芝士焗肉醬扁意粉 + 牛油蒜蓉包 + 粟米蛋花湯 ( 31-mar-2011 )

個包好似心型咁呀

( 31-mar-2011 thu )
星期四喇   今朝里奧大人上大陸   佢出咗門口我都瞓唔着   係床度典下典下等鬧鐘響   其實都唔知有無瞓到呢 ~

今朝超想食炒米粉呀   估唔到都幾多料 ~

晏晝有 lunch box   真係好 like 食金菇牛肉卷呢   下次整多 d 先 ~
依家要做埋小小 A/C 嘅嘢   不過算啦   反正悶起上黎   有 d 嘢做都好嘅 ~  
今晚經過吉嘢家   以為新出咗雪糕   因為離遠見到一個女人 "北" 咗一更白色嘅物體   行近 d 睇   原來係湯飯 ~  
是日晚餐 - 芝士焗肉醬扁意粉 + 牛油蒜蓉包 + 粟米蛋花湯
芝士焗肉醬扁意粉 - 尋晚特登買豬肉分兩餐煮架   咁就唔駛再去買喇   超醒   今次用咗一磅百合茄做蕃茄蓉   好似好味過用一大個嘅蕃茄   本來想開包芝士粉   但又想留番整其他嘢   所以用芝士片再切碎   估唔到自己咁有心機呢 ~  
d 百合茄好似心心咁呀   好得意

牛油蒜蓉包 - 個脆包喺 Yamazaki 度買架   $8.5   之前買 $8 咋   不過我鍾意用呢個包做蒜蓉包   因為大大塊易搽牛油蒜蓉呀 ~

粟米蛋花湯 - 一盒地們粟米湯 + 一罐金寶粟米粒   咁先好飲   因為超多粟米粒   里奧大人以為一盒粟米湯有咁多粟米粒添呀   真係食嘢唔知米貴 ~

本來 10 點半超勁想瞓   里奧大人又超想沖涼   但就想睇番之後錄左嘅 " Medium "   點知睇咗一 part 就超勁想追呀   最後又 11 點半先瞓   噢噢噢 ~ 

金菇牛肉卷 + 雙色蛋蒸肉餅 + 炒菜心 ( 30-mar-2011 )

( 30-mar-2011 wed )
星期三喇   心情開始興奮   因為好快星期六 ~ 
今朝食沙律芝士腸仔包   超正呀   好軟糯呀   呢間茶餐廳嘅包包真係唔錯   同埋好重手架   唔似聖安娜果 d 軾飄飄咁   如果里奧大人上大陸   我夜晚會買齋包比佢做早餐   我以前買聖安娜嘅細麥包比佢   真係買 3 個都唔及依家喺呢間茶餐廳買 2 個咁重手呀 ~
晏晝買咗肥牛湯檬   都幾好味   因為我鍾意有 d 芽菜呢 ~ 

Partner 又喺到中中下   所以我同 8 卦會諗計仔嘈醒佢   8卦就打 keyboard 大聲 d 同埋講電話大聲 d   我就特登咳兩聲勁嘅   但最 work 都係我果招   萬試萬靈呀 ~
今晚好有 mood 煮晚呀   里奧大人又 7 點番到屋企   所以我就比較趕 d 喇 ~
是日晚餐 -金菇牛肉卷 + 雙色蛋蒸肉餅 + 炒菜心
金菇牛肉卷 - 超勁想食好耐喇   所以點都要整   加埋黑椒汁   真係正都不能再正呀 ~ 
雙色蛋蒸肉餅 - 呢個整比里奧大人食架   啖啖肉佢最 like 呢 ~

炒菜心 - 今晚將碟菜平均分兩份   咁里奧大人就唔會又話嫌多   又話好飽喇   真係煩   食菜之嘛   又唔係叫佢食乜喎 ~
今晚做咗一陣功課就瞓喇   呢排好似瞓極都唔夠咁嘅   但又唔係夜瞓架噃 ~

嘉華大酒樓 @ 官塘 ( 29-mar-2011 )

( 29-mar-2011 tue )

今日又係天陰陰  凍凍地咁  不過就超乾燥喇 ~
  早餐去麥記   果班阿婆真係朝朝食麥記   唔厭嘅咩 ~ 
菇場都一般忙啦   但一樣係靜英英   唉 ~尋晚食飯傾開計   里奧大人話間唔中食常餐   搞到我今日都好想食常餐呢 ~

今晚放工去拎中藥   之後就同埋媽咪 家姐 姑丈同兩個姑姐一齊晚飯   因為其中一個姑姐後晚番加拿大 lu   不過依家聯繫都好方便   有 Email 又有 FB   再唔係打 IDD 都好平   只不過係時差問題啫 ~  

佢喺加拿大生活咁多年   節奏步伐都慢過香港人好多好多   我話香港人咩都快   就算睇醫生都好快   最多 2 分鐘   有 d 分半鐘咋   佢難以置信呀   佢話加拿大果邊規定最小 15 分鐘睇一個症   嘩   我地香港 15 分鐘可以睇好多個症咯   總之香港人咩都快   行路快   講嘢快   食嘢快   所以我地去到另一個國家   好自然就會覺得人地好慢喇   oh   其實人地可能係正常速度呢 ~  

8 點幾食完飯 lu   家姐又落黎食雪糕   咁食法真係要狂做運動先得呀 ~

美心 MX @ 牛頭角 ( 28-mar-2011 )

蒜香骨雲南米線

叉燒炒蛋

( 28-mar-2011 mon )

星期一 lu   都唔係話好攰   感恩感恩 ~
早餐食菠蘿包   因為想齋呀 ~ 

呢日老闆 off   所以一早諗好咗做功課   點知忙到 12 點   邪呀 ~

Lunch 食 7 仔嘅咖哩烏冬   好耐無食   覺得好好味呀 ~

放工睇中醫   之後去買麵粉同牛油   今晚又坐 van 仔番屋企   8 分鐘咋   真係快過的士   因為的士無佢地咁狼嘛 ~ 

今晚又會同埋家姐一齊食飯   因為媽咪去睇大戲   佢無飯食   但點知媽咪無睇   所以佢喺媽咪屋企食咗小小飯   再黎 join 我地   因為佢又買咗雪糕比我地呢 ~ 
我有美心 MX  $80 cash coupon   但 31/3 喇   所以用埋佢啦   大拿拿 $80 呀   我又買咗三寶   所以叫兩個餐就夠喇 ~

食完就番屋企   食下雪糕傾下計   家姐 9 點幾走   我就送佢搭車喇 ~  

稻香 @ 九龍灣 ( 27-mar-2011 )

( 27-mar-2011 sun )
今朝無番崇拜   起咗身就去大快活食早餐   食完就番屋企做功課 lu ~

家姐晏晝又黎同我地食   順便買嘢   今晚佢同事去佢屋企 BBQ   佢黎我屋企之前就去惠康買 d 豬肉   再買兩包炭   佢話買豬肉個亞姐好愕然問佢買兩包炭黎做咩   之後佢黎我屋企   佢話管理員同埋 d 人都望住佢喎   咁又係喎   如果買炭 BBQ 嘅話   就直接去 BBQ   點會拎上屋企喎   d 人以為佢想燒炭都未定   哈哈 ~ 
家姐打機   里奧大人熨衫   我就做功課   差唔多 1 點 45 分就去爭鮮食壽司   因為家姐未試過呀   今次我地食咗廿三碟   飽到爆肚 ~

之後一齊番屋企   里奧大人就約埋屋企人去拜奶奶   里奧大人叫我唔好去   要做功課   不過我都唔去架喇   來回三個鐘   真係又無咗半日咁架喇   咁家姐就陪我到 4 點就番屋企 lu ~ 
差唔多 6 點半又要去稻香食晚飯   我真係覺得稻香麻麻地囉   同埋佢地十幾年都食果 d   真係超級無敵頂級悶爆呀 ~ 
今晚拎埋之前焗嘅曲奇比佢地食   其實我食唔哂唔想掉   所以比佢地食   佢地個個話好食   不過我唔信架   事實我覺得真係麻麻地好食   而家姐 d 同事直頭話唔好食添啊   仲話唔似曲奇   我會信家姐同事多 d   因為佢地食慣好嘢嘛   家姐幾驚我唔開心呀   我又點會丫   我特登叫佢比同事試架   聽多 d 意見就最好   咁先得到改善嘛 ~

水雲間 @ 皇崗 + 沙爹王 @ 官塘 ( 26-mar-2011 )

青檸柑梅蜜 - 里奧大人必叫架  事實又真係幾好飲呢印度薄餅配咖哩汁 - 又係里奧大人必叫架蟹肉扒西蘭花 - 想食菜呀  所以點呢個喇 ~
豉椒炒蜆 - 又係里奧大人必叫架  今次都幾多蜆肉  good
避風塘炒賴尿蝦 (一斤) - 必叫啦  超正  我食哂 d 避風塘料架  所以次次食完都好口渴  哈


( 26-mar-2011 sat )
每月一 off   心情興奮到難以形容呀   今朝家姐過黎同我食地早餐   真係好開心呀   食完就一齊上屋企   等埋我沖涼換衫就出發   家姐就去元朗買 BBQ 食物喇 ~

同里奧大人坐直通巴去皇崗   佢係識途老馬   坐到熟哂啦   因為佢坐呢架車上大陸呢   其實我真係好驚上大陸   所以一過關就會好緊張   我居然拎咗香港身份証   好在里奧大人喺前面   我有時間拎回鄉卡   唔係阻住人就唔係咁好啦   個個男人趕住慰妻嘛 ~
今次係第一次去水雲間   上網睇評語都唔錯   又有專車送到門口都幾方便   好過自己坐的士   都唔知會兜去邊   no 喇 ~
呢間大堂 ok 啦   最緊要感覺都幾乾淨   同里奧大人各自換衫就去按腳一個鐘   呢個按摩係送架   因為我地會再按雙鐘全身按摩呢   如果三個鐘仲送埋一餐 lunch   咁又幾好喎   估唔到星期六無咩人   可能人仔升值   無以前咁抵玩   所以小咗人去   咁都好   我好怕太多人要等呢 ~ 
我地多數搵女師傅   因為男師傅太大力喇   同埋好似唔係咁方便咁   今次我主力按腰   佢話大力先可以鬆到 d 筋   之後會好舒服   我其實半信半疑架   不過比佢咁大力按完又即時覺得條腰無咁痛喎   不過真係超超超超大力囉   佢叫我嗌出黎會舒服 d   我唔啦   唔想變咗劏豬場呀   仲有按個半鐘喎   唔通要我嗌個半鐘咩   到時喉嚨都痛啦    加上我覺得按摩係要寧靜嘅環境   咁咪嘈住里奧大人囉   所以佢次次幫我按完   我都會呼好大啖好長嘅氣   按摩師都忍唔住笑呀 ~ 
呢間話就話按 1 個鐘   其實係 45 分鐘   不過算啦   好多都係咁   有 d 就 50 分鐘   但對於我黎講   個半鐘都夠架喇 ~

同里奧大人又坐番專車去皇崗   今次過關仲大穫   我將回鄉卡插咗入 E 通道   好在彈番出黎咋   唔係就要等佢地拎番出黎就煩喇 ~   
番到官塘差唔多 6 點   所以去沙爹王食喇   今次好感恩呀   仲有卡位坐   我鍾意坐卡位架   因為可以擺袋同擺衫嘛   唔駛攬住咁辛苦 ~
家姐今晚又黎喎   同埋里奧大人一齊去睇波鞋   不過買唔到囉   之後同佢去超市買嘢   之後上黎食雪糕再打機   差唔多 10 點幾先走   住得近真係唔錯   佢可以成日上黎嘛   咁佢唔駛咁悶呢 ~

住家飯 @ 媽咪屋企 ( 25-mar-2011 )

白切雞 - 新鮮雞黎架   有雞味  同食雪藏嘅分別真係好大呢  不過我呢一世都唔會整新鮮雞  我覺得好殘忍  但其實冰鮮都係嘅 oh 薑蓉 - 加埋指天椒一齊爆香  佢一路炒我一路咳   不過無咗蔥就覺得失色好多呀 

鵝掌翼 / 豬頭肉 / 生腸 - 超勁想食鵝掌翼  所以尋晚打比媽咪  叫佢買呀  佢話食呢 d 就唔蒸魚  我話食鵝掌翼  因為我好小見到有得買呢炒菜心苗 - 好甜喎  甜過哈哈笑菜心   豬肚 ( 湯渣 ) - 點豉油胡椒粉食  超好味  令我諗起及第粥添合桃淮山圓肉鮑片豬肚豬展湯- 我第一次飲合桃湯咋  都幾好飲  不過我最鍾意都係食圓肉呢  又擰埋臉 -.-寶寶依家唔同哂喇   肯出竇瞓覺   諗番起佢之前果兩年  佢只會哩埋喺柜入面  對眼係咁望住妳  唔食嘢唔飲水  等我地走咗先出動  但依家好好啦  會出黎食嘢  又敢瞓覺  咁先正常嘛 



( 25-mar-2011 fri )
今日係 Happy Friday   真係超級 happy   因為聽日 off 嘛   如果 d 人係逢星期六都 off   心情應該無我咁興奮呢 ~ 
今朝等車又耐又塞車   去到菇場附近都 9 點 05 分   所以今次都係買早餐番菇場食算喇 ~


呵呵   又做功課啦   不過膽戰心驚咁睇囉   話哂私人嘢唔係咁好   但我真係無嘢做嘛   好過上網啦 ~ 
今日有 lunch box 就好 good 喇   咁樣多 d 時間做功課嘛   呢兩日有入無出   個肚想爆咁呀   嗚嗚嗚嗚 ~ 
本來今晚里奧大人都會番媽咪屋企食飯   但又調咗今日上大陸   所以得我自己去食 lu ~