( 30-SEP-2015 WED )
今朝鬧鐘響 仲諗緊今朝係咪要起身番工 咁即係瞓得好林下啦 唔知發生咩事咁 哈哈 ~
早餐唔可以食咁飽 因為里奧大人晏晝同我食 lunch 咁菇場有 urgent 嘢要做 諗住食完就走 點知 8 卦又黎埋 咁等埋佢啦 之後 8 點 50 分都即走人喇 ~
忙到爆炸 一單接一單 做到慶合合剪真係 明明好凍都要除褸呢 ~
里奧大人晏晝要去深圳見客 所以陪我食 lunch 其實我驚今日會落雨 叫佢唔好黎 不過佢話我唔想同佢食咁喎 但其實我唔想佢樸黎樸佢囉 又揹住大背囊 又焗熱 唔想佢咁辛苦咋 ~
同佢食酸辣米線 佢話肥仔好食 d 不過就勁口渴 呢間都 ok 但 d 豬腩肉係無咩味 咁我話係架 唔好要求咁高啦 好在杯凍咖啡好飲咋 因為好濃咖啡味 估佢唔到 因為我平時唔飲架 飲埋真係爆肚都似 ~
我嘅豬軟骨酸辣米線 ( 小辣 )
里奧大人嘅蘿蔔豬軟骨酸辣米線 ( 小辣 )
食完行陣 mikiki 就走喇 諗住帶里奧大人坐 shuttle 點知我睇錯時間 哈哈 最後都係要行路去地鐵站 辛苦了 ~
4 點幾終於搞掂哂所有嘢 可以抖下喇 ~
放工去德福 好感恩里奧大人 6 點半都到咗德福 去埋旅行問資料 之後就去食嘢 lu ~
諗住去稻香打邊爐 但好多人呀 所以去銀咖哩食飯算喇 食完就去舖頭拎嘢就打的番屋企 lu ~
換埋對鞋就一齊去徑步 徑咗半個鐘 本來想再徑 不過好焗熱 都係番屋企沖涼好 d ~
沖埋涼就睇戲 聽日放假 又睇到 12 點幾先瞓 ~
( 29-SEP-2015 TUE )
終於要番工喇 不過今朝起身都無難度 因為菇場有嘢未做完 我想快 d 番工清哂去呢 ~
早餐食熱狗餐 雖然麻麻地好食 但今朝真係想食 d 新嘢呀 哈 ~
番到菇場都預咗忙 忙到 11 點 諗住忙完 點知對手無停過 ~
Lunch time 出去食粥 因為難得好天氣 想出去行下 唔係之後幾日落雨無得行呢 ~
及第粥
丫 超級超級勁忙呀 不過真係好攰 所以做到 5 點都要抖下 留番聽日再做過 ~
放工去 Taste 再買多 pack 辛辣麵比里奧大人 之後番屋企 lu 今晚唔駛點煮 所以可以有時間睇報紙 爽呀 ~
里奧大人 7 點幾放工 咁我煮佢想食好耐嘅辛辣麵 等佢開心下 因為今晚無咩點煮嘢 好似好懶好衰咁 所以要對佢好 d 哈哈 ~
是日懶餐 - 燻蹄 ( 外賣 ) + 唐生菜
燻蹄 ( 外賣 ) - 無啦啦好想食呀 之後家姐又係話 " 妳真係好鍾意食燻蹄" 我認架 呵呵 ~
唐生菜 - 尋晚整番 2 棵 今晚清埋去 lu ~
9 點出去徑步 番到屋企都 10 點 沖埋涼真係要休息喇 ~
又叫里奧大人食雪糕月餅 佢一口答應 如果叫佢食菜係咁就好咯 ~
11 點唔夠即瞓 今晚真係好攰呀 ~
( 28-SEP-2015 MON )
今日係中秋補假 唔駛番工真係好開心 哈哈 ~
9 點半起身 媽咪工人放假呀 所以我又買早餐比家姐食 順便陪下佢 咁里奧大人就要去大姑奶屋企度電視機 size 所以今次打的喇 唔駛轉車咁麻煩 ~
食完早餐又傾下計 差唔多 12 點里奧大人就打黎話黎緊 估唔到 d 時間過得咁快 差唔多 1 點就同埋媽咪一齊飲茶 飲到 2 點半都番屋企喇 因為工人番咗黎 同埋媽咪要食藥呢 ~
坐到 3 點就一齊走喇 之後我去買餸 里奧大人去訂電視機 ~
今日都好焗熱 真係唔願郁 但里奧大人好好喎 主動幫我熨 2 機衫 我可以做小樣家務 呵呵 ~
約咗家姐 5 點半拎湯 番到屋企抖多陣就煮嘢喇 今晚要去徑步呢 ~
是日懶餐 - 滷水雞翼 ( 外賣 ) + 唐生菜 + 粉葛豬骨湯
滷水雞翼 ( 外賣 ) - 懶到出汁 所以買雞翼做餸 哈哈 ~
唐生菜 - 又係懶人首選 浸又快淥又快 好鬼愛佢呢 ~
粉葛豬骨湯 - 家姐煲架 佢話依家代替媽咪煲湯比佢 其實真係多得媽咪同家姐 如果唔係我唔會有咁多湯水飲呢 真係搬番出黎住 先有咁多湯水飲 因為媽咪家姐成日覺得我好慘 成日無湯飲 ~
8 點出去徑步 見到大月亮 所以徑 20 分鐘就番屋企拎腳架再影 不過原來都影唔到 最搞笑隔離個女人又係拎腳架 佢都影唔到 咁我地都唔再 set 嘢喇 番屋企沖涼好過 好鬼熱呢 ~
都係影到好散
走人 lu
沖埋涼就抖陣 11 點唔夠就瞓喇 因為聽日要番工呢 ~
( 27-SEP-2015 SUN )
今朝 9 點 15 分已經醒咗 咁都起身 lu 之後去麥當勞食早餐 ~
食完番屋企抖下就番教會 崇拜完畢之後就去價真棧買即食麥片同乳酪 要開始減下肥 lu ~
無啦啦好攰呀 所以 hea 到 2 點半就去大快活食 tea 因為我要飲凍咖啡啊 ~
我食食下同里奧大人講 如果我死咗 你實好孤單好可憐 之後佢同我講話 "自古美人如名將 不許人間見白頭 " 所以叫我放心 我會好長命嘅 我仲好認真話 d 人真係好慘 可能成日要用腦 所以唔會長命 佢笑住話係呀係呀 頂佢丫 後尾終於清醒 知佢講咩啦 衰 ~
頭先喺價真棧 里奧大人好似好想買辛辣麵咁 不過 $29.9/pack 又唔係平 所以我去 Taste 睇下 估唔到做特價 $23.9/pack 所以買 pack 先 之後買 unsalt butter 因為之前睇係 $27.9/件 買二送一好似好抵咁 比完錢 check 單 心諗點解兩樣廿幾蚊嘢 最多咪五十幾 點解七十幾咁貴 仲想番轉頭問點解只係減一件 $27.8/件 唔係減兩件咩 好在停一停諗幾諗咋 唔係真係勁樣衰呢 因為我一心以為 $27.9 有三件呀 嗚嗚 ~
4 點飲湯 抖到 5 點半就出發去百樂門 今晚同九龍區嘅姑奶門做節食飯 食到 8 點幾就走喇 ~
家姐煲比我嘅青紅蘿蔔豬骨湯
我同里奧大人行去 Megabox 睇行山杖 好感恩喺 PROTrek 買到合心水嘅 $249 有 9 折 即係 $224 買完再周圍行 不過無咩人行 超勁舒服 哈哈 ~
本來諗住行路番屋企 但好難得 shuttle bus 唔駛排隊 所以最後都係坐 shuttle 番屋企 lu ~
超勁熱 番到屋企即沖涼 之後開機洗衫 ~
今晚要應節 所以食月餅 其實想快 d 清哂去 不過我唔食咁多凍嘢喇 比哂里奧大人食算 等佢每晚一個 哈哈 ~
睇下電視睇下雜誌 好快又 12 點 又要瞓喇 ~
沙爹湯底
實在太飽 所以成碗烏冬無食過 所以要拎走呢
( 26-SEP-2015 SAT )
今朝瞓到 10 點 15 分自然醒 但其實 8 點已經醒醒地 因為係一覺瞓天光 但無理由 8 點咁早起身家嘛 所以再瞓過 ~
里奧大人就 10 點已經起咗身 仲開埋機洗衫 咁之後我地刷牙洗臉 差唔多 11 點先落樓食早餐呢 ~
頭先明明好好太陽 食完早餐之後 個天就暗哂 本來去長洲行下 依家唔喇 改去荃灣 因為如果荃灣唔落雨 咁就可以去行山 如果無得行 就去行街買嘢 此乃進可供退可守也 哈哈 ~
坐 van 仔去官塘 再由官塘坐 van 仔去荃灣 真係勁嘥時間勁嘥錢 哈哈 但我同里奧大人講話唔想坐地鐵 地鐵應該十蚊雞之內 但坐兩程 van 仔 加埋要 $17/人 下次我都係坐地鐵算 因為感覺兜黎兜去好嘥時間咁 哈哈 ~
去到荃灣已經 1 點幾 我想剪髮呀 所以打比剪髮表妹 佢叫我 3 點再去佢度 但我話修前面 d 頭髮 所以佢叫我 20 分鐘後到就可以架喇 行行下居然見到 Miniso 咁又去買 d 嘢啦 上次去東門買咗條抹手巾 家姐好鍾意 咁我就入去睇下有無囉 估唔到又有喎 不過係唔同款 同埋 HK$15/條都 ok 但最正係有家姐一生中最愛嘅紫色 因為我唔鍾意心心圖案 所以買 1 條比佢先 下次見到係衫仔款再買多條比佢 ~
條街超級勁焗熱呀 所以去買杯百香果 QQ 再買多杯珍珠奶茶比表妹 去到可以即剪 唔駛 5 分鐘搞掂 之後就走人喇 呵呵 ~
原來已經 2 點幾喇 里奧大人話可以食嘢 咁食啦 其實頭先一黎到荃灣已經話食嘢 大佬 我有食力 但都唔能夠兩個鐘頭食一餐囉 ~
今次試下蘭洲拉麵 家姐話唔好食架 不過我都想試下 點知真係唔好食 哈哈 ~
紅燒雞翼刀削麵 - 我覺得 d 麵都唔煙韌 直頭覺得有 d 硬添呀 所以食到一半唔想再食
五香牛展上海麵
我覺得 d 醬都唔辣嘅 @@
炸雲吞 - 香口但唔覺得好食
食完就去南豐廣場 有個特買場買家品 d 嘢真係勁抵 又買咗 d 咁啦 之後去旅行社睇資料 睇完再行去千色店睇嘢 再去唔知咩醬園買辣麵豉同酸梅 唔駛下下去街市買 呵 ~
$5/支 勁抵 所以買咗 6支 其中 2 支比家姐 1 支就比媽咪
隔熱墊 ( $18 ) 想買呢 d 隔熱墊好耐 所以見到即買 同埋買咗 2 對超長筷子 好似 $5/對咋 用黎炸嘢就最好呢
家姐無啦啦 send 咗呢張相比我 麥包瞓到咁好搞笑呀
好喇 再行多轉 van 仔站對面嘅商場 經過馬拉松見到 Cross 只係 $249 咁買啦 里奧大人成日叫我買 話 $299 已經抵喎 咁依家 $249 再有會員價 抵上抵呀 好感恩呢 ~
行下又見到羊皮短 boot 今次係里奧大人買架 清貨價 $399 呢個真係抵喇 個款又靚 之後再用優惠價 $100 買多條羊皮皮帶就走喇 因為都已經 5 點半喇 約咗家姐 6 點拎湯比我嘛 所以即坐 van 仔番屋企喇 ~
約家姐喺停車場交收 又醒咗張 Häagen-Dazs 雪糕 coupon 比我 呵呵 不過 11 月到期 真係要記得食咯 ~
番到屋企抖陣 我勁想打邊爐 不過里奧大人唔想 咁就去大家樂啦 可以打一人邊爐呢 ~
食完又行陣商場 里奧大人又入去允記睇 Cross 佢終於又忍唔住買多對啦 話 $299 真係抵 唔買唔得 佢真係唔知兩年定三年 已經買咗 4 對 Cross 初初佢唔鍾意大頭 依家就覺得舒服喇 同埋最正係可以着完用水洗 夠哂方便同埋乾淨好多 不過始終係膠嘢 個底會好快蝕囉 ~
呢期勁愛梳乎蛋 所以見到有舖頭買佢嘅產品就即去睇 所以我叫里奧大人周圍行 我想睇哂所有嘢嘛 如何佢喺度 會成日催住哂 好煩呢 ~
唔記得呢 2 個 folder 幾錢添 好似 $8 同 $10
呢個坐枱月曆只係 $35 同埋我真係有用架 所以里奧大人話買呢
我買完之後就周圍行 咁啱轉彎見到里奧大人 正想叫佢嘅時候 佢入咗間舖頭 之後又出番黎 咁我知佢係買 Chopper 比我架喇 我唯有扮見佢唔到啦 所以等佢自己比個"驚喜" 我啦 ~
之後我打比佢約喺邊度等 一見到佢 我問佢拎住 d 咩 佢話送比我嘅中秋節禮物 哈哈 不過我話其實一早見到佢啦 佢唔信呀 好在我有影相 呵呵 ~
呢隻係之前可以 7-11 換購架 不過又係儲印花再抽 我其實覺得直接買仲好囉 而後面果隻係舊款 老闆同里奧大人講 問下我鍾唔鍾意先買 因為一開咗盒就無得退 但里奧大人話照買 丫 其實我都有啦 家姐之前買咗比我架喇 我放喺菇場之嘛 之後我頭先叫佢啦 唔駛嘥錢 但里奧大人話無所謂喎 擺喺屋企都好丫 反正我鍾意
番到屋企即沖涼 之後睇戲喇 又係 12 點幾先瞓 ~
