( 30-NOV-2014 SUN )
今朝鬧鐘 10 點響 因為諗住番教會嘛 咁里奧大人出去梳洗先 我就諗住瞓到佢搞掂為止 點知我一瞓就瞓到 10 點 45 分 因為里奧大人次次見我瞓到咁林 就唔會叫醒我架喇 ~
咁都番唔切教會 lu 所以可以唔駛咁趕梳洗呢 ~
食完早餐 行陣就番屋企 都已經 12 點喇 抖陣就要執衫喇 今次掉咗 1 袋衫 依家最好嘅係有回收箱呢 d 咁真係唔會嘥囉 因為真係有 d 無着過 有 d 連價錢牌都無拻呢 最驚比里奧大人睇到 哈 ~
今日勁焗熱呀 無風嘅 所有里奧大人話要開冷氣 咁佢真係覺得熱架喇 唔係得我一個熱 ~
執呀執 執到 2 點呀 約咗家姐黎屋企拎醋 順便比埋薑餅人禮物佢 佢一見到就話講咗唔要囉 做咩又買 里奧大人又講番話咗送又唔送 好似好衰咁 之後家姐拎個 mug 出黎睇 里奧大人話 " 睇時咩就可以用 " 家姐又話係呀 佢都咁諗 咁我以為叫家姐擺 d 錢入去啦 點知我再諗 終於知佢地講咩啦 頂佢 話裝骨灰呀 我話咁大個 mug 裝埋一齊都仲大把位呀 衰 ~
好喇 淘大依家開咗間 Pizza Hut 所以去食 tea 因為我有 3 送 1 coupon ~
我鍾意呢個水樽
意大利菜湯 我覺得好酸 不過家姐話唔酸喎
俄羅斯沙律三式拚盤
大蝦鮮茄特脆 - 好耐無食過 Pizza Hut 嘅 Pizza 又幾好味噃
都算多料架喇
超級至尊迷你必勝批 - 仍都好耐無食厚批 都覺得好好味呢
蜜桃脆金寶 - 家姐話食 tea 唔想咁飽 所以食甜品 細細個都唔錯丫
食完就番屋企喇 家姐坐到 5 點就走 lu 里奧大人去徑步 我就熨衫 之後預備晚餐 lu ~
是日晚餐 - 臘肉蒸節瓜 + 煎鯧魚
臘肉蒸節瓜 - 之前喺榮華買咗條臘肉 估唔到甜甜地幾好味 因為我印象之中 臘肉好鹹好硬咁囉 ~
煎鯧魚 - 媽咪買架 今晚終於清哂喇 明明新鮮都變冰鮮 哈哈 ~
今晚 7 點食 搞掂哂沖埋涼都係 9 點 咁睇 " 老表你好 hea " 大結局 我睇 d 唔睇 d 咁啦 不過都唔好睇嘅 ~
雖然唔眼瞓 但 11 點幾都要瞓喇 聽日正式番工架喇 哈 ~
( 29-NOV-2014 SAT )
個半月病假 話咁快就放完 lu 今日要番工喇 家姐同里奧大人都話今日留半日好丫 warm up 下嘛 ~
估唔到我真係有 d 緊張噃 尋晚瞓得勁差呀 但又唔係番新工 點解會緊張嘅呢 ?!
7 點 45 分起身 當然都係食埋早餐先番菇場啦 ~
無食個幾月啫 點解會細咗咁多架 大過奶皇包小小咋 ~
居然忙喎 都話次次星期六都好忙架啦 邪爆 不過我都無咩點做嘢呀 八卦係咁同我 skype 佢話個半月無同我吹水 要瘋狂吹水呀 要講番哂個半月無講嘅嘢喎 痴巾 但真係傾到放工 真係攰過做嘢 哈 ~
放工即走喇 番到屋企見里奧大人影相 原來佢靜靜雞買咗麥當勞嘅 " 薑餅人暖意套裝 " 比我同家姐呀 因為我之前叫佢送比我地嘅 咁搞笑啦 尋晚我地 3 個一齊睇 我同家姐都話唔要啦 好似無咩用 點知里奧大人話喎 之前話咗送就送 唔送好似好衰咁 ~
里奧大人好有心機擺噃
我話我都擺得唔錯架喎
每 set 有 5 塊薑餅人
同埋 5 張咖啡劵
2 點幾勁餓呀 所以去譚仔食米線 不過我話唔要食小辣咁運囉 咁要 2 小辣啦 但好似仲辣過小辣 定我太耐無食辣 所以小小都覺得辣呢 ~
食完就同里奧大人去 Taste 行下啦 不過佢對超市真係 " 毫不感到興趣 " 所以兜個圈就走喇 佢話番屋企瞓喎 咁好啦 我都 load 相 lu ~
想打邊爐呀 即約家姐啦 但佢已經買咗餸 所以唔打喎 之後問我 唔同我打邊爐會唔會嬲 我話梗係唔會嬲啦 嬲咩喎 咁我同里奧大人出去打都得家嘛 ~
6 點 45 分落去吉野家 不過無哂位 lu 咁去稻香啦 話今晚已經比人包場定咩 咁去大家樂又無位喎 無計啦 去大快活囉 但佢地係三文魚頭邊爐 我見到成個生嘅三文魚頭已經好驚啦 我仲以為喺湯入面添 咁都唔再周圍去喇 喺大快活食嘢算喇 ~
食完再去 Taste 買醋 $198 / 3 支 比支家姐 其實都抵 因為新開張買滿 $200 就可以用 $18 coupon 最感恩係可以買媽咪買到最後 3 pack 保利脫脂奶 每 pack $35.5 上幾日同媽咪買 佢話 $38.5 已經叫平添喇 ~
買完番屋企喇 沖埋涼 抖陣就同里奧大人睇 " 3 idiots " 勁好睇呀 ~
3 姑奶買咗 10 個橙比我地 所以叫佢伙記約里奧大人交收 差唔多 11 點呀 好在未瞓咋 ~
今晚勁呀 又係差唔多 1 點先瞓 ~
蟹肉三文魚子丼
海鹽赤海蝦
海膽
三文魚籽軍艦
海膽墨魚軍艦
厚燒玉子
炸蝦天婦羅
三文魚 + 三文魚腩
羅勒香草赤海蝦
飛魚子軍艦
炸三文魚皮 - 超乾超硬 食完之後勁反胃 唔知係咪太油呢
帆立貝裙邊
家姐話我知 "玉米蝦船 " d 字調轉咗
我想換月曆 但要食夠 $250 先換到 所以食到差唔多飽再計條數 之後再食 但其實好鬼飽 最後點計條數都有 d 出入 好在最後都係 $256.8 埋單 如果係 $249.8 我地會打爆里奧大人 因為佢同我地計條數架
家姐警告我 叫我點都要每月食一次元氣 因為咁辛苦先拎到個月曆 哈哈
( 28-NOV-2014 FRI )
尋晚 2 點幾里奧大人熱醒咗 開完冷氣之後瞓唔番 所以出廳睇戲囉 咁今朝里奧大人鬧鐘響 我都繼續瞓啦 之後佢話今日唔番工 咁都好丫 我 last day 休息嘛 哈 不過佢都講明話今日都會做公司嘢囉 ~
我其實 9 點都醒咗 但見里奧大人仲瞓緊 咁我都懶床啦 懶到 10 點真係懶唔到喇 要起身喇 咁啱里奧大人都醒咗 lu 咁一齊食早餐啦 我有 d 餓喇 ~
好似條蛇呀
食完行陣 番到屋企都 11 點 要即沖涼啦 約咗媽咪飲茶嘛 ~
本來里奧大人話一齊飲 不過公司有煩嘢 要同大陸同事跟 所以唔黎 lu ~
鮮蝦炸雲吞
家鄉咸肉糉
家鄉煎薄撐
香芋鴨腳扎
蠔皇鮮竹卷
今日飲到 1 點半咋 因為媽咪驚里奧大人餓喎 送埋媽咪搭車就番屋企 但里奧大人仲未搞掂 咁我自己去 Taste 行下 今日新開張 人又唔算話好多 但嘈到爆囉 ~
買完包無花果就走喇 都差唔多 3 點幾喇 打比里奧大人 叫佢好食嘢 無啦啦話想食炒飯 平時我煮飯又話要食麵 衰爆 ~
我驚要最低消費 所以叫奶油脆豬囉
食完又行陣 原來百佳廣場 closed 前日先聽 d staff 話裝修架噃 我都奇怪架喇 無理由又百佳又 Taste 囉 因為 Taste 係貴價百佳嘛 無理由自己人打自己人囉 ~
勁多人買呀 我聽到有個女人話今朝比人買哂呀 因為買一磅送一磅 一磅係 $59.6 其實我都唔知咩價 不過見好多人搶住買 咁又見啱啱開箱 我又買囉 咁可以比 d 媽咪
番到屋企就開機洗衫 之後整椰絲奶皇糯米糍 因為想清埋 d 奶皇餡同椰漿呀 ~
抖陣就飲湯 之後再熨衫 再包埋糯米糍 勁攰呀 ~
當參紅棗百合山斑魚湯
真係唔好貪心 因為太多餡好易爆皮
灑咗椰絲靚好多呀
約咗家姐去元氣 佢話 7 點到 咁我 6 點半都去等位喇 好在去到有位呢 ~
8 點食完 家姐上我屋企食甜筒 咁我順便比 d 糯米糍比佢 因為我同里奧大人食唔哂架 叫佢同工人幫手食 d 唔好嘥嘛 ~
家姐 9 點走人 咁我都即沖涼 之後休息喇 ~
又唔係好攰喎 所以 12 點幾先瞓 聽朝番工希望有精神啦 哈哈 ~
