板長壽司 @ 九龍灣 ( 30-SEP-2013 )

芝味吉列蠔卷

蝦天婦羅壽司

黃鰭吞拿魚壽司 / 香草煙三文魚壽司

三文魚壽司

牛肉鮮茄烏冬

( 30-SEP-2013  MON )

星期一喇   但諗到聽日國慶假期就好開心呢 ~

早餐食奄列餐   半份奄列做 lunch box 嘅餸   呵呵 ~



菇場忙呀   忙到差唔多 12 點   之後就 hea 到 lunch time   今日有 lunch box   慢慢食到 1 點   洗埋碗又上網睇報紙 lu ~

諗住 hea 等放工   點知又忙   忙完停咗陣又忙   不過一定要做哂啦   聽日放假嘛 ~

放工自己去鰂魚涌睇中醫   無約家姐   因為佢屋企有好多餸   所以要番屋企食飯   點知我一去到鰂魚涌   佢打黎話喺附近買麵包   咁陪我睇中醫喎   佢都唔知係咪覺得我自己睇好慘   因為喺佢眼中   一個人做咩都慘咁   哈 ~

今晚要等 4 個人呀   差唔多 7 點先睇完   算係耐架喇 ~

去到等車   整佢   由 724 等到 754 呀   其實我想搭地鐵   不過陪家姐嘛   所以先坐巴士囉 ~

里奧大人差唔多 7 點半先放工   咁叫佢番屋企等我   我差唔多 8 點 45 分先番到九龍灣呀   所以佢餓到呢   今晚佢話想食壽司   所以去板長喇 ~

食完就即番屋企喇   因為要煲中藥同埋開機洗衫   里奧大人 11 點瞓喇   我就同 frd 用 line 傾計   又叉埋電先想瞓   所以又 12 點先瞓囉 ~ 

薑蔥生蠔 + 麻油雞 + 腐乳唐生菜 ( 29-SEP-2013 )

( 29-SEP-2013  SUN )

今朝 9 點半醒咗喇   里奧大人入房拎嘢   佢以為我未起身   所以細細力開門   咁我叫聲佢啦   問佢幾點   佢幾衰呀   話 11 點幾呀   之後我話呃人   我起身已經睇咗幾點啦   無聊 ~

原來今朝里奧人 8 點幾已經醒咗   不過佢肚痛   可以尋晚太辣   又飲埋啤酒   好易搞肚架 ~  

難得咁早   所以去 Delifrance 食早餐   不過佢地搬咗之後   我覺得份量小咗   同埋無咁好食   之前 d 早餐係熱辣辣架   今次都唔熱嘅   同埋杯咖啡真係好唔掂   德福果間 d 咖啡又係唔掂   所以應該唔會再黎食早餐 lu ~

食完就番屋企抖下   沖埋涼就番教會喇 ~

崇拜完就去馬莎睇西褲   之後喺 Boss 買套 Suit   又唔比人配多條西褲   所以依家再搵下有無一條係差唔多色   可惜無啦 ~

之後去牛頭角街市改褲   順便買埋菜就番屋企 lu ~

抖到 2 點半就去金姆指食 tea   之後我去拎番條褲   里奧大人就瞓晏覺 ~

我番到黎   執下嘢   佢就醒咗   又開始做公司嘢 lu ~

咁我又繼續執執執抹抹抹   5 點幾飲埋碗湯   6 點半預備煮飯喇 ~    

是日晚餐 - 薑蔥生蠔 + 麻油雞 + 腐乳唐生菜 

薑蔥生蠔 - 第 1 次整架   味道唔錯呀   不過 d 蠔就縮哂水   今次買咗 $5 蔥   因為第 1 檔買咗 $3   d 蔥都唔靚嘅   咁再買多 $2 靚 d 嘅蔥   不過其實 $5 都幾多   所以留咗 d 黎做薑蓉 ~       

麻油雞 - 一碟蠔唔夠餸嘛   所以整多隻雞肶   加 d 麻油加 d 薑蔥   方便又好味 ~  

腐乳唐生菜 - 懶呀   所以買唐生菜囉 ~

搞掂哂   沖埋涼就食生果   媽咪買咗個巨蕃鬼荔枝比我   食完真係夠哂飽 ~

蕃鬼荔枝同沙田柚差唔多 size

其實個蘋果都係好巨

ME.N.U @ 九龍灣 ( 28-SEP-2013 )

部隊窩 - 兩人份

材料有 / 年糕 / 泡菜 / 豬肉 / 椰菜 / 香腸 / 金菇 / 洋蔥 / 火腿 / 午餐肉 / 茄汁豆 / 一塊芝士 / 辛辣麵

( 28-SEP-2013  SAT )

今朝瞓到 8 點先起身   都有 d 攰咁架   所以都無咩胃口   又食奶油多 lu ~

菇場忙到 10 點就 hea 喇   靜到爆   真係唔眼瞓都變眼瞓 ~

終於放工   又諗唔到去邊   所以番屋企喇 ~

里奧大人要去舖頭拎西裝   所以差唔多 2 點半就打的去宏天廣場   飲到差唔多 4 點   之後去舖頭   拎完就坐小巴去德福   去馬莎買咗 3 件裇衫   今次買 2 送 1   所以買 $499 一件嘅裇衫   咁樣除開   價錢同平時買嘅裇衫價錢差唔多   好似着數 d   哈 ~

香茜滑牛腸

蒜蓉蝦春卷

薑蔥牛柏葉

潮式靚粉果

四寶滑雞扎

生煎蓮藕餅

買完就去睇電話   里奧大人想出 Note 3   但 Sony 影相又靚 d   上網速度又差唔多   真係好難取捨 ~

番到屋企都差唔多 6 點半   好攰呀   又未餓   咁抖陣先再出去食飯喇 ~

抖到 7 點半就出去食飯   想食部隊窩呀   所以去 ME.N.U   又係要等位   不過度度都要等位   食飯時間嘛   好感恩等咗 10 分鐘就有位呢 ~

我上網睇食評   d 人話呢間嘅部隊窩材料樣樣都得 dd 咁多   同埋 Cashier 又話兩人份嘅份量   如果大食係唔夠   咁我覺得自己大食家嘛   所以加多個辛辣麵   初初食嘅時間好似唔多夠   仲覺得加辛辣麵係啱嘅   點知食第 2 個麵嘅時候就覺得開始飽   同埋我又食埋 d 年糕   所以會比里奧大人更飽   食完呢次   真係要隔一排先想再食 ~

實在超勁飽   所以同里奧大人行商場散步   行咗差唔多半個鐘就番屋企喇 ~

沖完涼就熨 2 機衫   熨到出汗又要再沖多次涼   之後就休息 lu ~

里奧大人做完公司嘢又睇陣電視   差唔多 12 點幾先瞓   好在聽日可以瞓到 10 點啫 ~             

住家飯 @ 媽咪屋企 ( 27-SEP-2013 )

花雕焗蝦 

燜鴨舌

蒸泥猛魚

炒菜心苗

皮蛋酸薑

蓮子百合當參山斑魚湯

( 27-SEP-2013  FRI )

嘩   尋晚又係 12 點先瞓   今朝對眼好澀呀 ~

早餐食碎蛋吞拿魚治   今次半份夠喇   食完都幾飽下 ~   

呢個咁嘅極品 8 卦   我一開 skype 就問我覺唔覺得佢係貪錢怪   為咗丁屎 300 蚊而問我攞番人情   用丁屎黎形容   肯定係佢老婆教   因為佢之前同我講話細過收到 $1 利是   即場講話咁小   佢自己都覺得好衰咁   所以佢今次咁講   一定係佢老婆教佢   之後我問佢會計同事無去飲同做人情   咁點解唔問人"攞番"  而一定要問我攞番   佢話佢預咗人地唔去   咁我覺得佢仲賤   明知人唔會去你都派帖   即係妳預咗齋收人情啦   不過我都唔串佢喇   只係問佢咩心態囉   呢 d 人終於令我肯定一樣嘢   就係依家開始同佢只講公事   唔傾私事   永遠只會係同事階段   唔會係朋友呢 ~

之後差唔多 10 點就開始忙喇   個渠王同事又係超衰格   d 嘢永遠唔清唔楚   問佢咩都話有   其實係無   咁樣好嘥人時間家嘛   咁大個人仲咁樣做嘢   真係好不知所謂 ~

忙到 lunch time 仲未做完架   好在有 lunch box   因為今日無咩點上網呀   哈 ~

忙呀忙   忙到差唔多 5 點幾呀   好在搞掂哂咋   可以準時放了工 ~

里奧大人上大陸   咁我又番媽咪屋企食飯喇 ~

今次醒喇   同媽咪講話唔食飯   因為 lunch box 好多飯嘛   咁媽咪又要叫我食小小   真係有 d 火   都話唔食就唔食   我食得落就唔會咁講啦 ~

食完飯抖下   家姐又話食生果同薯片   因為我買咗包粟米味薯片嘛 ~

 
差唔多 8 點 45 分就走喇   本來諗住熨衫   但真係好鬼攰   所以沖完涼就打機睇下雜誌算喇 ~

里奧大人 10 點幾番到黎   佢沖完涼就睇番錄咗嘅劇集   其實依家無咩電視劇好睇   所以我 8 點半之後就燜熄電視架喇   有時番到屋企直頭無開電視添呀 ~

今晚 12 點先瞓   好在聽日番半日   同埋我教 8 點先起身   咁瞓 8 個鐘都 ok 架   哈 ~            

魚香茄子 + 蝦味蛋炒飯 ( 26-SEP-2013 )

( 26-SEP-2013  THU )

攰呀   但都係同平時一樣 7 點 25 分起身   其實可以瞓到 8 點   不過醒咗再瞓反而係有壓力   因為始終要番工嘛 ~

今朝涼涼地咁呀   實在太好   如果日日係秋天就好 lu ~

早餐食奶油多   我叫咗奶醬多架   好在後尾醒一醒   即刻話係奶油多咋   我覺得奶醬好漏呢 ~

番到菇場第一件事係比人情比 8 卦   佢哦咗一聲   可能佢好愕然   之後我洗埋杯就開 skype   同佢講頭先封利是係人情   佢話點解又比番嘅   咁我咪話囉   我 d 朋友話既然你咁勇開口問人 "攞番" 人情   咁我都比啦   之後佢仲好意思話好怪咩    咁我話你成日口口聲聲話結婚擺酒係想人替你開心  但妳又開口問番我攞番人情   佢話我 d 朋友唔了解佢喎   話擺酒唔係賺人情   我費事再串佢咋   唔係為人情做咩問我攞番人情先   終於睇清楚呢個人   以後我一定唔會再主動約佢食早餐同 lunch   呢個人令我太失望喇   我依家都無再主動同佢打招呼   佢望到我   我笑一下咁囉   其實我勁想唔笑架  哈 ~

最搞笑幾個朋友都不約而同同我講   唔駛再請佢食飯   咁梗係啦   如果佢夠膽講   我真係毫不客氣串爆佢架   講難聽嘅說話幾咁易呀   唔好迫我 ~

今日食完 lunch box 就去銀行入票就周圍行   買咗件外套比媽咪   之後糟糟打黎傾計   傾咗半個鐘   原來已經 1 點 50 分   嚇得我急急番菇場喇 ~                 

放工唔駛買餸   所以去行下商場先番屋企   勁爽呀 ~

6 點半開始預備   之後糟糟又打黎   又傾咗半個鐘   傾完即煮飯喇 ~

7 點半搞掂   不過好餓   所以食印尼撈麵   因為今晚嘅炒飯只係夠里奧大人同 lunch box 嘛   點知里奧大人打黎話放工   咁我等多陣先煮餸啦   咁可以一齊食嘛 ~ 

是日晚餐 - 魚香茄子 + 蝦味蛋炒飯 

魚香茄子 - 今次買 3 條茄子   真係食得好滿足喇   其實勁想學人走油   顏色靚好多嘛   不過實在要用好多油   唔捨得呀   哈 ~  

蝦味蛋炒飯 - 里奧大人話今次 d 炒飯好味呀   口感又掂   我都覺呀   因為平時炒飯係一 pat pat 咁嘛   同埋今次我落咗多油   又加咗蛋   可能香 d 啩 ~

洗埋碗   抖多陣就去徑步喇   里奧大人做公司嘢   所以我自己徑   9 點 20 分徑到 9 點 40 分   都唔錯啦   對於我呢 d 懶人黎講   哈 ~

勁感恩呀   因為徑完行番屋企開始落雨呀 ~

沖完涼就睇報紙   之後又打機   不過今晚打到 11 點半就瞓 lu ~   

酸梅麵豉蒸排骨 + 紅莧菜 + 芫茜皮蛋魚片湯 ( 25-SEP-2013 )

( 25-SEP-2013  WED )

今朝超級勁唔想起身呀   因為呢排都好夜瞓   係時候要教番 11 點瞓喇   因為唔夠瞓對眼好澀   呢下最慘 ~

早餐食雪菜肉絲米   今次正呀   因為係肉片   唔駛 "new" 咁耐 ~

番到菇場   我同 8 卦講如果無帶飯就請佢出去食飯   因為我無去飲   其實我星期一已經同佢講   不過佢無覆我   咁今朝佢竟然同我講話   叫我不如比番人情佢喎   咁我終於知點解佢星期一唔覆我啦   佢最想要嘅係錢   仲好話如果請食飯   佢老婆唔熟我   覺得我好怪喎   衰 d 講   佢 9 月頭結婚   都隔咁耐   我唔鬼理佢都得   不過日日見就費事啦   我知道收到帖就要比人情   我仍都知道人唔到禮要到   但真係無諗過佢結婚果日   我每月一到根本無可能去到嘛   又唔係特登唔去喎   而佢都知我次次都 S/L 架啦   同埋我同其他同事又唔熟   叫人比住先又唔係咁好 ~

問哂屋企人同朋友   個個都叫我比番佢   因為塞住佢把口   唔好等佢日日咒我喎   為咗幾百而咒我   真係好恐怖   不過 8 卦老婆把口係好毒   8 卦同我講   佢老婆 3 年級小息玩棋   次次玩完都無人執得佢執   所以佢老婆就咒 d 同學有命玩無命執   真係好惡毒下 ~

比個咁嘅極品搞到我無咩胃口   所以差唔多 1 點先食 lunch   就咁叮費刁算喇 ~

之後有朋友又教我點做   真係差唔多全日都講緊呢單嘢   哈   所以好快又放工咁 ~

放工去街市買餸   順便買埋聽晚嘅餸   情願一次過重 d 都好過晚晚去街市 ~

番到屋企即預備啦   之後拖地同開機洗衫   開埋火滾湯就可以抖抖喇 ~

之後糟糟 7 點打黎   一傾就傾到  8 點   最搞笑佢有個同事又係好縮骨   英文名又係同 8 卦一樣   係咪咁邪呀   哈 ~

傾下傾下其實完全唔記得要淥菜   同埋唔記得自己開火滾湯   好在無煲燶咋 ~

是日晚餐 - 酸梅麵豉蒸排骨 + 紅莧菜 + 芫茜皮蛋魚片湯 

酸梅麵豉蒸排骨 - 無咩胃口   所以整酸梅麵豉   開胃 d 呢 ~  

紅莧菜 - $8/斤   所以試下   不過里奧大人唔鍾意食   話好似湯渣 d 菜喎   咁即係咩呢   哈 ~        

芫茜皮蛋魚片湯 - 連續兩晚食咖哩   又夜瞓   有瘡要爆啦   痛到呢   所以要下一下火呀 ~ 

里奧大人 8 點半打番屋企   不過我聽唔到   20 分鐘之後打比佢   我仲以為佢放咗工   原來係有 urgent 嘢做仲未走得   叫我食先   唉   佢差唔多 10 點半先番到屋企   番到屋企即食飯   之後即沖涼   睇陣 Ipad 就瞓覺   我就打機打到差唔多 12 點先瞓 ~

楓林小館 @ 大圍 ( 24-SEP-2013 )

椒鹽生中蝦 ( $240 ) - 一上枱好香架   呢度 8 兩有 8 隻要 $240   我覺得貴呀   有 d 就有膏   有 d 就好細隻   但家姐同事居然話食 2 隻已經好飽   實在太誇喇

紅燒乳鴿 ( $90) - 好一般啫     


蝦醬通菜 ( $70) - 好夠鑊氣   但好細碟呀   哈   

生炒排骨 ( $85 ) - 多肥豬肉呀   最驚   都係新斗記最好食   夠乾身

送架   但唔記得係合桃露定腰果露   因為完全無味道 @.@


我地見到咁大粒湯丸好開心啦   點知難食到   林過豆腐呀   完全唔煙韌   真係老人家唔咬直吞都唔會梗親呀   全宇宙最難食 @.@

芬達 $12 - 樽裝真係好飲 d  

辣醬芥辣真係好舊式酒家先有呢 

( 24-SEP-2013  TUE )

今朝里奧大人好早起身   原來係要上廠   尋晚問佢就咁話上大陸   等我以為係上大陸 office 添 ~  

個天仲有 d 煙霞   同埋仲係有小小焗   不過就唔係好熱   開始有秋意喇   開心開心 ~

早餐食芝腿治烘底   慘啦   開始有 d 厭   但諗唔到食咩又係食佢喎 ~

菇場唔忙實在太好   因為我實在無心機做嘢   想快 d 到 12 點半放工 ~

今日家姐 off 全日   所以我都 off 半日   約埋糟糟同媽咪一齊去飲茶行街 ~

約咗糟糟 12 點 45 分喺菇場附近等   之後再車埋媽咪 工人一齊去沙田大會堂美心皇宮飲茶   好在家姐去咗攞位先   咁我地去到可以即刻有點心食   哈 ~

呢間美心皇宮嘅點心都幾好食   仲有我地最鍾意嘅推車仔   今日成日講錯嘢   明明想話蛋散又講咗馬仔   之後明明想講茄子釀蝦膠又講咗釀花膠   嚇到佢地覺得點解點心用花膠咁高級   呵呵 ~

糟糟勁想食鳳爪   所以次次見到點心車都望   咁佢望唔到就我講比佢聽啦   咁之後家姐無啦啦話有我勁想食嘅節瓜釀魚肚   但其實我同媽咪同糟糟講   我勁想食茄子釀蝦膠   無話想食節瓜   但家姐係都話我有講   好在糟糟都話我無講勁想食咋   後尾我終於知道家姐點解話我講節瓜   因為我講過比糟糟聽嘛   但唔好屈我話勁鍾意食嘛   哈 ~   

炸蝦角 - 啖啖蝦肉真係幾正

水晶鮮蝦餃 - 又係啖啖蝦肉

干蒸牛肉 - 依家好小有得食   所以點都要叫黎食   我鍾意食干蒸多過山竹呢

薑蔥牛柏葉 - d 牛柏葉好爽

柚皮鳳爪 - 糟糟想食鳳爪   所以叫喇

瑤柱煎蝦米腸 - 我同家姐最驚食蝦米腸   家姐仲驚有蔥添   衰糟係都叫黎食   食小小又唔食   媽咪同工人又唔食得   咁要我食哂啦   衰

切雞飯 - 媽咪依家出去飲茶只可以食切雞飯同菜咋   雖然覺得好慘   不過難得佢肯戒口都唔引佢啦   等到血糖穩定唔駛打針   再同佢食過啦   今日佢都破戒食咗 1 粒蝦餃   因為媽咪其實可以食 4 隻蝦嘅   所以我叫佢食粒蝦餃   一齊食開心 d 嘛

懷舊千層糕 - 超好味   有蛋黃有冬瓜蓉   呢 d 先夠正宗嘛

香芒凍布甸 - 糟糟一坐低就叫   我話凍都變熱啦   最後先叫咪仲好   但佢真係食咗小小點心就食喇喎   之後佢行去搵點心   我食咗佢一半   因為條友成日食剩嘢   唔食就唔食架喇   衰   家姐話佢次次去酒樓飲茶   一次叫幾棟點心架   所以我喺度   我唔準佢叫   食唔哂我會鬧佢   但鬧佢呢   家姐同糟糟反而狂笑   痴線架 @.@

我鍾意個杯

飲到差唔多 3 點   之後去新城市廣場   估唔到唔焗喎   同埋係無咩人   同星期六日行係兩個世界 ~

今日超感恩   因為一田卡有折   咁啱媽咪又睇啱咗頂帽   所以即送比媽咪喇   最緊要媽咪開心呢 ~

之後陪糟糟睇枕頭同電視機   佢買完枕頭就去無印同一田超市   我之前勁想喺 Ikea 買三文魚扒   今次喺一田買仲抵   $127 減到 $108 再 95 折   所以即買 2 pack   再買埋低脂芝士比媽咪就走喇 ~

車咗媽咪番屋企都已經 5 點喇   本來想去唱 K   但又 book 咗位食飯   所以唔去唱喇   轉去九展車行睇車   睇咗 1 個鐘   行到有 d 攰   同埋開始肚餓 lu ~

估唔到塞車   之後去泊車   d 位窄到呢   同埋停車場係半層半層咁計   所以 4 樓等如 8 樓   唔怪得好似轉咗咁多彎咁啦 ~

去到楓林小館啱啱好 7 點   最離奇係佢地居然無幫我地 mark 低 book 咗 7 點   好在有枱咋   又會咁離譜嘅 ~

家姐唔鍾意食中菜家嘛   所以好奇怪點解佢會黎食   原來係佢同事講到好好好好食   同埋食到好飽好飽   但我地一致認為都唔係咁好食啫 ~

本來係啱啱好   之後食埋碗糖水就覺得超勁飽啦   所以行個大圈先去停車場 ~ 

雖然今日就咁飲茶同行街   但我地都覺得好攰   之後又講話 d 闊太生活真係幾悶   雖然有錢啫   但買嘢都會買到悶家嘛   嘩哈哈 ~   

今日家姐全包   糟糟就比泊車費   真係爽喇 ~     

番到屋企即沖涼喇   差唔多 9 點幾里奧大人都番到屋企   實在太好   唔駛等咁夜 ~

我依家玩緊 Line 嘅 PokoPang   原來我個舊同事都有玩   不過我唔 make sure 係咪佢   但見佢比樹葉我   我就比番佢啦   之後佢今日無啦啦 Line 我   原來真係佢   真係大大話話差唔多 10 年無傾計無見   估唔到佢仲記得我   呵呵 ~

同佢 9 點 Line 到 10 點   之後佢話手攰   所以就傾電話   一傾就傾咗差唔多 2 個鐘   真係耳仔都痛埋 ~

差唔多 12 點先瞓   真係超級勁攰呀 ~