星悅鮮廚 @ 官塘 ( 30-jun-2010 )

菠蘿生炒骨蜆芥鯪魚球豉椒味菜炒鵝腸南乳花生豬腳

( 30-jun-2010 wed  0.5 A/L )
諗起聽日放假心情都特別興奮呀   早餐食乜都覺得好味咁架 ~


番到菇場就預備心情等晏晝 OFF 陪媽咪覆診 lu ~

媽咪 1 點 45 分要到醫院覆診   所以我放工要飛奔去媽咪屋企附近食 lunch   再同媽咪去醫院覆診喇 ~

咖哩雞扒飯 - 塊雞扒係炸過  好好味呀

感恩 1 點 50 分可以入去睇醫生   傷口又埋得唔錯   今次睇埋大脾傷口   之前果位醫生話千其唔可以搞呢個傷口   如果唔係會生肉牙   所以復康姑娘都唔敢搞呢個傷口   但成 3 星期咁耐   d 紗有痴住哂 d 肉喎   我見到有血添呀   嚇到我腳軟   之後醫生建議喺傷口痴塊 " 龍蝦皮 "   係用 d 蝦殼蟹殼提煉嘅   只係舖喺傷口面   傷口埋哂呢   塊 " 龍蝦皮 " 自然會脫落   同埋如果下下洗傷口會好痛   最大好處就係唔駛任何麻醉藥   只係要上病房做嘅   咁當然好啦    反正媽咪屋企有嘢維修   根本唔番得屋企抖   同埋個傷口真係好痛   喺醫院休息半日好過呢 ~

陪完媽咪上病房我就自己出九龍城行陣   熱到呢   好在有嘢買到咋   仲可以同埋家姐媽咪分享   我就最開心呢   差唔多 5 點媽咪打黎話可以院   好感恩呀   因為我差唔多到醫院嘛   同埋媽咪話整完個傷口無咁痛   唔駛包紮咁大塊紗布舒服好多咁呢   今次真係好感恩   個醫生非常非常之好   又細心   如果個個醫生咁嘅態度對病人就好啦   唔駛食藥都好番呀   最憎 d 醫生成日下下嚇人 想唔驚到病都幾難喇 ~

呢日里奧大人又上咗大陸   所以得我同媽咪   家姐同姐夫一齊食飯   食完再上媽咪屋企坐陣就走 lu ~ 

芝士焗肉醬意粉 + 蕃茄薯仔排骨湯 ( 29-jun-2010 )

( 29-jun-2010 tue )
今朝遲咗出門口 + 小小塞車喎   真係邪呀   唔遲唔塞咁嘅   好在今日天氣好好   終於有陽光   唔係落雨仲塞得犀利呀 ~
我好鍾意食粉果架   不過唔鍾意有豬肉碎   如果就咁係菜甫 + 沙葛就好啦   加埋豉油辣椒油一齊食   umm   超滿足呀 ~
 

喺菇場無嘢做就諗下嘢咁啦   諗下唔駛做嘢又幾好   可以幾時起身就起身   但係覺得唔做嘢又好似無細藝喎   朋友又番工   我又唔會喺屋企上網嘅   最多陪里奧大人或者屋企人 lunch   成日一個人行街又唔想喎   諗諗下都係番工好   可以賺錢   可以消磨時間   又識到 d Blogger   真係唔錯喎   最感恩係我上司非常非常非常之好人囉   我以前公司無咁架   所以同朋友講起都覺得自己好幸運好感恩遇到個好上司   所以我要努力工作呀 ~ 
噢   發完夢要回歸現實諗下晏晝食乜 lu   勁想食南瓜   所以食兩餸飯   就係南瓜 + 炒青瓜   味道唔錯喎   如果配埋糙米就更健康   不過果度得白飯供應呢 ~


成個星期無煮飯啦   係時候要煮喇   煮飯對我黎講唔係一個責任   只係想自己同里奧大人有餐健康 d 嘅晚餐   餐餐出街食嘢實在太無益喇 ~
是日晚餐 - 芝士焗肉醬意粉 + 蕃茄薯仔排骨湯
芝士焗肉醬意粉 - 材料 $5 瘦肉 + 1 個大紫洋蔥 + 1 個小蕃茄 + 芝士碎 + 調味料   嘩   今次里奧大人話好味喎   仲話下次要多 d 芝士仲好味   點解咁架   之前又話太多好漏   依家又嫌唔夠   不過唔理啦   最緊要佢覺得好食   其實我覺得係今次整得比平時細咗一半   佢覺得唔駛夾硬食哂   所以咪好食囉   因為佢次次一見我整一大盤佢就驚定先   驚要食哂嘛   哈哈 ~ 
   蕃茄薯仔排骨湯 - 材料 3 個大蕃茄 + 1 個中薯仔 + $10 排骨   今次時間關係   所以煲咗半個鐘   但都好好味呀 ~

雲桂香米線專門店 @ 大埔 ( 28-jun-2010 )

重慶酸辣粉 ( 小辣 )
豬腩肉小鍋米線 ( 小辣 )
蒜泥白肉 
( 28-jun-2010 mon )

尋晚睇完波興奮得滯瞓唔着呀   德國 vs 英格蘭 4:1   真係令我非常超級振奮呢 ~

由呢日開始   我決定唔飲奶茶   同里奧大人講如果我兩個月唔飲奶茶   佢要有實際獎賞比我   佢應承就得啦   我會下定決心的   如果想飲點算好呢   但又唔可以犯規   就係叫佢飲   痴佢兩啖   佢話都得嘅   咁就皆大歡喜啦 ~ 
早餐食炒米粉 + 熱檸茶   飲檸茶感覺好似好消滯咁架   唔錯 ~
亞 Head 就好啦   放假放到 7 月中先番   我都好架   無人管   不過我好自律呢 ~

差唔多 lunch 嘅時候又倒水咁   好在今朝帶定福麵   反正無乜胃口   求其算喇   最緊要方便 ~
終於放工喇   要同家姐去超市睇嘢   所以順便去超市買餸   行下行下   行到無 mood 煮喎   所以番屋企等里奧大人放工再去街食算 lu ~

番到屋企無乜細藝   咁就熨衫啦   熨完時間啱啱好   同里奧大人去食酸辣米線喇 ~

今晚睇荷蘭 VS 斯洛伐克   悶到呢   未完場要瞓喇 ~

炒飯 + 粟米蛋花湯 ( 27-jun-2010 )

( 27-jun-2010 sun )
今朝瞓到 11 點半呀   里奧大人仲入黎揭開我張被   以為我乜事瞓咁耐喎   如果唔係佢入黎    我都仲可以瞓呀    因為我唔知原來已經咁晏 ~
唔知點解   假期要同里奧大人食早餐先覺得係假期嘅感覺   一個星期一日咋   所以我好期待架   所以叫佢快 d 去餐廳攞位   感恩我地係 last two ~

食完番屋企又 hea 喇   個人真係好鬼攰   攰到真係有錢都唔願執果隻喎 ~  
落好大雨呀   唔想出街   叫外賣 tea 啦   如果好人好者叫 tea 好似好懶咁   但今次唔多舒服叫 tea 又覺得好應份咁架喎   飯來張將口正呀   哈哈 ~

夜晚有番 d 精神   所以煮飯啦   將尋晚食剩果 d 餸同白飯炒埋一堆   唔錯架 ~ 
是日懶餐 - 炒飯 + 粟米蛋花湯
炒飯 - 將 d 椒鹽豬扒切粒再加白飯去炒   加 d 乾蔥碎   話咁快就有一碟好好味嘅炒飯呢 ~ 
粟米蛋花湯 - 菜都懶買呀   所以整粟米湯算喇 ~ 
我煮完就話 : " 好喇   食久違了嘅住家飯喇 "   點知里奧大人係度大笑喎   話呢 d 叫住家飯 ?!?!   係得我先嗡得出口喎   oh   我覺得喺開火煮嘢就叫住家飯架喇   同埋我真係煲咗罐頭粟米湯喎   唔係外賣架喎   真係丫 ~

明新焗飯小廚 ( 外賣 ) @ 屋企 ( 26-jun-2010 )

( 26-jun-2010 sat )
今朝要番工   瞓晏小小起身   估唔到無遲到喎   唉   又無胃口食早餐 ~

大粒全部唔喺度   不過我好攰   都無 mood 上網呀   只想快 d 番屋企 ~ 
放工即走啦   番到屋企有胃口喇   叫里奧大人買麥樂雞番屋企食   熱辣辣脆卜卜好正呀 ~

今晚唔煮啦   真係要休息呀   叫外賣算喇   3 餸 1 湯 2 白飯   夠哂皮啦   本來好想食嘢架    臨食之前大食表妹打黎勞勞嘈嘈咁講嘢   搞到我無哂 mood 無哂胃口   雞同豬扒剩番哂喺度     之得唔聽佢電話好過啦   激鬼氣 ~    

脆肉瓜炒魚片 + 芫茜皮蛋魚片湯 ( 23-jun-2010 ) + ( 24 & 25 jun 2010 )

( 23-jun-2010 wed )
早餐又食吞拿魚烘底    喺呢間茶餐廳度食早餐   唔知點解無人叫扒類嘅呢    食下好嘛    等我睇下個賣相掂唔掂  好唔好食都好丫   喺度成日食包同粉麵真係有 d 悶 ~
晏晝又同 8 卦出去 lunch   今次試間新開張嘅餐廳 點知一致通過係唔會再翻單    d 飯超 "林" 呀   仲話炒飯添 我平時炒得都唔乾身架   不過都無佢咁 "林" 咁難食囉 ~

落雨絲濕去街市真係好煩   應該唔係我一個咁樣諗啩 ~  
是日晚餐 - 脆肉瓜炒魚片 + 芫茜皮蛋魚片湯
脆肉瓜炒魚片 - 唔知煮乜好   又唔想又洗又浸   呢個餸真係唔錯   有瓜有肉   一碟上枱   可以洗小隻碟 ~   
芫茜皮蛋魚片湯 - 呢排睇波   比平時遲瞓咗個幾鐘   對我黎講十二點先瞓係好遲囉   煲 d 下火湯   希望降下火啦 ~ 
( 24-jun-2010 thu )呢日每月一到喎   痛就唔係好痛   不過周身唔舒服囉   成日中中中   好在中到放工知醒啫   番到屋企即沖熱水涼   舒服好多呢 但無胃口食嘢   全日無食嘢呀   好在無胃痛咋   暗喜啦 ~ 

( 25-jun-2010 fri )尋晚瞓得唔好喎   又赤赤痛   買咗杯熱菜蜜飲   平時可以飲哂成杯架   因為熱熱地好舒服   點知今次飲到一半超想反胃呀   好甜呀   唉 ~ 
今次衰喇   終於胃痛喇   不過呢   好在老闆 off   我又可以瞓足一日   又係瞓到放工啱啱醒    勁呀 ~ 
今晚有胃口喇   叫里奧大人買淨酸辣米線比我食   酸酸辣辣好開胃呢 ~  

住家飯 @ 媽咪屋企 ( 22-jun-2010 )

薯仔餅

煎紅衫魚
白切雞 / 叉燒 ( 外賣 )
炒芽菜冬瓜薏米瑤柱湯
西瓜
荔枝

( 22-jun-2010 tue )
今朝超熱呀   就算呢排好焗   我行去巴士站都唔會出汗   個身仲爽架   點知今朝一去到巴士站呢   不斷咁流汗   幾想再番屋企沖多次涼呀 ~

熱呀熱   本來想飲凍嘢架   不過忍下口   飲番熱嘢   最多慢慢灘凍 d 飲呢 ~


菇場凍到震呀   見到 Partner 係咁中   中到我都想瞓埋一份呀 ~ 
Lunch 同 8 卦出去美心快餐食   今次好想食六寶   平時好小自己食一碟呢 d 飯架   覺得啖啖肉   但唔知點解今次好想食囉 ~


里奧大人呢日上咗大陸   我又想見下媽咪   所以自己番媽咪屋企食飯   叫里奧大人自己食   比 d 時間佢 free 下咁啦 ~  
( 隻肥寶瞓到 me 實對眼   瞓得好林咁呢 )
 

雲吞蟹籽丸米線 + 唐生菜 ( 21-jun-2010 )

( 21-jun-2010 mon )

今朝有 d 攰   不過好在飲鴛鴦都可以提神   唔係都幾難捱到今日咯 ~


依家細老闆喺度個個都照上網 lu   精神食糧黎家嘛   唔係個個中眼瞓仲慘呢 ~ 
晏晝有 lunch box   我會幫人整埋保鮮紙   一開飯盒就知道邊個係男同事   邊個係女同事   因為女同事果 d 比較整齊   男同事果 d 好似打完風咁   好似一大堆唔同嘅食物炒埋一齊   真係睇見唔想食囉 ~

終於等到放工   好鬼攰呀一樣   所以煮米線算喇   最緊要快   唔好阻住睇波 ~
是日懶餐 - 雲吞蟹籽丸米線 + 唐生菜
雲吞蟹籽丸米線 - 雲吞買比里奧大人食架咋   我就食蟹籽丸   因為我好想打邊爐   我覺得食蟹籽丸好有打邊爐感覺呢 ~  
唐生菜 - $5 / 2 棵   又幾靚仔   浸兩浸就淥得 ~

難以置信葡萄牙大勝北韓   7 比 0 呀   不過我睇波唔係睇腳法   最緊要有靚仔   同埋係我識嘅球員   唔係睇得唔過癮呢 ~

茄汁洋蔥豬扒 + 節瓜淮山螺頭豬展湯 ( 20-jun-2010 ) + 跑步

( 20-jun-2010 sun )
今朝瞓到 9 點半醒 lu   勁想食糯米雞   所以就去大家樂喇   如果 10 點起身就唔得架喇   好多時去到都係得番魚柳   唔係自己想食果 d 囉 ~

食完番屋企抖陣又跑步   今日唔知係乜誕    又見到好多龍頭龍尾    睇見佢地成頭汗都替佢地辛苦呀 ~
同里奧大人食完 tea 就要番屋企煲湯喇   搞掂再睇碟   里奧大人一路睇碟又一路食 cake   好有食力咁噃   不過無計啦   我又唔食嘅   隔日食唔好食嘛 ~

今晚 6 點開始煮飯   6 點 45 分開飯   唔駛一個鐘我已經覺得好快架喇 ~  
是日晚餐 - 茄汁洋蔥豬扒 + 節瓜淮山螺頭豬展湯
茄汁洋蔥豬扒 - 酸酸甜甜都幾醒胃   又可以帶飯喎   幾好丫 ~  
節瓜淮山螺頭豬展湯 - 3 個大節瓜 + 12 粒淮山 + 2 個螺頭 + $15 豬展 + 3 粒蜜棗   呢個湯係睇 Blog 學番黎架   我覺得唔錯   因為有瓜有湯   唔駛特登再煮碟菜呢 ~ 
食飽就坐梳化睇下波啦   里奧大人就睇報紙   睇今屆世界盃都幾辛苦   因為比當地人用傳統樂器唔知乜乜   嘈到成日都聽唔清楚旁述講乜   睇睇下我聽到旁述講呢個球員幾廿年黎都踢得幾好   佢個樣又老老地   我又諗緊最多咪踢廿幾年   已經好勁啦   但如果踢幾廿年又覺得無乜可能喎   無耐又講多次個名 ( 我無留意   因為仲諗緊呢個問題 )   里奧大人大笑話唔係幾廿年黎   係 " 基也年尼 " 呀   嘩   聽完之後我都笑呀   發音咁鬼似嘅 ~