擔擔麵醬蝦仁炒飯 + 節瓜豬橫脷湯 ( 30-sep-2010 )

( 30-sep-2010 thu )番埋今日就連放 3 日   真係超級勁 Happy 呀 ~   今朝清埋包 Special K   唔知係咪 happy 得滯   覺得唔多飽   所以買咗燒賣番菇場食   早餐唔飽個人好易眼瞓架 ~


番到菇場又係忙   不過一定要搞掂哂   唔鍾意拖咁耐呀 ~

晏晝去美心快餐食六寶飯   因為有 Cash Coupon   唔駛錢食飯嘅感覺真係好好呢 ~

里奧大人要開會   又唔知開幾耐喎   所以上媽咪屋企坐陣   飲碗湯   仲可以拎埋比里奧大人    又食埋媽咪自己醃嘅酸薑   真係 very very very good 呀 ~

是日懶餐 - 擔擔醬蝦仁炒飯 + 節瓜豬橫脷湯擔擔醬蝦仁炒飯 - 因為要清醬呀   但估唔到用擔擔醬炒飯又幾惹味噃   仲有小小醬剩   炒多次飯就會清哂樽醬   唔浪費真係好呢   呵呵 ~   節瓜豬橫脷湯 - 真係好感恩   因為今晚我無諗過煮菜   咁啱媽咪又煲咗節瓜湯   實在太好啦 ~  

節瓜鹹蛋肉粒湯飯 ( 29-sep-2010 )

( 29-sep-2010 tue )
尋晚食壽司飲咗茶   成晚眼光光   碌黎碌去都瞓唔着   又瞓下醒下   辛苦到呢 ~ 
今朝食芝腿治   嘩   滯到呢   肯定晏晝都食唔落呀 ~
番到菇場忙到呢   簡直連洗手間都懶得去呀   係咁做做做   做到 lunch time 要停下喇   又未餓   所以出去行下   順便買沙律番菇場食喇 ~ 
忙呀忙   忙到 3 點幾就忙完   之後腰骨痛到呢   痛到標哂眼水呀   可能坐得太耐無乜郁   加埋尋晚瞓得又唔好喎   真係行又痛   坐又痛   企都痛呀   陰公 ~
點痛都好啦   都唔可以搵藉口唔煮飯嘅   呢排里奧大人都無餐住家飯食   好可憐咁   所以係咁易求其煮啦   好過出街食嘛 ~ 
是日懶餐 - 節瓜鹹蛋肉粒湯飯
節瓜鹹蛋肉粒湯飯 - 都唔知整過幾多次 lu   不過我覺得次次都整得好好食   哈 ~
沖完涼即叫里奧大人幫手按摩下條腰   唔係人都顛呀   雖然我搽咗安美露   但係比佢按完之後真係舒服好多囉 ~

爭鮮迴轉壽司 @ 九龍灣 ( 28-sep-2010 )

( 28-sep-2010 tue )
今日終於有精神番工喇   仲有小小胃口食早餐   算唔錯架喇 ~


喺菇場 hea 住做嘢   無乜力呀 ~
晏晝其實無咩胃口   但唔食又唔得   最後買咗沙爹牛肉米粉番菇場   買咗唔想食   唯有迫自己食啦   唔通掉咩 ~
 

里奧大人上咗大陸   夜晚都係決定唔煮喇   等埋佢一齊去食壽司   唔知點解每月一到果幾日特別想食壽司   次次都係咁架喎   怪 ~  

吉野家 @ 九龍灣 ( 25-sep-2010 ) & ( 26 to 27-sep-2010 )

( 25-sep-2010 sat )
呢朝又同埋媽咪 家姐飲茶   真開心 ~

晏晝同里奧大人 大姑奶一齊去大快活食 tea   食完就各自歸家   估唔到我可以瞓到晏覺   咁我真係好攰呢 ~  

都係唔好煮飯喇   所以去吉野家試下牛肉火鍋   我覺得都 ok   不過里奧大人就唔鍾意個芝麻醬   話好漏   同埋話鍾意蕃茄湯底   咁即係下次唔會同我食囉 ~   
( 26-sep-2010 sun )

每月一到   好在今日係星期日   可以瞓足成日呀   里奧大人自己三餐搞掂   佢就開心啦   有得食辛辣麵 + 豬肉乾   因為我講過一星期只可以食一次麵   佢見我唔舒服無力話佢   佢就得得戚戚咁   夜晚佢應該食叉燒飯啦   因為我次次一聞到 d 叉燒飯就超級無敵勁反胃   搞到我即刻狂搽白花油呀 ~

( 27-sep-2010 mon )

今朝個肚仲係痛痛地   所以請假喺屋企休息   瞓到夜晚先去睇醫生   之後里奧大人番到屋企   佢居然又自已煮辛辣麵   仲懶慘話唔知食咩好添   真係丫 ~ 

梅菜蒸肉餅 + 菠菜 ( 24-sep-2010 )

( 24-sep-2010 fri )

終於 Happy Friday 喇   咁開心   咁當然同里奧大人一齊食早餐慶祝一下先啦 ~

晏晝 lunch box   食完上網   都唔錯啦 ~ 
放工去買餸   街市熱到暈   如果所有街市都有冷氣就好喇 ~ 
是日懶餐 - 梅菜蒸肉餅 + 菠菜
梅菜蒸肉餅 - 好耐無整呢個餸喇   真係簡單又好味呀 ~ 
菠菜 - $12 斤都幾貴   不過食下唔同嘅菜就無咁悶囉 ~ 

煎野生三文魚柳 + 煎雜菜餅 + 菜心 + 豬腳薑 ( 23-sep-2010 ) + 跑步

( 23-sep-2010 thu )
今日假期   同里奧大人瞓到 10 點就起身 lu   又去 KFC 食早餐   因為里奧大人好小去 KFC   等佢無咁悶 ~  
( 芝士雞扒包 )( 秘制醬汁雞扒包 )

食完就去買嘢   之後諗諗下不如一齊剪髮   好在唔駛等咋   剪短頭髮真係無咁熱   超爽呀 ~ 
晏晝自家煮   好過出去食   因為都唔知食乜好 ~
( 韭菜蝦肉餃米粉 )( 韭菜蝦肉餃辛辣麵 )

難得今日可以做運動   所以抖陣就出發喇 ~
是日懶餐 - 煎野生三文魚柳 + 煎雜菜餅 + 菜心 + 豬腳薑
煎野生三文魚柳- 今次好有心機煎    完整無缺咁上碟   good 
煎雜菜餅 - 唔知煮咩好呀又   所以開冰箱睇有乜就煮乜囉 ~  
菜心 - 今期 d 菜心都幾甜   呢包菜心喺百佳買 $ 8.1   佢地半磅差唔多 $12   其實唔知係咪同街市差唔多嘅呢   如果超市用斤做單位就最好啦   咁就可以同街市比較下嘛   我最怕計數架 ~  
豬腳薑 - 媽咪之前煲架   我寒底   所以間唔中食都唔怕   唔食 d 肥膏就無問題啦 ~  

小草屋 @ 將軍澳中心 ( 22-sep-2010 )

( 仲有 4 碟無影呀   費事佢地又問影黎做乜   麻麻煩煩 )
( 22-sep-2010 wed )
今日超開心啦   聽日放假喎   唔開心先奇呀 ~
早餐去 KFC 食   因為有 Coupon   只係 $13.8 咋   我覺得一份早餐唔過 $15 都好抵囉 ~  

無啦啦又好忙   好在無影響到我嘅 holiday mood 啫   呵呵 ~
突然好想食公仔麵   所以買沙爹牛肉麵做 lunch   我覺得好似食緊早餐咁 ~ 


今日放 4 點   不過要番咗屋企先再出去   因為要幫家姐去超市掃飲品   之後再 join 里奧大人一齊去將軍澳   同佢屋企人做節呢 ~   

住家飯 @ 媽咪屋企 ( 21-sep-2010 )

( 21-sep-2010 tue )
仲以為尋晚會打硬 8 號風球   點知 11 點幾話 8 號風球機會唔大   幾咁失望   所以我覺得今日要番工係好似額外番咁呀   哈 ~ 
今朝試下另一間茶餐廳嘅早餐   估唔到都幾大份   個餐包要留番做 lunch ~
忙到 12 點   再上下網就好快食 lunch 喇 ~
今日唔知點解   覺得 d 時間過得好慢   應該係有超強勁 holiday mood 所致呀 ~ 
里奧大人上咗大陸   我就番媽咪度食飯   再拎湯比里奧大人飲   咁我又可以煲小一晚湯   無咁辛苦喇 ~