熱晴 ♡ 胡志明市。越南 (頭頓 & 美拖椰子島) 5 天美食團 Day 4 (Part 3/3) ( 30-JUN-2015 )

( 30-JUN-2015  TUE )  Day 4 ( Part 3/3 )

行完超市就行埋個商場   行到 3 點半就番酒店喇   實在無咩好行 ~

無咩車同人   好舒服呀

去呢間睇下有無越南咖啡   不過係無嘅   咁里奧大人話我玩嘢啦   Beer Club 點會有咖啡

買完包薯片就去呢個商場行下

好大喎   不過無人行囉   得我同里奧大人兩丁友咋

見到咁多 0 字都唔會買啦   但其實想試玩

呢架單車嘅車碌好闊身   我第一次見咋

如果買支越南國旗又好似好無聊咁   所以影咗當買咗算喇   哈哈

                           

里奧大人好鍾意睇呢 d 架   話帶去旅行好方便喎   我話我都有指甲鋏啦 @@

呢個都幾靚

迷彩電筒好靚呀   可惜我唔用啦

其實勁想買細細支嘅迷彩電筒   但買黎真係無乜用   都係唔好嘥錢喇

假嘢 ~~~~



個 BB 樣好搞笑

最頂層有嘢食嘛   我地就上去啦   對門又實喎   右邊隻門都差 d 比我拆爛呀   佢真係差 d 跌落黎咁滯架   係我夾硬托番上 d 咋   勁驚有人發現   之後入到去都無人食嘢嘅   得 d staff 喺度整嘢食   好似好忙咁囉

落番去地下啦   嗱   咁樣影到好多嘢食咁噃   但都唔係囉

佢個咀嘅紅色   係咪條脷黎架 ?!

藍天白雲   真係望極影極都唔厭

番酒店喇

原來間酒店得 7 層

                         

次次去旅行都係奧大哥 keep 房卡

無嘢做就睇下電視   我只係睇踢波咋   睇咗 2 場都係有美斯   我睇波唔聽波嘛   所以佢講越南話都無問題   但睇其他台    有 9 成 9 係配越南話   一係講英文嘅台又收得唔清   想點喎 ~

里奧大人就睇公司 email   我就睇睇下電視瞓咗   差唔多 5 點先醒 ~

Buffalo 雞翼味道



味道都 ok   同埋份量都幾多   食極都仲有咁 @@



里奧大人忍唔住買咗啦   話好抵好抵   自己鍾意就好抵 @@

成家人個樣好搞笑 ( 好肉酸 )   哈哈

5 點 45 分行去 4 星級酒店嘅餐廳   團友個個都話攰到要瞓覺呀   男團友仲要食粒 Panadol 再瞓一個鐘先好 d 呀 ~

隔離枱好快食完就番酒店先   我地食下傾下   6 點半先行番酒店呢 ~

團友太太呢間酒店有無得按摩   賓尼兔話無   就算有都唔好去呀   佢地無學過正統按摩   係拻下拻下就當按摩架咋   話上次有團友出去按摩   就係比人拻到瘀哂   哈哈 ~

又係好多蜻蜓 @@

天未黑就去呢度食晚飯

4 星級

行上一層先係餐廳

環境唔錯   不過咁啱佢地員工有 gathering   所以播音樂好大聲   好嘈囉 @@

又黎啤一啤

Steamed Shrimp   d 蝦好鮮甜彈牙呀

Steamed Cuttle Fish with Ginger   魷魚又係好彈牙   好味道呀

Sauteed Clams with Basil   無乜特別

Fried Fish with Sweet & Sour Sauce   我地幾個食唔出係魚   因為 d 口感唔似食魚嘛   猛喺度諗係咩來   之後我話駛咩諗喎   menu 有寫家嘛   哈哈

Cooked Pork in Claypot   豬肉好味喎

Sauteed Green Cabbage with Garlic   天氣熱   我都係鍾意食 d 乾身嘅菜

Sauteed Cabbage   咁呢個菜都好食呢   因為 d 菜好甜呀

妳有妳影   佢有佢食   好開心呀

Variety Vegetable in Firepot   正呀   又飲咗幾碗



Fried Sentinel Crab with tamarind Sauce   無食呀   因為唔想洗手

又番上房喇



今晚有自費節目就係食大頭蝦 ( HK$250/人 )   真係好似未停過口咁   哈   我上到酒店   睇睇下電視都瞓咗呀   之後里奧大人又話要瞓   所以教定鬧鐘 8 點半起身呢 ~

約咗 9 點喺大堂等   我地 8 點 52 分落到大堂已經齊哂人   因為總共得 7 個人去咋   哈哈 ~

坐車嘅時候落緊雨

有檔口仲未收喎

我地同 Auntie 坐一枱   另一枱係 2 對母女   估唔到 Auntie 都好好傾   佢去過好多地方   仲去過北韓添呀   佢話 4 年前去過   咁即問佢可唔可以周圍影相啦   佢話一啲啲地方先可以影咋   woo   真係咁神秘 ?!?!

我問佢點解佢 3 個朋友唔黎食   仲諗住得妳一個都唔黎食添   佢話就係因為佢地唔黎   所以點都黎囉   因為導遊都係靠呢 d 小費搵食   同埋佢同我地一樣   對海鮮係無咩興趣   而我黎就係因為知道頭頓係無咩嘢做   所以就自費食海鮮囉   錢就知一定係比佢地賺硬架喇   但我自己都有得食喎   最緊要大家開心呢 ~

佢地一早咁擺架   但我又唔覺得好大隻啫   唔通大頭蝦黎講算大隻 ?!  我喺泰國見到 d 蝦好似我前手臂咁長架   同埋睇落真係啖啖肉咁呢

7 隻大頭蝦

廚房喺入面

我地要上 2 樓食架   仲安排我地坐出面添   好在無落雨咋   但唔明點解唔安排我地坐入面呢   雖然出面唔熱   但有冷氣舒服 d 嘛

團友們

每人送罐嘢飲   我飲沙士   里奧大人飲啤酒   但我罐沙士唔凍嘅   好難飲   哈哈



呢個蜆都幾鮮甜

炒菜都 ok 啦   但其實好飽   我唔知原來有其他嘢食添架   以為只食大頭蝦咋   仲諗緊一隻大頭蝦要百幾蚊   應該都好大隻好飽肚下添呀   今次到我無留心賓尼兔講嘢   失策

主角出場

有專人拻蝦殼   燒完即拻殼   其實好熱架   見佢一路拻一路 "時時" 聲

實尼兔好搞笑   成日叫我地唔好反轉隻蝦   唔係 d 膏就漏哂出黎

一啖食得哂

里奧大人唔食膏蟹   所以我即係食咗 1 隻膏蟹   好味喎   我鍾意食膏蟹嘅口感

法包完全無掂過   所以叫佢地收走去啦   唔好嘥嘢嘛

仲有蠔仔粥   完全唔掂   成個粥根本係無味 @@

上車番酒店嘅時候又落雨

食飽就上車喇   賓尼兔又講開喺香港食燒鵝   話細細一碟已經要港幣二百幾好貴   一人一嚿都無鬼咗   之後 Auntie 就同賓尼兔講   下次黎香港 Auntie 請你食   之後賓尼兔問貴唔貴架   Auntie 話我請妳   你唔駛理貴唔貴   Auntie 真係好豪氣   哈哈   同埋睇得出 Auntie 對人都幾好呢   唔係計計較較果 d ~

番到酒店都 10 點   沖埋涼抖多陣   11 點就瞓喇   今晚一定好好瞓 ~

好寧靜嘅大堂

天花板真係好靚

原來夜晚係會開呢盞燈嘅

7 點半起身   發達喇

剩番呢 d 錢咋   希望夠用啦   我都希望用哂佢   因為南越真係未必短時間再去呢

呢日行程完畢