BBQ @ 家姐屋企 ( 31-MAY-2013 )

個爐咁大   燒隻乳豬都得呀


腸仔 / 墨魚丸 / 魚蛋 / 龍蝦丸 / 牛丸


加埋辣汁好味呀

好餓呀   家姐燒 2 條腸比我食先   唔好喺樹嘈 @.@

工人又即燒隻雞翼比我   太好喇   不過我覺得自己無咩耐性燒嘢食   因為成日問熟未熟未 

大蜆

媽咪買嘅蜆

生菜包牛扒    加埋生蒜同辣汁   家姐話喺韓國咁樣食法好好味   但係辣到我頭痕呢   家姐幫我加辣   我無諗過咁辣   食到一半頭都痕   之後飲咗半罐可樂   再狂食 10 塊生菜先解到辣   之後講比家姐知好辣   佢笑住話食嘅時候都覺得辣   不過無同我講   因為佢無諗過區區 2 粒指天椒咁辣呀 @.@  


美心排包 - 家姐話之前朋友話用排包  係好好味   不過又真係好好味   本身有牛油香   燒完再加牛油   真係香上加香呀 


印尼甜豉油 + 乾蔥 + 指天椒 - 甜甜辣辣超級好味   但咁樣算唔算係辣汁呢 ?! 

我唔係用 ABC 呢個牌字   下次買呢個牌子黎試下先


黃蕃薯 + 粟米 - 燒嘅時候好香   但食落無咩味嘅

( 31-MAY-2013  FRI )

唔知係咪尋晚食得太多荔枝   再加埋食薯格   所以半夜好熱咁   熱氣嘅熱呀   好在最後都瞓得幾好咋 ~

早餐食芝腿治烘底   睇報紙慢慢食   最鍾意咁樣呢 ~

菇場忙咗陣   之後去 pack 箱   話咁快就 lunch time 喇 ~

仲未餓   所以 1 點先食 lunch box ~  

3 點半又開始 pack 箱喇   差唔多 5 點就搞掂一部份   星期一再 pack 埋去   咁就了咗心事喇 ~

放工即走   坐 van 仔去旺角睇中醫   6 點半搞掂哂   今晚去家姐屋企 BBQ   咁媽咪又買咗 d 蜆仔同西瓜比我地食   咁我就去媽咪屋企等埋家姐   佢楂車接我去佢屋企 ~

其實我初初話打邊爐   咁家姐叫工人買嘢   佢工人居然記得我話過   下次黎要 BBQ   所以家姐又即打黎問 B 唔 B   嘩   我想 B 呀   因為打邊爐自己屋企都打到   B 就無可能啦   所以最後決定 BBQ 喇   我地差唔多 7 點半先開始燒   估唔到又有風喎   因為里奧大人冷笑我咁熱黎燒嘢食呀 ~

開始燒嘅時候   接到個怪電話   應該係呃人電話啦   今次話自己有馬拉口音   成日問我聽唔聽得出   咁我話妳喺邊個丫  我以為係朋友小寶呀   不過佢無答我   之後仲話聽日去大陸   會黎香港探我喎   痴鬼線 ~  

里奧大人唔駛上大陸   但 9 點先放工   不過我都未咁快走   我燒到成 10 點呀   之後再入屋食埋番薯同粟米   同狗狗影下相   抖多陣就走喇   家姐車我番屋企   沖埋涼原來都 11 點   好小會咁夜呀 ~

麥包

B 頭

B 仔

住家飯 @ 媽咪屋企 ( 30-MAY-2013 )

粟子蠔豉燜豬手

龍躉仔

炒西生菜

節瓜粟米豬橫脷豬骨湯

妃子笑

大粒又甜又多汁

( 30-MAY-2013  THU )

嘩   今日陽光普照   藍天白雲   所以心情勁好呀 ~

早餐食奶油豬仔包   之後 8 卦又話黎   又一齊食早餐呢 ~  


菇場唔忙喇   可以 load 相   做下自己嘢咁啦 ~

lunch time 陪 8 卦出去拎嘢   之後先再去食 lunch   食完行陣就番菇場喇 ~

我嘅潮州四寶丸米粉   d 丸難食到呢   粉黎嘅  @.@

8 卦嘅滑蛋蝦仁飯   又係唔好味 @.@

忙咗陣又繼續 load 相   幾咁快就 5 點半放工呀   即走啦   今晚番媽咪屋企食飯呀 ~

去到媽咪屋企就即飲湯   家姐今晚 6 點半就番到媽咪屋企喇   所以好快可以開飯   食完飯又食下生果   睇下電視傾下計   8 點 15 分就走喇 ~

番到屋企即沖涼   以前夏天沖涼多數用凍水   依家真係唔得 lu   最多用暖水   覺得用暖水沖涼 relax d 咁呢 ~

里奧大人今日唔駛上大陸   但 9 點幾先放工   佢買 KFC 番屋企食   因為要我幫手食薯格   我對薯格真係麻麻地   因為好飽肚咁   食食下嘢   里奧大人話上次喺台中機場原來用咗漫遊打比家姐   唔係用 Wifi   所以要交多 $88 電話費   仲話唔怪得上次收得咁清添   原來係漫遊   不過喺台灣買張電話卡其實都要百幾蚊   計落有賺啦 ~ 
超多薯格   起碼有 10 塊  

冬菇節瓜甫 + 七味粉煎龍脷柳 + 蔥粒肉碎炒飯 ( 29-MAY-2013 )

( 29-MAY-2013  WED )

今朝勁想食碎蛋治   所以見無咩人就去食喇   之後 8 卦 whatsapp 我   佢已經喺鑽石山   叫我幫佢買埋嘢食   不過無佢食嘅火腿   後尾又要再排過   但佢話唔想食   所以去對面餐廳食麵餐 ~

番到菇場超級忙   對手未停過   真係做到 lunch time 先停呢 ~

有 lunch box   同事話終於見到我有帶飯盒   其實我有時煮飯唔帶之嘛 ~

woo   4 點終於搞掂哂   真係鬆咗一口氣架 ~ 

放工去超市買豬肉就番屋企 lu   預備哂晚餐就拖地   之後抖陣又煮飯喇 ~

今晚 8 點自己食飯先   因為里奧大人打黎話好夜先放工   佢差唔多 9 點半先放工   好在番到屋企都有胃口食嘢咋 ~ 

是日晚餐 - 冬菇節瓜甫 + 七味粉煎龍脷柳 + 蔥粒肉碎炒飯

冬菇節瓜甫 - 買咗 2 個節瓜   其中一個大嘅原來爛咗一半   但買果時又睇唔到   激氣   今次釀肉碎   不過好鞋   下次試下釀蝦膠先 ~ 

七味粉煎龍脷柳 - 喺佳寶買架   $13 / 條   都好厚肉   同埋唔腥   下次可以大量入貨 lu ~ 

蔥粒肉碎炒飯 - 加咗 $2 蔥   加埋節瓜甫用剩嘅冬菇豬肉碎   再加埋醬料包一齊炒   不過今次唔得乾身   唔係應該更好味呢 ~               

黑椒京蔥牛仔骨 + 菠菜 ( 28-MAY-2013 )

( 28-MAY-2013  TUE )

今朝有 d 餓   所以食米粉餐   8 點半 8 卦打黎話一齊黎食早餐   同佢一齊唔夠 9 點就會番到菇場   咁都好   依家想 9 點前番到菇場呢 ~

11 點先忙   仲諗住 hea過添 ~  

lunch 食麥皮   今次唔餓都食喇   唔係夜晚放工真係會餓暈架 ~

忙呀忙   忙到放工   依家要發奮煮飯   所以去街市買餸   多 d 款   如果有冷氣就更加好啦 ~

去完街市再去佳寶   我鍾意行凍肉舖   因為好多唔同嘅肉同海鮮   雖然係急凍   不過我無咩所謂   又唔係即日食   最緊要屋企有呢 d 後備   唔想去街市買嘢都有 d 餸煮下嘛 ~

番到屋企即醃肉   浸菜   開機洗衫   執下嘢   眨眼又 7 點幾   要開始煮飯 lu ~

今晚自己食先   之後里奧大人 8 點半就番到屋企   呢兩晚佢都食得哂我留比佢 d 飯餸   可能依家份量係正常   佢先食得哂呢 ~

是日晚餐 - 黑椒京蔥牛仔骨 + 菠菜

黑椒京蔥牛仔骨 - 超勁想食京蔥   $6 / 2 條   同超市一樣   咁下次可以去超市買 lu ~

菠菜 - 尋晚食剩 1 pack   今晚食埋去 ~  

呢排都會睇埋肥媽 " 食平 D " 先瞓   不過次次睇佢煮餸   我都會話突然好肚餓   里奧大人就好鬼驚呢 ~

西刀魚丸出前一丁 / 辛辣麵 + 菠菜 ( 27-MAY-2013 )

( 27-MAY-2013  MON )

尋晚 11 點幾   見眼瞓就瞓啦   勁開心架   因為 4 點飲咗杯奶茶   咁晏飲多數夜晚瞓唔到   但上到床其實又瞓唔着喎   之後里奧大人瞓瞓下又出廳睇電視   因為頭先飲咗茶   瞓唔着   而我就繼續喺床典黎典去啦   我估我起碼 2 點幾 3 點先瞓到呀   慘 ~

瞓得唔好   仲要今日係星期一添   好在又唔係話好攰   同埋依家唔想懶床呀 ~

早餐食芝腿治烘底   飽到震   坐隔離位係 4 個麻甩仔   無着衫架   粗口爛舌又大聲   比佢地影響哂心情   佢地一走   餐廳靜哂   但無用啦   我都要番工喇 ~

之前堆哂 d 嘢未做   今朝做做做   做到 11 點半呀   充實到呢 ~

到 lunch time 仲未餓   同埋都唔想食嘢   我差唔多 3 點先有 d 餓   食咗幾件粟餅   但其實又唔飽   不過都懶得再食餅 lu ~

放工超餓呀   頭都暈   滿腦子係食物   本來想食埋 tea 先番屋企   不過要去超市買菜   咁買完菜即飛番屋企喇 ~

番到屋企除低鞋即入廚房開爐煮麵喇   第一次咁架咋   因為真係餓得好緊要呢 ~

woo   食完個人精神哂喇   抖陣就洗埋碗   再拖地執下嘢   之後沖涼喇   都係唔想一次過做咁多嘢住 ~

里奧大人 8 點放工   咁我就煮個辛辣麵比佢食   再淥埋碟菠菜一齊食   洗埋碗就真正休息喇 ~

粟米蛋花湯 ( 26-MAY-2013 )

( 26-MAY-2013  SUN )

今朝里奧大人問我起身未   我話好攰   之後我繼續瞓   一起身已經 12 點 lu ~

其實仲想瞓下   不過里奧大人要我落去行下喎   所以去大快活食嘢   我又唔餓   share 食一份餐算喇 ~

食完又番屋企抖   里奧大人又熨衫   仲話好忙添   我話你知做家務係幾咁忙呢   我平時放工番到屋企仲要煮埋飯添呀   佢笑但唔敢出聲 ~ 

差唔多 3 點幾   突然想食魚柳包   所以里奧大人又去買麥記番屋企食喇 ~

今晚里奧大人約咗朋友 6 點半喺別府食飯   我就喺屋企休息   差唔多 8 點就飲粟米湯   1 個人飲 1 罐真係頂到上喉嚨呀 ~