( 30-aug-2011 tue )
今朝又係瞓到 8 點半再打的番菇場 個人仲係好攰 同埋個肚有小小痛 唔想食食早餐 但就飲咗半支寶礦力同一罐咖啡 之後就好好多喇 ~
飲完好精神喎 不過仲未有胃口 但 lunch 都要比自己食嘢囉 尋日買咗小牛蛋 今日到期 所以唔食唔得喇 無胃口仲食埋 d 咁乾爭爭嘅嘢都幾難頂 d 同事經過我位都叫我應該食暖嘢 但真係無胃口嘛 ~
喺菇場都有 d 嘢做 所以覺得 d 時間過得好快 無啦啦頭暈暈咁款 放工都係打的番屋企 之後再買隻茶葉蛋番屋企食 食完好 d 呢 ~
今日里奧大人要上大陸見客 但好感恩 8 點都番到屋企 我真係唔太想食嘢 所以就咁食腸粉 佢食車仔麵啦 因為同一檔買嘢 唔駛分開買咁煩嘛 ~
( 呢 d 係檀花香梘黎架 我用界刀整成一片片 都幾辛苦架 用黎掛喺房門鎖 希望間房會有檀花香味 哈哈 )
( 26-aug-2011 fri )
Happy Friday 嘛 早餐要食得豐富 d 呢 同埋將食唔哂嘅餐蛋做 lunch box 嘅餸 咁就唔駛浪費 就咁食一個麵其實已經好飽呢 ~
10 點幾收到家姐電話 話媽咪打黎話頭暈氣促 但無帶平安手機同身份證咁點喎 咁點丫 叫人即 call 白車啦 聽完個電話之後 我個頭痛到爆 好嬲囉 都叫落街帶電話 一有事打個電話就會即 search 位置 知妳叫乜名 唔駛一陣警察黎到再問妳 同埋如果周圍無人都唔駛咁驚嘛 今次好彩喺百佳 有人肯借電話比妳打 有人肯幫妳叫白車 如果唔係妳話會點丫 嬲鬼到我呢 ~
之後婆婆打黎問媽咪點 有無事 姑娘點講 家姐知唔知媽咪點 我真係頂唔順用好重語氣話 媽咪無帶電話 我乜都唔知 今晚探佢先知 我真係已經好火 仲問埋呢 d 問題喎 雖然係關心 但第一時間已經話唔知啦 點解仲問呢 ~
Lunch box 係尋晚喺茶餐廳嘅炒麵 再加早餐食唔哂嘅餐蛋 哎 yo d 麵乾到呢 餐蛋又係好乾呀 餐肉可以用脆黎形容添呀 可能我叮咗 7 分鐘太耐喇 同埋無喺叮前加 d 水 唉 好難食都要食啦 唔通浪費咩 ~
放工即探媽咪啦 雖然我把口成日鬧媽咪 其實好關心佢架 嘩哈哈哈 買咗葡萄適 蛋糕同糖囉 悶悶地有 d 甜嘢食會好 d 嘛 ~
去到呢 我平靜中帶點激動同媽咪講 下次真係要帶平安手機 今次妳無帶到 妳話幾咁麻煩 咁咁咁咁 之後再話妳唔用就 cut 我自己月費都唔捨得比呀 妳個個月百幾蚊又唔用 咁不過開張電話卡比妳好過 媽咪都唔敢出聲啦 見佢咁攰 我都唔話喇 ~
里奧大人上咗大陸 家姐又約咗朋友 所以我探到 8 點先走喇 反正番到屋企都係等里奧大人放工 ~
好在喺醫院飲咗碗湯頂到里奧大人番黎 所以我都有氣力熨衫 抹柜 掃地 叫做勁架喇 一次過做咁多 做開有條路嘛 ~
等到 9 點半里奧大人就番到黎喇 我話難得聽日 off 所以唔好外賣 出去食啦 不過咁夜我地都無胃口 食粉麵最好 好怕食完飯就瞓 好似好滯咁 唔鍾意呀 ~