仿膳飯莊 @ 九龍灣 ( 31-oct-2010 ) + 紅豆沙

( 31-oct-2010 sun )

今朝約咗里奧大人朋友一齊番教會   所以都要早 d 起身食早餐   費事遲到嘛 ~ 

崇拜完畢都 12 點幾   我地唔餓   朋友又唔餓   最後都係各自歸家   不過我睇埋中醫先番屋企   今次試下同仁堂   等咗半個鐘先有得睇   結論又係血氣唔夠   真係要做多 d 運動先 ~
睇完都兩點喇   順便食埋 tea 先番屋企   星期日真係無乜電視好睇   所以我又熨衫   之後再煲埋紅豆沙   記得之前第一次煲到燶哂   今次我好有心機煲   因為我無瓦匙更   成日出出入入廚房都好攰   但   皇天不負有心豬   終於比我煲到我認為好好味   但比較甜咗 d 嘅紅豆沙   果下真係感動到想叫阿娘呀喂 ~

煲完都差唔多要出發食飯喇   今次係同埋姑奶 & 2 個兒甥女一齊食呢   之後里奧大人就話買衫比佢地   買完就番屋企 lu ~ 
番到屋企就食紅豆沙   里奧大人都話好味   不過甜咗 d   我話天氣乾燥   甜小小對皮膚係好 d 架   我無呃佢   真係咁架喎 ~

芝士腸什豆出前一丁 + 流浪影子卜聚 @ 沙嗲王 ( 30-oct-2011 )

( 30-oct-2010 sat )
今日係 OFF   因為要清埋果半日 A/L 呀   咁請星期六就最好啦    同里奧大人10 點起身食早餐   之後就同埋姑奶佢地去掃墓喇~





今日本來 plan 好晏晝去針灸   晏晝就同家姐 lunch   點知家姐打黎話唔同我地食   但最驚喜係馬來西亞朋友 流浪影子 今日晏晝得閒   所以就約我喇   難得佢黎香港   我都唔去針灸 lu ~

出到去差唔多 2 點半   我地約咗旺角某餐廳等   不過我同里奧大人都搵唔到   所以最後要影子同小寶接我地呀   真係唔好意思啦   最搞笑係居然要來自馬來西亞嘅朋友接一對土生土長喺香港嘅朋友   真係對唔住呀 ~
不過咁又幾好喎   錯有錯着   因為我覺得旺角真係無乜好食   咁啱我等嘅地方就喺沙爹王樓下   咁我地一致都認為 ok   因為可以坐耐 d 無人趕嘛 ~
今次再見番影子同小寶   真係好有老朋友 feel 呀   同第一次怕怕羞羞咁相認嘅感覺差好遠呀   之前點都要扮下斯文唔好嚇親人嘛  ( 因為我唔想影響佢地對香港人嘅印象   哈 ) ~
坐低第一件事就係影子比手信我呀   就係佢地嘅地道江魚仔   即場試咗兩條   口感同泰國果 d 差好遠呢 ( 多謝影子   多謝妳嘅細心   啜 )
里奧大人發板 order   好在只有其中一樣有肉類咋   佢唔記得影子唔食肉呀   今次嘅食物水準都唔錯   但就一樣係好快黎哂囉   好似影完一碟之後   又要影第二碟   第二碟未影完就三四五碟咁拎黎   又係一枱食物   今次我唔客氣喇   餓嘛   再加上今次唔理儀態用手食嘢   又一路食一路講   真係 very 開心呀   加上小寶同里奧大人今次都好多嘢講 ( 多過我同影子 )   我覺得氣氛好好呀 ~

   
之後我地陪影子買 SD Card   最緊要係話佢地知越入越平   我地 4 個人   每人記一間價錢都唔難   不過最慘係間間差唔多樣咁   好在真係最尾果間係最平   如果係中間其中一間就難記 d 喇 ~ 

好似差唔多 6 點就走人喇   我地喺地鐵站道別   雖然之後應該會再見   但我都有 d 唔捨得    同埋見到佢地迫入地鐵車廂   我都覺得佢地應該好唔慣咁迫   不過唔緊要啦   體驗下香港人嘅生活嘛   哈哈 ~
番到屋企有 d 攰   里奧大人就瞓咗半個鐘   我就唔瞓喇   驚一陣瞓咗夜晚瞓唔着仲慘呀   本來想出街食   不過我又唔願出   最後都係煮出前一丁喇 ~ 
是日懶餐 - 芝士腸什豆出前一丁
芝士腸什豆出前一丁- 今次食 Johnsonvill 嘅 Beddar Cheddar   第一次食咋   估唔到真係好好味   不過煎嘅時間比較耐   下次都係焗好 d   最怕 d 油彈到周圍都係呀 ~
夜晚咁 heavy 喎   當然要燃燒 d 脂肪啦   做家務就最好啦   拖地熨衫呢兩樣嘢真係同做跑步機無乜分別架 ~ 

臘腸蒸排骨 + 菜心苗 ( 29-oct-2010 )

( 29-oct-2010 fri )
星期五喇   非常之開心   今朝係喺屋企食 K 做早餐   因為尋晚太飽喇 ~ 
菇場又忙   真係無乜時間上網   所以晏晝買廈門炒米番菇場食   一路食一路上網   把握時間呀 ~
忙咗成個星期   聽日又 OFF   其實真係無乜 mood 煮飯   但唔煮又好似好衰咁   所以求其蒸排骨算喇   話哂住家飯嘛   只不過普通 d 咁啫 ~

是日懶餐 - 臘腸蒸排骨 + 菜心苗
臘腸蒸排骨 - 今次將 d 蒜頭豆豉爆香   再放上排骨面蒸   真係出味好多呢   真係唔懶得呀 ~

菜心苗 - $10/2 包   份量唔小   食得都好滿足咁呢 ~  

住家飯 @ 媽咪屋企 ( 28-oct-2010 )

( 28-oct-2010 thu )
今朝開始覺得有 d 涼   但唔係凍   沖完涼出門口簡直唔覺涼添呀   不過好大風   所以等車都要着番件風褸囉 ~
諗住晏晝食麥皮   所以早餐就豐富 d 喇   同埋實食唔哂個餐包   留番 lunch 食   又慳錢又唔浪費   真係好 good 呀 ~

菇場超過忙呀   未停過手   做到 lunch time   喺菇場沖麥片 + 個包   夠哂飽呀 ~
今日真係忙足成日   好在今晚番媽咪屋企食飯   可以抖下呢 ~

水餃河粉 / 出前一丁 + 粟米蛋花湯 ( 27-oct-2010 )

( 27-oct-2010 wed )
早餐食 K   好在到依家都未厭   仲有一盒就清哂 lu ~
今朝仲以為自己眼濛睇錯嘢   離遠見到個女人對眼敷咗 Eye Mask   但原來佢真係有對 Eye Mask 架   點解會咁嘅 ~
晏晝有 lunch box   本來好想出街行   但見咁猛太陽又唔想喎   唔想行到熱辣辣番菇場呀 ~

放工搭地鐵   無無聊聊周圍望   見到個男人對黑眼圈真係好勁   真係黑色架   好恐怖呀   咁黑嘅 ~  
是日懶餐 - 水餃河粉 / 出前一丁 + 粟米蛋花湯
水餃河粉 / 出前一丁- 唔想煮   但又唔想出街食   煮麵就最好喇   最緊要方便  一鑊搞掂哂 ~  
粟米蛋花湯 - 無菜嘛   所以就滾粟米湯喇 ~ 
隔離屋裝修   整到屋企鐵閘非常之污糟   所以我就忍唔住去抹鐵閘   佢地仲有個幾月先搞掂   都唔知要抹到幾時   尋晚試下開對流窗   所以超大風   吹到對房門關埋   我諗住推開   點知推唔切   我隻手指仲更加縮唔切   痛鬼到我呢   彎一彎都痛呀   唉 ~   

叉燒炒麵 + 皮蛋酸薑 ( 26-oct-2010 )

( 26-oct-2010 tue )
今日涼咗 dd 啦   天氣一涼   個人好似特別餓咁架 ~


菇場又忙啦   11 點幾仲開始餓添   所以 lunch time 一到即開餐喇 ~  
里奧大人上咗大陸   我就唔駛咁急煮飯喇 ~
是日懶餐 - 叉燒炒麵 + 皮蛋酸薑
叉燒炒麵 - 因為里奧大人鍾意食   所以就炒比佢食   我會將佢所講嘅嘢放喺第一位架   如果佢果日對我好嘅話 ~  
皮蛋酸薑 - 無啦啦想食   好在夠簡單   自己隨時都可以整 ~
實在忍唔住喇   超想食糖不甩   所以走去許留山買喇   順便買龜苓膏比里奧大人   咁顯得我無咁為食呢 ~

豉油王雞絲炒意粉 + 菜心 + 花生眉豆雞腳湯 ( 25-oct-2010 )

( 25-oct-2010 mon )
Oh no   尋晚小丸子有心事   瞓得勁唔好呀   好似無瞓過咁   仲要今日係星期一添   Oh nonono ~
無 mood 呀   所以喺屋企食 K   喺屋企食嘢會開心 d ~


番到菇場又忙喎   不過都好彩忙   唔係 d 時間仲難過   話咁快 lunch   今次只係帶餸唔帶飯    但好似唔係咁飽囉 ~ 
雖然忙   但我都會抽空諗下今晚煮乜餸嘅 ~ 
是日懶餐 - 豉油王雞絲炒意粉 + 菜心 + 花生眉豆雞腳湯
豉油王雞絲炒意粉 - 用咗 1 大個洋蔥   又爽口又甜   好 good 呀 ~ 
菜心 - 呢排菜心又唔多靚咁噃   有渣嘅   咁就 no good 喇 ~ 

花生眉豆雞腳湯 - 媽咪煲架   間唔中飲雞腳湯都唔錯   有骨膠原嘛   又係好 good 呢 ~ 
今晚實在太攰喇   無出去做運動   不過仲慘   因為心有食念   雖然爆大瘡   但都忍唔住食媽咪麵   包裝寫到營養食品咁架   呃細路咩 ~