日月星餐廳 ( 外賣 ) @ 屋企 ( 31-jul-2011 )

( 31-jul-2011 sun )
今朝早餐就係喺屋企蒸燒賣食   唔駛咁趕   正呀 ~

里奧大人要做 present   所以我就上網啦   電視又無節目好睇喎 ~ 
差唔多 2 點幾就食 tea   無啦啦好想食粉麵   雖然咁熱   不過都好想食囉 ~

無啦啦個肚有 d 痛喎   但都頂得到   因為都有胃口食嘢 ~ 
今晚唔想出去食   叫外賣算喇 ~

金加利餐廳 @ 九龍灣 ( 30-jul-2011 )

( 牛油厚多士 )
( 羅宋湯 )
( 豬助骨雜果沙律 )

( 咖哩牛腩意粉 )
( 燒春雞餐 - 忌廉汁 )
( 芝士龍脷柳農夫包 )

( 30-jul-2011 sat )
今朝同里奧大人去茶餐廳食早餐   因為實在唔想去太興   來來去去都係得 6 個餐   雖然坐得好舒服   但食到好厭 ~

食完番屋企 hea 喇   因為每月一到嘛   個人比較攰 d   之後家姐同我地一齊食 tea   食完佢番屋企   我地就去買嘢 ~

里奧大人做咗陣公司嘢就去瞓覺   我就睇報紙   d 時間都好快過   呵呵 ~  
本來想出九龍城食泰菜   但媽咪又話唔食得   里奧大人又話想我食清 d   所以最後同埋媽咪 家姐 工人一齊去金加利食嘢   淘大真係無咩好食   但又唔想過德福   因為德福仲多人呀 ~ 

食完就陪里奧大人買衫   我好專心幫里奧大人睇衫   突然有隻超巨大黑嘢飛喺我面前   嚇到我彈開   原來有個女人揀緊拖鞋   唔小心飛埋黎   我話以為係老鼠呀   哈哈   家姐送埋媽咪搭車之後就一齊買衫   買完就走喇 ~

脆肉瓜炒雞件 + 滷水牛展 + 髮菜眉豆豬骨湯 by 鐘點 ( 29-jul-2011 )

( 29-jul-2011 fri )
Happy Friday 呀   所以去麥記食早餐   咁我食完就睇一陣報紙   正想飲啖咖啡嘅時候   見到杯邊有隻細飛鵝   嚇到我丫   幾驚佢飛走呀   因為佢飛走咗我就無証據換一杯新嘛   我飲咗 3 啖咋   好在隻飛鵝都好乖   自己跳入咖啡湖   等佢唔郁我就即冚蓋   拎番去 counter 換一杯新嘅   之後就番屋企 lu ~


今日無諗住出街   睇下電視睇下報紙都好快過咗半日   所以又要整 lunch   就無煲翻尋晚飲唔哂嘅一碗魚湯   同埋之前 d 紅豆沙就算喇 

鐘點黎到又傾下計   不過佢就有分寸   知道自己傾計呢   之後做嘢就會加快   唔會呃鐘咁囉 

家姐今晚落黎比嘢我   咁叫做無咁悶啦   不過佢 9 點就要走   趕住番屋企睇 " 真相 " 大結局呀 

里奧大人差唔多 9 點半先番到屋企   好在我又飲咗湯咋   唉   不過咁夜食   大家都無咩胃口   真係好想叫鐘點唔駛煮飯   反正次次都食剩好多   雖然我可以留番做 lunch box   但都唔食得咁多家嘛   始終都要掉   oh no ~

嘉美雞 + 節瓜紅衫魚湯 by 鐘點 ( 28-jul-2011 )

( 28-jul-2011 thu )
自己整早餐   因為尋晚食唔哂 d 墨西多辣肉醬香腸呀   又要清埋兩塊方包   所以又整埋牛油多士   加埋包朱古力奶   食完飽到震 ~
umm  之後又係睇電視   差唔多 2 點再整 lunch   又係尋晚無食過嘅香蒜肉絲意粉 + 墨西哥辣肉醬香腸   呢餐又係飽到上喉嚨   下次無咩必要都係唔好叫 Pizza 餐   搵自己黎搞   嗚嗚 ~

鐘點 4 點黎咗   咁我唔知係咪飽得滯   同埋呢日唔知點解好攰   所以瞓咗半個鐘   瞓醒舒服哂 ~ 
里奧大人今晚成 9 點先番到屋企   所以飲咗湯先   唔想太夜飲湯   半夜又要去廁所   同埋唔想眼腫腫囉 ~  

Chicken & Pizza ( 外賣 ) @ 屋企 ( 27-jul-2011 )

( 27-jul-2011 wed )

今朝 9 點就醒咗   所以就早 d 食早餐喇 ~



睇陣電視就梳洗出發同媽咪飲茶喇   媽咪傷口仲痛   所以只能喺佢屋企附近酒樓飲茶 ~

飲到差唔多 2 點就陪媽咪去百佳   今日鐘點唔黎   所以我就出旺角行陣喇 ~ 

平時真係唔會出旺角   出親旺角都係有嘢買先去   今次買咗 4 條裙  2 件外套  1 對涼鞋   再去花園街買咗 6 套睡裙   再買塊燒餅比家姐就番屋企喇   又熱又重又攰   不過就好開心囉 ~  

番到屋企第一件事係開冷氣   之後再沖涼呀   嘩   舒服到呢 ~ 

今晚唔想出街呀   所以外賣 Pizza ~    

家姐今晚又去我屋企   因為佢同我 share 朋友比佢 d 手信   同埋我幫佢買咗 3 套睡裙同燒餅嘛   唔黎唔得呢 ~  

豆豉涼瓜燜支竹排骨 + 紅豆沙 by 鐘點 ( 26-jul-2011 )

( 26-jul-2011 tue )
尋晚里奧大人同客食飯再飲嘢   所以差唔多 1 點先番到屋企   我喺廳度一路睇電視一路瞓一路等   因為佢未番到屋企我都會真正瞓到囉 ~ 

今朝好有 mood 整扒芝士黑椒火腿三文治   好好味呀 ~
食完睇電視   嘩   日日咁都真係幾悶   不過休養嘛   好人好姐就可以出下街   同媽咪飲茶  約家姐食 lunch   做下家務   整下嘢食都唔錯   咁 d 時間過得快好多 ~

呢朝沖咗 1 jar 檸檬水   唔知係咪酸酸咪咪關係   個人好快餓呀   所以 1 點半就煮番 d 粥好鬼熱   差唔多 2 點先想食 ~

鐘點 4 點黎到   又係熨衫   我覺得好似日日有衫熨咁   但我已經無乜出街   都唔明點解可以有咁多衫洗 ~ 
今晚食飯嘅時候   里奧大人話唔好煮咁多飯   我話已經叫鐘點煮半嘜   再小 d 就好難煮   不如唔好煮飯啦   不過妳食燜餸唔送飯得唔得先   佢諗咗陣話唔得   煩到呢   唔係我煮我都覺得好煩   嫌乜嫌物咁   不過算啦   佢做嘢壓力好大   夜晚真係食得唔多   就算佢自己鍾意食嘅都食得好小   但星期五六日就好有胃口呢 ~

皮蛋瑤柱鹹瘦肉粥 + 炒麵 by 鐘點 ( 25-jul-2011 )

( 25-jul-2011 mon )
眨下眼就差唔多月尾   時間過得好快呀   今朝食米粉   食完睇睇下電視就瞓着咗   風扇吹吹下真係好易令人瞓着呀 ~


無啦啦覺得好悶   所以落商場行下   買咗件外套就走喇   唔想一悶就買嘢   要慳 d ~
好想食海南雞飯呀   估唔到柏檔都有下午茶餐   即叫個迷你海南雞飯餐   覺得好好味呀 ~

鐘點 4 點到   佢有佢做嘢   我有我睇電視   家姐放工去我屋企附近買嘢   所以又上黎坐下   今晚里奧大人同客食飯   鐘點又煮咗好大碟炒麵   同埋 d 麵好淋   我唔鍾意呢 d 口感   所以叫家姐幫手拎番媽咪屋企食   唔好浪費嘛 ~ 

鐵匠 @ 九龍灣 ( 24-jul-2011 )

( 24-jul-2011 sun )
諗住番教會   不過條腰骨好痛呀   成晚又瞓得唔好   所以同里奧大人食完早餐就番屋企休息喇 ~

喺屋企 hea 住咁等到 tea time   好熱呀   叫外賣算數 ~

里奧大人做公司嘢   我就睇電視咁囉   不過星期日 d 電視節目都唔好睇嘅 ~
同里奧大人早 d 落去買鬧鐘   之後試過教咗但唔響呀   好在我啱啱醒咗望下個電話原來已經 7 點   即刻叫里奧大人起身咋   唔係遲到就唔好啦 ~
買完就去鐵匠食飯   近近地嘛 ~