叉燒炒麵 + 尖椒皮蛋 + 蒜泥唐生菜 ( 31-jan-2011 )

( 31-jan-2011 mon )
星期一 lu   但諗到番多四日就放假   就真係番工都番得開心過人咁喇 ~
今朝唔係太餓   所以食腿蛋包   間唔中都幾想食呢 d 包   由細食到大嘛   兒時回憶呀 ~
今日見到太陽   仲以為會熱   所以無着外套就出去買嘢食   點知凍到震呀   走咗去食粥呀 ~
無驚無險又放工喇   今晚要煮喇   去到街市都有幾檔收爐   好在我想買嘢嘅檔口無收爐   如果唔係我唔煮架喇 ~

是日晚餐 - 叉燒炒麵 + 尖椒皮蛋 + 蒜泥唐生菜
叉燒炒麵 - 唔知整咩好嘛   所以又叉燒炒麵   里奧大人真係超級無敵勁鍾意食   因為我整咗一大盤   剩番一碗仔   我諗住自己夾硬食埋去   估唔到里奧大人會食埋   如果係菜呀   佢就會話每人食一條   每人半咁架   所以我次次都會發哂火話   叫你食菜好似叫你食屎咁   好煩呀 ~  

尖椒皮蛋 - 好想食   但無心機整   所以樣樣都求其切   切到大大粒   形狀又不一   真係唔似我風格呀 ~
蒜泥唐生菜 - 無心機呢   連蒜頭都切得大粒   最緊要快嘛 ~
嘩   我覺得煮完餐飯   再洗埋碗   個人好似散哂咁呀 ~

蒸大眼雞 + 自家蘿蔔糕 + 油麥菜 ( 30-jan-2011 )

( 30-jan-2011 sun )
今朝無番教會   我又唔想好趕咁出去食早餐   所以我就煮丁丁喇 ~ 
食完 hea 陣就出發去旺角數碼通喇   因為我部手機無哂電話簿號碼   唔整唔得囉   好在去到無人   等咗 3 分鐘就輪到我   感恩感恩 ~
之後我地去咗食傷心酸辣粉   我叫咗小辣   但比里奧大人試下先   佢話好辣   要 bb 辣就算   但係 bb 辣係一 d 都唔辣架   但口水雞就好麻辣   食緊嘅時候   覺得個頭好痺呀   同埋流鼻涕   不過我都係唔鍾意食四川麻辣呢 d 酸辣囉 ~ 

食完就去花墟   幫襯里奧大人朋友買嘢呀   旺角真係超多人   又焗   行完有 d 頭痛   同埋焗到個人好眼瞓呀 ~    

又坐亡命 van 番屋企   諗起同以前住大埔   下下坐車都要最小 40 分鐘先番到屋企就慘   依家唔駛 10 分鐘就番到屋企   超爽呀 ~
無啦啦超想飲珍珠奶茶呀   買番屋企慢慢嘆 ~

6 點幾家姐話黎我屋企   拎糖順便過數比我   話唔好 "擇" 過年喎   順便同佢 share 樂家杏仁糖   雖然見面時間係半個鐘左右   但都好開心呀 ~

今晚唔出去食 lu   我發覺真係好似好耐好耐無煮飯咁呀   真係唔煮唔得咯 ~ 

是日懶餐 -蒸大眼雞 + 自家蘿蔔糕 + 油麥菜
蒸大眼雞 - 媽咪買比我架   超大條   個鑊都冚唔到呀   今次拆肉  加豉油胡椒粉一齊撈埋   咁樣食好似方便 d ~
自家蘿蔔糕 - 里奧大人家姐整架   估唔到好好味呀   真材實料   正呀 ~
油麥菜 - 去到百佳   得番一 pack pack 嘅菜   咁就買油麥菜啦 ~

食完飯同里奧大人去德福廣場抽獎   係即抽折獎架   所以一定要去囉   呢排勁想食麥記朱古力新地   所以忍唔住買咗黎食呀   真係超級好味呢 ~

上海婆婆 @ 九龍灣 ( 29-jan-2011 )

松子黃魚

野生椒牛肉

干煸四季豆
婆婆粗炒
宮保雞丁
雞絲海蜇
蒜蓉拍青瓜
生煎包
梅菜扣肉包
酒釀丸子
高力香蕉豆沙
豆沙鍋餅

( 29-jan-2011 sat )尋晚夜瞓   諗住今朝 8 點先超身   點知我一郁呢   里奧大人就話陪我食早餐   我話唔駛啦   唔駛特登陪我    佢話 7 點已經醒咗   咁好啦   提起精神一齊食早餐啦 ~

番到菇場未停過手   忙到 12 點幾呀 ~

家姐打黎話想一齊行街買衫   但我要同里奧大人一齊去旅行社 book 位   所以要食埋 lunch 先 join 佢地呢 ~

家姐同媽咪去咗東港城畔溪飲下午茶   不過我超飽   唔食嘢喇   但家姐話見我鍾意食炸雲吞   所以叫碟一齊食喎   噢   咁有我心   唔食都唔得啦 ~
諗住只係陪家姐去 Dr. Kong 買鞋   忍唔住自己都買咗對   佢地個鞋墊真係好舒服   就算有吋半踭嘅鞋都着得好舒服   有驚喜呀 ~

買完鞋就陪埋家姐去買衫   不過呢間舖頭 d sales 真係好唔掂   我明明件衫已經爆哂   仲扣唔到拉鍊   但佢都話啱   仲叫我着薄衫   真係痴根   依家買梗係依家着架啦   咁凍叫我着薄衫   真係愛靚唔愛命咩   好在家姐都買咗幾件心頭好   唔係佢會覺得無收穫咁架   之後去埋家姐屋企拎喼   送埋媽咪就番屋企 lu ~

今晚同妯姑奶們食飯   book 咗稻香   但等半個鐘仲係等   痴線   都唔知要人 book 位黎做乜   其他客人都等到好火滾   所以我好憎接近大時大節嘅時候食中菜   實係超級無敵勁多人   簡直浪費時間呀 ~ 

咁等唔係辦法   所以里奧大人行去睇邊間食肆無咁多人   鴻星又係爆   好在上海婆婆有位   所以即轉場喇 ~

今日好多嘢都好突然呀   無啦啦里奧大人陪我食早餐   無啦啦晏晝陪家姐買衫   無啦啦又話同里奧大人屋企人做節   攰到我呢 ~

雲貴軒風味過橋米線 @ 荃灣 ( 28-jan-2011 )

( 28-jan-2011 fri )
Happy friday 喇   今朝去 KFC 食早餐   因為 $14 可以食到好飽   好開心呀 ~


菇場靜到呢   我打乞痴   8 啩話嚇佢一跳喎 ~

今日同 8 卦出去食麥記   我好小喺其他人面前食 Big Mac   因為要張開好大個口先食到   但我今次好想食囉   唔理咁多   我用個紙盒遮住   咁佢就睇唔到我個口幾大喇 ~

菇場有人唔做喇   所以有 tea 食   我都食咗奶油多 + 熱檸蜜   我覺得今日個口無停咁食呀   仲係樣樣都好飽肚下   不過呢個 tea 成 5 點先黎到   咁都好嘅   一陣電髮唔會餓囉 ~
今晚放工同家姐一齊搭地鐵去表妹度剪髮   咁啱攝影表弟又黎埋   真係好開心呀 ~

由於太多人關係   我地要坐喺出門等   一路傾一路食燒賣魚蛋一路等   差唔多 8 點先開始   10 點 半先搞掂   之後阿姨同姨丈又黎接表妹放工   所以就同我地一齊食嘢喇 ~

我地話想食米線   所以佢地帶我地去雲桂軒   其實我應該係想食雲桂米    但唔緊要啦   試下新嘢   不過我唔多鍾意麻辣   我已經小辣   但食咗幾啖已經 feel 到個肉咀有 d 麻   同埋唔鍾意 d 花椒味   唔知點咁 ~
差唔多 11 點 20 分走   去到亡命 van 站係 11 點 半    我陪埋家姐等巴士番屋企   我就 12 點番到屋企   亡命 van 真係好快呀 ~
里奧大人明明打黎話瞓覺先   點知佢開門比我   然後話都係心掛掛瞓唔着   等埋我喎   算佢對我都掛心啦 ~

Food Court @ Piago ( 27-jan-2011 )

( 27-jan-2011 thu )

依家又鍾意食番扒芝腿治  唔知係咪天氣凍  想食飽 d 呢 ~

晏晝喇喎   好想食湯粉   所以走去食魚蛋河   不過唔好味囉 ~

umm   到放工喇   今晚要去媽咪屋企比新銀紙佢包利是呀   我坐到 7 點就走人   同里奧大人去 Piago 嘅 Food Court 食嘢 ~
諗住去旅行社睇資料   點知 closed   8 點 15 分咋喎   咁快 closed 嘅   咁唯有番屋企啦   食埋媽咪之前比我嘅紅豆黑燸米   超飽呀   雖然 10 點我真係唔想熨衫   但實在唔郁唔得   點知熨到 10 點半   覺得超攰呀   同埋好快又要瞓覺   無哂私人時間咁   下次都係唔好喇 ~

Canteen @ 伯特利神學院 ( 26-jan-2011 )

( 26-jan-2011 wed )

星期三 lu   時間真係過得好快   眨下眼已經星期中   眨多兩眨就過新曆年  好開心呀 ~

早餐食沙爹牛肉 + 榨菜肉絲米粉   加咗胡椒粉又幾好味噃   依家好想唔食咁多辣嘢呀   不過都應該幾難   因為我真係好鍾意食辣嘢囉 ~ 

菇場好靜呀   人地唔知真係以為我地係啞架 ~

尋晚去媽咪屋企食飯   所以我都唔客氣要帶埋 lunch box 喇   今日食都覺得好好味   但唔知點解   食自己整嘅 lunch box 又會覺得悶喎 ~

唉   之前 "唱" 咗 d 新銀紙   admin 話會今日派   等到 5 點 45 分先有   所以 6 點先走得   撞正今晚要番學   我又訂咗飯   食飯時間係 6:00 - 6:45 pm   好趕呀 ~

坐的士又塞車   個司機又去錯地方   已經無乜時間架啦  我當時好火架   好想開口鬧佢唔識路出聲嘛   不過見佢係應該 6x 嘅伯   我忍唔住 " jep " 咗一聲就算   但其實我都仲係好激氣囉 ~

去到 6 點 25 分喇   個個人都食完   大食表妹又食完   得我一個食飯咋   好彩牧師都未食   咁多一個人食   我無咁尷尬嘛 ~

9 點 35 分放學   有 d 餓呀   真係勁想去 m 記買朱古力新地   不過又唔係咁想食凍嘢   咁啱見到有炒栗子   所以買 $10   買番屋企慢慢嘆 ~

住家飯 @ 媽咪屋企 ( 25-jan-2011 )

蝦碌
荷蘭豆炒雞什

炒菠菜
冬菇蠔豉燜豬手
家維雞

紅豆黑糯米糖水




( 25-jan-2011 tue )
呢朝去 KFC 食早餐   食完再行去搭地鐵  感覺上無咁肥咁呀 ~


我成日覺得搭地鐵好焗好迫同好 chok  但就可以掌握到時間囉   次次都見到好多人喺電話度睇嘢  一係就打機   其實我覺得好辛苦   因為我覺得好傷神囉 ~
今朝要同 partner 執嘢   佢呢   件衫一陣味咁架   之前 8 卦都咁講   話次次經過佢個位都一陣味咁   估唔到係真   點解可以咁架   我覺得男人都算   但女人點可以咁架  同埋我今朝同佢一齊搭 lift   見到佢件褸嘅衫袖口位   有好黃嘅漬呀   超級超級超級烏糟呀   真係好好奇佢老公係乜人   點接受到架   但 8 卦話佢老公可能仲烏糟過佢   oh no ~
尋晚樣樣食剩小小   所以我就帶 lunch box 啦   又唔浪費   又可以幫我慳番筆   加埋車厘茄就夠哂飽啦 ~

里奧大人上咗大陸   我又去媽咪屋企開餐喇   食完飯再去稻香拎糕 ~



番到屋企本來好想 hea 架   但又忍唔住熨機衫   覺得唔駛煮飯就做下家務啦   咁樣唔駛又一下子推哂一齊做   但又覺得難得唔駛煮飯咁嘆  不如比自己休息下唔做家務   真係好矛盾呢 ~