2015年7月31日星期五

元氣壽司 @ 九龍灣 ( 31-JUL-2015 ) ( 禁 )

炸三文魚皮 - 里奧大人唔食架   所以叫家姐陪我食   哈哈     


吞拿魚壽司 / 油甘魚壽司 / 三文魚壽司 / 羅勒香草赤海蝦壽司
家姐超愛八哥家嘛   之前一見到張 poster 就已經影比佢   上次同佢食佢自己都影咗   咁啱糟糟今日又影呢隻八哥比佢   係人都知家姐鍾意八哥   所以一有八哥嘢就會送比佢呢     



飛魚子軍艦 / 芥辣八爪魚軍艦 / 三文魚子軍艦


左口魚裙邊壽司 / 三文魚腩壽司   


炸蝦天婦羅


炸蝦卷


玉米蝦船



@ 手作之店



( 31-JUL-2015  FRI )

今朝諗醒發夢   夢見里奧大人明目張膽有小三   當我無到添   之後我出 trip 又唔送我機   佢仲話每星期四上大陸過夜   同係同小三一齊呀   勁賤呀   所以我一起身就鬧佢勁賤格勁賤格   之後我話由聽朝開始   d 水會加老鼠藥   日日比佢飲 d   哈哈 ~

其實尋晚都一覺瞓天光架   所以好開心呢   我仲諗住會激氣到半夜扎醒添 ~

早餐食菠蘿油   今次叫佢唔好叮熱 d 牛油   因為真係好鬼難食呢 ~


菇場唔忙   所以繼續慢慢整相寫 blog ~

Lunch time 就出去食車仔麵   之後去 759 買包糖比里奧大人嘅大陸 asst.   希望佢鍾意食啦   里奧大人又搞嘢嘅   叫我買零食比佢 d 同事食   我又唔知佢地鍾意食咩喎   家姐話買蒟蒻喎   咁買 4 磅比佢地食囉   但里奧大人話好鬼重   無辦法啦   買下買下唔覺嘛 ~ 


$18.8   有 8折再 88折 = $13.2   折上折真係好抵   哈哈 


Niko 即磨普羅旺斯香草辣鹽 ( $14.5/樽再8折再88折 = $10.2/樽 )   


買完再行陣先番菇場   因為真係好想比自己郁下呀 ~

仍然整相到放工   今晚去睇媽咪啦   因為姑娘話媽咪 d 藥分錯哂   叫家姐幫手分藥   家姐又叫埋我   咁就一齊分啦 ~

去到媽咪屋企無耐   復康姑娘打比媽咪屋企   咁我聽啦   佢超級好人   佢話今朝幫媽咪搞咗好耐   所以好多嘢堆起哂仲未做完   一陣又要上堂   但佢都想知媽咪今日情況係點   所以打黎問問呢 ~

佢話比媽咪激死   因為媽咪掉咗 3 支去大便藥水   話好甜喎   但 1 支要成 HK$600   媽咪又係衰   妳唔食都比番人啦   唔好浪費人 d 嘢嘛   同埋依家又要插番尿喉   因為始終都要排毒素出黎 ~   
咁姑娘話媽咪講嘢係精靈   但其實個人狀態係攰   我咪話係咪因為成日瞓唔郁   佢話係因為媽咪之前入院   因為係肺炎導致氣喘同心臟有問題   所以打咗好多藥   其實係 d 藥仲未喺體內清哂   所以咁攰   同埋最大問題係根本佢體力做未後完   一定要做物理治療   等身體真係完全康復先出得院   如果佢跌親就煩   又唔做得手術   唔明點解媽咪係都要出院   依家就算再唔舒服入聯合急症   如果聯合無床位   妳點辛苦都要番番屋企   唔會留醫   而靈實就更加唔駛諗   因為床位已經 full 哂   想再入靈實就更加難 ~         

依家媽咪仲有 d 血壓高   所以要朝早食完藥就量血壓   咁我咪話媽咪囉   仲食榴槤真係痴痴地 ~

咁依幾日都有復康姑娘睇媽咪嘅   每次 HK$80   我咪話媽咪囉   住靈實好似 HK$68   但有醫生有護士睇住   又有物理治療做   依家得個工人睇住妳   扶妳沖涼都麻鬼煩啦   都唔明妳個腦諗乜嘅   我話妳咪成日旨意工人呀   工人放假   妳自己換尿袋   自己去買嘢食啦   咁巴閉要出院丫嘛   妳千其唔好叫我同家姐黎呀   我真係唔會得閒理妳   妳自己攞黎衰架咋 ~

因為我要去買量杯   咁啱家姐又差唔多到    所以叫佢買嘢食比媽咪   我就去買量杯   咁我買完都仲未有得拎嘢食   所以又一齊去行 759   因為今日係最後一日 Paypass 88折呀   加埋呢次   今日行咗 3 次 759 呀   人地唔知   真係以為我好愛佢呢   哈哈   咁好啦   又買咗小小薯片同家姐 share   我話最緊要記得去拎烏冬比媽咪呀   唔係直接番咗屋企就搞笑 ~

卡樂B薯片 - 沖繩柑橘味 ( $9.8/包有8折再88折 = 6.9/包 ) 
固力果百力滋- 蕃茄味 ( $18有8折再88折 = 12.7/包 ) - 買比家姐工人
Nabisco 粟米脆-燒粟米味 ( $10.8/包有8折再88折 = 7.6/包 )
Monarc 朱古力雲呢拿夾心餅乾 ( $19.8/包有8折再88折 = 13.9/包 ) - 買比媽咪工人 
樂天焦糖革命焦糖糖 ( $11.9/包有8折再88折 = 8.4/包 ) - 原來係軟糖   無味嘅   唔好食囉     


RISKA 濃湯粟米球 ( $7.9/包 有8折再88折 = 5.5/包 ) - 家姐同工人 share   因為我食到好驚 lu


TARAMI 什果乳酪 ( $7.8/個 有8折再88折 = 6.9/個 )



番到去就即分藥丸喇   咁叫工人快 d 食嘢   佢又唔食   話想睇下我地點整   想學下   所以我真係覺得佢好好   頭先姑娘叫我做 d 咩   我即叫佢記住   佢就即刻拎本薄出黎記低   我見到佢本薄寫住媽咪今日飲咗幾多水   寫埋時間係 12:53   比我只會寫 1:00   佢真係好細心呢   起碼佢對媽咪細心過我對媽咪   因為我已經比媽咪激到我唔會再有耐性同佢講嘢 ~

分完藥再坐陣   之後家姐同媽咪講   再食榴槤而要入醫院   真係唔會再睇妳   叫埋工人都唔會理妳   我再加把口   嚇佢話對眼嘅微絲血管爆咗仲未好番   咪因為食榴槤囉   一陣連眼角膜都爆哂   妳就盲架喇 ( 其實我求其 up )   咁妳依家最好全日合埋眼   要早 d 習慣盲嘅感覺   同埋妳依家腳無力嘛   咁勁要出院嘛   妳順便習慣下下半身郁唔到嘅感覺喇   之後佢又驚   妳話呢 d 人係咪嘥氣丫 ~

今晚同家姐去元氣食啦   去到都 8 點半喇   等到 9 點 20 分先食呢 ~

食完再食雪糕   之後我就送家姐搭車   好感恩好快有車   咁我可以番屋企沖涼   哈 ~  

睇埋 "急診"   又 12 點先瞓喇 ~

2015年7月30日星期四

釀豆卜 + 腐乳唐生菜 + 青紅蘿蔔豬骨湯 ( 30-JUL-2015 ) ( 禁 )

里奧大人一見到就話 " 嘩   咁多餸 "   我話豆卜一入口就無啦   之後再話燶嘅又唔食得   點知佢反轉哂 D 豆卜   得番幾粒唔燶咋   我話黑色果 d 唔好食   咁其實只係食細半粒豆卜   邊到飽喎   等你仲話多丫嗱   佢喺度笑   話我乜都駁一餐喎   呵       




( 30-JUL-2015  THU )

今朝好好天呀   心情大好   真係行路都行快咗呢 ~

我會拎免費報紙睇家嘛   今朝聽到阿姐佢地傾計好搞笑   有個阿姐 A 話好熱   因為佢地係着自己衫再加件公司背心   之後另一個阿姐 B 話 d 運動員都係有時着兩件衫咁啦   阿姐 A 話大佬   人地運動員 d 衫係正嘢靚料   同埋好通風架   佢咁講即諗起里奧大人   因為我成日話 d 足球衫好熱   里奧大人就一定話 d 衫好通風架   咁我未着過嘛   同埋見佢地成日出哂汗    d 衫"啜"住哂 d 肉   睇落好鬼熱囉 ~

想食甜嘢呀   咁食奶油脆豬喇 ~


尋晚有人黎菇場滅蟲呀   所以地下有唔小強屍   好在我個位得一隻   但係其實菇場最多小強出沒嘅地方係電話底   所以叫同事幫我拎起個電話   拎去 pantry "鄧" d 強屎出來   我大大力"鄧"咗廿下就"鄧"咗 1 隻強蛋   之後再大大力"鄧"廿下又再出 1 隻   同事話應該無架喇   電話就黎比我"鄧"爛喇   但我唔理再大大大力"鄧"   又"鄧"多隻啦   再"鄧"多廿下真係無先收手   終於"鄧"咗 3 隻強蛋出來   勁呀   係勁恐怖 ~~~~~~~~ @@    

一拎起個電話已經咁多強屎喇   其實我最驚係有小強出來啦   有生強有死強架大佬   所以我次次都好輕力放電話囉 


菇場忙下停下   10 點幾家姐打黎話媽咪堅持即刻出院   因為頭先拆拆咗尿喉   但其實起碼要睇多日先出得院   都唔知堅持出院做乜   痴鬼線 ~

之後家姐又打黎   講番姑娘打比佢   話因為媽咪堅持出院   醫生已經同媽咪講咗   個人無力   如果跌低   失救會死   姑娘話醫生已經用個死字嚇媽咪   但媽咪都堅持即刻出院   睇咗媽咪記錄   話佢唔食藥又唔做運動   留喺醫院都無用   所以比佢依家出院   本來家姐話放工揸車接媽咪出院   佢係都唔制   咁唯有叫埋家姐工人幫手接佢出院啦   真係超級麻鬼煩 ~

都唔鬼理佢喇   講又唔聽   總知有事唔好打黎喊就得喇 ~

妖   好鬼慶呀   所以 lunch time 出去行下   之後再買酸辣米線番菇場食呀 ~


放工買完餸打比媽咪   佢話食緊粥   咁同佢講話姑娘話如果去唔到小便   要即入急症室   因為始終係毒素   一定要排出黎   但佢話有小便喎   咁都好 d   唔係攞黎煩 ~        

番到屋企浸埋菜就抖陣   里奧大人今晚 7 點唔夠放工   真係好喇   我正想去煮嘢   今晚我都只係食餸   因為個米線仲未落格呢 ~    

是日晚餐 - 釀豆卜 + 腐乳唐生菜 + 青紅蘿蔔豬骨湯 

釀豆卜 - 今朝睇免費報   見到整三角形豆腐釀豬肉   咁諗住整   點知唔見三角形豆腐   所以買豆卜啦   原來釀豆卜好煩   要撩哂 d 豆腐肉出來   好嘥咁   下次要諗埋點整埋 d 豆腐肉先煮釀豆卜 ~    

腐乳唐生菜 - $7/斤唐生菜   有 7 小棵   真係好抵喎   今晚食咗 4 棵   聽晚再食 ~ 

青紅蘿蔔豬骨湯 ~ 家姐煲架   不過我無飲   只係比阿奧飲 ~

食完哂諗住抖陣去徑步   難得里奧大人放早嘛   勁開心啦   點知家姐 8 點打黎   話媽咪話腳軟喎   咁我話我去睇媽咪啦   叫佢快 d 食飯先   有咩再打比佢 ~

洗埋碗就同里奧大人搭的士去媽咪屋企   見佢瞓喺梳化   之後我叫佢舉高腳   佢都舉到   咁佢順便坐喺度   咁最緊要無暈無條喘就得 ~

咁問佢入唔入醫院   又話要入番靈實   唔入聯合   唔想又成日又吉隻手又驗嘢   呢下我火都黎   今朝一早就唔應該出院啦   麻鬼煩   要入就一定入聯合再轉介去靈實   同埋靈實根本無急症室   妳估話入就入呀   神經病   之後佢仲發我脾氣   合埋眼口 up up 話我煩煩煩添呀   顛顛地 ~ 

媽咪係都話靈實有急症   之後我打去問   根本無   之後媽咪話我話有急症   痴巾   所以我好大聲好惡話係妳話有急症架   講真   我真係覺得佢好討厭 ~

之後無啦啦又話工人無力扶佢   得家姐工人先夠力扶佢   真係痴痴地   家姐工人係大力   但得佢一個根本都係唔夠力扶妳啦   問題係妳自己唔用力   工人又瘦   就算加埋里奧大人都根本扶唔到妳   妳成 pat 嘢咁灘喺度   堆妳都難啦   何況扶妳 ?!   好記得之後有朋友飲醉酒冧咗   要 4 個男人扶住佢先上到的士呀 ~    

搞到工人唔開心喺度喊   之後我安慰工人   話唔駛喊   妳唔需要因為佢讚家姐工人而覺得自己無用   你有無用   我地知道   我地好感激妳對媽咪咁細心咁照顧   同埋媽咪都會鬧我地架   唔係只鬧妳一個   總知如果媽咪成日無啦啦鬧妳   妳同我講   我會話番佢   叫佢唔駛唔開心   對自己身體都唔好呢   記住仲有我同家姐同里奧大人喺度   會幫妳呢 ~

好喇   之後我聽見里奧大人都好火滾講嘢   咁我都出番去啦   話扶媽咪上床   佢話睇電視   大佬   妳唔瞓   工人都瞓啦   係咪咁煩呀 ~

問佢入唔入院   佢話聽日先   之後再問   佢又發脾氣話唔入   又合埋眼口 up up 話煩煩煩   呢下真係好想兜巴星佢   大佬   我好得閒呀 ?!   我撲黎睇妳架 ?!   今朝堅持出院依家話無力入院   係咪麻鬼煩呀 ?!   之後佢又好大聲話 3 晚無瞓   我話妳成日瞓又唔郁   夜晚咪瞓唔到囉 ?!   嘥鬼氣 ~

里奧大人又火滾   成日話我同家姐唔識處理   話媽咪搞出問題   我地就解決問題   佢永遠唔知錯   我明佢講得有道理   但佢係都堅持做埋 d 衰格嘢   唔聽人講   咁我可以點呢 ?!   夾硬踢佢上床呀 ?!   一陣佢發顛要自己起番身跌度   咁咪仲煩 ?!

咁我其實好想講話你夠一樣幫喺澳洲嘅姐夫買 2 部電話啦   電話駛唔駛後備呀 ?!  佢手頭已經有 2 部喇喎   自己壞咗唔去整   只係叫你買   咁你夠買咯   咁你係咪應該都唔好幫佢買   等佢壞咗要買部新   知道澳洲買電話咁貴   同埋壞咗無得用係好慘   要好好珍惜   咁其實你都係幫佢解決咗問題喎 ~~~~ 

臨走之前   工人細細聲同我講話媽咪買咗榴槤   叫佢十萬次唔好食   係都要買黎食   里奧大人話成盒拎走   媽咪話留番嚿比佢   我話好番再買比妳啦   我無啦啦有得食榴槤   咁都好喎   我想補下   哈哈 ~   

搭小巴番屋企   之後即沖涼   要睇下 "急診男女 " 笑番下先瞓呀   不過都差唔多 12 點先瞓   激氣呀 ~

2015年7月29日星期三

住家飯 @ 家姐屋企 ( 29-JUL-2015 ) ( 禁 )

光波三文魚骨 - 一塊就咁焗   所以好脆架   另一塊就加咗 rosemary 同黑椒就 juicy d   不過我鍾意食脆嘅多 d 呢   好似食薯片咁   呵呵 


鹹酸菜炒牛肉 - 我只食鹹酸菜咋   就咁送飯超級好味   咁我同家姐講話要一碗飯   因為我好鍾意食鹹酸菜   點知今晚 d 飯比較林   唔係一粒粒   所以好後悔要一碗飯   嗚   


西芹炒雞柳 - 我都幾鍾意食炒西芹   不過自己唔整煮   所以覺得呢個餸都好味   


蒸水蛋 - 家姐驚我無餸   所以特登蒸水蛋   但我話今朝食咗蛋治   唔想食咁多蛋   


飯後梨   其實我好鬼飽   所以無食  


( 29-JUL-2015  WED )

今朝里奧大人上大陸   鬧鐘響完   叫佢帶參蜜   我再去埋廁所又瞓番 lu ~

8 點唔夠就出門口   可以慢慢嘆早餐呢 ~


菇場唔忙   大粒又全部唔喺度   勁爽呀 ~

食完 lunch box 就出去買蛋糕比媽咪   再去 759 買包薯片   真係好在有帶遮咋   無啦啦落好大點雨   仲諗住過雲雨   點知之後成個天黑哂喇 ~

山芳薯片 - 濃厚牛油味 ( $9.9/包有8折再88折 = $7/包 )   勁抵   因為係單位數字同埋十蚊唔駛   同埋呢隻真係好香牛油味   好好食呢     


繼續整相   hea 住等放工   今晚去探媽咪   6 點 10 分去到   即問姑娘依家媽咪乜嘢情況   個肺清哂   打埋今日抗生素就唔駛打   聽日拆尿喉   咁其他都 ok   我問媽咪有無做物理治療   佢話有   不過就未知幾時可以出院呢 ~

一入去見到媽咪 "挨" 喺度睇電視   咁我就開心番哂啦   起碼唔好成日瞓嘛   同埋都有胃口   感恩家姐住得近   可以叫工人煮嘢比媽咪食   最搞笑今日煮煎釀三寶   媽咪話隻辣椒好辣   不過媽咪又勁唔食得辣   家姐又勁食得辣   所以真係唔知辣定唔辣   哈哈 ~

家姐 6 點半黎到   咁因為我地要去新都城買濕紙巾比媽咪   所以 7 點 20 分都走人喇   咁我地次次一走就會幫媽咪教番好張床   佢又話上又話落都唔知想點   真係家姐都話麻鬼煩   之後家姐同我講   次次媽咪講多幾講又發脾氣   我話理鬼得佢   佢發我地咪走囉   無人幫妳   自己攞黎衰之嘛 ~

咁媽咪今日肚屙   我話可能食得太辣   點知家姐話媽咪食咗包蝦條   我頂   做乜鬼買蝦條佢食呀   喺醫院食咁清   突然食咁油膩嘢   唔肚痛就有鬼啦   之後家姐話媽咪想食   我話唔係想食就買家嘛   同埋工人話媽咪食咗幾條之後比姑娘話   佢就即刻掉咗包蝦條   真係痴痴地   嘥錢又搞到自己唔舒服   真係搵黎搞 ~ 

我地行番去家姐屋企   初初行真係覺得無料到   之後行到 2/3   勁喘氣呀   上到家姐屋企之後   我係全身濕哂   成塊臉都係汗   家姐激動到叫我即刻洗臉   哈哈 ~

揸車去新都城買嘢   買完濕紙巾又要去廣良興買零食比里奧大人大陸同事   買到一袋二袋又重   婆婆打比我   咁我聽啦   佢講來講去都係問媽咪有無嘢   我答來答去都係話媽咪無嘢   講咗 2 分鐘都係講果 d   大佬   拎住嘢又行緊   好鬼辛苦嘛   之後佢又打比家姐   家姐話佢同緊我一齊   最離奇係婆婆話知   唔怪得我聽到家姐話其實我地兩個答案都係一樣架啦   咁事實又係喎   我知婆婆係關心媽咪   但唔好成日一打黎聽唔到   一分鐘就再打  打唔到比家姐就即打比我   我聽唔到又再打   之後又打比家姐咁   呀大佬   家姐揸車唔聽電話家嘛   我沖涼仍都唔知妳打黎   妳唔係咁樣打法呀嘛 @@

買咗 2 包   ( 合共 $70 )


買比里奧大人嘅豬肉鬆 ( $30 )

            
番到家姐屋企已經 8 點半喇   即刻開飯呢   家姐好搞笑   真係差唔多每食 2 啖就叫我食多 d 依樣   食多 d 果樣   我忍唔住問佢係咪覺得我成日無飯食 ?!   佢話係   因為之前成日探媽咪喎   咁我咪話囉   我唔探媽咪果幾晚都有煮飯呢   之後佢叫我唔駛探媽咪   煮多 d 飯食   佢又煲咗湯比里奧大人飲   今晚真係又食又拎呢 ~ 

衰麥包   點都唔望鏡頭  


 好 BB 咁呀  


用雪梨引佢先望住鏡頭咋


衰 B 仔就成日望住枱上面嘅雪梨  


又係用雪梨引佢  



坐到差唔多 10 點   家姐車我番屋企   里奧大人今晚 7 點半已經番到香港   所以我一番到屋企   佢已經沖埋涼睇電視 lu ~

沖完涼就睇 " 急診男女 "   睇到 12 點先瞓   woo ~~~~~~~~    

2015年7月28日星期二

腐乳雞絲炒飯 + 蠔油燜節瓜 + 蕃茄薯仔魚湯 ( 28-JUL-2015 ) ( 禁 )





( 28-JUL-2015  TUE ) 

尋晚瞓得唔錯   實在太開心喇 ~


早餐食芝蛋治走牛油   無咁滯呢   但都係一樣咁飽   哈 ~


菇場無哂大粒   8 卦又上大陸   真係勁正   唔駛成日比人昅住哂 ~

今日帶 lunch box 嘛   阿爽同阿齋話好香呀   話搞到佢地今晚都想食蝦   其實又真係喎   我聞到好香嘅嘢都好想即晚整   如果 d 嘢易整嘅話   哈哈 ~

無啦啦飯氣攻心   加上成日整相   對眼真係好鬼攰 ~

放工先黎落雨   不過好在係過雲雨   同埋太陽又未落山   我同同事都覺得好似 lunch 出去食飯   唔似放工呢 ~   

幫里奧大人買完包就即番屋企   諗住整兩樣嘢都好快搞掂就去徑步啦   點知唔醒起要滾湯添   所以突然間覺得好趕咁 ~        

7 點半自己開餐先   因為我只係飲湯食節瓜   同埋之前食剩嘅 2 條粟米   之後里奧大人打黎話放工   咁好啦   等埋佢食完再一齊徑步 ~     

是日晚餐 - 腐乳雞絲炒飯 + 蠔油燜節瓜 + 蕃茄薯仔魚湯  

腐乳雞絲炒飯 - 唔想成日焗雞扒   好似好悶咁   所以用黎炒飯   加咗 3 件腐乳都無咩味咁   下次都係加小小豉油   好似會好味 d ~     

蠔油燜節瓜 - 唔浸菜就會煮節瓜   最緊要夠快   同埋我要清哂 d 蠔油呀 ~ 

蕃茄薯仔魚湯 - 今次仍都係 2 個薯仔 + 5 個細蕃茄 + 2 條紅衫魚   今次嘅紅衫魚係 $25/份   今次又係好好飲呀   好開心呢 ~

搞掂哂   諗住 9 點一齊去徑步   不過里奧大人話好飽   所以唔徑   咁好啦   我都唔徑喇   我都有 d 攰攰地 ~

沖埋涼   又睇 "急診男女 "   呢套係家姐叫我睇嘅   咁我又心急想知主角嘅關係   咁即打比家姐問啦   估唔到佢又記得 d 劇情喎   之後佢個勢好似想繼續講咁   我話唔好講   我要自己睇   之後佢話又要問人又叫人唔好講   哈 ~

睇到 11 點幾要瞓喇   難得瞓到呢 ~   

2015年7月27日星期一

茄汁蝦碌 + 蕃茄薯仔魚湯 ( 27-JUL-2015 ) ( 禁 )




( 27-JUL-2015  MON )

又星期一喇   今朝好好陽光   真係心情都好 d 呢 ~

早餐去另一間食啦   我要奶茶小奶   佢居然多奶   厚多士又乾爭爭   想點呀   真係勁難頂   哈哈 ~


做埋 report 就 hea 過   唔錯唔錯 ~

Lunch 出去食皮蛋魚片粥 + 炒米粉   碟米粉又係食到一半就即脹胃   下次真係唔食喇   唔想嘥嘢 ~


好嘢   菇場仍然唔忙   放工可以即走   因為要去街市買餸呢 ~

買完番到屋企都 6 點半   其實諗住今晚徑步   不過睇個勢都應該徑唔到架喇 ~

8 點先煮完   咁啱里奧大人放工   咁我食住等呢 ~
   
是日懶餐 - 茄汁蝦碌 + 蕃茄薯仔魚湯  

茄汁蝦碌 - 買咗 1 斤海蝦   $56/斤都算平   但咁平   應該唔係海蝦   家姐話海蝦無咁平喎   我鍾意整蝦   但最憎最憎挑蝦腸   衰里奧大人食蝦第一件事係睇有無蝦腸架   大蝦都易挑   細蝦我唔理架   挑完之後隻蝦都散哂 lu ~       

蕃茄薯仔魚湯 - 用 4 個細蕃茄 + 2 個薯仔   買咗 1 份 $15 嘅紅衫魚   魚佬話唔知咩艇捕紅衫定咩呢   唔記得添   仲好有耐性教埋我點滾湯   講到錢都唔記得拎比我   好在我記得   哈   呢個魚佬我好記得佢架   上次買 $10 大眼雞   佢唔幫我切魚肚呀   今次都係買 $15 就教我點滾湯   完全係兩個人囉   今次煲嘅湯好 creamy   里奧大人仲問我加咗 d 咩   唔通 d 魚令到湯 creamy ?!   定係因為有 2 個薯仔呢   平時我落 1 個架咋 ~  

洗埋哂碗   沖埋涼都成 10 點幾喇   拿拿聲同里奧大人一齊食埋 d 龍眼   唔係又壞 ~

睇咗陣 " 急診男女 "   11 點半先瞓呢 ~  

2015年7月26日星期日

元氣壽司 @ 九龍灣 ( 26-JUL-2015 ) ( 禁 )

芝麻八爪魚 


螺肉


吞拿魚壽司 / 油甘魚壽司 / 三文魚壽司 x 2 / 羅勒香草赤海蝦 x 4


我呢期勁愛嘅羅勒香草赤海蝦 


炸蝦卷 / 三文魚腩壽司 x 2 


三文魚籽軍艦


海膽墨魚軍艦 / 芥辣八爪魚軍艦


玉米蝦船


日本朱古力蛋糕


( 26-JUL-2015  SUN )

今朝 9 點半已經醒咗   仲諗住起碼瞓到 12 點添   因為 d 藥勁料嘛 ~

里奧大人問我食咩   我話你話事啦   佢話金姆指   我話唔好   咁麻酸樂呢   我話唔想   之後我話想去大快活   佢喺度笑   話一早就講大快活啦   假民主   哈哈   我承認我係 ~

唔係講笑   我好小出街食雞扒   但依家禁食祈禱只食白肉   加上我唔多舒服   就算食炸嘢都唔好喺里奧大人面前食啦   未比佢煩過咩   哈 ~




今日唔番教會   我想喺屋企休息   咁沖埋涼   開機洗埋衫就食藥   我同里奧大人講   我其實好攰   但硬係瞓唔到咁   感覺有 d 似失眠感覺   里奧大人就開始擔心我喇   咁我睇飲食男女啦   等對眼攰 d 可以瞓嘛   咁真係越睇越眼瞓   1 點 50 分開始瞓   瞓到 2 點 10 分   咁都好   熟睡 20 分鐘   又好似精神好多   最搞笑係里奧大人話   佢見我瞓咗   去廁所都唔敢   驚我聽到聲音又醒呢   因為我真係超級勁醒瞓呢 ~

差唔多 3 點就去食 tea   4 點半出發去探媽咪喇 ~

原來係吉列雞扒黎嘅   咁唯有唔食塊皮啦   




咁里奧大人話去廁所   咁我行入去先嘛   佢叫我記得唔好頂咀   好搞笑   因為我成日話會忍唔住發火   佢入哂腦啦   哈 ~

媽咪今晚食咗 d 粥   咁都好   之後佢又係瞓啦   我唔理佢 lu   因為我都好攰   之後家姐黎埋   拎咗小小雲吞麵比媽咪食   咬粒雲吞就吐出來話唔食   話依家鍾意食齋   其實我想話明知雲吞有蝦有肉就一早唔好食啦   妳唔係第一日食雲吞呀嘛   不過我唔出聲架喇   留番啖氣暖肚好過 ~

坐到 6 點 45 分走喇   其實媽咪唔係瞓嘅話   我地一定會陪到 8 點   但佢都係瞓   咁我地走好過   好過咁樣好浪費時間 ~

揸車去淘大   因為今晚去元氣   用埋 d coupon ~

食到 8 點幾就走喇   家姐同我去萬寧換 Staub   佢係都要再送多個煲比我   佢自己再加 $199 換 2 個大碗   換哂就走喇   因為我要同里奧大人去買啤酒   所以佢自己去停車場 lu ~

番到屋企即沖涼   抖陣就食藥   11 點即瞓   難得想瞓嘛 ~