梅菜蒸鯇魚 + 沙爹醬炒唐生菜 ( 31-oct-2011 )

( 31-oct-2011 mon )

星期一喇又   又係美好開始   今日天氣非常之好   有風有太陽又唔乾燥   真係好想行山呀 ~

早餐食芝腿治烘底   今次烘得好靚呀   平時好似求其烘咁呢 ~

依家多數 9 點前番菇場   真係唔想成日遲到   咁樣準時走都無咁異相嘛 ~

晏晝食 Special K + 高鈣脫脂奶   估唔到都夠飽   都唔錯   唔想自己咁大食呀 ~

放工去超市買餸   因為要清咗包 oreo 餅底   所以整  New York Cheese Cake   惠康得酸忌廉   但又無 Cream Cheese   所以我又要去百佳買   計落條數買材料嘅錢仲費過我上次喺太子酒店買嘅 Blueberry Cheese Cake   好記 3 年前先開始對煮嘢食有興趣   買嘅價錢同今時今日嘅價錢係貴咗一陪   有 d 唔止添呢   我買 Unsalt Butter 係 $19.9   之後睇住佢加   加到依家好似接近 $40   所以我次次焗嘢失敗就會好心痛囉 ~ 

是日懶餐 - 梅菜蒸鯇魚 + 沙爹醬炒唐生菜

梅菜蒸鯇魚 - 我想里奧大人食多 d 魚   所以又整呢個餸喇   希望之後自己可以蒸冰鮮魚啦   唔駛咁悶嘛   但一諗到要全接觸條魚   我就好唔想買   好唔想食囉 ~ 

沙爹醬炒唐生菜 - 點印尼沙爹醬食唔錯架   其實我想用蒜蓉炒   不過唔夠時間切蒜蓉呢 ~

食完飯就即浪衫   里奧大人話日日見我開機洗嘢咁喎   不過真係唔知點解我都覺好多嘢洗咁   搞到我又要密密熨   同埋里奧大人成日拎完 d 衫出黎又唔着   之後又唔擺番入去   再之後又唔知自己有無着到   所以又要洗   我咪話要有手尾先得架   熨一件衫唔小時間架   真係吖 ~


洗好哂碗就專心焗蛋糕喇   今次將所有材料放哂喺碗度   逐步遂步咁跟食譜   因為我次次焗嘢都係邊睇邊拎邊磅   所以 d Step 會亂咗   今次整比家姐食   所以想做好 d   一路焗仲一路睇火   焗第 2 次嘅時候   我就去沖涼   一路沖涼一路聞到好香嘅蛋糕味呀 ~

今次焗蛋糕連埋預備同洗嘢   好似用咗個半鐘   都算快架喇   焗完出黎都幾靚仔   放涼後放入雪柜   留番聽晚食   希望好食啦 ~   

電視又無嘢睇   所以我又抹梳化   里奧大人笑笑話尋晚見妳抹完今日又抹嘅   我話無鐘點嘅日子   我都要保持屋企乾乾淨淨呢 ~  

自家製 New York Cheese Cake ( 31-oct-2011 )

( 31-oct-2011 mon )

因為   要清咗包 Oreo 餅底   所以想整 Cheese Cake 喇   其實想掉咗去算   因為都係 $20   同埋依家買料都唔平   ( Cream Cheese $33.9 / Sour Cream $14.9 )   一陣失敗會發顛囉   但包餅底又未開過   就咁掉好似好折墮咁 ~

今次真係好有決心整架   去完惠康又去百佳買材料   點知番到屋企先知無哂沙糖   因為我依家係用黃糖煮嘢   所以我又要再落去惠康買過 ~

我平時好小用打蛋器   因為要洗多樣嘢   同埋 d cream 成日打到飛哂出黎   可能用嘅器皿唔啱   今次用 Ikea 買嘅 Stainless Steel 煲黎整   無飛出黎呀   所以好開心   咁我第時都會用打蛋器   因為打得軟滑 d 嘛   同埋真係無咁攰囉 ~

今次按哂 Step 咁做   同埋一路焗一路睇住個火   因為真係好驚燶浪費心機嘛   同埋今次整比家姐同佢 d 同事食   所以責任比較大 d ~

焗完出黎再查 Cream Cheese   不過查得好樣衰囉 ~ 

放涼就擺入雪柜焗一晚   任務完成   好開心同好期待呀 ~

大快活 @ 九龍灣 ( 30-oct-2011 )

( 30-oct-2011 sun )

我次次如果一覺瞓到 7-8 個鐘   中途無醒嘅話   咁樣之後起身再瞓番   就好難瞓得着   就係因為咁   今朝 7 點 45 分已經醒咗喇   但又喺度諗   難得星期日可以瞓晏 d   不如瞓多陣啦   不過瞓極都瞓唔到   終於 8 點 15 分 起身喇   費事郁黎郁去整到里奧大人無覺好瞓 ~

依家鐘點唔黎   所以我就諗定點樣執屋   因為唔想一次過咁辛苦做哂   但做開又想即刻樣樣都做哂架喎 ~ 

早餐又未食   唔可以做 d 太操重嘅嘢呢   所以就抹鞋柜喇   里奧大人好煩架   次次我一買鞋就話呢對唔見我着   呢對又無着過咁   所以襯佢瞓覺就順便掉咗唔想要嘅鞋喇 ~

佢 10 就起身喇   一齊去太興食早餐   諗住影相嘅時候   相機個 mon 無畫面   但有 d 模式又影到   但我用開嘅模式又影唔到喎   雖然我部機都用咗差唔多 3 年   已我都好想換機   不過一諗到部機無壞   又唔想買新囉   但我慣咗影相   所以同里奧大人講話要即刻買機呀   買 G12 算   平平地玩下   但佢又話 S95 好 d   因為 configure 好 d 喎   但我鍾意 G12 機款   因為 S95 同我部差唔多款   買得新機更想轉下款家嘛   不過依家 S95 應該好平   咁又幾抵玩嘅 ~

食完就番教會喇   之後去德福行一陣   行下行下都差唔多 2 點 lu   所以就去大快活食 tea 喇 ~

里奧大人番到屋企又做公司嘢   我就幫佢煲中藥   之後開機洗窗簾   難得有陽光   之後就抹睡房   熨衫   超攰呀 ~  

今晚又會去大快活   因為我想打邊爐呀   里奧大人又唔打   所以去大快活就最好   你食你嘅嘢   我食我嘅嘢 ~ 

食完去買鞋   因為見里奧大人着對 Cross 好舒服咁   所以我又買對喇   之後佢就話咩都跟佢   咁又係喎   佢買咩我又想買架喎 ~

番到屋企抖陣   里奧大人就話出去徑步   我唔去啦   因為之前睇過環境   附近有條渠好鬼臭囉   我話你再聞下臭唔臭先   唔臭我都會去跑呢   佢跑咗 20 分鐘就番黎   話落雨   同埋話條渠唔臭喎   下次一齊跑呢 ~    

豉汁排骨雙腸煲仔飯 + ABC 雜菜湯 + 雪梨茶 ( 29-oct-2011 )

( 29-oct-2011 sat )

今朝要拎中藥比家姐   家姐咁啱又要覆診   所以一齊食埋早餐喇   我食牛扒好鍾意食牛筋架   家姐話同媽咪食牛扒見到牛筋嘅時候   就會第一時間諗起我呢 ~

番到菇場當然無 mood 做嘢啦   明明諗住上網睇報紙   點知突然有嘢做喎 ~

家姐覆完診就去我屋企坐陣   等埋我放工食 tea   但我要陪里奧大人睇中醫   估唔到佢又陪埋里奧大人一齊過黎   咁仲好   唔駛再約黎約去 ~ 

經過美心就入去睇下有咩食   好耐無去美心食 tea   見到 d tea 都幾吸引   所以食埋先番屋企   不過 tea 嘅份量係好細   但張相嘅份量係好大囉   呃人嘅 ~

食完同家姐去惠康買嘢   次次同佢去超市都一袋二袋   佢話如果住附近   成日一齊買嘢就慘喇   我話如果住附近嘅話   樣樣買一份 share 就搞掂啦   唔駛樣樣買兩份   同埋佢依家好鍾意買嘢食放喺我屋企   之後上黎一齊食囉 ~

家姐差唔多 4 點幾就走喇   我就幫里奧大人煲中藥   又煲雪梨茶   又熨衫拖地   超充實呀 ~  
   
是日懶餐 - 豉汁排骨雙腸煲仔飯 + ABC 雜菜湯 + 雪梨茶

豉汁排骨雙腸煲仔飯 - 唔知煮咩好   唯有煮我認為完全無難度嘅蒸排骨啦   今次又扮煲仔飯   不過其實係假煲   因為我只用將煲好嘅飯放喺煲仔度   再將蒸好嘅豆樣排骨同雙腸放喺飯面   里奧大人笑住話 A 貨   問我點解唔整真正嘅煲仔飯   我話我只識 A 貨咋   同埋 A 貨製作唔簡單架   又要預備多個煲仔   又要擺 d 餸上去   用唔小時間架 ~

ABC 雜菜湯 - 本來想整粟米湯   不過驚太飽肚   同埋豉汁比較鹹   所以都係想飲 d 酸酸地嘅湯呀 ~   

雪梨茶 - 天氣乾燥   超市買鴨梨又平   $8.8 / 5 個咋   所以買黎煲雪梨茶呢 ~

脆肉瓜什錦鍋 ( 28-oct-2011 )

( 28-oct-2011 fri )

Yoyo   Happy Friday 喇   早餐食豐富 d   因為依家開始減肥   咁晏晝同夜晚就食小 d 同清 d 咁呢 ~

番到菇場有小小嘢做咁啦   話咁快就搞掂   又係時候等 lunch 喇 ~

晏晝食 Special K + 高鈣脫脂奶   其實我超唔鍾意飲鮮奶架   好羶咁   同埋之前飲十字牌盒裝鮮奶   飲咗 2 啖皮膚即刻起紅點敏感呀   好鬼驚囉   今次飲高鈣脫脂奶仲難飲   同鮮奶味道唔同   又無咁滑   都係買番正常嘅高鈣低脂奶算喇 ~

放工去拎藥   之後再去街市買餸   再去惠康買生果就番屋企喇 ~

番到屋企飲咗碗中藥   所以唔係咁餓   咁等埋里奧大人番黎先一齊食   所以差唔多 10 點先開餐呢   好在今餐唔係啖啖肉   唔係肯定食唔落呀 ~

是日懶餐 - 脆肉瓜什錦鍋

脆肉瓜什錦鍋 - 材料有脆肉瓜   魚蛋  炸豆腐    灣仔碼頭韭菜豬肉水餃   我用紅衫魚湯煮哂所有嘢   之後再用沙爹王嘅 XO 沙爹醬黎炒   又幾好味噃 ~  

住家飯 @ 媽咪屋企 ( 27-oct-2011 )

果皮蒸泥猛 - 我同家姐都鍾意食鞋身嘅魚   唔鍾意食滑嘟嘟嘅魚   今次呢 d 大泥猛就好喇   因為唔係滑嘟嘟嘛   但媽咪就鍾意食滑嘟嘟嘅魚囉

栗子燜豬手 - 好入味呀   不過好驚食豬手囉


炒菜心 - 無特別架   不過晚飯一定要有菜囉

燒鵝 / 叉燒 ( 外賣 ) - 媽咪話驚唔夠時間煮多樣餸   所以就買燒味喇 


蓮藕栗子豬展湯 - 好鮮甜呀   一飲就知道用足料黎煲呢  

 

( 27-oct-2011 thu )

今朝又忍唔住再打去九巴熱線投訴呀   之前架車係 8:05 am 到站   咁尋朝架車就 8:02 am 到咗   不過我要等過馬路   所以送車尾   咁今朝就 8:00 am 到   咁預早 5 分鐘就最穩陣啦   點知架車 8 :12 am 到   咁即係點呀   d 時間咁唔穩定嘅   妳估係自己車鍾意幾時開就幾時開呀   番工時間黎家嘛   離哂大譜   我話上次投訴咗都仲未有人覆我呀   佢話報告未番   我話都好耐喇噃   之後佢話幫我跟跟 ~

食早餐嘅時候   8 卦走黎叫我   咁就一齊食啦   我咁啱又食唔哂塊麵包   比埋佢食   我就唔駛浪費啦 ~



菇場有 d 忙   但就唔駛急住做囉 ~   

Lunch 食低糖拿破崙   我好小 lunch 食呢 d 甜嘢   不過里奧大人又唔想食咁   唯有自己食囉 ~

放工去拎藥   之後番媽咪屋企食飯   今晚唔知點解突然之間好攰   食完好想瞓覺   次次去媽咪屋企食飯都好飽   今晚飽到連生果都唔食喇 ~

8 點半就同家姐一齊走 lu   打比里奧大人   佢啱啱放工   喺深圳番到屋企到差唔多 10 點   陰公 ~

番到屋企即沖涼   之後熨衫   鐘點依家唔黎架喇   所以好多嘢都會自己做番   好彩我都唔抗拒做家務   因為我鍾意屋企乾淨整齊嘛 ~

依家如果時間許可   我都會煮嘢比里奧大人食嘅   頭先買咗魚蛋   所以煮個出前一丁比佢食   等佢開心下   之後我會問佢開唔開心   再之後話無人會對你咁好   佢就會好感激咁講唔該哂架喇   係喎   我其實都好攰架   不過想里奧大人食得舒服 d   又唔駛一個人喺出面食咁慘   所以我先煮咋 ~

叙苑粉麵茶餐廳 @ 九龍灣 ( 26-oct-2011 )

( 26-oct-2011 thu )

今朝食通粉餐   已經走包同埋要小通粉   但都食唔哂添 ~

 

番到菇場就忙喇   因為尋日無乜點做嘢   今朝就要做番哂啦   做到 12 點先做完   woo   咁樣 d 時間過得好快   超充實呀 ~

Lunch time 唔係好餓喎   所以 1 點幾先食 3 塊朱古力餅   已經覺得好飽喇 ~



晏晝又忙忙地咁   所以又好快放工咁喇 ~

里奧大人今日上大陸   所以我今晚同家姐一齊去睇中醫   7 點開始睇   我又係血氣唔夠   佢話煲北芪當參會好 d   我地差唔多 8 點先走   因為又同個醫師傾下計咁囉 ~

家姐想掃街   所以陪咗佢食咗橙色果 d 生腸同腎   煎釀三寶同辣魚蛋   我食咗小小咋   因為我仲要陪里奧大人食飯呢 ~

同家姐一齊搭巴士   佢喺中途轉車番屋企   我就直接去九龍灣   里奧大人都差唔多 9 點幾到九龍灣   佢想食煲仔飯   所以去叙苑喇   不過無咁好食 lu   同埋 d 材料小咗好多呢   無計啦   咩都貴哂嘛 ~

牛肉盅頭飯 + 魚片頭河 + 菜心 ( 外賣 ) @ 屋企 ( 25-oct-2011 )

( 25-oct-2011 tue )

今朝都 ok 啦   不過都係好攰   所以都係搭的士番工   咁樣可以瞓耐 d ~

買咗醬占包同咖啡   再加一杯菜蜜番菇場   不過只係想飲咖啡   好在無胃痛咋 ~

菇場又忙   不過其實都無乜點做嘢   個肚有 d 戚戚痛   其實唔辛苦嘅   不過就唔想郁咁囉 ~ 

晏晝上網睇咗陣報紙就瞓覺喇   瞓咗 40 分鐘   精神好多呢 ~

差唔多 5 點先有胃口食嘢   食埋今朝買嘅醬占包   太好喇   唔駛浪費嘢 ~

放工即走啦   番到屋企即沖涼   再等里奧大人放工買嘢比我食 ~

佢差唔多 8 點幾先走   好在我又唔餓   本來想食牛什米   但講講下又想食牛肉飯   因為我次次都覺得唔舒服食粉麵   d 湯特別鹹咁架   所以都係食飯好 d ~

蕃茄意式肉丸青口意粉 ( 23-oct-2011 ) & ( 24-oct-2011 )

( 23-oct-2011 sun )
今朝同里奧大人去 Delifrance 食早餐   價錢同太興差唔多咋   想轉下環境   不過咖啡唔好飲呢 ~

( 烘芝士火腿蛋小班里尼包 )

( 煙三文魚炒蛋配牛角酥 )

食完就番屋企沖涼   之後就番教會喇 ~

家姐今日要喺惠康買米呀   因為我有 Enjoy 卡嘛   好在有里奧大人幫手枱米啫   買完就去大家樂食 tea   我等咗位之後就叫里奧大人過黎坐   之後我去揀嘢食   然後里奧大人同我講我隔離個男仔好有責任心   因為我行開去揀嘢食   里奧大人坐埋去   個男仔好緊張話張枱係個女仔   咁里奧大人就話我識得個女仔   我話個男仔係傻架   因為佢食完無啦啦好輕佻咁講 " 咁多人走我又走先 "  之後又拎起隻碟   食埋跌落餐紙果粒飯   仲津津有味咁   我話正常人走就走啦   點會無啦啦講我又走先架   好在佢真係走   唔係就慘喇 ~

食完就各自歸家   里奧大人要做公司嘢   所以我又做家務   整依樣整果樣   d 時間過得超快呀 ~ 

是日懶餐 - 蕃茄意式肉丸青口意粉

蕃茄意式肉丸青口意粉 - 我想清冰箱 d 嘢食   所以今晚就煮呢個意粉喇   今次加咗兩片車打芝士   我覺得同蕃茄味唔夾呀   搞到好滯咁   但問里奧大人食唔食得出有芝士味   佢話食唔出   只係覺得好漏   唉   仲有成包車打芝士   都唔知點算好添 ~

( 24-oct-2011 mon S/L )

每月一到呀   好感恩其實真係唔太痛   不過就真係好攰囉   咁里奧大人又作唔舒服   請咗朝早半日休息   咁我都請 S/L 喇 ~

打完比菇場就再瞓   瞓到 3 點起身睇醫生   番到屋企沖完涼再瞓 ~

差唔多瞓到 7 點   之後唔敢瞓喇   驚夜晚瞓唔着   見有 d 胃口   食埋今朝里奧大人買比我嘅腸仔包當晚餐就算喇 ~

唉   里奧大人成 8 點幾先放工   我真係再食唔落嘢   所以佢自己食埋嘢先番屋企呢 ~