大家樂 @ 九龍灣 ( 31-AUG-2013 )

( 31-AUG-2013  SAT )

今朝 8 點 15 分先起身   里奧大人仲以為我唔番工添 ~

早餐勁想食熱嘢   所以就食雪菜肉絲餐肉米粉   今次要食得快呀   因為已經遲到呢 ~

番到菇場   個人都係溫溫燉燉   都無心機上網同 Skype   之後 8 卦又同我講話邊個邊個同事唔黎飲   我咪話囉   根本你就唔應該請人添啦   人地做咗 2 個月都唔夠   我真係覺得你好肉酸囉   之後佢又講點點點   我都無理佢喇   因為真係勁攰   唔想諗嘢 ~

放工即走啦   今日里奧大人又陪佢姐夫去買電腦   我唔去喇   買完點心番屋企   食完又瞓咗半個鐘   差唔多 3 點   里奧大人同佢姐夫都番黎 lu ~  

佢地買咗麥記   勁想食 d 薯條呀   不過都無可能食到   里奧大人昅到實 ~

之後佢有佢地整   我就喺梳化睇雜誌   睇睇下瞓着   之後索性入房瞓喇 ~

瞓到 6 點幾就醒喇   其實仲好攰   不過唔瞓啦   因為有 d 餓呀 ~

想飲冬瓜盅   所以叫里奧大人陪我去大家樂呢 ~

食完又番屋企   抖陣就沖涼   hea 下 hea 下   差唔多 11 點半先瞓 ~

豉椒炒蜆肉 + 菜心 + 冬蔭功麵 ( 30-AUG-2013 )

( 30-AUG-2013  FRI )

又星期五喇   真係最開心呢 ~

丫   喉嚨痛呀   應該係前兩晚食咗薯片   同埋尋晚又食鹹水角   所以先咁呢   慘   之前晚晚食薯片都唔會喉嚨痛架   唔通食完中藥我變咗熱底   嘩哈 ~

菇場靜呀   老友又番咗 Ipoh   無得 Skype   好在 8 卦喺度   唔係都幾悶   因為今日唔想上網呀   好攰咁 ~

同 8 卦出去食 lunch   想食酸辣米線   不過佢又唔想   所以又去食五寶飯喇   明明叫咗小飯   居然無小到   飽鬼到呢   所以我叫 8 卦自己番菇場先   我要兜個圈先得呀   估唔到行咗 15 分鐘   真係舒服 d 咁架 ~

Yahoo Blog 終於摺埋   佢地情願收購另一個平台都唔好好管理個 Blog   真係傷透人心啦   不過其實寫 Blog 咁耐   佢地真係做得越黎越衰   Upgrade 之後真係唔覺得有咩改善   我個人覺得仲衰過舊時   好多 Blogger 話唔見好多篇 Blog 同相添呀   不過我無留意有無唔見嘢呀   因為咁耐嘅嘢真係唔記得囉   我覺得寫 Blog 對我黎講係一個回憶   基本上都會繼續寫嘅   同埋應該轉去比較多 d 人用嘅 Blogspot   講真   去到果邊見番 d 熟口熟面嘅 Blogger  都幾有親切感架  ( 嘜頭都用番隻貓貓   我真係好鍾意佢架   肥嘟嘟好得意呢 ) ~

沾寒沾凍   個身又滾   但其實又非常之凍   都似發燒架喇   勁想快 d 放工番屋企 ~

落車經過美心   見到好多件 Cheese Cake 切餅   今次真係忍唔住買番件喇 ~

番到屋企居然唔駛開冷氣   都心知不妙啦   所以浸埋菜就即探熱   真係有 d 燒   諗住食 Panadol   不過里奧大人係都要我睇醫生   咁我即掛號啦   好在 6 點 45 分有得睇 ~

去到診所探熱都係 37.9 度   醫生問有無周身骨痛喉嚨痛   我話有   之後佢又摸我條頸   輕輕掂已經好痛啦   咁我都知應該係扁桃腺發炎   不過我攰到傻咗   無問醫生我係咪又扁桃腺發炎添 ~  

抖陣就煮飯喇   里奧大人 7 點半先放工   咁我都自己食先喇   因為想快 d 食藥同沖涼呢 ~

是日懶餐 - 豉椒炒蜆肉 + 菜心 + 冬蔭功麵

豉椒炒蜆肉 - 煮咗勁小蜆肉咋   我簡直覺得煮果小小   真係嘥煤氣呀   嘩哈哈 ~ 

菜心 - 尋晚食剩   今晚食埋去   真係好在有菜剩   唔駛射登又去買嘛 ~  

冬蔭功麵 - 泰國 d 麵好細包   所以煮 2 個比里奧大人   咁見 d 蜆肉實在太小   又加 d 蝦同西刀魚丸咁囉 ~

里奧大人知我鍾意 Line 公仔   所以特登買個月餅比我   搞笑 ~

 ( 之前扭蛋   不過想要果 d 就扭唔到   但我覺得已經好夠   因為依家扭蛋要 $15 一隻好貴囉 )

椒鹽豬扒 + 菜心 ( 29-AUG-2013 )

( 29-AUG-2013  THU )

里奧大人今朝 10 點半見客   佢話陪我食早餐   所以我可以 7 點 50 分起身   超開心呀 ~

菇場忙咗陣   上下網又 Skype   好快又到 lunch time 喇 ~

今日有 lunch box   食飯真係飽飽滯滯咁   但我又唔鍾意飲茶   如果唔係咁樣可能會好 d   無咁滯呢 ~

放工即走   去街市買菜   再去鴻星買鹹水角同豆沙角就番屋企喇 ~

醃好豬扒再浸好哂菜就食鹹水角喇   熱辣辣超好味呀   豆沙角又係好好味   不過食完都幾飽下 ~

7 點開始煮   差唔多 8 點先有得食   今晚我都無食飯   食 d 餸同飲湯已經好夠飽 lu ~

搞掂哂就沖涼   差唔多 9 點就打比里奧大人  其實我已經好攰   隻手又痛   所以都猛猛地   因為我好快 d 休息嘛   佢食完又要幫佢洗   好鬼煩   所以我話叫佢食杯麵   我唔想煮米粉   唔想對住火爐熱辣辣呀   其實佢食杯麵都無所謂   仲唔知幾開心添   不過我講完又覺得自己好衰咁   之後打番比佢   我話煮米粉啦   今朝又食咗麵   唔好食咁多麵囉 ~

是日懶餐 - 椒鹽豬扒 + 菜心

椒鹽豬扒 - 買咗 2 隻紅尖椒   切嘅時候都覺得辣   估唔到真係辣   都唔錯呢   最開心里奧大人都話呢個豬扒好味   不過佢就無食到 d 紅尖椒   如果唔係佢又會呱呱嘈又話辣又依樣果樣   煩 ~ 

菜心 - $12/斤   其實都唔知貴唔貴   依家 d 價錢日日都唔同   我見多人買先買咋   今晚好在浸咗半斤   份量啱啱好呢 ~

住家飯 @ 媽咪屋企 ( 28-AUG-2013 )

茄汁海蝦


羅漢齋煲 - 媽咪仲包咗 d 腐竹卷   餡係一條條嘅紅蘿蔔絲   好好味呀 ~ 

蒸龍躉仔 - 我食緊魚嘅時候   家姐望住我   我問佢望咩呀   佢話以為我咁大膽食魚眼呀   其實我係食緊臉珠 dum 嘅肉之嘛   咁又係嘅   夾嘅位置又真係幾似夾魚眼嘅   哈 ~  

三色椒炒帶子

皮蛋酸薑

牛蒡紅蘿蔔白果豬橫脷湯

( 28-AUG-2013  WED )

天氣又係爆熱   我覺得行樓梯上上落落先最熱   好在我特登早 d 起身   早 d 出門口就唔駛咁趕頭趕命呢 ~

早餐又食奶油豬   睇下報紙打下機   好快又要番工咁   哈 ~

菇場忙咗陣又 hea 過   呢排隻手掌又勁痛   今次仲慘   連拎袋上膊頭都痛呀   開杯蓋又痛   唉   上網成日用 mouse   唔痛先奇 ~

今日又係食完 lunch box 就出去行陣   呢排夜晚無徑步   咁唯有晏晝行下  當運動下咁啦 ~

諗住 hea 過   但又忙咗陣   咁都好   半個鐘頭話咁快就過咗 ~

里奧大人上咗大陸   所以我就去媽咪屋企食飯   本來家姐唔去架   因為佢尋晚已經去咗媽咪屋企   不過應該媽咪係咁叫佢去   佢先再去呢   哈 ~

家姐今晚 6 點 45 分番到屋企   又可以早 d 食飯   爽呀 ~

食完飯同家姐一齊食咗一筒薯片   即時鼻哥窿慶合合呀   不過真係好難忍口囉   呵呵 ~

家姐要去我屋企拎番支 BB Cream   所以同家姐一齊 8 點 15 分走喇 ~

坐巴士嘅時候   家姐同我講   媽咪勁想煲湯比我飲   話番屋企一定要有湯飲   咁 9 點幾打比家姐   家姐話諗下番唔番先   媽咪就話佢睇埋 "走過浮華大地"    11 點先瞓   咁 11 點打黎都得   聽到咁講   我個心好實   媽咪真係好錫我   因為平時佢話 10 點已經瞓   為咗想我飲湯竟然話 11 點瞓   所以家姐 9 點幾都打番比媽咪話番黎食飯   我成日都講   食飯簡簡單單得啦   聚下之嘛   唔駛刻意諗住咩煲 d 咩   我食咩都無所謂嘅   因為我真係唔想媽咪咁辛苦囉 ~

上到屋企   家姐即打機   之後叫我開電視   仲以為佢睇   點知仍都係打機無睇   咁做咩要開喎   真係呢 ~
佢坐到 9 點幾就走   我飲埋碗中藥就沖涼喇   里奧大人差唔多 10 點就番到屋企   又一齊睇下電視   11 點幾就瞓喇   呢排仲係好攰咁呢 ~   

三色椒炒黑椒牛丸 + 油麥菜 + 叉燒炒飯 ( 27-AUG-2013 )

( 27-AUG-2013  TUE )

尋晚 4 點幾去廁所   見到里奧大人喺廳睇電視   佢話諗公司嘢諗到瞓唔着   真係好大壓力咁噃   真陰公 ~

今朝起身都有小小攰   不過沖咗涼就精神 d 呢 ~   

早餐食腿蛋治烘底   依家佢地都知我烘底要大火   因為我真係唔鍾意食烘底 d 麵包好似無烘過咁囉 ~

菇場唔忙   又做下自己嘢都唔錯 ~

食完 lunch box 就出去行下   買咗 2 盒冬蔭功百力滋就走喇   因為條街真係好鬼熱囉 ~

里奧大人 5 點見客   所以可能會早 d 番到屋企   咁我放工即去街市買餸   番到屋企即煲中藥   再預備晚餐    搞掂就開機洗衫同拖地   雖然開咗冷氣   都出汗呀   有 d 虛脫嘅感覺 ~  

7 點預備   里奧大人 7 點 45 分已經番到屋企   不過仲要等多 10 分鐘先可以食呢   所以煲中藥真係要預多 d 時間煮飯呀 ~

是日晚餐 -三色椒炒黑椒牛丸 + 油麥菜 + 叉燒炒飯

三色椒炒黑椒牛丸 - 好想食三色椒同黑椒牛丸   不過 d 丸真係貴   6 粒都要 $10.5   可能買得小會貴 d   下次買 1 磅   咁唔駛成日去買 ~

油麥菜 - $10/斤   唔想樣樣都炒   所以灼熟算喇   點甜豉油一齊食都唔錯架 ~

叉燒炒飯 - 喺太興買 $22 瘦叉燒   再加 d 蔥花去炒   好好味呀 ~

搞掂哂又 9 點   沖埋涼再食埋車厘子就抖喇    勁攰呀 ~

參巴醬炒青豆角 + 煎墨魚卷 ( 26-AUG-2013 )

( 26-AUG-2013  MON )

嘩   今朝好攰咁呀   加上天氣勁爆熱   仲更加攰呢 ~

早餐食芝腿治烘底   見到人地食麵又好想食   不過真係食唔落一個麵餐   所以望下都好開心架喇 ~

菇場忙到 10 點幾就 hea 過喇   一到 Lunch Time 就食 lunch box   係尋日食剩嘅 tea 囉   但又好好味喎   自己煮到咁好味就好 lu ~  

食完就陪 8 卦去萬寧買 K 仔同糖   其實 K 仔即係 Airwaves   因為菇場太靜   一定要食勁薄荷嘅嘢黎上電   如果唔係會無厘神氣   真係瞓着到似   所以就叫 K 仔喇   有次我好自然咁問里奧大人有無 K 仔   佢好愕然問咩叫 K 仔   咁又驚 d 嘅   K 仔喎   哈 ~  

里奧大人 4 點見客   感恩 5 點已經見完   所以佢早番過我呢 ~
番到屋企就即煮飯喇   趕到我丫   不過可以同里奧大人一齊 7 點食飯就真係好開心嘅 ~ 

是日懶餐 - 參巴醬炒青豆角 + 煎墨魚卷

參巴醬炒青豆角 - 清埋呢包醬就無喇   實在太開心   因為可以喺 expiry date 29/8 前煮埋去   今次加咗 100 ml 水黎煮   所以煮嘅時候覺得好鬼辣   係咁打乞痴   之後里奧大人食嘅時候話好辣   仲話我煮嘅時候   聞到都好辣   又聽到我煮嘅時候係咁打乞痴   都知呢碟嘢都係辣架喇   哈 ~

煎墨魚卷 - 尋日買定架喇   $20/半磅   里奧大人話好食   咁就好喇   諗唔到煮咩就可以買黎做餸   唔駛煩 ~

食完洗埋碗都只係 8 點幾   真在太好   今日好攰   所以都唔徑步喇   沖埋完食埋生果就睇電視休息   10 點 45 分就瞓覺喇 ~

香檳京都骨 + 楊州炒飯 + 青紅蘿蔔粟米豬骨湯 ( 25-AUG-2013 )

( 25-AUG-2013  SUN )

今朝 9 點半鬧鐘響   里奧大人就沖涼先   我就喺度懶床   呢排好攰   真係唔願起身囉 ~

我真係好攰   里奧大人又要幫佢姐夫整電腦   所以都唔番教會喇 ~

食完早餐就去街市買煲湯料同菜   買完就即番屋企   條街勁熱呀 ~

番到屋企抖陣   差唔多 1 點就煲湯   里奧大人姐夫無耐就到屋企   佢有佢地整   我有我打機 ~

今日 PokaPang 有 Extra Bonus   所以到咁上下時間要 stand by   都幾緊張   哈 ~

里奧大人姐夫話好餓   所以 2 點半就叫外賣 tea   食下傾下都差唔多 4 點   之後佢地又繼續搞電腦喇 ~

佢地終於 5 點幾搞掂   佢姐夫就番屋企   可惜我煲湯仲係太多水   無厘味道   要再開大火煲半個鐘   如果唔係叫佢飲碗湯呢 ~

紅蘿蔔湯太利尿   所以煲完即飲   費事夜晚成日去廁所   咁樣仲衰   瞓得唔好 ~

7 點預備煮飯   今餐完全無難度   就咁炒番熱就得 ~  

是日懶餐 - 香檳京都骨 + 楊州炒飯 + 青紅蘿蔔粟米豬骨湯

香檳京都骨 - 個汁好味道   但尋晚食個汁無咁甜   今晚食就好甜呢 ~   

楊州炒飯 - 如果我炒到咁乾身   咁粒粒分明就好 lu ~ 

青紅蘿蔔粟米豬骨湯 - 今個星期無湯飲   所以就要自己煲喇   太耐無煲   又係煲到無咩味   慘 ~

搞掂哂抖 45 分鐘就同里奧大人一齊去徑步喇   太耐無徑   所以徑 5 個圈   出咗成身汗   番到屋企即沖涼   d 感覺真係爽到陣   之後食埋生果就休息 lu ~