住家飯 @ 媽咪屋企 ( 31-mar-2010 )

( 31-mar-2010 wed )

呢排瞓得都唔係咁好   個人好攰咁 ~
早餐都唔想食咁飽   奶醬多算喇 ~


今日有 lunch box   估唔到食完又瞓到喎   雖然得 20 分鐘   但都唔錯   瞓醒都精神咗 d 呢 ~
呢晚番媽咪屋企食飯   里奧大人因為要拎住部電腦同文件番屋企   所以無去食飯   早 d 講嘛   預哂餸家嘛   好在有 d 可以留番唔駛整啫   如果唔係又食到反肚架喇 ~

 

蕃茄芝士海鮮焗長通粉 + 蒜蓉包 ( 30-mar-2010 )

( 30-mar-2010 tue )

星期一喇   不過今個星期一好開心   因為今個星期只係番 4 日   之後連放 5 日   咁多假放   點會唔開心喎 ~ 
今日無帶 lunch box   所以陪里奧大人食早餐   唔駛拎個飯盒真係差好遠架   左一袋又一袋好煩   我又唔會放個飯盒喺袋喎   我覺得整到個袋好污糟咁   萬一漏汁咪好大鑊   如果用布袋咪一路行一路滴汁   咁就真係好樣衰咯 ~
話咁快又到 lunch   買粉果 & 腸粉番菇場食   我鍾意拉開 d 腸粉黎食   咁就成條都有豉油   好味好多呢 ~

呢晚嘗試放慢腳步去買餸   感覺唔錯喎   其實係因為里奧大人放 7 點   所以唔駛咁趕去買嘢   不過番到屋企就一樣要快手快腳整嘢   因為我想里奧大人一番到屋企就可以開飯呀 ~
是日晚餐 - 蕃茄芝士海鮮焗長通粉 + 蒜蓉包
蕃茄芝士海鮮焗長通粉 - 海鮮只不過係急凍魚柳同蝦   都唔錯丫   加埋 3 個大蕃茄 + 1 個紫洋蔥 + 2 塊芝士 + 1 罐細茄膏 + 半包長通粉   估唔到份量都好多   里奧大人又話熱氣   唔想食咁多焗嘢   我咪話焗唔熱氣囉   佢又唔知 up 乜   我話下次你煮喇 ~

蒜蓉包 - 好想食呀   所以特登買 4 塊方包   諗住里奧大人會食   點知佢唔食喎   食完飽到我呢 ~   

苑記粉麵茶餐廳 @ 大埔 ( 29-mar-2010 )

( 29-mar-2010 mon )
尋晚食咗半個榴槤   夜晚熱到呢   搞到瞓得唔好   無哂精神番工添 ~

本來想食奶醬多   但驚唔飽仲眼瞓   所以食扒芝腿治喇 ~


番到菇場仲慘   靜到無倫   最慘係我左右嘅同事成日中眼瞓   睇見佢我都覺得好攰呀 ~

晏晝又 lunch box   唔知點解   晏晝有 d 唔舒服   好反胃   好似作傷風咁   本來整好哂 d 餸   但最後都出街食   加上里奧大人又傷風   我都覺得自己要休息多 d   唔好比細菌打倒呢 ~

呢晚又要食埋 d 蛋糕   依家開始對蛋糕抗拒了 ~

肉絲炒米 + 南瓜紅蘿蔔粟米栗子豬展湯 ( 28-mar-2010 )

( 28-mar-2010 sun )
呢朝 10 點起咗身食早餐 lu   早咗起身 d 時間真係好用好多呢 ~
食完番屋企抖陣   里奧大人去跑步   我就去買餸   煲祛濕茶   拖地   難得咁好天氣又洗下 Cushion 同公仔   攪住香噴噴嘅公仔瞓覺   正呀 ~

唔好講笑   對手真係未停過   所以覺得話咁快就食第二餐咁   今次唔食咁飽   因為留肚食蛋糕呀 ~

里奧大人趕住做功課   食完即番屋企 lu   佢有佢忙   我就睇報紙鬆弛一下先   之後就煲湯同燙衫   燙咗個半鐘   攰到呢   我又唔鍾意分開燙   鍾意一氣呵成喎   望下個鐘已經 6 點 15 分   係時候煮飯   時間過得非常之充實呀 ~   
是日懶餐 - 肉絲炒米 + 南瓜紅蘿蔔粟米栗子豬展湯
肉絲炒米 - 本來諗住午餐肉炒米   但突然間醒起 d 湯有豬展   唔食就掉   倒不如整肉絲   咁好過浪費丫 ~

南瓜紅蘿蔔粟米栗子豬展湯 - 好想飲呢個湯   覺得非常之好味呀 ~

今餐又係唔可以太飽呀   因為仲有蛋糕要食呀   我就食埋榴槤   好香榴槤味   食咗幾粒超滿足呀 ~  

照燒汁野生三文魚扒 + 素鵝扎 + 福字麵 ( 27-mar-2010 )

( 27-mar-2010 sat )

每逢星期六要番工嘅日子   早餐都會食飽 d   如果唔係頂唔到去 tea 呢 ~ 
番到菇場呢   個個唔係玩 FB 就上網睇報紙   真係好期待每個星期六都 off   雖然得半日   但咁樣 d 時間就好用好多   唔駛樣樣迫住星期日做   他條好多架 ~
終於等到放工   同里奧大人去食 tea   之後買埋生果就要即刻番屋企啦   因為約咗 Cable 整機   之前買咗部 DVD 錄影機   但搞唔掂   錄唔到 Cable 節目   所以搵師傅上黎睇睇   又要換個盒   好在終於搞掂   又可以錄鍾意嘅節目   真係好鬼開心呀 ~

搞掂就同里奧大人番教會   見仲有半個鐘先開始   所以就食碗豆腐花先喇 ~



是日懶餐 - 照燒汁野生三文魚扒 + 素鵝扎 + 福字麵
照燒汁野生三文魚扒 - Jusco 買架   無骨嘅都唔錯   加黑椒去醃   不過唔夠時間解凍   所以唯有整碎黎炒   再加燒汁兜勻   估唔到好好味喎   又唔腥   正呀 ~
素鵝扎 - 第一次買黎食   就咁煎香   點泰式甜酸醬一齊食又唔錯喎 ~

福字麵 - 未餓無飯癮   所以就煮麵喇 ~

同里奧大人食完飯就去出去散步   番屋企就食喺教會買嘅花生糯米糍   超好味呀   d 皮好煙韌   又唔厚   d 料嘅份量啱啱好   真係好有驚喜   但里奧大人又唔食喎   隔晚又唔好食   我一個人食哂 4 個   但又唔漏喎 ~

雲桂香米線專門店 @ 大埔 ( 26-mar-2010 )

( 26-mar-2010 fri )

終於 Happy Friday 喇   天氣又好喎   有風又有陽光   所以心情都特別好呀   如果日日都咁嘅天氣就好喇 ~


朝早 d 時間過得好快   眨下眼又 lunch   今日又 lunch box   超方便呀 ~
噢   晏晝 d 時間就難過喇   又靜   再加上飯氣攻心   好想瞓覺   要拿拿聲沖杯茶醒一醒神呀  
呢晚同家姐喺天后做 Research   7 點 15 分 開始   8 點半就搞掂   家姐聲帶發炎   所以無胃口食嘢   咁我就叫里奧大人食小小嘢先   再陪我食米線喇 ~

冬菇蒸雞翼飯 + 欖菜炒脆肉瓜 + 芫茜皮蛋魚片湯 ( 25-mar-2010 )

( 25-mar-2010 thu )
呢朝食早餐要食兩份   因為第一份好唔飽   我比份餐牌老點咗啦   餐牌寫明火腿、餐肉、腸仔   我以為有 3 樣   原來只得 1 樣   咁佢應該 火腿 / 餐肉 / 腸仔嘛   咁我就知係得 1 樣囉   本來想轉另一樣早餐   但睇下份量係點先   點知一睇就知唔夠飽啦   我又唔食蛋黃   加上飲埋熱檸茶   真係覺得無食嘢落肚咁   最後要多份奶油多   咁就啱啱好喇 ~

菇場又好靜呀   靜到有 d 耳鳴   唉   呢 d 氣氛真係好鬼眼瞓 ~
今日 lunch 好開心呀   因為里奧大人特登過黎陪我 lunch 先去見客   人開心真係食乜都好味同零舍飽 d 咁架 ~

呢晚突然想滾湯   所以又要去街市喇 ~

是日晚餐 - 冬菇蒸雞翼飯 + 欖菜炒脆肉瓜 + 芫茜皮蛋魚片湯
冬菇蒸雞翼飯 - 第一次咁整架   扮下煲仔飯   氹下里奧大人開心   佢鍾意食煲仔飯架   不過佢番到黎第一句就話 " 又 A 貨 "   無飯焦唔算係煲仔飯   下次就咁蒸雞就算   唔駛擺到煲仔飯咁喎   噢 ~ 

欖菜炒脆肉瓜 - 今次用欖菜兜一兜   因為唔想蒜頭豆豉同 XO 醬   好似好悶咁 ~ 
芫茜皮蛋魚片湯 - 下火清熱湯   間唔中飲下   成日食薯片都唔驚呢 ~

住家飯 @ 媽咪屋企 ( 24-mar-2010 )

( 24-mar-2010 wed )

今朝陪里奧大人食早餐   開心到佢飛起呀 ~

依家電咗頭髮   所以都會早小小起身整下個頭   因為我嘅頭髮比較薄   所以特登買個 for 電頭髮嘅風筒   咁樣 d 頭髮會鬆 d   睇起上黎會厚 d  ( 索 d )   唔錯唔錯 ~



Lunch 喇   買包波浪薯條番菇場食   一路等 lift 一路聞到香噴噴嘅薯條味呀   哎呀   有人一齊等 lift 咋   如果唔係實拎條出黎咬呀 ~



今晚去媽咪屋企食飯   因為媽咪話買咗新鮮雞喎   可惜里奧大人要幫公司拎 sample   如果唔係可以一齊番媽咪屋企   咁樣我就更開心啦 ~