茄汁豬扒 + 節瓜瑤柱豬骨湯 ( 30-APR-2013 )

( 30-APR-2013  TUE )

諗起聽日放假就開心喇   如果每個星期三都放假   妳話幾咁好呢   就算唔出街喺屋企抖下   執下嘢都好丫 ~

早餐食奶油豬仔包   估唔到呢間又整得幾好味噃   下次多過選擇呢 ~

又唔係好忙   不過又唔係咁想上網   可能無心機呀   因為阿 head 今日 last day 啦 ~

做做下嘢嘅時候   老闆喺我面前行過   同我講多謝   話好鍾意本 Cook Book   仲舉高隻手指公   好搞笑   不過我真係好開心   因為啱佢用呢 ~

今日有 lunch box 呀  係前日食剩嘅豆豉炒雞柳   但好奇怪叮出黎嘅味道勁似沙茶味   我同事以為我整沙爹添呀   話搞到佢想食沙爹牛河   好記得有次佢聞到我嘅肉醬意粉   佢 lunch 即刻去 pizza hut 食肉醬意粉   搞笑 ~ 

平時放工都會擰轉頭同阿 head 講 bye bye   今晚特登入佢房同佢講 bye bye 啦   佢第一句話老闆好鍾意好鍾意本 Cook Book   之後我又再祝佢生活愉快啦   講多幾講我 feel 到自己開始眼濕濕   所以即講 bye bye 就走喇   唉   真係好唔捨得佢地呢 ~  

放工去牛頭角拎中藥   雨粉粉最煩   因為等如長命雨嘛 ~ 

媽咪煲咗湯又買咗大蕉同豬腰芒比我   所以又同工人喺屋企交收喇 ~

番到屋企即醃豬扒   之後嘆杯中藥   家姐飲完中藥一定要食 d 涼果之類嘅嘢   我就唔駛架喎   雖然係苦   但又無咩嘢喎   不過次次飲到最後一啖就勁反胃   可能一氣呵成咁飲   好脹胃啦 ~

又唔知里奧大人幾時番   又費事打比佢   正想煮飯嘅時候   佢就話放工   感恩呀   佢差唔多 8 點半番到屋企   咁就一齊食喇   不過今晚唔煮飯   淥泰國冬蔭功麵   酸酸辣辣正呀 ~

是日晚餐 - 茄汁豬扒 + 節瓜江瑤柱豬骨湯

茄汁豬扒 - 今次掂呀   唔知係咪多蒜蓉   所以有 d 似蒜蓉汁   我覺得好味呀   好在里奧大人都覺得好味   好開心呀 ~

節瓜江瑤柱豬骨湯 - 媽咪加埋蓮子薏米   再加埋幾塊豬潤比我補補血   最衰家姐啦   成日話我口唇白   嚇到媽咪次次都望我口唇   一白就好擔心   所以我有時會咬自己口唇   咁樣就好快紅啦 ~

金姆指米線 @ 九龍灣 ( 29-APR-2013 )

( 29-APR-2013  MON )

星期一喇   尋晚 9 點幾先食西瓜   所以夜晚成日去廁所   但食完西瓜之後   個人真係無咁熱氣咁架 ~ 

早餐食芝腿治烘底   其實有時想食下腸粉燒賣   不過果間餐廳真係坐得好唔舒服   唔係可以多 d 選擇 ~

番到菇場第一件事比本 Cook Book 阿 head 喇   希望佢地啱用啦   喺外國好多都會自己煮   唔似香港食嘢咁方便嘛 ~

無嘢做呀   又靜   衰 8 卦又係咁話眼瞓   真係唔眼瞓都比佢講到眼瞓呀 ~

老闆同阿 head 番埋聽日   所以今日去龍皇食 Farewell Lunch   正呀 ~

食飽仲眼瞓   4 點幾老闆話喺文華酒店買咗 cake 請我地食   真係勁好味呀   差唔多 5 點 20 分   所有人要去 showroom   因為老闆有嘢宣佈   好在好快講完   因為今晚我要去旺角睇中醫呀 ~

睇完都 7 點   打比里奧大人叫佢放工喇   所以我都坐 van 仔番九龍灣   夠快嘛 ~

本來想食餃子   但無位   所以都係去金姆指喇   因為趕住番屋企煲中藥呀 ~

番到屋企即煲中藥   再開機洗衫   9 點半先飲碗中藥   真係好小咁夜飲   不過無計啦   唔想嘥咗去呀 ~    

辣豆豉炒雞柳 + 油麥菜 ( 28-APR-2013 )

( 28-APR-2013  SUN )

今朝 9 點半起身喇   梳洗之後食早餐   抖陣就番教會喇 ~

里奧大人得得戚戚同我講   話佢食麥皮幾健康   我即刻話有鬼用咩   幾個月食一碗仔   日日食就差唔多 -_-

家姐今日放監呀   所以之前已經約定   話今日過黎去麥記飲咖啡   因為飲夠 4 杯就送 1 杯呀   所以奉獻完就走 lu   里奧大人番屋企先   我就同家姐去超市買嘢   係咁買買買   都唔記得自己無拎環保袋   好在家姐有咋   唔係唔知點拎好呢 ~

里奧大人瞓咗覺   但家姐又想 2 點半走   咁叫家姐嘈醒里奧大人啦 ~

食完就各自歸家喇   執下嘢   再飲埋湯   都已經 5 點幾喇   差唔多預備煮飯 lu ~

是日晚餐 - 辣豆豉炒雞柳 + 油麥菜

辣豆豉炒雞柳 - 爆香蒜頭豆豉乾蔥   再加多匙磨豉醬同 1 隻指天椒   惹味就惹味   不過唔夠辣   唔係就更加好味呢 ~

油麥菜 - 惠康買 $15 / 2 pack   估唔到煮起上黎都幾多喎   今次點腐乳食   好味道 ~  

我好鍾睇飲食節目架   依家睇 " MAY 姐有請 "   佢加埋嘉賓   成班女人   係又笑唔係又笑   我覺得好煩同好嘈囉 ~  

別府 @ 九龍灣 ( 27-APR-2013 )

鬼石坊主地獄拉麵 ( 2 辣 ) - 牛肉好味   不過湯底一 d 都唔辣嘅 @.@

天婦羅蝦壽司 / 吞拿魚壽司 / 甜蝦壽司 - d 飯好新鮮 ^^

三文魚刺身 - order 1 客加 $12 就多 1 客   不過好明顯 $12 果客係頭頭尾尾囉

七味炸三文魚骨 - 無上次咁脆 @.@

( 27-APR-2013  SAT )

今朝唔駛同 8 卦食早餐   咁我可以瞓到 8 點呢 ~

早餐食碎蛋吞拿魚三文治   不過今次塊麵包係凍嘅   係雪過黎咁囉   我唔鍾意呢 d 凍冰冰嘅感覺 ~  

雖然呀 head 今日 off   不過我都忙呀   所以好快就到 1 點   放工即走喇   因為要坐 shuttle bus 去地鐵站 join 埋里奧大人去旺角呀 ~

旺角呢個地方   真係唔係買嘢   我係唔會出   因為人太多   同埋呢 d 地方實在令我太傷感呢 ~

1 點幾未餓嘛   所以去星際睇相機袋   不過唔啱心水   行到 2 點半   我開始覺得好餓好餓   餓到面青口唇白呀   嚇到里奧大人拿拿聲同我去食 tea 先   咁先有氣力再去下一場 ~

烤牛肉撈濛 - 我想食撈濛 d 醋好耐架喇   所以食到好開心   真係超級滿足   雖然牛肉好韌   但心情都無受影響   同埋估唔到有好多牛肉   真係無 10 塊都有 8 塊  

烤牛肉湯金邊粉 - 賣相已經唔掂   放幾條香草好睇 d 嘛   點知原來個湯底都好唔掂  

食飽精神哂啦   咁去另一間睇   好似叫 CAM 2   好感恩想要嘅 Backpack 啱啱番貨呀   買完就搭地鐵去佐敦拎喼   之後再搭番地鐵去九龍灣   去埋 HMV 買本 Cook Book 比呀 head 就番屋企喇 ~

番到屋企抖陣   7 點就去別府食嘢   食完去書局睇陣書   再買埋張心意卡就走喇   好攰呀 ~

好耐無好似今日咁頻樸   番到屋企即沖涼   再做埋腳按摩先舒服 d 咋 ~ 

住家飯 @ 媽咪屋企 ( 26-APR-2013 )

蒸海星斑

豉椒炒蜆

炒菜心

節瓜淮山江瑤柱豬骨湯

( 26-APR-2013  FRI )

Happy Friday 喇   今朝試食嘢   食炸魚柳包   不過真係麻麻地   食完個口好苦咁呀 ~

菇場忙呀   好快又到 lunch time 喇   唔想食麥皮咁齋   所以去買酸辣米線番菇場食   飽到呢 ~

里奧大人上咗大陸   今晚我又番媽咪屋企食飯喇   家姐要傾屋企裝修黎唔到   無人爭食   所以覺得好快飽 ~

8 點半走喇   好鬼大風   好在無雨   因為又要拎湯同雪糕批   一袋二袋再拎遮真係好麻煩 ~

番到屋企即沖涼   里奧大人差唔多 10 點幾先番到屋企   我又未眼瞓   一齊睇下電視   睇到 12 點幾   唔瞓唔得啦   聽日要番工嘛   實在   實在太羨慕 d 人星期六唔駛番工呢 ~    

栗米蛋花湯 ( 25-APR-2013 )

( 25-APR-2013  THU )

今日好 d 喇   個肚唔痛   不過就谷住谷住咁囉 ~

早餐食芝腿治烘底   食咗半份就食唔落   食剩果半份就做 lunch 啦 ~



菇場超級勁忙呀   咁都好   時間過得超勁快嘛 ~

晏晝諗住食麥皮   不過都係想食湯米粉暖暖肚呢   即飛落街買呀 ~

做到 5 點就搞掂哂   放工即走喇   個肚谷住好唔舒服   番到屋企即沖熱水涼   舒服好多   因為可以灘喺梳化 ~

抖咗陣又有 d 餓   超勁想食熱嘢   所以諗起粟米湯喇 ~

嘩   飲完真係舒服哂呀   個肚完全無事   之後鬼打咁精神   同埋有 d 餓添呀   食埋朝早果半份芝腿治   勁呀 ~

里奧大人差唔多 8 點先喺大陸放工   喺上水食埋嘢先番屋企   咁仲好   太夜食會無胃口嘛 ~  

用 Ipad 睇 "中國好聲音" 呀   可以一首歌聽好多次   越聽越有味道呢 ~

終於等到里奧大人番黎喇   等佢沖埋涼   再傾下計   睇陣電視就瞓覺喇 ~

淨雲吞 + 水餃粗麵 ( 外賣 ) @ 屋企 ( 24-APR-2013 0.5 S/L )

( 24-APR-2013  WED )

今朝瞓到 8 點半   個肚仲有 d 痛   但都番工啦   今日 partner 請咗假嘛   我又唔係咁想 dept 無人   最多頂唔順先再請假囉 ~

打的番工   再買埋早餐先番菇場 ~

真係好在有番工咋   真係有嘢做呀   幾辛苦都做埋佢先呀   之後真係頂唔順   下午請 S/L 喇 ~

拿拿聲打的去診所拎今日下午嘅病假紙   番到屋企即沖涼瞓覺喇 ~

起身嘅時候天黑黑   又望見隔離無人   心諗里奧大人 2 點都未瞓   再望一望鐘   原來果時係 7 點   未瞓醒唔知自己做緊咩呀   嘩哈 ~

有 d 餓喇   食埋今朝份腿治   咁里奧大人 8 點放工   咁我勁想食雲吞呀   所以叫佢買嘢番屋企食喇 ~

明輝茶餐廳 @ 九龍灣 ( 22-APR-2013 ) + ( 23-APR-2013 S/L )

中式牛柳


西蘭花羅漢齋煲

西洋菜湯

( 22-APR-2013  MON )

星期一 lu   又涼咗 d   好彩無落雨 ~  

早餐食芝蛋治烘底   真係諗唔到食咩好 ~  

又忙喇   又係幫另一 dept 對數   d 嘢又唔 match   但係 8 年前嘅數黎   佢地點會記得丫   所以呢   開頭做得唔好   之後仲更加嘥時間去整呢 ~

對住 d 數字真係人都顛   又未餓   所以出去行陣   行到點幾先買盒炒麵番菇場食   估唔到盒炒麵咁巨   食完要食柑桔消滯呀 ~

里奧大人作感冒   腸胃又唔舒服   請咗一日病假喺屋企休息   咁我放工都即走喇   好難得里奧大人咁早喺屋企嘛 ~  

諗住行遠小小食   點知落毛毛雨   又懶上番屋企拎遮   所以去明輝算喇 ~

( 23-APR-2013  TUE  S/L )

OH   今朝每月一到   肚有小小痛   不過就勁想嘔   所以瞓到 9 點   打番去菇場請病假   再去埋睇醫生就番屋企沖涼瞓覺喇 ~

今次食藥都好 d 喎   因為 d 藥係食完好眼瞓   同埋真係無咁痛 ~

瞓到 8 點幾   我真係無胃口   叫里奧大人自己買嘢番屋企食   千其唔好預我   之後我都瞓喇   真係全日無離開過間房   勁呀 ~

海寶漁港 @ 九龍灣 ( 21-APR-2013 )

今次用手機影架

片皮鴨一食 - $138 就無要求啦

金豬紅袍半邊天 - d 皮脆卜卜好食呀

百花炸釀鮮蟹拑 - 完全似食緊蝦丸 @.@

翠綠妙醬炒蝦球 - 打風咁呀   不過 d 蝦都幾大隻   都埋我鍾意食藕片

清蒸游水海星斑 - 都幾大條   不過中間唔係太熟

飄香鮮蝦荷葉飯 - 食咗一啖   好香荷葉味呀

金湯蟹肉燴燕窩 - 無食到

其實仲有翡翠玉環瑤柱甫 / 魚湯鮮腐竹翡翠 / 黃金脆皮一品雞 / 紅豆沙同生果拚盤   不過距離我太遠   所以無影到 ^^

( 21-APR-2013  SUN )

今朝 10 點 20 分起身   沖埋涼就去 KFC 食早餐   食完番屋企抖陣就番教會喇 ~

今次又係聽完道就走喇   要去家品店買防潮箱同防潮包   之後番屋企煲中藥   2 點就約埋大姑奶一齊去食 tea ~  

食完就坐巴士去上環同其他姑奶集合   佢地喺 Pacific Coffee 買咗嘢飲   所以就喺度坐一陣傾下計咁喇   之後分批坐的士去拜山呢   差唔多 5 點走人   跟 2 姑奶佢地車出九龍灣   快好多呀 ~

去到九龍灣各自各活動   大姑奶就跟我地番屋企   6 點 20 分就出發去海寶食飯   咁多人食   所以叫個 "金豬星斑燕窩全包宴" 加多隻片皮鴨   夠哂飽呀 ~

番到屋企都 8 點半   沖完涼就熨兩機衫   里奧大人就熨番佢 d 裇衫西褲   咁我就可以抖抖喇 ~