香茅豬扒湯金邊粉
馬拉盞炒通菜
石榴子冰
( 31-jul-2009 fri )
話咁快又 happy friday 期待放假嘅心情真係好開心呢
番到菇場又係好開心 因為有錢賺 又他條 呢份工真係養到我肥肥白白啊
晏晝同里奧大人去食粉麵 呢個天時真係唔知食乜好 不過食乜都唔緊要 最緊要有杯凍飲呢
牛丸河
炸魚片頭麵
放工同里奧大人去醫院探奶奶 本來話買燒賣比里奧大人食 佢又話唔駛 點知去到醫院話肚餓 去 ok 買咗個杯麵 見佢食我又想食喎 買咗盒 xo 醬蘿蔔糕 毫無味道 食麵粉咁 唉
7 點半就要走喇 又未肚餓 所以番屋企附近先食晚餐 突然又好想食越南湯粉 所以就去食棧開餐喇
( 30-jul-2009 thu )
今朝里奧大人 7 點 8 打比我 話吐露港勁塞車 半個鐘頭都無郁過 所以叫我搭火車好 d 因為唔知塞到幾時喎
好啦 搭火車番工啦 不過就好鬼煩囉 因為要坐 shuttle bus 到火車站 坐完火車又要轉地鐵 轉到頭都暈 要 1 個鐘多 dd 先番到菇場 仲要企足全程 又多人 最鬼憎呀
無啦啦又瞓矮頸喎 成程車拎住個袋 又重喎 真係好想叫人起身比個位我坐呀 噢
食埋早餐先番菇場 不過就要飲凍奶茶囉 再飲熱就會好遲架喇 費事啦 不過覺得飲凍奶茶係無咁提神咁 唔知點解
番到菇場無哂心機啦 條頸痛到顛 慶合合咁好辛苦呀
晏晝無啦啦落大雨 所以同里奧大人臨時改去大家樂 超多人 第時都係去附近茶餐廳好 d 唔駛 sai 時間等位
次次晏晝食飯就會好眼瞓 飯氣攻心好難頂 做乜都無原動力 只係好想番屋企瞓覺
是日懶餐 - 粟米龍脷柳拌豉油王蔥粒炒飯 + 牛油香草粟米
粟米龍脷柳拌豉油王蔥粒炒飯 - 本來想整意粉 但又唔想開焗爐喎 又突然記得有冷飯 所以整咗呢碟飯 個粟米汁真係唔知想點 唔識打芡 就咁用乾蔥蓉 + 雞蛋 + 粟米 加 d 水 再加生粉水 煮嘅時候有汁咁架 但上碟無哂汁咁喎 怪
牛油香草粟米 - 唔想淥菜 因為唔想洗菜摘葉浸菜 好攰唔想攪咁多嘢 所以整粟米算喇 但唔知係咪個人作唔舒服 對住 d 粟米唔係話勁想食 定係開始厭咗呢
飯後果 - 榴槤 街市買 15蚊一 pack 咋 我見好靚咁 摸落又林林地 又平 一於罟黎食 估唔到真係又甜又多肉 食咗幾舊已經飽喇 超滿足呀
發
( 27-jul-2009 mon )
落雨天陰陰 + 唔夠瞓 + 星期一 真係好痛苦啊
我幾趕都好 都會去食早餐 雖然係趕 但總好過番菇場食 一個人坐喺自己位食早餐 感覺好悶啊 同埋番到菇場已經有 d 同事開緊工 我食早餐都唔好意思啦 咁倒不如出去食 遲小小番好過呀
今日媽咪煲咗北芪淮山圓肉杞子山斑魚湯 所以同埋里奧大人又去美心皇宮飲茶喇 飲湯飲到飽 唔想食 叫咗一個餐 ( 2款點心 + 雪菜火鴨燜米 ) 呢個燜米好好味 濕濕地咁 如果自己可以整到咁就發達喇
今晚放工又可以同里奧大人齊搭車番屋企 雖然成日見 但我都覺得好開心啊
是日懶餐 - 蜜糖豬扒 + 涼拌皮蛋 + 菜心 + 蕃茄湯米線
蜜糖豬扒 - 醃咗一晚嘅豬扒 煎香再掃蜜糖 超正呀 呢次係我第一次煮到 d 豬扒唔 " 鞋 " 架咋 唔知係咪因為醃嘅時候落多咗生粉呢 噢
涼拌皮蛋 - 好想食皮蛋 但無尖椒 所以用蒜蓉 + 蔥花 再加麻油 味道都唔錯丫 不過隻皮蛋有 d 怪啊
菜心 - 尋晚食剩半斤嘅菜心 用薑蔥落拌黎食 真係好好味架 好過食蠔油 又貴又無益
蕃茄湯米線 - 雖然都係即食制品 但感覺好健康咁啊
唉 我真係辛苦命 如果屋企有嘢未做呢 我會成日 " 籮籮攣 " 咁 好想快 d 搞掂 同埋唔鍾意做 d 唔做 d 咁 所以呢 尋晚洗完碗就抹地 沖完涼再熨衫 真係有 d 虛脫呀 但唔做又唔安樂喎
做完舒服哂 個人都開心 d 呀 所以食我最鍾意嘅薄荷古古力雪糕黎獎勵自己呀
發