新港明珠海鮮酒家 @ 官塘 ( 31-dec-2010 )

明爐燒味拼盤大斑兩味 - 碧綠炒斑球大斑兩味 - 蒜蓉蒸頭腩紅燒鮑參翅肚羹荔茸鳳尾蝦枝竹羊腩煲田園脆綠蔬當紅南乳吊燒雞 生炒糯米飯精彩甜品 - 合桃露精彩甜品 - 綠豆沙

( 31-dec-2010 fri )
今日 Happy Friday   再加上係 2010 最後一日   心情真係特別興奮呀   因為好期待新一年嘅開始呢 ~
早餐要食飽 d   因為飽 d 個人會精神 d 同埋特別開心 d ~

Holiday Mood 啦   番到菇場無嘢做   更加好想快 d 放工呀 ~ 
晏晝食完 lunch box 之後就落街買嘢   但買唔到嘢添   又好熱喎   唉   無收鑊嘅   之得唔落街啦 ~ 
噢噢噢   仲諗住放 4 點添   原來無得放早   仲要好忙添   不過算啦   好過悶嘛 ~ 
今晚約咗大眼妹一家同埋佢家姐一齊食飯   里奧大人又放 6 點半   所以諗住行一陣   之後再 join 埋里奧大人一齊去   途經街邊檔   買咗梳皇帝蕉   再去食神傳說買咗零食比自己   又買餅乾比里奧大人   點知里奧大人打黎話不如將 d 餅乾直接拎去佢公司   咁佢就唔駛拎黎拎去   咁又係喎   所以我就接里奧大人放工喇 ~ 
今次着 One Piece 又出事啦   里奧大人同事問我地會唔會倒數   我地話唔會啦   佢同事話 " BB 唔捱得夜 "   我仲以為佢知我地早瞓   所以用 BB 黎形容   點知里奧大人陰陰咀笑   話妳知咩事啦   我話我真係唔知喎   佢話同事話緊妳個肚嘅 BB 呀   Oh no   個腩真係大成咁   成日比人誤會   慘呀 ~
7 點準時到酒樓   大眼妹一家又係差唔多時間到   今次我地叫咗半席嘅菜式   我覺得勁有 Family Feel 咁呀   又一齊飲紅酒   呢晚好開心呀 ~
差唔多 9 點半就各自歸家喇   我帶里奧大人搭 Van 仔番屋企   點知搭錯車   我仲同佢講話呢條 Van 仔線又加咗價   點知去到中途發覺路線唔同之前   再望真 d 個牌   原來係另 1 條線嘅 Van 仔   好在可以比我地中途落車咋   唔係都唔知去邊到先可以落車呀   之後再行番附近 Van 仔站   好在唔遠咋   不過已經比里奧大人嘈嘈嘈   我實在太論盡喇   咁都睇錯 ~
2010 年最後一日喇   好想同里奧大人一齊迎接新嘅一年   但我地年紀大喇   要早瞓   又唔想同人迫   舒舒服服喺屋企相親相愛咁倒數仲好啦 ~  

住家飯 @ 媽咪屋企 ( 30-dec-2010 )

蒜蓉金菇蒸帶子

果皮蒸泥猛

海參蠔豉燜排骨


炒菜心花膠紅蘿蔔粟米湯 

( 30-dec-2010 thu )
今朝好似清涼咗   不過有太陽   都唔話好凍咁呢 ~ 
早餐食腿蛋治   其實我唔鍾意食火腿架   不過又唔想食餐肉   鹹牛又肥   芝士又滯   但就咁蛋治又好齋咁喎 ~
菇場又係好 Free   掛住上網   郁都唔願郁咁   所以越坐越凍呀 ~
晏晝同 8 卦去一間新開嘅餐廳食嘢   之後我就買絲襪   叫佢番菇場先   買女人嘢唔方便有男人喺度 ~

里奧大人上咗大陸   我又番媽咪屋企食飯喇   食完飯就同家姐一齊番屋企   我要幫佢搽指甲油呀   我地仲買埋煎釀三寶番屋企食   佢恨食好耐啦   次次都提嘅 ~  

送埋佢搭車我就幫里奧大人買龜苓膏   出一出街就比人點去買嘢 ~ 
我今晚雖然唔駛煮飯   但都好攰   不過見到一機衫未熨   我又唔想堆埋一齊熨喎   連熨 2 機衫好攰家嘛   所以沖個熱水涼   醒一醒神再熨衫   但都係好攰   嘩哈 ~ 

打邊爐 @ 稻香 ( 九龍灣 ) ( 29-dec-2010 )

豚肉 - 上次喺朋友屋企打邊爐食過之後   覺得好好食   所以就 Order 喇
墨魚膠 - 里奧大人好鍾意食架   所以必叫呢   

頂級肥牛 - 打邊邊唔叫肥牛   唔似打邊邊呀 
綠色一藍子 - 菜喎   當然唔小得啦沙爹湯底 - 呢個湯底要 $48   我覺得都幾貴   不過原來都好香沙爹味   加咗 1 次水都仲係好濃味   Good 呀   咁都幾物有所值8 款醬料 - 最鍾意呢   我記得好耐之前去唔知邊度打邊爐   生蒜係要 $10 碟架   不過無又唔好食喎   所以依家可以無限次任添加   真係食得好鬼開心囉 ~左邊係喺養和堂買嘅竹蔗馬蹄水 / 右邊係稻香嘅西洋菜蜜
( 29-dec-2010 wed )
今朝又唔覺好凍咁噃   不過都係要着番件褸穩陣 d ~ 
好想飲即磨咖啡呀   所以又去麥記食早餐喇   不過其實我唔多鍾意幫襯麥記架   覺得佢成日將 d 價錢加 d 加 d 咁樣   好奸咁囉   同埋依家 d 餐紙又薄咗同細塊咗呀   上次聽到有個人係咁講架喇   不過我無用到張餐紙   所以無為意   點知上次里奧大人印薯餅嘅時候又係咁講    唉   無計啦   樣樣嘢都加哂價嘛 ~
番到菇場超開心呀   因為所有高層都唔喺度   想點都得呀 ~ 
晏晝有 lunch box   食完就出去行下   又買咗兩對絲襪   真係無事出街小破財呀   定係女人真係見到咩都想買呢 ~
里奧大人今日 OFF 做功課   佢又記錯咗 d 嘢喎   等我無諗定晚餐煮咩   所以都唔煮喇   去稻香打邊爐算喇 ~
我地飽到反哂肚   去咗商場行一陣先番屋企   番到屋企諗住熨衫郁下   點知 d 衫又未乾喎    無計啦   個天都要比我休息   無理由特登再搵嘢黎做家嘛   係咪先 ~     

鴛鴦腸蒸排骨伴玉子豆腐 + 沙爹醬炒唐生菜 + 甜酸齋 / 齋鴨腎 ( 外賣 ) ( 28-dec-2010 )

( 28-dec-2010 tue )
呢幾日假期朝朝瞓到 10 點幾先起身   今朝要 7 點 45 分起身   瞓小 3 個鐘   真係好鬼攰呀 ~  
今朝好想食甜包   所以食雞尾包   但坐我對面嘅女人食車仔麵   仲要加醋同辣椒油   香到呢   幾想叫佢比兩啖黎食呀   哈 ~
菇場呢排無咁忙   可以偷雞上網   雖然菇場 d 同事好古怪   但唔緊要   因為可以 MSN 同朋友傾計   如果無得 M   咁每一日都好難過囉 ~ 
晏晝有 lunch box 喇   好耐無食 lunch box   都幾有新鮮感呢 ~ 
呢日里奧大人 OFF 做功課   難得佢咁早喺屋企   我放工都即刻趕番屋企煮飯 lu ~
是日懶餐 - 鴛鴦腸蒸排骨伴玉子豆腐 + 沙爹醬炒唐生菜 + 甜酸齋 / 齋鴨腎 ( 外賣 )
鴛鴦腸蒸排骨伴玉子豆腐 - 我覺得呢個餸係懶人首選黎架   今次加埋玉子豆腐   係因為原來 1/1/2011到期   好在比我留意到咋   唔係又浪費呢 ~
沙爹醬炒唐生菜 - 懶呀   唔想炒呀   最多落多兩片薑   我真係好驚拍薑拍蒜頭   次次都唔知飛咗去邊   但見人地拍就好簡單咁   可能我把唔係菜刀啦 ~
( 家姐介紹嘅印尼沙嗲醬   佢話點唐生菜好好味   今晚試咗都唔錯喎   好香花生味   同埋呢隻沙嗲醬有分唔辣 / 小辣 / 中辣 / 大辣   我呢包係中辣   我一 d 都唔覺得辣   但里奧大人話辣喎   怪 ) 甜酸齋 / 齋鴨腎 ( 外賣 ) - 無啦啦勁想食   所以就買喇   不過 d 鴨腎好乾呀   咬到牙到軟埋    唔掂呀 ~  

本來想食完飯出去睇電話   但都係想里奧大人快手 d 做功課   咁樣第時可以成日去街都得啦   好期待呀 ~

韓汁雞翼 + 勁薑蒜炒飯 + 炒菜心 + 牛大力土茯苓豬骨湯 ( 27-dec-2010)

( 27-dec-2010 mon )
最鍾意星期一係假期   咁會覺得呢個星期番工會好快過咁呢 ~
呢朝 10 點 15 分起咗身 lu   同里奧大人 share 一份早餐   之後我就去鴻星等位 lu   感恩呀  一去到有位   但約咗媽咪同家姐 12 點   不過咁都好嘅   好過佢地黎到無位呢 ~

坐正風位   吹正個頭喎   有 d 頭痛   忍唔住打比里奧大人叫佢黎嘅時候拎頂帽比我   估唔到無耐就到呢   仲拎埋頸巾   佢話驚我凍喎   又幾窩心噃   一叫即到 ~

( 椒鹽魷魚鬚 )

( 蝦腸 )
( 鹹菜豬肚湯 )
( 臘味煲仔飯 )

( 粟米雞球粥 )

( 山竹牛肉 )
( 懷舊馬拉糕 )差唔多 2 點飲完茶   里奧大人就番屋企做功課   我就叫家姐車我去千色店買瓦煲   好感恩買到呀   之後家姐再陪我去埋街市買豬展煲湯   咁我就唔駛特登再去屋企附近先買嘢喇 ~

番到屋企都 4 點幾   問里奧大人餓唔餓   佢話餓   但無咩胃口   點知去到大快活就餐蛋麵 + 香草雞翼   咁叫無咩胃口喎 ~

是日晚餐 - 韓汁焗雞翼 + 勁薑蒜炒飯 + 炒菜心 + 牛大力土茯苓豬骨湯
韓汁焗雞翼 - 用韓式醃肉汁醃咗一晚   好好味呀   本來諗住就咁煎   但要焗埋 d 火雞片   所以就開爐喇 ~ 
勁薑蒜炒飯 - 里奧大人話凍嘛   所以整呢個炒飯   我食咗兩啖咋   但佢就話好辣   成身暖哂呀 ~

炒菜心 - 食埋剩餘嘅 1 斤   我又唔識買牛肉   又唔識炒牛肉   如果唔係唔駛齋食菜心咁悶 ~
牛大力土茯苓豬骨湯 - 次次煲湯包都唔記得買紅蘿蔔同粟米   好在食 tea 嘅時候記得要買咋   唔係個湯應該無咁甜呢 ~