激 c...落得多又驚...所以只用兩湯匙...唉...一 d 都唔辣嘅...c 喇...我已經用大量羌絲舖底...但都覺得好腥...我真係開始好怕整魚喇...
青紅蘿蔔海底椰豬骨湯 - 兩條紅蘿蔔 + 一條青蘿蔔 + 半磅栗子 + 4 條粟米 + 海底椰 + 蜜棗 + 南北杏 + 豬骨...包清甜 (我覺得)...

沙爹炒豬肉 + 腐乳唐生菜 + 蕃茄薯仔大眼雞魚湯

尋日里奧大人特登強調話同事話佢臉色差咗又瘦咗喎...所以咪煮餐住家飯比佢嘆下囉...始終成日出街食都唔係咁好嘅
去街市買咗 4 個蕃茄 + 1 個細薯仔 ($5) 同 2 條細嘅大眼雞魚 ($12)...又要趕住煮晚餐 lu...
是日懶餐 :蕃茄薯仔粟米大眼雞魚湯 + 沙爹炒豬肉 + 腐乳唐生菜...
蕃茄薯仔粟米大眼雞魚湯 - 諗住用 4 個蕃茄 + 1 條粟米 + 2 條大眼雞魚黎煲湯實會好甜...所以加多咗水...點知無味嘅...我估應該係 d 蕃茄唔靚...激 c
沙爹炒豬肉 - 呢個餸係跟通少整嘅沙爹豬肉炒芥蘭嘅走芥蘭版...用九龍城泰國雜貨舖買嘅沙爹醬黎炒...真係好正...最緊要係超級方便嘛
腐乳唐生菜 - 超 easy...無難度...又好食
呢排嘅零食係食花生...開心果...焗咗嘅黑豆...因為比薯片有益...又可以止口癢
平時星期五多數 12 點先捨得瞓...因為第日番半日...眼瞓都唔駛驚...但呢排實在太攰...所以頂唔順 11 點半就瞓喇
                 
今朝同里奧大人去 can-teen 食早餐...我食魚柳煎旦拚厚多士配熱朱朱力...里奧大人食牛扒煎旦拚厚多士配熱奶茶...($44)...好耐無食魚柳...所以覺得好好味呀