2013年1月31日星期四

住家飯 @ 媽咪屋企 ( 31-JAN-2013 )

陳皮蒸泥猛


瑤柱海參炒脆肉瓜


沙嗲魚蛋雞紅 - 完全無味 @.@  媽咪話鍾意淡喎   我話咁妳下次唔駛落沙爹啦   就咁白烚   咁唔駛嘥咗 d 沙爹醬


髮菜冬菇蠔豉燜豬手


黑豆紅棗當參山斑湯

( 31-JAN-2013  THU )

眨下眼又到月尾喇   好感恩呢個月過得好開心   達成幾個目標   2012 年所有唔開心嘅嘢要忘記   將好嘅嘢放到最大   自己講嘅嘢或者做嘅嘢令人唔舒服   一定要講對唔住   每日飲 5 杯水啦   做下運動   減肥   睇聖經   認真聽道   唔可以亂發脾氣   講嘢要留後路比自己   嘩哈哈   其實唔係咩目標   只係唔想再好似以前咁比好多藉口去逃避啫   所以我依家真係每日都好開心   個人都特別精神 d 咁架 ~

尋朝食咗米粉餐   真係太飽喇   所以今朝食番奶油多呢 ~


番到菇場有 d 嘢做   之後執下文件   又抖下咁   好快又到 lunch time 喇 ~


食完就去一田幫 8 卦買嘢   之後又行超市幫家姐買午餐肉   重到呢 ~
里奧大人上咗大陸   所以又去媽咪屋企食飯喇   真係好感恩呀   因為之前同公司唱咗 d 新銀紙   可以今晚順便拎埋比媽咪   我又可以了咗件心事 ~

家姐 6 點半番到屋企   咁又可以早 d 食飯   最好不過啦 ~

同家姐 8 點 15 分走喇   番到屋企就沖涼   食下零食   里奧大人 10 點番到屋企   見我熨衫覺得好出奇   因為我好小咁夜熨衫   其實我因為食咗零食   熨衫當做運動啫 ~


2013年1月30日星期三

醬爆牛仔骨 + 西蘭花 ( 30-JAN-2013 )



( 30-JAN-2013  THU )

今朝 7 點醒咗去廁所   之後就瞓唔番 lu   等到里奧大人鬧鐘響就一齊起身喇 ~ 

每朝早要着嘅衫褲   最好尋晚拎定   咁樣起碼快 5 分鐘   所以今朝我要等番里奧大人轉頭呢 ~

勁想食米粉呀   真係十級飽   下次都係留番假期先食好 d   因為食唔哂可以比里奧大人食 ~



菇場一般忙呀   但做 d 濕濕碎碎嘢囉   咁都好   時間過得都幾快 ~

今日食完 lunch box 就同 8 卦去一田行下   順便試 d 年糕   好在佢都算為食   可以陪我睇下零食嘛 ~

放工即走喇   去超市買醬汁   再買埋黑糖就番屋企 lu ~

我又食飯先喇  里奧大人 8 點幾先放工   所以等佢番到黎再食埋   幫佢洗埋碗我先沖涼   咁就 10 點喇 ~  

是日懶餐 - 醬爆牛仔骨 + 西蘭花

醬爆牛仔骨
- 里奧大人生痱滋   講明話唔食黑椒汁呀   咁我就整醬汁牛仔骨囉 ~ 

西蘭花 - 之前喺街市買架   $10 / 3 個   超級抵   所以忍唔住買   原來都好多下   真係 5 個人食都得呀   我要分 2 個鑊浸   又要分 2 次淥添呀   呢餐西蘭花抵啦   食足 3 餐 ~  


尋晚里奧大人餵魚   見到有條得番個頭咋   我睇嘅時候仲以為係海棉黎添   做咩咁架  魚食魚   無理由唔夠食喎   唉   咁下次都係再餵多 d 算喇 ~



彩色呢條魚仔   原本買咗 5 條架   之後每日就升仙 1 條   諗住買 d 貴貴地 $48 嘅魚仔黎養   點知   雖然唔係我打理 d 魚仔   但都覺得好慘囉 @.@   下次要問番老闆娘點解會咁先得   咁下次就知點養嘛 ^^  


2013年1月29日星期二

椰菜炒五花腩 + 大白菜豬肺湯 ( 29-JAN-2013 )



( 29-JAN-2013  TUE )

今朝里奧大人鬧鐘響咗   咁我都醒 lu   同埋佢一齊出門口   陪佢買麵包   又可以賺 $20   因為佢好多時都會比散銀我嘛   我就次次都會話都唔夠食早餐   佢今次比咗 4 個 $5   之後佢比錢時   我叫佢嘟   佢話比其中一個 $5 咪得囉   之後我話我蝕咗   佢笑哂話好意思用蝕黎形容   係賺呀嘛   所以佢成日都話盜亦有道   我就咩道都無喎 ~

早餐食芝士火腿漢堡包   我始終都係唔太鍾意食呢間嘅漢堡包   d 口感好怪咁   所以食剩一半都唔想食   咁唯有打包留番做 lunch 囉 ~


菇場一般忙啦   其實可以執下嘢   不過又唔想   想 hea 住過呀 ~

今日又開始飲中藥   又係飲 4 日   飲到成肚水   好在 lunch 係食半個芝士火腿包   咁無咁脹肚嘛   食完就同 8 卦出去散步   食完行下咪好囉   好過成日瞓嘛   不過佢次次一開工無耐就話好眼瞓 ~

同 partner 去隔離搵 file   條友唔願做   我都唔會幫佢架   搵唔到就賴同事求其放   唔見咗一箱又唔出聲   我話妳咁樣   我都無嘢好講   後尾我再睇   真係有架   佢懶伸個頭入去搵之嘛   之後佢伸個頭入去時   我勁想一腳伸埋佢入去添呀   d 咩人黎架   做嘢咁樣嘅 ~

放工即走喇   去街市買餸   見到 d 菜好似平番 d 咁噃   因為見到豆角係 $12 / 斤   同埋有 d 係一扎扎咁賣   想買嘅時候就無   一係貴   真係邪呀 ~

番到屋企打仗喇   醃好豬肉浸好菜就開機洗衫   之後拖地   7 點開始煮飯   我一入廚房開抽氣扇就咩都聽唔到   部機嘈到好似打到黎咁   所以次次一煮完即刻熄   真係靜哂架   最搞笑係里奧大人打咗黎搵我半個鐘都搵唔到   我又無拎室內無線電話入廚房   嚇到佢以為我咩事   仲打埋比家姐   好在頭先放工家姐打黎   知道我買餸   呢個時候即係煮緊飯囉   唔係做咩喎 ~

里奧大人 8 點先放工   所以我都食飯先 lu ~

是日晚餐 - 菜炒五花腩 + 大白菜豬肺湯

椰菜炒五花腩
- 今次買 $20 五花腩   我叫豬肉呀姐切咗塊皮   佢問我煮咩   我話回鍋肉   佢話回鍋肉要皮架   我話唔要呀  好多毛好驚   呢個豬肉呀姐好好架   好 nice   唔係聲大大果 d   同埋如果佢見我拎幾袋嘢   佢就會比個大膠袋我一峙次裝哂   佢仲話呢 d 大膠袋就係比我地咁用呢   幾好人呀   我好論盡呀   以為之前買咗包回鍋肉醬   點知原來係買咗另一款醬汁   搞到我要自己求其調汁   里奧大人話唔似回鍋肉味道   咁我即 search 回鍋肉醬汁點煮   原來係用甜麵醬嘅   不過下次都係買現成醬汁好 d 喇   方便又唔阻掟   哈哈 ~

大白菜豬肺湯 - 星期日同媽咪飲茶   佢見到我生咗粒暗瘡   尋日特登煲豬肺湯   想我清清熱   所以叫家姐拎比我飲囉   住得近真係好喇 ~

食完飯   洗埋碗再食生果就沖涼   之後再熨衫   搞掂哂就休息喇   好攰呀 ~               

2013年1月28日星期一

車仔麵 ( 文記 ) @ 屋企 ( 28-JAN-2013 )

煎釀 ( 5 件魚蛋 / 2 件豆腐 / 2 件餃子 ) - 依家又加價喇   $10 / 4 件   $20 / 9 件  


我嘅螺肉 + 蘿蔔米線 ( 辣 ) - 我同里奧大人講點解我碗咁多湯嘅   佢話因為佢有 2 個麵   而佢個碗真係好盤滿砵滿呢 ^^


里奧大人嘅牛腩 + 辣魚蛋 + 螺肉 + 生菜 + 幼麵 + 粗麵 ( 辣 )

( 28-JAN-2013  MON )

嘩   尋晚喊到斷氣咁滯   所以好好瞓呀   不過里奧大人鬧鐘響咗之後   我都唔瞓 lu ~

今朝同埋里奧大人一齊出門口   不過就唔會同佢一齊搭地鐵   太迫人喇   真係唔鍾意呢 ~

對眼好攰呀  一隻眼皮仲腫埋添   最慘係有 dd 頭痛 ~   

其實勁肚餓   不過一坐低又唔多想食嘢   唯有食奶油多啦 ~


番到菇場勁忙呀   未停過手   做到 lunch time   今日帶菜心咋   不過唔飽   再食 flakes 加朱古力奶   叫做唔餓   但又未飽   不過又無嘢想食 ~

忙呀忙   忙到放工先忙完   好在搞掂哂   個人做到虛脫咁呀 ~

坐 van 仔去荃灣睇中醫   睇完就去表妹度買 3 枝泥   之後里奧大人話想食桂花糕   咁我去買啦   再問家姐要唔要   諗住佢一陣會楂車去媽咪度拎湯   點知佢原來已經拎埋去我屋企添   實在太好喇 ~

今次當然又坐 van 仔走啦   但今次等車等咗 25 分鐘呀   下次都係唔好星期一睇醫師   因為之前又試過睇另一個醫師   又係星期一睇   又係特別多人架 ~ 

好在 8 點左右就番到九龍灣   本來 PCCW 話 8 點黎整嘢   後尾話要到 9 點半   所以里奧大人話唔駛喇   咁佢又已經番到屋企   費事叫佢又落街   我就去文記車仔麵煎釀番屋企食算喇   真係好鬼餓   唔知係咪做嘢太衝勁   特別餓咁呢 ~

食到爆肚   抖陣再食啤梨同蘋果   之後就沖涼喇   今日做咗成日   又去睇中醫   個人真係好攰   所以即按摩 2 次膞頭同腳呀   鬆一鬆舒服好多架 ~

睇下電視   fing 下手腳   11 點就瞓喇   最鍾意係 11 點瞓   咁早 d 起身都有 8 個鐘頭瞓到丫   瞓多 d   皮膚都好 d 架 ~   

2013年1月27日星期日

Pizza Bird 脆意雞 ( 外賣 ) @ 屋企 ( 27-JAN-2013 )

環遊世界 ( 薄批 ) - 洋蔥 / 青椒 / 辣肉腸 / 火腿 / 蘑菇 / 菠蘿 / 牛肉 / 豬肉


香辣海鮮意粉


蒜蓉包


炸雞 3 件

( 27-JAN-2013  SUN )

今朝 9 點半醒咗   唔想再瞓   出廳執下嘢   點知里奧大人又話唔瞓   咁好啦   出去食早餐   可以慢慢嘆 ~





本來里奧大人朋友都話番教會   不過最後話仲未搞掂   所以唔番 lu   咁仲好   里奧大人可以陪我同埋媽咪家姐一齊飲茶 ~

崇拜完畢就去媽咪屋企   家姐要幫媽咪整花灑頭   我又飲埋碗黑豆湯   所以差唔多 2 點先出發去飲茶呢 ~

其實里奧大人想同媽咪去 Mega Box 飲茶同行下   不過媽咪尋晚去屯門醫院探舅父   10 點先番到屋企   所以今日都好攰唔想出街   屋企附近飲茶算 lu   我初初以為媽咪懶去街   仲話佢添   點知原來佢真係好攰   oh   怪錯咗媽咪添   所以我即講對唔住呀   咁下次無咁攰先再去遠 d 飲茶同行街呢 ~


朱古力 Dounut @ A1 Barkey - 家姐買比里奧大人食嘅   不過里奧大人就唔食 d 彩針 @.@


Dounut Mickey ^^


蛋撻


鮮蝦菜苗餃

鹹水角


干蒸牛肉 / 燒賣


豉汁蒸鳳爪

灌湯餃



豬腳薑


豉椒排骨炒麵

4 點飲完   陪埋媽咪番屋企就走喇 ~  

里奧大人做公司嘢   我就開機洗衫同熨衫   煲埋菊花茶   再淥埋尋晚姑奶比嘅有機菜心   今晚家姐要黎睇 "南極大陸" 大結局   咁我唔煮飯 lu ~



家姐 7 點黎到   外賣無耐又到   可以即開餐   一路睇 "南極大陸" 一路食   呢套戲好感人架   所以我一路食一路喊   食完再睇再喊   辛苦到呢   喊濕咗成 20 張紙巾   抹到個鼻都痛呀   本來諗住再由第 1 集睇起   不過都係唔好喇   頂唔順呀 ~

家姐 9 點走喇   我即沖超熱水涼呀   要冷一冷靜 ~  

喊完真係好攰   對眼又好痛喎   所以 11 點 15 分即瞓喇 ~ 

2013年1月26日星期六

團年飯 @ 姑奶屋企 ( 26-JAN-2013 )

腐皮卷


炸豬扒


花生燜豬手


臘鴨餅 / 臘腸 / 潤腸


茄汁蝦碌


西蘭花

其實仲有蒜蓉帶子煎粉絲 / 蒸石斑仔同花膠雞湯   不過太餓喇   所以唔想再去拎相機 ^^


( 26-JAN-2013  SAT )

依家如果我同 8 卦喺星期六都要番工嘅話   多數會約埋一齊食早餐   因為佢多數早落車   有時間食早餐   如果無約佢   我就會瞓到 8 點 10 分先起身   約佢我就要 7 點 45 分起身喇   唔想太遲   其實因為想早過佢   咁我就可以唔駛食得咁急呢 ~

今次我早咗   去到食早餐果間餐廳居然無西式早餐食   所以即轉場 ~  

呢間完全唔掂   咖啡苦澀難飲都無咩所謂   因為我飲幾啖嘅啫   但唔熱就真係好有所謂喇   所以呢間應該唔會再食架喇 ~

我嘅香茅牛肉纖麥麵 ( 小麵 ) - 真係好小   幾啖食哂 @.@   感覺好似喺 8 卦碗麵度拎 d 比我咁呢



8 卦嘅醬燒骨纖麥麵


我嘅腸仔煎蛋

阿 head off    但我都要忙到 11 點囉   其實仲有嘢做   不過真係唔想做 ~

好快就放工喇   今日搭地鐵去九龍灣  約咗里奧大人一齊去 Smartone 整嘢   我勁想食麥當勞薯條呀   間唔中就會好想食咁呢   食完就去交團費 lu ~

雙牛芝堡 / 扭扭薯條



招財福堡 ( 牛肉 )


Mocha - 勁想飲   點知....   尖沙咀果間好飲好多好多   呢間唔夠熱 @.@   今日不宜飲咖啡 @.@  

去埋 Uniqlo 買嘢就番到屋企   已經 4 點   里奧大人就瞓陣   我就睇下雜誌咁啦   真係唔可以話瞓就瞓架 ~

今晚去姑奶屋企食團年飯   所以同里奧大人 6 點出門口   因為想去官塘廣場食冷冷撈呀   食完行一陣  再埋 4 對襪就走人喇   因為約咗 3 姑奶一齊上去呢 ~  

7 點半開飯   食下坐下傾下   9 點幾大家都要走人喇 ~

仲落緊雨  覺得好凍咁呀   所以都係坐的士番屋企   最緊要快 ~

2013年1月25日星期五

打邊爐 @ 家姐屋企 ( 25-JAN-2013 )

芫茜皮蛋馬蹄湯底 - 4 扎芫茜 + 3 隻皮蛋 + 幾粒馬蹄   未淥食物之前   工人當湯咁飲   飲得幾咁滋味呀   之後我又跟佢飲   woo   估唔到就咁飲芫茜皮蛋馬蹄湯都咁好飲   最正係飲完個身暖好多呢 ^^

蟹籽丸 / 黑椒牛丸 / 芝士丸 / 墨魚丸 / 魚腐 / 龍蝦丸 / 台灣腸 / 芝士腸 - 呢度只係一半份量咋   因為家姐知我鍾意食呢 d 丸   所以買多 d   最後佢話我眼闊肚窄   我都話細食咗好多架啦


手切牛肉 ?! - 呢度 $60   家姐話呢 d 牛肉係用手切嘅   $160 磅   其他佢咩都唔知 @.@   不過真係好好食  


牛柏葉 / 魷魚 - 好在工人打黎問我食唔食咋   完全唔記得呢兩樣嘢   人多先食到咋   我試過 1 個人食   食完頂住個胃   食唔到其他嘢呀


炸魚皮 - 家姐喺公司附近架   好脆好好味


唐生菜 / 油麥菜 - 我習慣係食肉又食菜咁   但家姐佢地就係最尾先食


指天椒 - 家姐同工人各一碗   我就要好小就得架喇   佢地係顛嘅


( 25-JAN-2013  FRI )

尋晚同里奧大人臨瞓前傾下計   點知傾咗個幾鐘   成 1 點先瞓   我就過咗時間瞓覺   好難先瞓得着   里奧大人就瞓到   因為佢成日話自己長期唔夠瞓喎 ~

今朝無咁凍喎   我都無着褸添呀   因為次次一上 van 仔就焗到暈   完全係同出面兩個世界 ~

早餐食火腿吞拿魚治烘底   真係諗唔到想食咩 ~



菇場忙呀   忙到 11 點幾就搞掂   可以 hea ~

食完 lunch box 就同 8 卦出去行   之前佢成日話減肥減肥   我就叫佢食完飯唔好瞓   一齊出去行仲好啦   幫完家姐去惠康睇嘢就去萬寧   無啦啦額外 9 折   所以買咗 2 支淋浴露同剃鬚啫喱就番菇場喇 ~

諗住 hea 過   點知忙到呢   放工都未搞掂呀   不過我唔會開 OT 嘅 ~

里奧大人上咗大陸   所以我今晚去家姐屋企打邊爐   家姐尋晚問我想食咩   我第一樣就話打邊爐   真係唔知點解超勁想打囉 ~

坐 van 仔好快咋   去到家姐屋企都係 6 點 10 分   一落車覺得好寒呀   入咗屋企都好 d   但都係凍   之後坐低無耐聽到家姐把聲   仲以為已經 6 點半添   原來佢同事車佢番屋企   順便睇下家姐間屋喎   因為佢未見過村屋   咁佢又佢地傾   我就同狗仔玩   影下相咁呢 ~




B 頭 - 大佬黎架   最細粒係佢   但年紀最大都係佢   所以又要着衫仔   又要狗竇又要毛毯咁好好保暖呢

B 仔 - 二佬黎架   肥到豬一隻咁 @.@   家姐同工人不約而同同我講   要比佢食飯先架   因為佢會同我地同枱坐   好乖咁坐喺妳隔離咁呢   如果佢唔食咗先   佢見我地食完   佢都唔會食嘢架   搞笑   



麥包 - 三佬   個樣駛唔駛咁慘呀


7 點開飯   好餓呀我   可能真係超級勁想打啦   食呀食   食到 8 點幾   食完嘢就覺得好凍呀 ~

好在家姐有 2 隻肥狗   我用 "巨熊" 能形容佢地架   肥到呢   之後抱住麥包睇電視   成隻 "灘" 落我身度架   好鬼嗲   雖然好暖   不過手都痺   之後佢仲扯埋鼻寒   好鬼過癮 ~

成日 "lam" 條木   "lam" 咗 5 分鐘都仲 "lam" @.@   不過佢由細到大都好鍾意 "lam" 嘢 @.@  


我臨出門口前影架   見佢地瞓緊嘛   咪影下囉   點知佢地醒咗   B 仔望咗我一眼就再瞓過 lu

瞓得好淋



9 點半走喇   家姐車我番屋企   順便去埋媽咪屋企拎嘢   我番到屋企即開機洗衫   沖完涼無耐   里奧大人都番到屋企 lu   佢有佢做嘢   我有我熨衫 ~

睇完電視又睇下雜誌   望下鐘已經 12 點 45 分   好驚囉   唔想比自己咁夜瞓呀   唔健康嘛 ~