2014年4月30日星期三

嘉華大酒樓 @ 官塘 ( 30-APR-2014 )

西檸煎軟雞 - 炸得好乾身   好味道呀

豉汁蒸黃立鯧

炸乳鴿

金銀蛋莧菜

沙薑雞腳

( 30-APR-2014  WED )

仍然攰呀   不過諗起聽日放架就開心呢   因為可以瞓晏 d   哈 ~

好餓呀   所以早餐食麵餐   我發覺呢排個胃食大咗   慘 ~


菇場唔忙   最緊要唔好忙   因為無 mood 做嘢呀 ~

Lunch 食酸辣米線   今日真係痴咗線   我好小朝早食麵   晏晝又食米線咁飽肚嘅嘢架   但無啦啦勁想食   所以就食囉   不過食完又勁辛苦   好滯咁   之後係咁食超酸嘅糖   搞到個胃有 d 痛添  攞黎搞   哈 ~


放工即走   今晚同媽咪 家姐一齊去嘉華食飯   因為家姐星期五要開 OT   同埋里奧大人今晚上大陸   所以我改今晚食囉   其實家姐諗住今個星期都唔番媽咪屋企食添呀   不過見我今晚黎   所以就一齊食呢 ~

媽咪同工人番屋企先   我就同家姐去萬寧睇下嘢   好感恩 air waves 做出位價   所以我地總共買咗 10 包   再埋多盒朱古力   因為依家仲差 1 個印花   所以計咗數先比錢   明明計咗 $6x   但比錢嘅時候係 $7x   咁我即刻話家姐計錯數   但其實係我問題   因為我同家姐講話 8 包 air waves   但其實係 10 包   嘩哈哈哈哈   家姐真係慘   比我屈咗佢添 ~

買完番媽咪屋企   今晚勁呀   因為我要拎走 d 芥蘭啦   節瓜同新鮮淮山   原本呢 d 係今晚食嘅菜   不過媽咪話出去食   佢又食唔到咁多   咁就益哂我喇   再拎埋湯   個袋又盤滿砵滿 lu ~

8 點半同家姐一齊走喇   番到屋企即開機洗;衫   之後沖涼就休息喇 ~

里奧大人 11 點先番到屋企呀   所以食杯麵   之後食埋木瓜   佢沖涼完無啦啦話要 relax 喎   食珍珍同飲啤酒   之後話頭先餓到死   依家飽到死   哈哈 ~ 

今晚 12 點幾先瞓   好在聽日可以自然醒 ~

2014年4月29日星期二

叙苑粉麵茶餐廳 @ 九龍灣 ( 29-APR-2014 )

魚香茄子煲

咕嚕肉 

( 29-APR-2014  TUE )

雖然一覺瞓天光   都幾精神   不過如果可以瞓到自然醒就更好   哈 ~

早餐食芝腿治烘底   不過今日食火腿 d 口感好怪   唔知點咁 ~


菇場唔忙呀   大粒又完全唔喺度   真係好想落街行下呀 ~

Lunch 諗住食酸辣米線   不過 PMS 無啦啦約我出去食   咁就去啦   今次去食點心   估唔到又幾好食喎 ~

陳皮牛肉腸

鵪鶉蛋燒賣

傳統客家煎大餅

滋味漢堡仔

薑蔥牛柏葉 - 我一路食牛柏葉一路講   差 d 梗死呀   勁驚   所以到 PMS 食果陣   我叫佢咬耐 d   同埋唔好講嘢   哈

醬皇蒸鳳爪


蕎麥茶幾好味

飽呀   勁想瞓   如果可以瞓陣就好 lu ~

里奧大人 4 點打黎話見客   咁我順便問埋今晚煮飯定出去食   佢話出去食喎 ~

放工即走喇   因為里奧大人有 urgent 嘢要做   所以我都番屋企先   等呀等   等到 8 點先出去食   餓鬼到我呢 ~

里奧大人想食豉骨排骨炒麵   所以去叙苑食啦   但之後見到有小菜餐牌   所以都係想食小菜   哈 ~

食完都差唔多 9 點   即番屋企沖涼喇   之後再等埋里奧大人沖涼就睇心計   呢兩晚 11 點就已經好眼瞓   咁都好   起碼有睡意   因為到瞓覺時候都無睡意真係好鬼慘呢 ~  

2014年4月28日星期一

太興燒味 @ 九龍灣 ( 28-APR-2014 )

菜心薳客家梅菜扣肉煲 - 都唔好食嘅

紅燒豆腐魚肚煲 - 份量好小呀   但個汁都幾濃味   不過太杰身   唔係就更加好

例湯 - 真係好好飲   哈


( 28-APR-2014  MON )

今朝勁唔想起身呀   都係自己衰   尋晚 12 點先瞓 ~

早餐食芝蛋治烘底   好耐無食喇   又幾好味噃 ~


諗住快快手做哂 report  就抖啦   點知做完之後就不斷有嘢做   攰到呢   又好鬼眼瞓喎 ~

Lunch 出去買車仔麵   因為想飲凍奶茶提神 ~


飲完奶茶仍然咁攰噃   同埋仍然咁忙囉 ~

放工真係要即走   仲要有咩車就搭咩車番屋企   因為約咗 Rainbow  6 點黎屋企做清潔測試 ~

佢差唔多 6 點 15 分先到   做咗差唔多 1 個鐘   不過我唔會買啦   $26,000 喎   同埋唔係我想像中咁好   如果唔係都會考慮下 ~

里奧大人 7 點 15 分就放工   佢無啦啦話想食中菜   本來想去稻香   不過我又未走得   所以我話去太興啦   近近地 ~

9 點番到屋企就即開機洗衫喇   唔好講笑   今日真係勁攰   沖完涼就睇電視休息   咩都唔願做呀   同埋一到 11 點就即瞓   機都唔打喇   哈 ~      

2014年4月27日星期日

元氣壽司 @ 九龍灣 ( 27-APR-2014 )



玉米蝦船 / 元氣卷

芥辣八爪魚

吞拿魚

波士頓卷 / 元氣卷 / 炸蝦卷 / 三文魚 / 皇帝蟹柳

螺肉

中華沙律

( 27-APR-2014  SUN )

今朝教咗 10 點起身   鬧鐘響咗之後   里奧大人就沖涼先   我話我想瞓多 5 分鐘呢 ~

點知一瞓就瞓到 10 點 40 分   咁番唔切教會 lu   梳洗之後要即落去食早餐   唔係連早餐都無得食 ~


食完我就自己去超市買果汁   里奧大人話有 d 眼瞓   我叫佢番屋企先   但佢等到我番黎佢先瞓 ~

今日好鬼熱呀   出一出街已經成身汗   真係唔沖涼都唔得囉   就算開埋冷氣都會覺得立痴痴   我無心機做嘢架   所以沖完涼之後成身爽哂   做嘢都好衝勁   哈 ~ 

我終於的起心肝抹鞋柜   掉咗 6 對鞋   之後發覺仲有 7 對鞋無着過   好在無比里奧大人睇到   唔係又話我買買買架喇 ~

差唔多 2 點就出去食 tea   食完經過髮型屋   咁啱見到平時剪開頭髮嘅髮型師   咁啱又無人   所以里奧大人就去剪髮喇   而我就番屋企執衫喇 ~


買衫嘅時候真係好開心   不過買下買下真係好多   所以里奧大人呢排成日撩我去泰國   我都話唔去   因為太多衫   但去泰國唔買衫又唔得喎 ~

好在之前將 d 衫分類   咁樣執起上黎係快好多架   不過都執咗 2 個鐘   好鬼攰呀 ~   

里奧大人 4 點幾番到屋企就最 perfect   因為要飲埋 d 湯   係媽咪尋日特登煲比我地架 ~

    
我話明今晚唔煮飯   但想去元氣食壽司   今次醒喇   5 點 45 分出門口   估唔到 6 點去到元氣都要等 8 張飛   好在唔駛 10 分鐘就有位呢 ~

今次又係食到好飽   因為我食咗 2 件之後   個胃無啦啦好脹呀   搞到我食力大減   最後要里奧大人幫手食   佢飽到上腦   但都係食咗 $233   同 $900 仲有斷距離   所以下次會叫埋家姐黎食   咁樣起碼會食夠 $300 或以上   有人幫手食差好遠架 ~      

之後行德福   去咗 Unilqo   里奧大人買咗條 7 分褲   我就買咗件線衫   再行埋馬莎   里奧大人又買多條黑色長褲   買完就番屋企   我就沖涼睇電視   佢就自己去徑步呢 ~

今晚又唔係好眼瞓   所以 12 點先瞓呀   預咗聽日番工實會眼瞓咯   呵呵 ~

2014年4月26日星期六

奇興美食中心 + 松記糖水店 @ 九龍灣 ( 26-APR-2014 )

燒原隻澳門葡式乳豬一隻 ( 炒飯底 ) - 團購價 $198 咋   味道都 ok 啦   不過食食下都覺得幾多肥膏

d 炒飯好味   同埋夠乾身   最有驚喜反而係佢   哈   

豉椒味菜鵝腸 - 無鹹酸菜味道嘅 @@   

薑蔥霸王雞 ( 半隻 ) - 一般

香煎中式牛柳 - 呃人嘅   一咬落口   我地個個都話係食緊大家樂早餐嘅牛扒囉   但個汁就 ok

金銀蛋浸白菜仔 - 一般   其實佢地小菜真係好一般   唔夠鑊氣囉

奇興   有緣再見 ~~~~

@ 松記糖水店

我嘅幻彩明珠 - 唔夠凍呀

家姐檸檬芝士脆脆木布 - 呢個勁凍   好似食緊好硬好硬嘅雪糕

糟糟芒果明珠 - 無咩味嘅

里奧大人生磨芝麻糊 ( 熱 ) - 呢個好香   不過得里奧大人自己食   所以佢食完話超級漏   呵呵

( 26-APR-2014  SAT )

今朝我 8 點起身   不過我起身嘅時候   里奧大人已經醒咗整嘢   之後係都要陪我食早餐呢 ~

咁我依家用緊佢部 GF5   我話有 d 壓力   因為部機始終唔係我嘛   同埋我覺得自己唔算話好錫相機嘅人   好驚整花佢部機囉   咁我話不如賣比我啦   佢個咀型已經係個好字架喇   差在未開聲咋   之後我即刻話 $100 賣比我   佢話送比我好過喎   呵呵 ~

其實我唔想借里奧大人部相機影相架   但我覺得 Samsung 電話影相嘅顏色真係麻麻   所以先借相機囉   不過用人 d 機真係唔太慣   影唔到本身個效果添   嘥料   哈

菇場唔忙   實在太好啦   因為次次星期六都無啦啦好忙家嘛 ~

今日菇場有 d 同事會參加慈善步行   佢地 12 點幾就換件 polo tee   之後就去飲茶   我同 8 卦都覺得去到會場換 tee 都未遲啦   我覺得最搞嘢係佢地嘅 tee 係白色   真係好在唔係襯埋白褲啫   唔係以為去大酒店   同埋佢地又着哂白色 tee 去飲茶   我覺得真係好搞笑囉   如果比我揀顏色   我會揀黃色或者螢光綠呢 d sharp 嘅顏色會好 d   咁起碼精神 d 丫 ~

放工即走 lu   喺鑽石山地鐵站 join 里奧大人一齊去深水埗買 printer ~

丫   落毛毛雨呀   所以去完鴨療街買完條電線就去食嘢喇 ~

我嘅麻辣雞翼尖 + 油渣削搖麵 ( 原味湯底 ) - 勁多雞翼尖呀  好似有 7 隻定 8 隻   我初初諗住得 4 隻架咋   無諗過咁多   食到個口好攰


主角係呢 d 辣菜甫 ^^

里奧大人嘅油渣 + 魚腐削搖麵 ( 酸辣湯底 )

我飲凍咖啡   里奧大人飲凍檸茶   但我發覺好多時都會比凍檸茶比我   可能覺得女仔驚肥   所以唔飲奶茶咖啡咁呢

其實想試下小食 " 絕椒肚 "   個名好似好勁咁   不過我驚太辣   所以都唔敢試 lu

食完坐陣就去高登喇   里奧大人一早諗好咗買 HP 嘅 Printer   不過行行下比我見到 Canon 紅色 Printer   所以最後都買咗 Canon ~

坐地鐵番九龍灣   不過就喺油麻地轉車   因為想坐下呀   咁我去到油麻地站   我直頭想行去對面車廂   里奧大人叫停我咋   如果唔係又去番深水埗呢   嘩哈   無計啦   我盲中中家嘛   同埋其實頭先都覺得奇怪   點解總站仲係咁多人搭添   原因自己搞錯 ~

番到屋企都差唔多 4 點   里奧大人即 set printer   我就睇雜誌啦   今晚同埋媽咪 家姐佢地去食乳豬   所以叫媽咪同工人落黎九龍灣先   咁啱媽咪又想買鞋   咁叫佢 5 點落黎淘大一齊睇鞋呢 ~

我大愛嘅紅色

媽咪成日想買 Birkenstock   因為佢着開覺得大頭好舒服   又話波鞋個踭好高   其實邊度高啫   妳用平底拖鞋黎比較   咩鞋都高過佢啦   同埋佢着拖鞋黎做運動其實都唔好啦   但講咗好多次都係咁   所以我都費事話去   叫里奧大人同佢講話拖鞋唔好   不過我都會比佢試拖鞋嘅   但依家個鞋底好 "線" 呀   所以唔比佢買   咁拎咗對波鞋佢試   佢話好輕   着起黎都好舒服   所以里奧大人送比佢喇 ~

之後媽咪想買風褸   咁又同佢睇下啦    又睇啱咗件   所以里奧大人又送埋比佢喇   佢自己都買咗條短牛仔褲   本來我都買條長褲架   不過已經 6 點半   所以唔買喇   因為 book 咗 6 點半到呢 ~

打的去到之後   糟糟同家姐都差唔多時間到   唔知點解我同家姐都好鍾意話鬼糟糟   因為話完佢   佢會係咁笑   咁我出去接佢地嘛   明明到咗   衰糟係都要行前睇下   所以我好自然咁話佢   呢度咪係囉盲人   之後我地 3 個一齊笑   因為我好小會話佢係盲人   哈 ~

今次隻乳豬係我團購架   咁叫埋其他小菜   家姐就睇張單   話二百幾蚊咁平嘅   我話隻豬我比咗錢架喇   話明團購嘛 ~

糟糟坐喺我同家姐中間   咁我食阿麻素嘅時候   佢問我呢幾粒係咩   不過吞緊點答佢喎   之後佢又問   不過我仍都無理去   因為家姐咁啱又同我講嘢   之後阿糟好慘咁話點解我唔答佢   咁又係喎   佢問我先家嘛   嘩哈 ~

食到差唔多 8 點   咁我話玩包剪揼   輸咗個請   糟糟未玩過嘛   但我講明話唔駛佢請嘅   旨在玩下啫   咁糟糟又唔知咩事   里奧大人就奸笑同佢講話   玩下咪知囉   點知我地一猜   我同家姐同里奧大人都係係剪   糟糟係包   真係未試過咁架   因為多數邊個話猜就邊個輸   糟糟話我地 3 個好似 d 老千咁呀   哈 ~

我話不如一齊去食甜品咯   因為得寶開咗間松記   咁佢地都話好   所以就車咗媽咪工人番屋企先   我同家姐跟車   里奧大人就自己行去松記   先到先等 ~

呢間松記都好迫囉   坐得勁唔舒服   不過我地食下傾下都已經 9 點幾   係時候散水喇 ~

番到屋企我就即沖涼啦   而里奧大人繼續整 printer   感恩都好快手搞掂 ~

嘩   搞 lee 搞 ku   差唔多 1 點先瞓呀   估唔到咁夜添 ~