住家飯 @ 媽咪屋企 ( 30-jun-2009 )

清蒸青斑加鹹魚

蝦醬炒通菜

絲瓜野生竹笙魚滑湯

金枕頭


黃皮

( 30-jun-2009 tue )

早餐 : 芝士蘑菇雞肉腸片三文治烘底 & 奶茶  



午餐 : 同里奧大人 & 媽咪去美心皇宮飲茶   因為媽咪媽咪煲咗紅棗山斑魚湯呢 

蟹籽燒賣

龍蝦湯鮮竹卷

煎腸粉

乳豬飯

叉燒包

紅棗山斑魚湯


晚餐 : 去媽咪屋企食丫   家姐咁啱唔番屋企食飯   里奧大人就番奶奶屋企食   所以我想陪下媽咪   食完飯   幫媽咪練下腳   之後 join 里奧大人一齊番屋企喇 ~   

芝士焗肉醬意粉 + 粟米蛋花湯 ( 29-jun-2009 )

( 29-jun-2009 mon )

星期一起身係最痛苦   真係好想瞓到自然醒呀 ~

瞓得好都好 d   最慘尋晚瞓得唔好   勁痛苦呀 ~ 

今朝好想食芝蛋治同熱央呀   我已經係要走牛油小蛋   但都覺得好漏 ~ 



番到菇場仲慘   靜到呢   出現耳鳴呀   妳話丫   無得上網嘅話   實有抑鬱症都似 ~ 

晏晝同里奧大人行遠小小食 lunch   不過真係好熱呀   哈 ~ 

放工去超市買嘢   再等埋里奧大人放工一齊買衫   之後就番屋企   一齊放工真係好開心 ~

是日晚餐 - 芝士焗肉醬意粉 + 粟米蛋花湯

芝士焗肉醬意粉 - 唔知點解整唔到紅卜卜顏色嘅   但一樣好好食喎   今次用一整包Mozzarella cheese ( 因為 3/7 到期 )   超正呀   煙煙韌韌咁   又唔覺好漏喎    good ~ 

粟米蛋花湯 - 無買菜   所以用粟米湯頂上 ~  

三文魚扒 + 菜心 + 五香肉丁炒飯 (28-jun-2009)

( 28-jun-2009 sun)

一早諗好要食公仔麵   所以呢朝有得食好開心呢   呢間茶餐廳嘅公仔麵   口感勁似出前一丁架   咁就唔駛特登加 $3 轉丁啦 ~

番到屋企即做家務喇   因為想晏晝他他條條睇報紙嘆下呀 ~

里奧大人依家又 join 番跑步   我就 no 啦   因為平時夜晚跑步真係好趕   買餸煮飯食飯洗碗   樣樣都要快   好緊張   攪到個人仲攰咁   所以我改為夜晚喺屋企做運動就算 lu ~ 

Lunch 同里奧大人食酸辣米線   等食期間聽到有班女仔話食薯條嘅時候   發現有隻 "蚊之" 響碟薯條度   叫個 staff 睇睇   個 staff 話隻 "蚊之" 係飛入黎   唔係炸嘅時候喺度架   咁叫廚房整過一碟妳地啦   最搞嘢係班女仔仲繼續食碟有 "蚊之" 嘅薯條喎   之後老闆娘黑哂面叫個 staff 埋去話   妳應該同班女仔講隻 "蚊之" 點點點   個 staff 又話我都係咁講點點點架   唏   個老闆娘都唔知有無搞錯嘅   呢度係妳地方   更係要負責啦    一碟薯條都咁緊張   頂佢唔順呀 ~

是日晚餐 - 三文魚扒 + 菜心 + 五香肉丁炒飯

三文魚扒 - Jusco 買嘅   我覺得無咁腥   之前喺百佳買果 d 好腥架   搞到我曾經好抗拒三文魚扒呢   今次好有心機煎到金黃色咁   但點解唔脆嘅   噢 ~

菜心 - 見到好靚咁   所以買黎食   估唔到真係好甜呀 ~

五香肉丁炒飯 -  五香肉丁擺咗喺雪柜已經一個星期   估唔到仲未壞   所以用黎炒飯   好惹味呀 ~ 

飯後果 - 車厘子   3 姑奶買咗 5 磅比我地呀   太好啦   正想補血 ~   

日式雜錦拚盤 ( 外賣 ) + 脆皮芝士腸 + 冷麵 (27-jun-2009)

( 27-jun-2009 sat)
噢   今朝好早起身啦   同媽咪去大家樂食早餐呀   之後再陪媽咪行百佳買嘢先番工   爽 ~ 

番到菇場又爽啦   老闆 off 呀   free 到呢   簡直覺得自己唔係番緊工咁呀 ~ 
晏晝同里奧大人去屋企附近嘅譚仔米線 次次食 2 碗都食唔哂   所以今次里奧大人話試過 " 過橋米線套餐 "   兩個人食就 perfert   不過我唔太鍾意咁多肉囉   之後再加個土匪雞翼   熱辣辣超好味   唔知係咪用咗孜然粉醃嘅呢   好惹味呀   但其實我唔知乜叫做孜然粉係點架喎   哈 ~ 

食飽就去買機頂盒   終於有高清睇喇   番到屋企裝完機頂盒就番教會 lu ~ 
6 點 10 分完咗祟拜   心大心細唔知煮唔煮好   但里奧大人話不如去 Jusco 買 d 嘢食   再煮冷麵丫   方便嘛 ~ 
最終去 Jusco 買咗個日式雜錦拚盤   本來想再買 pack 細三文魚   但又無   只得大 pack 嘅   咁就唔買啦   食唔哂嘛 ~

番到屋企即煮麵喇   加多個味僧湯 ( 卡卡送比我嘅台灣手信 )   再煎幾條脆皮芝士腸    咁就可以開餐喇 ~