住家飯 @ 媽咪屋企 ( 31-may-2012 )

蒜蓉蒸蝦

蒸青斑

黑椒牛仔骨

炒通菜

青紅蘿蔔粟米江瑤柱蠔豉瘦肉湯

妃子笑

皇帝蕉 / 芒果

( 31-may-2012 thu )

之前喺巴士站識到位太太阿姐   咁佢話養魚無用泵   所以我又學下養魚   不過原來都係有泵好 d   我尋日等車又見到佢   傾開養魚 d 嘢   佢話要有水草架   咁我話下次去買   佢話比 d 我   佢有好多   我話唔駛啦   星期六會出去買   點知今朝佢比咗 d 水草我呀   我好開心呀   佢咁有我心 ~

今朝食麵餐   超級飽呀   無啦啦覺得好脹胃咁 ~   

晏晝食穀麥片 + 麥精   因為早餐食得太勁呀 ~

里奧大人今日唔駛上大陸   不過我都會去媽咪屋企食飯呢 ~

唔知點解   次次一番媽咪屋企   就會覺得特別快肚餓   可能知道有自己鍾意嘅餸菜啦 ~

番到媽咪屋企第一件事多數飲一大碗湯   食埋湯渣已經飽咗 7 成   所以次次都係食兩啖飯   最主要食餸呢 ~

今晚同家姐坐到 8 點半就走人 lu   因為佢次次係都要等埋我上車先走   咁我都唔太夜走喇   有時要等 10 分鐘先有車架   但有時又好快有車 ~

咁啱里奧大人又到咗九龍灣   所以陪佢坐啦   難得茶餐廳有卡位坐 ~

金拇指米線 @ 九龍灣 ( 30-may-2012 )

我嘅豬潤麻辣米線 ( 2 辣 ) - woo   ok 喎   味道比我想像中好   咁第時唔駛特登去譚仔食 lu   不過下次會要 4 辣   都係辣 d 過癮 d ^^

里奧大人嘅牛肉 / 豬軟骨酸辣米線 ( 1 辣 ) - 我發覺佢自己去完馬來西亞之後   食辣勁咗咁呀   佢話下次會叫 2 辣都應該無問題   以前佢咩都話咗驚辣先架   依家佢有時食得仲辣過我呢   正 ^^  

菜心 - 今次好好多喇   因為係熟   上次真係好似無淥過咁架

炸餃子 - 超想食囉   講咗 4 次   不過里奧大人話驚食唔哂   所以唔敢叫   但佢話知我真係好想食   因為講咗好多次   哈哈   味道就無咩特別   因為我純粹係超想食炸嘢嘅啫

( 30-may-2012 wed )

yo   星期三喇   天氣唔錯   心情都好好 ~

無啦啦好想食麥記呀   所以行番轉頭食 ~

菇場靜   所以依家訓練自己打 keyboard 細聲 d   不過都幾難   好記得舊同事話見工時   好似要睇一分鐘可以打幾多字   佢話入到房聽到 d 打字聲好似槍林彈雨咁樣   我覺得佢形容得好搞笑   之後我就開始留意人打 keyboard   里奧大人又係打得好鬼大聲   仲好大力咁打   不過我發覺自己都打得好大聲   因為菇場實在太靜嘛    同埋如果同老友 m   簡直忘我境界好投入咁打   都無留意原來 b lee ba la 好大聲咁呢 ~

好快到 lunch time 喇   今次都係帶 lunch box   不過食完好滯   食飯真係好滯   下次都係多餸小飯算喇 ~

飯氣攻心   要飲咖啡添呀 ~

放工即走喇   因為趕住睇中醫   好感恩今次好快睇完   同埋好感恩里奧大人又差唔多喺大陸番到黎   佢話想食米線   不過驚我唔想食   因為我話呢間酸辣唔好食   但我話會試麻辣米線嘛   估唔到真係有驚喜呢 ~

魚香茄子 ( 29-may-2012 )

( 29-may-2012 tue )

又係天陰陰   真係好想瞓耐 d 呀 ~

無咩胃口   食奶醬多算喇 ~


呵呵   好彩都忙忙地   hea 多陣就 12 點   可以叮飯   行下無咁悶 ~

依家帶 lunch box 喇   無計啦   懶得出去食   同埋好怕食茶餐廳 d 餐   太大份喇   同埋我唔想飲杯嘢   我覺得一日一杯已經好足夠   食唔哂又浪費   但夾硬食又辛苦   但叮叮又唔可以成日食   炒米粉又驚食到厭   所以都係帶 lunch box 算喇 ~

yo   終於放工   感恩菇場附近有新開線嘅小巴線可以番到屋企   同埋又可以到街市門口   咁就最好啦   車費又平過巴士   其實時間就同搭地鐵差唔多   地鐵最平   不過我唔鍾意搭地鐵感覺   行上行落   同埋又要行一段路先到   唔買餸都 ok   買餸就唔好喇   因為我鍾意快買快 d 番屋企預備 ~  

里奧大人上咗大陸開會   差唔多 9 點半先番   所以我又食先   之後沖涼再熨兩機衫   超攰呀 ~   

是日懶餐 - 魚香茄子

魚香茄子 - 買 2 條大茄子   啱啱好 $10   又可以搭多條蔥   依家真係唔係度度有得搭蔥架   今次醬汁又係自己調   只係用甜醬 + 辣豆辦醬   估唔到里奧大人話好好味   但就甜咗 d   辣番小小仲正喎   不過我話驚佢太夜食   唔想食得太刺激   等下次早 d 食嘅時候就可以加埋指天椒   應該更惹味 ~

黑椒雞絲意粉 + 粟米蛋花湯 ( 28-may-2012 )

( 28-may-2012 mon )

yo 星期一喇   個天灰灰暗暗   又毛毛雨   不過唔緊要啦   最緊要唔好橫風橫雨就得架喇 ~

今朝食餐蛋治   懶得用湯匙同叉食嘢呀 ~

菇場都忙咗陣咁啦   之後又等 lunch time 喇 ~

本來諗住食穀麥片   不過又好似好餓咁   所以行一陣再買炒米粉番菇場食   飽 d 精神 d 嘛 ~

放工即走喇   去完超市就番屋企執嘢   開機洗衫   預備晚餐   搞掂哂都已經 7 點半   今晚自己食先   因為想快 d 食完再執下嘢   8 點里奧大人打黎話放工   咁我仲更加要加快步伐   因為我想拖地   如果佢喺度比較煩   因為佢唔會自動自覺行開比我拖地 ~

是日懶餐 - 黑椒雞絲意粉 + 粟米蛋花湯

黑椒雞絲意粉 - 好耐無煮啦   感覺好似煮新餸咁呀 ~

粟米蛋花湯 - 無買菜就係飲粟米湯   同埋我真係好鍾意飲囉 ~

Riso Café @ 九龍灣 ( 27-may-2012 )

( 28-may-2012 sun )

今朝 9 點 15 分起身   食完早餐就番主日學之後再崇拜   今次里奧大人朋友又黎咗   好在唔駛一齊食 lunch   因為實在大把嘢未做呀   食一食又無咗兩個鐘   我情願快快手執好哂嘢好過 ~ 

去完百佳買生果就番屋企陣 hea 陣就去食 tea   食完就即番屋熨兩機衫先   之後又執執執   估唔到又執好埋個廚柜   呢下最開心   執呀執   好似執一世都未執完咁   里奧大人又無幫手   掛住睇之前買落嘅書   因為我話妳唔睇就即掉   所以佢快快趣睇完即掉   所以佢係無幫手執嘢 ~ 

終於執到我有 d 火喇   我話放棄唔執喇   就算有人黎都由得 d 嘢周圍放算數喇 ~ 

呢兩日執嘢好攰   又唔多舒服   都係出去食飯好 d   唔夠精神好鬼易病 ~

食完番屋企又執啦   里奧大人知驚主動執喇   不過執佢自己果 d   因為我話我次次一執好有空位   佢就會即刻擺嘢   明明唔係擺果度都擺   我話我真係無心機執   執完又擺   執完又擺   之後見到仲有件抓毛同厚褸未洗   我發火啦   我話呢 d 咁厚衫都唔係依家着啦   佢就話之前着   咁我仲火   依家仲掛喺度   天氣唔好先黎洗   一世都未乾啦   同埋問題係洗一件厚褸會佔咗半機位家嘛   咁又要將本應洗嘅衫遲 d 洗   沒完沒了啦   痴線   其實我執嘢洗衫真係完全無問題   但你唔好咁丫嘛   以為執嘢好簡單   雖則我係亂中有序   但大佬呀   我執嘢都要用時間架 ~

大快活 @ 九龍灣 ( 26-may-2012 )

呢個叉燒拉麵係最後食嘅   加麵加黑蒜汁一齊落鍋   焗十幾秒就可以食  

( 26-may-2012 sat )

今朝 7 點 45 分起身   其實可以 8 點先起身嘅   不過會成日發夢無車同埋遲大到   仲瞓得衰   所以都係早 d 起身算   反正都已經比平時瞓多 20 分鐘已經好好多啦 ~

早餐食吞拿魚火腿三文治 + 咖啡   嘆下報紙   真係好享受   但其實平時都係咁   但覺得星期六係特別唔同   特別 relax 咁呢 ~

番工等放工   番到屋企 hea 陣   等埋家姐一齊去食車仔麵   之後送埋佢搭車   我就番屋企喇 ~

上星期六喺 Ikea 買咗個零食柜同掛衣架   今日準時 3 點送到   好在叫佢地安裝   唔係有排搞 ~

擺好位置又出發去中旅社睇資料   之後再陪里奧大人去 Unilqo   佢無啦啦又買咗 3 件 tee 同太陽眼鏡   咁搞到我又去第度買咗副太陽眼鏡   唔知點解   佢買嘢我又想買咁架   之後我買埋個袋就去大快活食嘢喇   因為好想打邊爐   不過里奧大人話唔食   咁大快活囉   各有各食 ~

食完有氣有力啦   執咗兩個幾鐘頭   好似新居入伙咁執   攰到痴呀   頂唔順呀   都係沖涼   留番聽日再執 ~    

蜜糖焗雞翼 + 司華力腸 + 出前一丁 ( 25-may-2012 )

( 25-may-2012 fri )

yo   happy friday 喇   好似眨眼就到星期五咁   唔錯唔錯 ~

菇場靜啦   靜到我都想瞓 ~

晏晝去萬寧買嘢   之後再買冷麵番菇場食   咁就已經 1 點幾 lu ~

今晚煮飯喇   好似好耐無煮咁   里奧大人又上咗大陸   我可以多 d 時間預備 ~

抖咗幾日   n 樣嘢未做過呀   所以番到屋企解凍雞翼就即開機洗衫   熨衫再抹嘢   搞掂哂就等埋里奧大人番黎先開餐   今晚算好啦   9 點幾有得食 ~

是日懶餐 - 蜜糖焗雞翼 + 司華力腸 + 出前一丁

蜜糖焗雞翼 - 超方便又好味   里奧大人問點解唔似出面街食咁樣一絲絲蜜糖喎   我話無心機睇會好易燶   所以我唔會整到咁   食就食   唔好咁煩 ~

司華力腸 - 家姐訂比我架   我超鍾意食腸   不過唔可以食咁多呢 d 加工嘢 ~ 

出前一丁 - 里奧大人話食麵喎   我話其實煮麵煩過煮飯   不過都會煮嘅   唔好晚晚食就得架喇 ~

之前覺得手機上網真係無咩用   因為我番工可以上網嘛   依家覺得手機可以上網係非常之有用   因為想同老友幾時傾計都得   或者就咁 send 個 icon 就知我做緊咩   超方便 ~  

住家飯 @ 媽咪屋企 ( 24-may-2012 )

韭菜花炒鮮魷

蒸煙鯧魚

白切雞

蒜蓉辣椒豉油 

炒生菜

苦瓜黃豆蠔豉雞腳排骨湯

芒果

( 24-may-2012 thu )

哎呀   個肚赤赤肚添   但都 ok 嘅   唔好抽住抽住痛就得架喇 ~

早餐其實唔想食   不過又係驚餓啦   所以叫咗份奶醬多   食得半件咋   留番半件做 lunch ~



菇場忙啦   無計啦   唔在狀態下我唔會做嘢架   好易出錯嘛   今日 ok 番哂   就要即做啦 ~

Lunch 食埋件奶醬多   其實都唔想食   不過費事浪費嘛 ~

放工去媽咪屋企食飯   都無咩胃口   今晚都係早 d 番屋企休息   所以同家姐差唔多 8 點半就一齊走 lu ~
番到屋企見到里奧大人買咖哩牛腩飯番黎食   食得幾滋味   佢真係食街嘢零舍滋味咁架喎 ~