松子肉丁 (跟風版) + 香草粟米

唉...人減肥我減肥...咁食法唔肥已經偷笑...我都唔敢奢望會減到磅呀

唉...仲有喎...一睇 blog 仲覺得自己未必減到添喎...因為 d blog 友會話... 鍾唔鍾意食野先！鍾意就啱喇 !! 有 d 又話有咩好煮意...等我話你知咁喎...又有 d 話係 food-tour  + 美食 +食譜咁喎...仲有仲有...我又幾鍾意小動物又鍾意紅色...有 d 用狗仔貓仔狗仔做 banner...又吸引到我睇喎...咁唔通唔睇下人地寫咩嘢咩...就係咁...攪亂咗我嘅減肥大計喇

由於未想減肥前已經諗好咗整通少嘅松子肉丁...所以豬肉一早已經醃定...只係買洋蔥 + 紅蔥頭 + 青椒 + 粟米就算喇...依家唔知做咩鬼呢...d 粟米好貴呀...$10 得兩條咋...仲要唔係成日有得買添...唉...之前 $2 條咋...不過唔想食菜...所以貴 d 都要買囉

是日快餐 - 松子肉丁 (跟風版) + 香草粟米
松子肉丁 - 見通少整得好好食咁...所以之前已經買咗一包松子...咁啱屋企又有海鮮醬...唔駛特登去買...咁咪試下整囉...講真...呢個餸都幾方便...只係切洋蔥...紅蔥頭...青椒...蒜蓉咁啫...因為我懶...所以用免治豬肉代替枚頭...我覺得炒松子果陣時真係要好小心...因為中火好快燶...好快變咗啡色咁...嚇到即刻轉細火炒兩炒就上碟備用...不過今次又係做錯步驟...就係將所有材料一齊炒 (包括松子)...今次好好彩...當我整醬汁時記得通少 d 份量係四個人嘅...所以即刻調教番 d 份量...真係要比五個叻比自己呀  (通少 : 你見到松子仁嘛??)


粟米 - 呢一生人最憎係切粟米...其一係要用菜刀...其二係一刀劈落去...彈到周圍都係 d 汁...但...今次唔劈唔得...因為條粟米好肥大...跟本無可能用手拗為兩節...唯有劈開去...諗住逐粒拻啦...又好鬼難拻喎...住哂...一拻就爆汁...把幾火咪用刀劈囉...又真係好鬼方便嘅...但里奧大人食嘅時候問點解有渣嘅??平時無架喎??我都覺得有渣極度影響口感...唔係係咪切得入得滯所以有渣呢??唉

洗洗下碗先記得要 join 做 gym...但為時已晚喇...因為已經 closed

洗完碗就整鹹金桔...之後沖涼...沖完涼真係舒服到不得了...所以好 relax 咁食咗杯 delight yoghurt...再加廿幾粒 blue berry...因為 d blueberry 超級酸...真係擺唔落口...但買咗個幾星期...唔食會變壞嘛...所以加落 youhurt 度一齊食...估唔到又超好味喎...第時都咁食先... 
唔知做咩...呢排好攰...所以十一點就瞓覺喇

            

今朝呢...唔知點解超級肚餓喎...所以食咗芝旦治烘底 + 熱啡 ($15)...超級滿足呢...
唉...瞓矮頸呀...又唔敢叫里奧大人幫手練下條頸...因為一練條頸我會即刻想嘔...唔知點解...所以我做按摩都係叫人走頸...唔係就會好辛苦

晏晝帶飯呀...呢排都無咩點帶飯...差 d 唔記得拎個飯盒去叮添...好在我番工嘅時候...個腦唔係諗上網就係諗食啫...如果唔係真係驚唔記得叮架...
唉...越想減肥就越想食嘢...咁攪法唔得架噃...我公司個柜桶仲有一條三角朱古力同鳥結糖...屋企又有樂家杏仁糖...m & m...魚皮花生...豬肉乾...蝦條...可樂糖咁...要食哂先可以減肥架噃...因為減肥唔可以有咁多引誘....唯有事前做 d 功夫...快 d 食哂去...唉...真係好煩呀

生日中菜

尋日媽咪出院...所以我都安樂哂...個人都放鬆咗好多...在此多謝 blog 友對媽咪嘅問候同祝福獻上感謝...
尋晚放工等車期間...聽到隔離巴士站有男人鬧交...排第一個男人話有人打尖...打尖果個人係地盤佬...企咗喺鐵欄出面...鬧鬧下另一個地盤佬話果個無打尖...話因為上唔到車...所以排番第一喎...唔係嘛...上唔到車咪排番原本自己企緊嘅位囉...點會排第一架...咁個個咁做咪即係個個都要排第一??唔駛排隊啦??不過件事最後係點就唔知喇...因為我啱啱有車...不過點睇都係個地盤佬唔啱...d 人真係不知所謂...
唉...頻樸咗兩晚...又夜瞓...有 d 攰...橫掂生開日...咪出去食飯再慶祝咁囉...於是就同里奧大人去屋企附近嘅迎喜酒家食晚飯喇

食咗乳豬 (例牌) + 西檸煎雞甫 + 海味什菜煲 ....估唔到又食得哂喎...可能我無食到飯...所以食多咗餸...食食下覺得 d 乳豬好鹹...我估係因為唔係連埋飯一齊食...不過唔食飯都好飽...樣嘢好唔抵...就係渣打信用卡有 88 折...我係有...但因為之前寄咗張新...里奧大人又確認咗...但佢又唔比張卡我...就咁話我知就算...無啦啦嗡句嘢...邊鬼個會記得丫...咁...所以我張舊係失效嘅...88 折呀...慳番廿幾蚊都好丫...真係心痛 c 我呀...
等埋單期間...追番里奧大人去和民食嘢 d 錢...睇番張單原來係 $220.8...但我簽咗 $220 呀...因為當時又暗...自己又飲咗兩啖酒...睇唔清楚...以為係 $220...依家攪到我好似呃人咁

番到屋企都搵唔到張新嘅渣打信用卡...抵啦...成日周圍放嘢...仲要屈我擺埋咗...真係克人憎到不得了...我放我實知嘅...因為同一時間寄黎另一張信用卡我放咗柜桶入面...無理由放 d 唔放 d 家嘛...我唔會幫手搵架...等佢自己攪掂啦...呢個係一個好好嘅教訓

唉...又要食番中藥喇...因為之前感冒停咗...依家飲番覺得超級苦呀

         

今朝晨早要抽血...好在唔係好多人...好快抽完...所以可以食咗較為豐富嘅早餐...就係沙爹牛肉麵 + 熱央 ($16)...
番到公司有嘢做...但我唔興一坐埋位就做嘢...我會睇下 blog...msn 一陣...relax 下先可以半投入工作...如果唔係會好無精神

晏晝出去買嘢食...買咗魚肉燒賣 + 炒米粉 ($11)...經過見到煎釀三寶又好想食...所以買咗無咁肥嘅豆腐同青椒 ($5)...飽到想嘔呀 

生日快餐 @ 和民居食屋

尋日雖然係自己生日...但媽咪入咗院...所以都無咩 mood...以前生日就好開心...年紀越大就越過得平淡...最緊要係屋企人同里奧大人陪我食餐飯仔就好滿足架喇...
唉...尋日里奧大人喺我公司附近見客...咁我好開心啦...因為見完可以一齊坐車探媽咪...點知里奧大人唔記得咗約咗我一齊探媽咪...約咗朋友嘆咖啡...攪到我無癮之餘仲有小小慶...但朋友特登約出黎就當然唔可以推啦...所以後尾都係要應約囉

真係估唔到放工突然好鬼大風好鬼涷...因為晏晝 d 天氣似大回南...又熱...幾個鐘就變化咁大...真係估唔到...好在家姐放假...可以早 d 陪媽咪...所以我可以唔駛咁趕...去到醫院見到媽咪終於入病房...環境點都好過走廊啦...又有電視睇...無咁悶嘛...
媽咪好攰要抖下...所以我同家姐就係睇報紙同雜誌囉...媽味抖咗陣就一齊傾下計咁啦...之後里奧大人又黎埋...傾下計咁...7點半就走喇...因為 book 咗 APM 和民食生日飯

幾日前打比家姐...本來唔得閒同我食架...但尋日又話可以...所以我都好開心...因為始終三個人可以食多 d 嘛 ...
一埋位...里奧大人就同家姐一齊舉杯同我講生日快樂...身體健康...d 感覺好得意呀...但估唔到里奧大人咁遲先講囉...一早見到我又唔講喎...古靈精怪...已經無禮物架啦...生日快樂都唔講...真係有 d 唔開心架...我仲已經諗埋如果佢唔講我會點對佢添呀

我哋一齊合力食咗和風 pizza  + 串燒盛合 + 三文魚刺身 + 帶子刺身 + 和民沙律 + 辣辣泡菜炒飯 + 一口豆腐 + 什菌野菜炒 +  一杯 asaki 啤酒...埋單 $220 咋...因為有 $100 生日 cash coupon...同埋有 free drink for bday...食就麻麻地...但好抵囉...今次要自己請呀...因為要和民卡簽賬呀...里奧大人之前話會比番 cash 我...但尋晚家姐大聲多謝我時...佢又博大霧講幾次多謝...衰衰咁...我實會攞番錢架...唔好諗住以為我笑笑口唔出聲就唔駛比番我呀...
和風 pizza - 必叫嘅...個皮又薄又脆...好好食...

帶子刺身 - ok 咁啦...但超級細塊...同相片不符...相片大成陪架...搵笨...

三文魚刺身 - 我無食到...但家姐話唔算新鮮...又係同相片不符...搵笨...

串燒盛合 - 鰻魚 + 帶子 + 雞腎 + 雞肉 + x肉 + 雞翼 - 唔熱嘅...激 c...

和民沙律 - 必食嘅...因為里奧大人好鍾意食...

辣辣泡菜炒飯 - 好食...因為熱辣辣...但份量好小...同埋 d 泡菜小到睇唔到...

一口豆腐 - 難食...又係唔熱嘅...同埋唔係山水豆腐...硬實實...後尾原來我記錯咗我係鍾意食元祿果度 d 一口豆腐...

什菌野菜炒 - 好味..有菇有菜...最緊要係熱辣辣...

番到屋企成十點幾...真係好攰...係咁易掃下地就沖涼...坐多陣就瞓喇...

       

今朝都係好攰...所以令到自己精神 d...就去美心快餐食糯米雞 + 熱啡 ($20)...超飽...好在食咗小小肉同無食隻雞膇啫...如果唔係應該係會食滯唔係食飽...
番到公司都有 d 嘢做下...都好...唔駛發 mo

太開心喇...因為媽咪出院喇...我又可以鬆一啖氣...擔心一個人真係好辛苦...仲會 feel 到自己個心好實添呀...
晏晝去 bank 攪 d 嘢去百佳行下...之後就去 7-11 買咗碗仔翅 + 司華力腸 + 蒜撈麵 ($21.5)...太耐無食...所以覺得勁好味...
頭先搭 lift 見到男同事...咁梗係同人笑下打招呼咁架啦...但佢居然話我笑得好淫邪..omg...微微咀係咁易笑咋噃...都叫淫邪??我好驚架...因為驚佢以為我埋 d 咩嘢 signal 佢就唔好啦...不過真係唔明...我咁樣笑...個個都話我係笑淫淫咁...唉...笑又話淫...唔笑又話我惡...點好呀