2012年11月30日星期五

住家飯 @ 媽咪屋企 ( 30-nov-2012 )

蒜蓉蝦 - 媽咪用咗 4 個蒜頭黎蒸   超勁多呀 ^^


果皮蒸泥鯭


冬菇栗子燜雞


炒菠菜


蓮藕蠔豉鴨腎豬骨湯

( 30-nov-2012  fri )

又到 happy friday 喇   超開心   不過 d 天氣就好唔得喇   回南天咁   好似好攰 ~

今朝坐埋最後一次 van 仔喇   有 d 失落   因為好難得遇到一個咁好人嘅司機叔叔呢 ~

早餐食餐蛋治   飽到呢 ~  


菇場靜呀   真係要靜呀   勁唔想做嘢囉 ~

晏晝食麥皮沖好立克   懶得出去食嘢 ~

又咳又流鼻水   不過唔睇醫生住喇   聽日盡情瞓先   最搞笑 8 卦經過我位   m 我問我咩事   可唔可以講出黎   我唔知佢講咩   仲以為佢 m 錯我   原來佢以為我喊呀   其實係我啱啱打完乞痴   所以眼濕濕同埋鼻紅紅囉 ~

里奧大人又上大陸   我就去媽咪屋企食飯喇   其實我感冒唔想同媽咪講   唔係佢又好擔心   不過見佢話整蒜蓉蝦   所以我話我感冒   想要食多 d 生蒜   之後講完比佢聽唔夠一分鐘   媽咪又打黎叫我睇醫生   之後番到屋企又叫我睇醫生   但我唔想食西藥   情願盡情瞓好過   感冒唔需要睇醫生   最緊要係瞓呢 ~

同家姐 8 點 45 分一齊走喇   我番到屋企即開機洗衫再拖地   其實潮濕天氣唔想拖地   地板好煩   好似好耐都唔乾咁呢 ~

里奧大人 10 點幾先放工   番到黎成 12 點   不過我唔瞓住   想陪下佢呀   大佬   真係幾日無見佢咁呀   陰公 ~

2012年11月29日星期四

雲南小鍋米線 @ 荃灣 ( 29-nov-2012 )

豬腩肉蘿蔔小鍋米線 ( 小辣 ) $28 - 腩肉好入味   初初睇個湯底顏色以為無味   點知越食越辣   同埋都唔小配料   我覺得好味過雲桂香同星林居添呀

( 29-nov-2012  thu )

今朝唔係好凍咁噃   但勁有回南天 feel 囉   加埋毛毛雨   勁唔鍾意呀 ~

早餐食扒芝腿治   實在太好味喇   呢排都勁鍾意食呢 ~



菇場今日靜呀   仲好   唔舒服唔想做嘢 ~ 

8 卦今朝喺深圳聽嘢   咁我正想出去 lunch 佢就打黎   同佢一齊出去食粉   之後我去買念慈菴   佢就番菇場先 ~


次次一番到菇場又係咁打乞痴同流鼻水   但出街同喺屋企又無事架喎   可能坐正風口位啦 ~

里奧大人上咗大陸又會夜番   所以我搵表妹剪髮   放工坐 van 仔去荃灣   去到唔知邊度要轉車   我問司機係咪要轉車   佢居然話 "咪話要轉車囉"   都痴線嘅   咁我問佢架車係咪去荃灣佢話係   我以為直去嘛   之後我話點知啫   痴線   真係忍唔住呀   之後上車坐低   我係 last 4   無耐聽見司機話個個坐低唔比錢   開唔到車呀   嘩   好在我一早拎定錢   所以即彈起身比   但又無寫明話上車比錢喎   又係痴線   上次同里奧大人坐 van 仔番屋企   好多人一上車比錢   司機話落車先比   里奧大人好奇怪點解 d 人會比錢先   我即刻同佢講有 d van 仔真係要比錢先架   如果唔係唔開車   因為我試過話落車比   佢話唔得呀   果時我三袋嘢喺手   幾咁狼狽呀 ~

去到千色店都係 6 點   真係好快   所以就算佢地態度衰都會坐囉   因為坐地鐵真係好耐   同埋我超唔鍾意坐地鐵   感覺好趕好趕咁   但人地明明係唔趕家嘛   行慢 d 都唔得咁 ~

等咗一陣就到我啦   同表妹傾開 d 推銷電話   最憎 d 人一聽到話唔要就 "cup" 線   佢話佢個客好驚聽到呢 d 電話   我話驚咩喎   唔聽咪得囉   佢話佢個客上次話唔要喇唔該   對方叫佢去死啦   嘩   我笑爆咀呀   駛唔駛呀   不過如果發生喺我身上   我果刻真係會激到痴線   就係呢 d 咁嘅人   搞到人地見到陌生電話就唔聽囉 ~

6 點 45 分剪完   又未餓   周圍行下   去完正隆行買完嘢都差唔多 7 點 45 分喇   去 van 仔站附近搵食   去到兆和街   覺得開始遠喇   所以唔敢再行   一陣認唔到路出去就慘   見到有間食米線就入去食啦   估唔到好味道呀   再去隔離買杞子桂花糕同椰汁紅豆糕就走人喇 ~


食到好飽   又周圍行下   比我見到 Boutique 有長 tee   又比我買咗 10 件衫同褲   爽呀   最鍾意一個地方買哂我要嘅嘢 ~

8 點半走人   滿載而歸番屋企喇   打比里奧大人   居然話要開會   8 點半都應該走人啦   喺大陸喎   仲要開會   真係人都顛 ~

番到屋企即沖涼呀   之後就灘喺梳化等里奧大人番黎喇   差唔多 11 點先番到屋企   第一時間叫佢食桂花糕   佢話好好食呀   不過我無試呀   差唔多 12 點先瞓   好在依家天氣凍凍地   都易 d 入睡咁囉 ~

$10 / 3 件 ( 我買咗 4 件杞子桂花糕 / 2 件紅豆椰汁糕 )


鹽焗夏威夷果仁 $130 / 黑椒豬肉條 ( $58 ) / 開心果 ( $23 ) / 紫菜豬肉鬆 ( $20 )


2012年11月28日星期三

雜丸極辛豬骨出前一丁 ( 28-nov-2012 )



( 28-nov-2012  tue )

又落毛毛雨   已經落咗一星期雨   下星期繼續落   唔好喇啩 ~  

以前非常之唔鍾意抽濕機   覺得其實無咩用   開冷氣仲好   依家唔同講法喇   無抽濕機唔掂呀   如果唔開   一機衫真係成星期都唔乾   最慘有裇衫西褲   同埋有 d 衫係唔焗得   一焗就縮水仲得了   所以依家一出門就開抽濕機   夜晚番到屋企成機衫都乾哂   可以繼續洗 ~

早餐食菠蘿包餐   之後 8 卦又黎埋   佢食茄牛治   真係一分鐘可以食哂   超勁 ~ 


今朝開始飲中藥   好在係藥粉   咁唔駛特登朝早煲熱   但又要食完早餐之後一個鐘飲   實凍哂啦   仲難飲 ~

唉   尋朝特登飲杯薑茶暖身   放工覺得喉嚨有 d 唔舒服   點知依家發哂出黎啦   好日唔飲   一飲就唔舒服   食榴槤都燥啦   但又無問題喎 ~

菇場超凍呀   本來想食麥皮架   不過都係出去行下好 d   食完去買嘢   真係無事出街小破財呢 ~


放工即走喇   番到屋企附近都係 5 點 45 分   想唔煮   但咁早又食唔落   上番屋企又唔願再落街   所以屋企煮麵食算喇   反正里奧大人今日上大陸又會夜番   我自己食先   之後熨衫同抹柜   本來想拖地   但真係唔想再做喇   好攰 ~ 

是日懶餐 - 雜丸極辛豬骨出前一丁

雜丸極辛豬骨出前一丁
- 好在記得之前剩咗 d 丸   終於清哂 ~  

食完就休息喇   睇下電視   玩下 Ipad   里奧大人 10 點 45 分先番到屋企   陪下佢睇電視   差唔多 11 點半就瞓呢 ~ 

2012年11月27日星期二

金姆指米線 @ 九龍灣 ( 27-nov-2012 )

泰式豬頸肉


七味雞軟骨


我嘅墨魚丸麻辣米線 ( 小辣 )

家姐嘅豬大腸酸辣米線 ( 5 辣 )

里奧大人嘅豬潤片酸辣米線 ( 1 辣 )

( 27-nov-2012  tue )

今朝落毛毛雨   所以非常之凍呀   真係要長袖衫同長褸呢   尋晚凍到滕滕震   呢 d 感覺真係好鬼辛苦   所以今日點都要好好保暖個身體呢 ~

早餐食雪菜肉絲鴨胸米粉   但其實想食   不過唔餓   所以食到有 d 驚 ~


菇場凍到震   凍過出面   所以沖杯黑糖薑茶暖暖身   但飲完都仲凍喎   係我本身勁寒   定係菇場勁寒呢 ~

食番尋日嘅 lunch box   食到 1 點 15 分   實在早餐仲未落格   真係要細細啖慢慢 dap   唔係食唔落 ~

放工約家姐去荃灣睇中醫   其實家姐尋日睇咗   不過驚我唔識去   所以帶我去   咁一齊喺太子站 join 埋一齊去荃灣   醫師又係話我係超寒底   好在係食藥粉   唔係真係好煩   煲中藥真係要好多時間   又要睇火先煩嘛   睇完醫師執藥嘅時候   家姐同事兩公婆都到咗   一齊傾咗 15 分鐘先走   女人真係特別多嘢講呢 ~

實在有 d 餓   去陳記買 2 串大辣魚蛋同牛柏葉   之後就坐 van 仔番九龍灣喇 ~

一上車即打比里奧大人叫佢放工   我地到咗金姆指先   20 分鐘後里奧大人都到埋   可以開餐 lu ~

食到 9 點半就各自歸家喇   番到屋企食埋碗芝麻糊   真係夠哂飽呢 ~  



2012年11月26日星期一

叉鴨飯 ( 外賣 ) @ 屋企 ( 26-nov-2012 )



( 26-nov-2012  mon )

嘩   起身有 d 太陽架噃   但又話今晚會勁凍   所以着短袖加風褸就算   但出到街又唔係咁凍噃 ~

今朝好感恩   因為之前司機叔叔話 cut 咗 2 班車   我諗住唔等架喇   但又想睇下會遲幾耐   反正我預咗多時間食早餐   就算等到 8 點半都無咩問題   但估唔到今朝 8 點 10 分又可以見到佢   原來佢話後尾佢阿頭叫佢做到月尾   咁就好喇   我可以坐到月尾呢 ~

早餐食扒芝腿治   芝蛋治其實都好好味   如果芝士係半溶狀態嘅話   但食完就真係超級超級飽囉 ~


菇場靜呀   星期一特別多朋友搵我 m   因為個個知我得閒   同埋星期一個個都無 mood 做嘢就係真嘅   同埋個天又黑哂   仲更加無 mood 啦 ~

家姐今日 off   所以約我食 lunch   其實我有帶飯   不過難得佢 off 同我食   我就帶佢食魚生飯   因為佢鍾意食呢 ~


食到 1 點 20 分就走喇   之後去埋銀行就番菇場 lu ~

今晚去旺角拎嘢   好在菇場長期有披肩同厚褸   晏晝出去已經覺得凍   夜晚落雨更凍   所以唔理三七廿一拎條披肩包住條頸   真係暖好多架   風褸薄切切   着咗等如無着咁啊 ~

拎完嘢就走   見時間都早   所以買埋半打拿破崙同椰撻比家姐   再買埋兩碗芝麻糊比里奧大人就搭巴士番屋企   好在有位坐咋   一袋二袋真係好辛苦   但我堅持要搭巴士   平小巴一半呀   我覺得搭平車好開心 ~

約咗家姐喺停車場交收   里奧大人原來都已經喺九龍灣 lu   叫佢買飯盒番屋企食   我就食埋尋晚食剩嘅飯餸   其實難得里奧大人咁早放工   真係超勁想同佢出街食   不過尋晚食剩差唔多成個餐   要掉咗去真係好鬼折墮   又唔想留到星期三做 lunch   所以我話食埋去喇 ~

食完抖陣就熨兩機衫   好在開咗抽濕機   唔係 d 衫有排都唔乾呀 ~

2012年11月25日星期日

日月星茶餐廳 ( 外賣 ) @ 屋企 ( 25-nov-2012 )



( 25-nov-2012  sun )

今朝勁喇   8 點起身   因為加拿大嘅堂細佬番黎香港   所以一齊去媽咪屋企附近酒樓飲早茶呢 ~

其實都未瞓醒   行到巴士站先見到原來表哥表嫂排緊隊等車   又會咁啱嘅   佢唔叫我我都唔知呀 ~

約咗 9 點   我地 8 點 45 分到喇   洗下杯碗   d 人都陸陸續續咁黎   今次總共 23 個人飲茶呀   第一次咋   兩張大枱   最搞笑係堂表弟 d 朋友一齊黎飲嘛   佢地計埋都 7 個人   不過 d  ABC 對飲茶又好有興趣呢 ~

飲到 10 點半   送埋佢地去巴士站都差唔多 11 點幾 lu   之後我地同埋家姐就上媽咪屋企坐下   拎埋家姐 d 手信   1 點走人喇 ~

里奧大人番到屋企即瞓呀   我都瞓咗半個鐘   真係好眼瞓呀 ~

頭先無咩點食嘢咋   所以 2 點即出去大快活食 tea    又落緊毛毛雨又大風   今朝着得小衫   個人好似有 d 唔舒服   食完即番屋企休息喇 ~


又煲 "美食法庭"   好快又到 6 點咁   我就食番尋晚食剩嘅牛扒   所以叫外賣比里奧大人食喇   懶得出去買呀 ~

2012年11月24日星期六

Cafe Lagoon @ 九龍灣 ( 24-nov-2012 )

美國西冷牛扒配薯菜 


澳洲 T 骨牛扒配薯菜


羅宋湯


餐包


曲奇奶油朱古力咖啡



( 24-nov-2012  sat )

今朝 8 點起身   8 點半 8 卦就打黎問我喺邊   我喺屋企樓下咋   不過搭快 van   所以都好快到菇場附近茶餐廳食早餐呢 ~


諗住 hea 過   點知有嘢做   所以好快就放工咁喇 ~

個肚仲有 d 唔舒服   但就唔係超辛苦果隻囉   同埋感恩係有胃口食嘢   所以我沖個熱水涼先   之後再叫里奧大人買點心番黎一齊食 ~

雞球大包 / 生煎包



炸魚餅 / 炸雲吞

食完十級飽   又瞓唔到   所以煲番之前錄咗嘅 "美食法庭"   睇到 6 點幾就出去食嘢   頭暈暈唔想行咁遠   所以去 Cafe Lagoon 喇 ~

2012年11月23日星期五

米粉 ( 23-nov-2012 )

( 23-nov-2012  fri )

今朝瞓到 8 點半   去 KFC 買完早餐之後搭貴 van 仔番工   番到菇場已經 9 點 20 分 lu   好在唔算最遲 ~

忙咗成朝   lunch 食糙米芝士包   叮番熱好味好多   無咁乾 ~


2 點幾無啦啦個肚痛喎   今朝仲諗好開心個肚唔痛添   不過呢次痛又接受到   唔駛典黎典去   但就嘔囉   勁想番屋企   忍到 5 點半即打的番屋企 ~

抖陣無咁痛就沖個勁熱水涼   舒服好多呢   之後瞓咗 1 個鐘   覺得肚餓   飲包蜜瓜豆奶   再焗個米粉   飽哂 ~

里奧大人 9 點半先喺大陸放工   番到黎都成 11 點   傾咗陣計我都入房瞓 lu ~

2012年11月22日星期四

海皇粥店 @ 九龍灣 ( 22-nov-2012 )


( 22-nov-2012  thu )

嘩   潮潮濕濕嘅天氣真係令人好唔舒服呀 ~

今朝坐 van 仔   司機叔叔話佢做埋今日   咁成架車得我同另一位小姐   另一位小姐聽到咁情況   就教佢應該點點點咁做   呢個司機叔叔真係超級好人   成日會等埋人先開車   好似我喺德福站係我同其他兩位小姐   如果佢見仲有一位未黎到   就會等多 1 分鐘   無就開車   之後去到另一個站就會等埋兩母子先開車   有時已經開咗車   但佢見到兩母子喺對面馬路   叫我地等埋佢地   幾咁好人呀   同埋我落車嘅位唔係站黎   係佢知道我地呢度落車方便番工   所以特登比我地落   妳話呢 d 咁好人嘅司機邊度搵喎   但可惜呢條線唔做啦   佢仲話 d 車已經 cut  咗兩架   所以我地都話朝早唔搭喇   唔知等幾耐 ~

早餐食腿蛋治   媽咪同家姐鍾意食火腿同雞蛋   我就唔係喇   因為茶餐廳多數都係有餐腿蛋呢 ~


菇場忙呀   好開心   因為做完已經 lunch time 喇   個肚谷住谷住   所以都係食麥皮算喇 ~

終於每月一到   感恩唔太痛   只係有 d 扯住扯住   對我黎講已經係好好好好   因為我好多時第一日已經想嘔   今次 everything ok   感謝主 ~

今日見自己唔舒服   所以好怕凍   咁去停車場等 van 仔   唔駛食風   咁差唔多 5 點 50 分有架 van 仔埋站   佢開門我以為開得車   點知佢話 6 點 10 分先開   嘩   好在真係心血來潮去停車場等   唔係吹風吹到病都似   咁佢叫我可以坐喺車度等   不過我費事啦   因為佢開住冷氣   我覺得好凍呀   所以去一田行下先   夠鐘就上車喇 ~
難得有胃口食嘢   所以去海皇食艇仔粥   最緊要暖下個胃呢   番到屋企又即沖個超熱水涼   正到呢 ~

里奧大人 7 點半放工   佢去大快活買飯番黎食   佢話大家樂四寶飯唔包飲品要 $39   去大快活買只係 $32 仲包飲品   仲話有次見到有個男人喺大家樂度嘈   話 $35 買咖哩牛腩飯得 2 舊仔牛腩   之後經理比多幾舊佢喎   呢 d 咁嘅大集團真係好唔掂   錢又識加   量又係咁減   唔成正比   難為我地 d 小市民呀 ~

驚自己會嘔   所以食止暈止嘔藥   但呢隻藥會令人昏昏欲睡   我真係食咗藥半個鐘之後已經想瞓   之後 8 點 15 分已經喺梳化瞓咗   里奧大人 8 點 45 分叫我入房瞓   果時我已經溫溫燉燉喇   d 藥真係勁 ~

2012年11月21日星期三

叉燒 ( 外賣 ) + 清炒菜心苗 ( 21-nov-2012 A/L )




  
( 21-nov-2012  A/L )

今朝 8 點 45 分起身   去 KFC 食早餐   之後就番屋企沖涼出發去將軍澳醫院小禮堂向叔叔鞠躬 ~



真係好感恩   尋日家姐打長途比我   傾到最後我問佢坐咩車去將軍澳醫院   好在問咗佢咋   唔係我以為屋企附近有 98C 呀   係就慘喇   因為根本係無 ~

坐 van 仔去牛頭角地鐵站   再轉 98A 就直接到醫院門口   嘩   架車慢到呢   差唔多 40 分鐘   我 10 點 55 分去到   話就話 11 點開始   好在 11 點 15 分先開始咋   唔係我尷尬到暈呢 ~



今日得我去咋   家姐去咗旅行   里奧大人要見客   媽咪條氣有 d 促同埋又咳   好在我所有表哥都有到   咁可以傾下計   其實都幾年無見   但一傾又可以好投契   細細個成日一齊玩架   大個之後無聯絡 lu   不過佢地個個都一樣   同以前一樣咁和藹可親 ~

11 點 45 分完畢   我無跟大隊上山呀   因為已經約咗媽咪飲茶   如果上山要食英雄飯   咁要媽咪等好耐   所以唔去喇 ~  

坐番 98A 番官塘   25 分鐘咋   唔坐呢架車都唔覺頭先果架咁鬼慢 ~

同媽咪飲到 2 點就走人喇   媽咪仲咳   天氣又凍   所以同媽咪即刻番屋企喇 ~



番到媽咪屋企灘喺梳化度唔願郁呀   之後媽咪叫工人沖咗杯檸檬薑茶我飲   飲完火燒喉嚨咁呀   但個身都暖咗 d   但又無發滾果隻喎   媽咪話我係咪寒底到咁犀利呀 ~  



4 點幾走喇   去太興買完叉燒就番屋企   天氣勁潮濕   要喺房開抽濕機   好怕呢 d 天氣呀 ~

本來諗住瞓陣   不過又瞓唔到   所以就抹書房   終於了咗件心事   舒服哂 ~

好餓呀   所以 7 點炒菜   食埋尋晚嘅意粉   之後就等里奧大人番黎喇 ~

是日懶餐 - 叉燒 ( 外賣 ) + 清炒菜心苗

叉燒 ( 外賣 )
 - 最低消費 $20   呢個師傅超勁呀   一切就 $18   之後再切就 $19   幾驚之後佢一切就切到 $21 呀   估唔到切到啱啱好 $20   因為之前有個幾咁衰呀   一切就切咗 $27 比我   我一定唔要   最後好似 $23   咁我自己都預係 $21-$23   其實我都唔鍾意食叉燒嘅   只係用黎炒麵時吊味之嘛   不過我估真係次次買叉燒都係整叉燒炒麵   因為我同佢講話今晚食叉燒   佢第一句就問係咪叉燒炒麵 ~

清炒菜心苗 - 喺媽咪屋企拎架   媽咪又食唔哂   我又唔想買   咁媽咪就比咗一半我呀 ~  

里奧大人差唔多 9 點半先番到屋企   我煮辛辣麵佢食   之後佢見到 d 菜同叉燒就話咁多餸食唔哂   我發火話唔好成日咩都話食唔哂   好煩   尋晚又係   煮一餐飯唔係好難   但都唔易   買浸切洗煮   呢 d 都用唔小時間   成日一見到 d 餸就話飽真係聽到我好煩   半碟叉燒 10 條菜唔係好多咋嘛 ~