小炒王 ( $ 78 ) - 呢個小炒王有腰果 / 炸魚仔 / 韭菜花 / 魷魚 / 豬頸肉 炒得好乾身 好味呀 但我地就食剩豬頸肉 因為個樣好似就咁烚熟咁 但如果係燒咗嘅豬頸肉就好味 哈哈
超鍾意食呢 d 炸魚仔
蝦乾都好大隻 不過就咁食就好鹹囉 同埋好有咬口 咬到個口好攰 食剩 1 隻都放棄喇
滷水鵝片 ( $ 128 ) - 我見到 d 鵝片疊到咁高 覺得 $128 真係好抵 後尾一夾件鵝片 見到底部係豆腐同花生 完成唔記得有豆腐花生呢回事添 哈 鵝片都幾滑 但我見到里奧大人果件係有骨喎 @@
藍妹啤酒大支 ( $25 ) - 阿奧驚熱氣 又叫啤酒 佢次次叫啤酒都會叫人拎支凍 d 嘅 我就會話啤酒實係凍架啦 今晚飲咗一啖超凍啤酒 原來係咁好飲 仍都知原來我好多時飲嘅係唔凍嘅啤酒囉 終於明白 mimi 同冰姑點解鍾意飲酒喇 哈
( 31-OCT-2015 SAT )
今朝 7 點 45 分起身 里奧大人話陪我食早餐之後再瞓 我一定話唔好 難得有時間休息 當然要瞓夠啦 ~
去到餐廳都 8 點半 咁即係真係要好似平時 7 點半起身 先可以慢慢嘆早餐咯 ~
菇場忙到爆炸 但 d 時間就過得超勁快呢 ~
里奧大人隻腳仲有 d 痛 加上又話今日局部地區有驟雨 咁我地都唔出街喇 我大把飲食男女未睇 想快 d 睇哂掉哂去呀 ~
放工即走 番到屋企抖陣 2 點半落去譚仔食嘢 ~
口水汁雞翼 - ok 好味
過橋米線套餐 ( 4 麻辣 )
食完行陣就番屋企 lu 咁又差唔多 4 點 之後睇下雜誌 越睇越瞓瞓 終於正想瞓嘅時候又已經 6 點喎 又要出發去黃大仙喇 ~
去到都 6 點半 又唔太餓 所以叫兩碟嘢算喇 咁又加埋支啤酒 實夠飽 里奧大人話我地好似老夫老妻 我話咩似呀 直頭係啦 佢話應該係好似 d 阿伯阿婆咁 食餸飲酒唔食飯喎 哈 ~
家姐今朝 whatsapp 話煲青紅蘿蔔湯 問我要唔要 我做咗個公仔符號 咁家姐以為我要 又知我唔出街 所以叫工人慢慢煲都未遲 咁之後我話佢知我出咗街 佢話做咩今朝唔講唔要呀 唉 我又係衰嘅 唔要就講唔要嘛 之後家姐 6 點幾拎湯比媽咪 之後再拎去我屋企呀 搞到佢又要特登泊車比錢 我真係唔好意思呢 同埋我話其實唔飲都得架 唔駛佢滕黎滕去咁辛苦 ~
食到超級飽 又去黃大仙中心行喇 買咗 1 件黑色外套 同 1 件裇衫 做緊特價呀 $140 同 $120 所以即買 lu ~
再去埋雞仔餅大王買埋 d 糕點就番九龍灣 里奧大人想去馬莎買西褲 感恩 $499/條 第 2 條半價 再可以用埋之前張 $100 coupon 即係 3xx/條真係抵呢 ~
喺雞仔餅大王買架 $20/5件 難食到爆炸 我食咗芒果糕同桂花糕 完全無味 咁無味都算 但口感係一 pat 嘢 我想掉咗佢架 不過又覺得好浪費咁 所以快咬快吞落肚算喇 我覺得佢真係史上最難食糕點之一囉 @@
馬莎呢隻糖好味 不過 $25 一包 唔會成日買囉 我覺得好貴呀 同埋好後悔點解之前 $40 有 2 包唔買囉 嗚
買完又睇下 d 波鞋 用黎跑步就平平地算喇 有 d 做緊特價只係 $339 咁就抵玩喇 不過今晚唔買住 因為已經 9 點 想番屋企休息喇 ~
沖埋涼就抖喇 睇陣電視 成 12 點先幾瞓呀 @@
( 30-OCT-2015 FRI )
又到 friday 喇 呢排好忙 所以覺得 d 時間過得勁快呢 好多嘢都好似啱啱發生完 但其實講緊嘅可能係一個月前 lu ~
里奧大人每逢星期五都會早 d 起身 咁就可以喺公司附近慢慢嘆個早餐 相對我又要早啦 所以我要食 d 款多嘅嘢 即係好似麥皮餐咁 食完一樣到一樣 咁樣可以坐耐 d 哈哈 ~
菇場忙呀 其實忙嘅感覺真係好 攰就係攰 d 但起碼個腦會郁下 有時悶起上黎 個腦都鈍 d 咁架 ~
Lunch 出去食粥 因為我好想食完行下呀 萬寧無啦啦又會員 9 折 又買咗 d 嘢咁囉 真係賤物鬥窮人呀 ~
Kinder 繽紛樂買 2 件有 88 折再有 9折 ( 原價 $18.5/件 ) / 洗手液就 $8.5 換購 1 樽
菇場仍然忙呀忙 最恐怖係 5 點 31 分有同事 intercom 原來佢話一陣會放低 d 嘢比我聽日做 驚我聽日一番黎唔知咩事啫 之後我問佢係咪唔番 ?! 佢話唔係 我心諗妳聽朝講到得啦 同埋 d 嘢前日先做過 點會咁快唔記得呀 哈 ~
懶呀 所以放工去 Taste 買免治豬肉 買盒最小嘅 要 $13.8 其實我就咁食茄汁雜豆意粉都得架 不過費事里奧大人嫌太 dry 雖然 佢成日話唔鍾意食肉 但次次都係第一啖係食肉先囉 ~
番到屋企預備好哂就拖地 里奧大人 6 點 45 分打黎話放工 咁我可以抖陣先煮嘢喇 ~
是日懶餐 - 肉醬扁意粉
肉醬扁意粉 - 好似一大盆意粉咁 但其實 2/3 係雜豆 + 紫洋蔥 扁意粉只係一碗仔 因為唔知係咪頭先食咗個芒果 所以唔係咁餓 如果唔係就會煮多 d 意粉喇 好在里奧大人話好味 唔係我會練死佢 因為事實扁意粉真係好小囉 ~
佢隻腳仲痛 所以唔徑步 但我會照徑囉 佢話佢一陣同我一齊出去 坐喺 d 櫈度睇住我徑步 嘩哈哈哈 痴線 ~
我話好想參加毅行者呢 d 比賽 不過好似要行 24 小時定咩 佢大笑話好呀 我話我可以行 50 個圈喎 條友即同我計呀 話行 50 個團只係得 2 個鐘 唔該妳行掂呢 50 個圈先講 @@
好啦 發完夢就去洗埋碗 抖到 8 點半就出門口 ~
徑咗 40 分鐘 流下汗嘅感覺真爽呢 ~
沖埋涼 睇報紙啦 我多數第一樣嘢係睇下萬寧同超市有咩特價 里奧大人一睇到係超市果版 就即刻笑住話我只係睇食嘢果版 我話因為咁 我幫佢慳唔小錢呀 真係呢 ~
之後睇下電視 我自己 11 點就瞓先喇 ~
滷水拚盤 ( $80 ) - 無咩滷水味囉
芋茸香酥鴨 ( $55 ) - 好味 但好滯呢
瑤柱魚膠什菜煲 ( $78 ) - 我鍾意食什菜煲 因為我自己唔會整 哈哈
南乳豬手 ( $58 ) - CC 叫架 佢話好鍾意食架喎 里奧大人唔食架 我都 OK 只要唔好比有手指嘅部份比我就得架喇
黃金煎麵 ( $65 ) - 勁想食呢個好耐喇 我以為係全個麵餅都係脆添 原來只得個邊脆 本來食剩一半 但個個話唔好嘥 食下食下剩 2 件 我話拎走留番聽晚食 不過最後我同兔兔都食埋佢囉 丫 今餐食咗好多炸嘢呀 番到屋企見照鏡 見到塊臉爆瘡呀 嗚
海皇方魚肉碎粥 ( $88 ) - 原來我叫錯咗 我以為蠔仔肉碎粥呀 唔怪得無蠔仔啦 哈哈
唔記得咩燉湯 ( $19 ) x 2 - 見細細盅就叫兩盅啦 因為突然又好想飲湯
朝日啤酒 ( $12/大支 ) - 里奧大人一坐低就話要叫啤酒 驚一陣食炸嘢會熱氣喎 咁兔兔又一齊飲 叫第 2 支嘅時候 里奧大人又問佢可以飲幾多支 佢話無數喎 咁即係飲得好勁啦又 @@
唔記得反光添 不過影到飛碟都唔錯丫 哈哈
( 29-OCT-2015 THU )
可能依家唔慣夜晚食飯飲湯 尋晚起咗 3 次身去廁所呀 真係暈暈陀陀咁行出房架 所以今朝里奧大人上大陸見客 佢鬧鐘響完 我都即刻可以瞓番 實在太攰喇 哈 ~
早餐食腿治 因為唔想食蛋又唔想食奶醬多 但其實我唔太鍾意食火腿架喎 覺得薄切切無口感 但我又好驚食火腿扒架喎 所以我其實覺得自己食嘢都好麻鬼煩呢 ~
菇場忙呀 旺季開始了 咁都好 最緊要有生意呢 哈哈 ~
今日有 lunch box 食咗幾啖飯都覺得好脹胃 我發覺次次食飯都係咁 食意粉米粉又無事架喎 ~
個胃頂住頂住 所以洗埋嘢就即刻出去行喇 行咗 20 分鐘好似好 d 咁囉 ~
里奧大人同客 2 點就由工廠開始走 但居然塞車 要 4 點幾先到上水 所以佢應該會第一個到 APM 哈哈 ~
仍然忙呀 忙到放工都未做完 之後 8 卦話 5 點 29 分會比嘢我整 整埋先好走 我話今晚唔得閒喎 佢就即刻話我大細超 不過其實佢都唔會咁衰嘅 但如果真係趕得咁緊要 我都會幫嘅 但第日一定黑佢面囉 呵 ~
里奧大人 5 點幾已經到 APM 所以叫佢一陣去攞位先 無諗過又係佢最早到 哈哈 ~
放工即搭地鐵 去埋萬寧買嘢就上去潮館 lu ~
Airwaves $12.5/2包 ( 出位價 )
eclipse 超強薄荷糖 $10/盒咋 因為里奧大人鍾意食 所以買幾盒比佢呢
CC 同兔兔兩公婆差唔多 6 點 40 分就到喇 每人叫 d 餸咁啦 CC 同里奧大人一樣唔多食炸嘢同辣嘢 我同兔兔就無咩所謂 呵 ~
叫完餸就開始傾喇 講開影相 我話我地一齊去旅行嘅話 咁得我影食物相 我驚團友唔理我 之後 CC 話 4 個一齊影囉 咁 d 團友都唔會好意思食呀嘛 嘩哈哈 之後里奧大人仲衰 話不如叫 CC 食嘢先 佢就即刻話 CC 唔好食住啦 人地影緊相呀 我覺得 CC 好慘囉 哈 ~
兔兔就話去旅行買嘢 首先係買最貴嘅先 之後再買嘢就會覺得 d 嘢好平 嘩哈 又係喎 佢咁講就嚇親里奧大人啦 因為里奧大人成日話我痴痴地家嘛 咩都買 但我真係唔係咩都買囉 佢成日周圍咁唱我 等到識我嘅人都覺得我鍾意買嘢咁 我慳妳地唔知啫 @@
CC 屋企係睇到日落 之後我話好羨慕呀 可以睇到日出同日落 兔兔覺得我係咪玩嘢 嘩哈哈哈哈 ~
里奧大人食到一半就停 其實佢食咗兩碗粥都勁架喇 之後 CC 咪話佢咁快停手囉 搞到我地 3 個好大食咁 但其實我地唔大食架 因為我地要食埋里奧大人果份囉 ~
同埋兔兔又係好鍾意咩都試 但 CC 就會話食完先再叫 唔係一陣嘥嘢 兔兔話有次我同 CC 行街食飯 佢一個人食泰菜 食咗酸辣鳳爪同泰式炒金邊粉再加支啤酒 之後打比 CC 問佢走未 咁我地仲未走 佢再叫多碟春卷 咁可以坐耐 d 食完就等埋個老婆一齊番屋企 我覺得佢好食得呀 哈哈 但佢反而話點解我地咁多嘢講 我話女人係咁架啦 ~
食下傾下都 10 點 係時候埋單走人喇 我終於請番佢兩公婆食嘢 了咗心事 哈哈 ~
搭地鐵番屋企 即刻沖涼喇 抖多陣 11 點幾瞓 lu ~
( 28-OCT-2015 WED )
尋晚瞓得都唔錯 感恩感恩 ~
今朝里奧大人話腳痛 原來尋日同叔叔影相 我 click 倒佢 就係果下就扯親 d 肌肉 唉 ~
無啦啦突然好想食腿蛋治 好在麵包夠 soft 所以覺得好好味 哈 ~
菇場忙呀 勁忙果隻 對手無停過 ~
本來諗住食麥皮 不過想比對眼抖下 所以出去食粥喇 再去買 d 零食就番菇場 lu ~
朱古力條 $10/包 / 檸檬糖 $10/包 / 童星點心麵 $11/3包
唉 里奧大人 send 咗張外賣相比我睇 佢肯定隻腳好痛啦 唔係唔會叫外賣 之後我話今晚幫佢"練"鬆下 d 肌肉 佢話仲驚 哈哈 ~
仍然做到無停手 有 d 唔趕就聽日做 lu ~
差唔多放工嘅時候 家姐打黎話有湯比我 實在太好 因為我正想滾湯比里奧大人飲呢 ~
放工即走去買餸 之後就企定定等家姐拎湯比我喇 又無啦啦好想食酸齋 所以去 Taste 買完就番屋企 lu ~
預備好就抖陣 里奧大人 7 點放工 抖多陣就開始煮嘢 lu ~
是日晚餐 - 蒜頭豆豉炒茄子魚肉 + 齋滷味 ( 外賣 ) + 西洋菜豬骨湯
蒜頭豆豉炒茄子魚肉 - 第一次咁整 我以前多數會釀茄子 但釀茄子真係要整好多時間 煎咗十年 d 茄子都仲係生勾勾咁 所以其實都好耐無整 但上次買咗 d 幼身茄子 真係無可能釀到 所以我分開煮 原來咁仲方便 呵呵 ~
齋滷味 ( 外賣 ) - $18 減到 $14 真係好抵 同埋最緊要份量唔好太多呢 ~
西洋菜豬骨湯 - 我鍾意飲西洋菜湯架 不過自己一定唔會煲 因為 d 菜要浸好耐 同埋驚有 "其乸" 真係未飲已經嚇死咗咯 ~
碗都未洗 里奧大人叫我一齊落去萬寧買安美露 咁是但啦 ~
番上黎洗埋碗 沖埋涼就開機洗衫 之後再熨兩機衫 熨咗個半鐘 差唔多 10 點半先熨完 企到腳都痛 嗚嗚 ~
里奧大人就自己用正骨水同棉花紮住隻腳 佢自己一手一腳搞掂架 果下我覺得自己好衰咁 咩都無幫手 如果我整親呢 佢就會幫我搽依樣果樣 所以有時比佢串又真係應該嘅 哈哈 ~
我晾衫嘅時候 里奧大人話"乜你洗咗衫咩 ?!" 之後佢話駛唔駛咩都一次過做哂喎 我話唔鍾意 d 嘢堆埋一次過做嘛 但我其實依家都懶咗啦 頭先搵單據 我話自己擺得實在太好 所以搵唔到 里奧大人即話我啦 自己擺完唔見咗就話擺得太好得滯 哈哈 ~
11 點幾瞓喇 唔好講笑 今晚真係幾攰 ~
薑蔥魚雲煲
芥蘭炒臘味
豉油雞 (半隻 )
( 27-OCT-2015 TUE )
尋晚瞓得都唔錯 可能依家天氣涼涼地 但其實我都仲係開緊冷氣 咁究竟關唔關天氣涼事呢下 ?!
今朝同里奧大人 11 點要喺深圳見客 咁一齊買定個包 之後就去食早餐喇 ~
菇場忙呀 要開行 turbo 做 因為下午請咗半日假去送叔叔機呢 ~
感恩兩個幾鐘就做哂嘢 可以無後顧之憂咁 off 呢 哈哈 ~
里奧大人見完客就去上水坐 A43 去機場 咁我就坐 A22 去機場 12 點 45 分開車 咁里奧大人差唔多 1 點 15 分 send d 相比我 好似同我去緊嘅地方差唔多咁 咁即打比佢啦 原來佢喺我架車後面 我話我架車好慢 佢話佢架車更慢 因為無理由上水方向去機場會同我差唔多時間到機場喎 所以大家都 1 點 30 分就到機場喇 ~
原來 A22 座位係咁舒服 我第一次坐呢 d 坐位架咋 @@
約咗叔叔佢地 2 點左右喺 Air Canada Check-in counter 咁知道叔叔佢地 1 點半先打的黎機場 所以同里奧大人去 Muji 睇下嘢 買咗塊鏡 ( $39 ) 之後就去番 Counter 前面坐喇 ~
咁啱有一家人送機 有個婆婆番加拿大 原來佢已經 91 歲喇 我覺得佢好勁 可以坐到十幾個鐘頭飛機 咁之後差唔多要離境 佢個親戚同佢握手 婆婆好唔捨得大力握手喊呀 嘩 搞到我都喊埋 我好驚呢 d 場面 但最搞笑係佢 d 親戚無個喊 哈哈 ~
叔叔佢地 2 點 15 分到喇 估唔到佢朋友都一齊送機呢 ~
叔叔搭 6 點 55 分機 但見 Counter 有人 所以試下可唔可以 check-in 先 好感恩係可以嘅 咁唔駛拖住 2 件大行李周圍走嘛 ~
諗住同叔叔去翡翠食嘢 但原來嬸嬸話想食菠蘿油飲咖啡呀 因為佢黎咁耐都無試過菠蘿油呢 咁好丫 一齊去翠華食喇 ~
嘩 好開心咁叫咗 3 個菠蘿油 點知落單之後話賣哂 我覺得仲衰過一早話無呀 因為唔好比希望我地嘛 哈 ~
我今日覺得好感恩 因為我其實我驚自己坐巴士入機場 好耐之前去接里奧大人機 但去咗機場博覽館 所以又要坐番車出來 咁今日其實都驚落錯車架 始終自己論論盡盡嘛 咁啱里奧大人坐嘅巴士又喺我後面 我叫佢差唔多落車就打比我 咁就唔會落錯啦 ~
咁里奧大人今日用 power bank 叉電話 叔叔見到即問係咪用黎叉電 原來大表哥佢送咗個 power bank 比叔叔 但無教佢點用囉 雖然呢 d 嘢係好普遍 但未用過就真係唔知點用嘛 因為我試過用 power bank 叉電 但無推去 on 仲好話里奧大人無叉夠電就比我用 勁呀呢 咁我地買咗 2 支 sticker 比堂妹 里奧大人都千叮萬囑我一定要教叔叔點用 仲要只係插線果隻 真係唔難用 但起碼妳點都要教一次 人地唔駛嘥時間睇下點用嘛 突然間覺得里奧大人好細心 (婆乸) 呢 哈哈 ~
坐到 4 點 45 分左右就走喇 之後陪嬸嬸去奇華買杏仁條同花生糖 我開始黎料喇 嗚嗚嗚嗚 叔叔話唔好喊呀 下次唔比我送機 又話如果我去加拿大 我走又喊 唔得呀 佢話當堂妹大過哂 第時會番來密 d 嬸嬸都鼻紅紅 最搞笑係嬸嬸表妹話比我整到佢都眼濕濕 ~
衰里奧大人話我一個人去加拿大無問題 最緊要 1 way 正衰佬 我話如果要去加拿大 起碼要用十萬 佢話無問題 最緊要 1 way 之後話叔叔可以比番二十萬叫我番黎香港唔該 我話咁我都好着數喎 賺咗三十萬 哈哈 衰里奧大人真係超衰囉 @@ ~
5 點半開車 因為紅磡有 d 塞車 所以我差唔多 7 點先去到嘉華呀 ~
里奧大人要做公司嘢 所以都唔黎食飯喇 我坐低無耐家姐都到 可以叫餸食飯喇 ~
食完去萬寧買嘢 之後番媽咪屋企坐陣 拎埋生果 差唔多 9 點就走 lu ~
沖埋涼 食埋生果 睇下電視 11 點幾瞓喇 ~
( 26-OCT-2015 MON )
尋晚早瞓 所以今朝起身都好精神 感恩感恩 ~
又係好想食 d 酸嘢 咁就食熱狗餐喇 ~
菇場勁忙呀 做到 lunch time 都未做完 ~
出去食酸辣米線 之後行去睇下邊度搭 A22 真係行到成身汗 不過知道邊度搭車 個心就定好多 唔駛聽日搵黎搵去 ~
繼續做做做 做到放工 今日真係超充實喇 ~
放工去街市買餸 番到屋企預備好哂 滾埋 d 湯就開機洗衫 之後抖陣 里奧大人 7 點放工 咁我都開始煮嘢 lu ~
是日懶餐 - 蒜香肉末蒸茄子 + 雪耳百合紅蘿蔔瘦肉湯
蒜香肉末蒸茄子 - 之前見到報紙嘅食譜教煮呢個餸 不過我就跟 d 唔跟 d 咁囉 但我覺得好味喎 同埋整呢個餸都好方便 下次再整先 ~
雪耳百合紅蘿蔔瘦肉湯 - 又係跟食譜架 但份量就無跟啦 唔想拎個電子磅出黎 同埋我得 1 條紅蘿蔔都跟唔足架喇 所以求其算 就係因為求求其其 所以完全無味 嘩哈哈 里奧大人飲哂一碗 真係好勁呢 因為我都接受唔到係味嘅湯 飲咗半碗咋 哈 ~
搞掂哂都差唔多 9 點 又一齊出去徑步喇 今晚有 d 攰 所以行平路算喇 最緊要係行夠半個鐘就得架喇 ~
番到屋企沖埋涼就抖喇 meme 摩摩 11 點幾先瞓 ~
西柚辣沙律 - 望個樣好似勁辣 但原來一 d 都唔辣 西柚好甜 但估唔到有咁多炸蒜同炸乾蔥碎 我又分開黎食 所以覺得好鹹 哈哈
泰式炒金邊粉 - 其實我鍾意食炒金邊粉 不過里奧大人就麻麻地酸酸甜甜呢 d 粉麵 但今次想試新嘢 又唔想食飯 所以食呢個喇 都唔錯呀
椰菜苗炒咸豬肉 - 估唔到今次 D 咸豬肉係脆皮 好好味呀
( 25-OCT-2015 SUN )
今朝 9 點 15 分起身喇 但我發咗個夢 喺夢入面鬧鐘係 9 點 15 分響 我仲話鬧鐘好大聲添 我好似都醒咗一醒 因為真係唔知係真定係夢境嘛 所以望下個窗 個天仲係好黑 咁即係未天光啦 可以繼續瞓 lu ~
媽咪工人今日放假 所以我同里奧大人一齊買早餐去媽咪屋企 同埋家姐一齊食 陪下佢啦 ~
家姐見到里奧大人食完剩番個盒 就同我講話佢成個大爺咁款 咁我睇咩嘢啦 原來係里奧大人食完 蓋都唔冚 又唔掉就行開去 我話佢不嬲覺得喺屋企食嘢好似喺茶餐廳食咁架啦 食完就人 真係咩都唔理架 @@
食完早餐 咁里奧大人睇書 我同家姐打機 但其實我地幾個都好眼瞓 哈哈 ~
話咁快又 1 點幾 係時間去飲茶喇 ~
飲到 2 點幾就走喇 上咗媽咪屋企坐一陣 差唔多 3 點就走喇 去埋 Smartone 買增值卡就去馬莎睇西褲 $399/條 好感恩買第 2 件係半價 所以里奧大人即買 同埋得番最後 2 條咋 我估今晚黎晚都應該無哂貨 lu ~
買完就番屋企 原來都已經 4 點幾 好攰呀 但唔瞓喇 費事今晚瞓唔着 ~
里奧大人話食泰菜 咁好喎 今日我都好攰唔想煮 呵呵 ~
6 點出門口 食到 7 點幾就走喇 因為今晚唔徑步 所以行咗晨運徑一個圈 再行另一邊嘅公園 估唔到都行咗成半個鐘 爽 ~
行到街市附近見到月亮 又影下啦
去到晨運徑再影
唔講唔知係月亮 哈哈
沖埋涼 睇下電視 10 點 45 分即瞓 好難得咁早有睡意呀 所以好肯定我今日真係好攰呢 哈哈 ~