魚片頭日式拉麵 ( 30-NOV-2015 )

( 30-NOV-2015  MON )

尋晚早瞓   今朝起身都覺得精神   感恩感恩 ~

又開始熱番咁噃   不過之後幾日又話凍番   真係要好小心身體   唔係好易病架 ~

明明好餓   但去到餐廳又唔想食米粉餐   咁又食番芝腿治啦   哈哈 ~

菇場超級勁忙   我預咗架喇   所以要快手快腳做哂去呢 ~

Lunch 出去食白粥同炒米粉   本來諗住食麥皮架   但工人話屈臣氏買 body cream 平   所以我去萬寧睇下囉   點知家姐話工人已經買咗   真係暈暈地   頭先叫佢唔好買住   等我晏晝睇咗價錢先買家嘛   不過佢買咗都好   唔駛我拎黎拎去   反正同價   只不過家姐想一陣用 coupon 買啫 ~

行多陣就番菇場喇   未夠鐘都做嘢喇   真係覺得難以想像   哈哈 ~

放工未做完   但都走喇   趕住去拎中藥呢 ~

拎完藥就去街市買餸   番到屋企就拖地   成身汗呀   所以我覺得今日真係熱呀 ~

里奧大人 6 點 45 分放工   咁我就自己預時間   因為今晚只係淥嘢   唔需要好多時間   但就唔可以太早煮囉 ~

是日懶餐 - 魚片頭日式拉麵

魚片頭日式拉麵 - 完全九唔搭八   不過真係唔想諗煮咩囉   同埋最緊要係清埋 d 水餃同龍蝦丸   我求求其其一兜就算   係里奧大人果碗整得好睇 d 咋   咁烚咗 2 條粟米   知佢唔太鍾意食粟米   所以我拻咗半條落佢碗拉麵度   唔食唔得呢   呵呵 ~

搞掂哂就沖涼   食埋生果就寫 blog   唔係聽日無時間   依家年紀大無記性   襯記得就要寫架喇 ~

11 點即瞓   對眼好攰   想早 d 休息 ~ 

BBQ 醬燒豬肋骨 2 人餐 ( 大家樂外賣 ) @ 屋企 ( 29-NOV-2015 )

BBQ 醬燒豬肋骨 2人餐 ( 美式風味嘅醬燒豬肋骨 2 件 / 香草雞下腿 2 隻 / 香甜燒粟米 2 支 / 肉醬意粉 1 客 / 蘋果薯仔沙律 2 客 / 香脆薯角 1 客及可口可樂 2 罐 )  所以我覺得 $88 好抵呀     

估唔到個汁都幾好味   同埋薯角份量都唔小呢  

( 29-NOV-2015  SUN )

呢排都無開冷氣瞓   但有時瞓瞓下都熱醒咁   但就唔會出汗   如果唔係都唔知開唔開冷氣好   哈哈 ~

但今朝熱到有 d 喉嚨唔舒服   所以醒咗   一望個鐘原來只係 8 點半   咁我都起身喇   因為都唔眼瞓嘛   咁刷牙沖涼   之後睇下雜誌   里奧大人 9 點都醒埋   到佢沖涼洗頭   咁我搞掂哂就去大快活買早餐先   因為工人放假   我同家姐就照顧媽咪囉   其實都係坐同食   哈哈 ~

食埋早餐又傾下計   家姐又睇我旅行 d 相   好快就 1 點   要同媽咪去飲茶喇 ~

里奧大人負責捱輪椅   佢着格仔裇衫又帶口罩   立眼睇好似 d 復康人員   呵呵 ~

飲完又 2 點幾喇   我喉嚨好慶   所以勁想食凍嘢   去埋麥記食士多啤梨新地   家姐又話想試粟米批   咁食埋啦   不過勁難食   一 pat 無味嘅醬加小小粟米   搵笨嘅 ~

上到媽咪屋企就坐陣   3 點左右就一齊走喇   咁家姐想買波鞋   咁叫佢黎淘人允記睇下   New Balance 又睇唔啱   條友成日揀親都係深色   仲要係男裝   因為佢拎比我睇嘅時候   我話咁大對係男裝黎架喎 @@   佢話頭先拎另一對比里奧大人睇嘅時候   佢都話係男裝   妖   男裝大對 d 家嘛 @@   

之後家姐去 Reebok 睇啦   佢揀咗對好 sharp 嘅波鞋   同埋咁啱特價 $379   咁又抵喎   咁我同家姐講話揀咁 sharp 咪好囉   成日黑沉沉   之後佢話係里奧大人幫佢揀嘅 @@

里奧大人上屋企先   我就同家姐去元氣拎芝士蛋糕   之後再陪佢去麥記買開心樂園餐比姐夫   細細份最啱佢 ~

買完就送家姐搭巴士   一去到就有車喇   感恩感恩 ~

我番到屋企   里奧大人以為我無送家姐搭車呀   因為無諗過咁快   哈 ~

本來今晚想煮飯  但個人真係好攰   同埋唔係咁舒服咁   所以飲埋杯 Hot Lemon   睇陣雜誌   之後都瞓咗半個鐘呀   瞓完好似好 d 咁 ~

好想食大家樂嘅 BBQ 醬燒,豬肋骨套餐   所以 6 點即去大家樂   排隊買嘢嘅時候先知 $88 醬燒豬脾餐只係外賣   咁就外賣啦   喺屋企食舒服好多   呢間大家樂真係好迫   同埋我最唔鍾意 d 人兩人打邊爐就霸 4 個位   超級勁自私呢   快餐店唔係咁囉   講真   想坐得舒服又想食完傾計   咁去酒樓囉   唔好阻住人丫嘛 ~

食完抖陣就沖涼   都仲係好攰咁噃   所以睇陣雜誌   打下機   10 點半即瞓喇 ~        

PART 2/2 龍脊灣 + Outback Steakhouse @ 銅鑼灣 ( 28-NOV-2015 )

( 28-NOV-2015  Part 2/2 )

今次行山   都見到好多大陸人   但都有 d 質素嘅   因為唔會周圍放飛劍同推人呀 ~

行下行下都 1 點半喇   唔知仲有幾耐先行得哂呢   哈哈 ~

我踩住 d 石頭行   其實幾好玩嘅   哈哈 

我覺得我呢個樣   應該係諗緊仲有幾時先行完

個男人好似伸緊個頭出黎咁   哈哈

龍脊觀景台

呢度超級勁大風   所以要捉實 d 嘢

我影緊自己 d 頭髮比風吹起   但我唔敢向住個海   因為我背囊頂住   我驚自己頂咗自己落山呢

我 zoom 過去影架   因為我離遠見到佢拎住罐綠色嘢   又哂光   所以我同里奧大人講話佢飲啤酒   之後佢經過我隔離   真係啤酒罐黎架   我唔明點解 d 人行山又食煙又飲啤酒囉   咁健康嘅活動   無理由有呢 d 嘢出現囉

一豬當先   嘩哈哈哈   里奧大人話以為真係有隻豬行出來 @@   暈

1 點 40 分到 088 喇

今日唔太熱   不過都幾曬   我同里奧大人條頸嘅位置都曬黑咗

又影下相先 ~~~~

呢條路都幾搞嘢   中間係突出來

係咪就快到大浪灣呀 ?!

個女仔幫個男仔影緊相

原來唔係囉   嘩哈哈哈   佢地唔識架

呢班強國人好勁   一路行一路食橙   佢地好似 9 個人   我見個男仔每人分一個呀   咁個背囊都好重下喎

一路食   一路掉橙皮落山   唉

                           
又見到大烏龜   其實來來去去都係呢個景觀

呢度有張櫈   所以里奧大人話已經 2 點   要食嘢喇   但其實我唔餓   不過照食啦   最後都食唔哂 2 條芝士條   之後唔買咁多啦 ~~~~

食飽又繼續行

                               

無啦啦有嚿大石喺中間   形狀好似條大蟲 @@ 

如果之後 d 路係咁就好 lu  

離遠望到有粒啡色嘢

原來係個亭

行呢條樓梯係最恐怖   因為條木同 d 可路唔係平舖嘅   好易 click 親架

唔整好過整   一係就整好 d 啦

又黎呢 d 路 @@   好在今次唔算多人行   唔係我就阻住人啦

里奧大人 : 天呀   咁行法   係咪要行到 2049 呀呀呀呀呀呀呀呀

好似就到咁喎   開心開心

但原來係要繼續艱辛   哈哈

2 點 15 分到 089

行到呢度就覺得好焗

呢 d 路   如果我落雨行   唔小心一跌   呢條路就好似 sir 滑梯咁   sir 落山呢   哈哈

佢地坐喺度食嘢

呢個鬼妹赤腳行   堅呀

好難見到出面咁   所以有 d 熱

d 路凹凹凸凸   加上有 d 又比陽光射住   又 d 又比樹蔭遮住   又光又暗咁   所以我覺得仲難行

  

好多樹根凸哂出來   所以我都仆咗幾次   好在里奧大人扶住我咋

有棵樹向橫伸展 @@

仲有 500 m   去到邊先 ?!?!   已經 3 點 lu   我覺得龍脊灣美中不足係無洗手間囉

我見到好似平路嘅地方   所以行快 d 呢   因為我想去廁所 

嗚   原來仲有一段路

里奧大人話第一次見人行山拎斜揹袋仔

見到個指示牌之後真係晴天霹靂   原來去大浪灣仲要行一個鐘呀   呢度有流動廁所   里奧大人話都乾淨   不過我都唔去啦   驚一陣無胃口食嘢   我忍。。。。。。

抖下

之後又坐低抖下  

里奧大人就周圍影下相

我就望天打掛

又紅又黃又綠嘅樹葉

車慢駛   我都要慢行 ~~~~~~~~

對鞋污糟到呢   

好舒服呀

仲要行 45 分鐘先到大浪灣  

好似係隻大蒼蠅食緊嘢

前面係去小西灣   落樓梯係去大浪灣喇

我覺得呢條路都好難行   太凹凹凸凸喇

                               

Yeah   4 點終於到 100 喇   行咗 4 個鐘   又唔係話好攰   係驚多 d 囉

經過 d 村屋

收信集中地   突然間覺得好多信箱咁 

終於落地面喇  

隻狗仔好得意   右下角有隻狗頭   其實我摸緊佢呢   哈

好多人等小巴出筲箕灣   我地要等第 3 架先有位   $12/位 

都有好多人帶狗入黎大浪灣

4 點到大浪灣   咁要行番出去嘛   我地坐小巴落筲箕灣   4 點半上車  好似 25 分鐘就落到去筲箕灣   之後即去安利食嘢   好在我記得係之前去開果間咋   唔係就去錯安利大排檔呢 ~

凍奶茶 ( 小甜 ) - 超好飲呀   唔澀口   下次黎一定要再飲呀

片頭河 - 我覺得片頭都幾腥   咁我同家姐講啦   佢話唔覺   梗係啦   佢話佢落好多辣椒油   蓋哂 d 味   只係食到辣味 @@   不過我都有落辣椒油   落咗半茶匙囉   我都覺得辣   之後生埋"飛滋" 添呀   慘  

切腩魚片撈粗 - 其實家姐叫我食坑腩架   不過我食完之後先記得應該叫坑腩囉 @@

鮮油多 - 我同里奧大人講話不如叫埋鮮油多   因為筲箕灣唔會成日去   真係唔知幾多年先去一次   所以我話叫埋囉 

如果我食開間茶記   烘 d 多士係咁靚仔就好 lu

                    

好在我記得係間廟對面咋  

食完抖陣就搭地鐵過銅鑼灣 Sogo   諗住買背囊   但又唔啱心水   但買到個蒸氣熨斗刷   折咗 $358 都 ok 抵   但 Sogo 呢幾日唔記得係咩特價日   勁多人   所以買完之後都即走喇   無咩心機行 ~

其實唔餓   但唔想番九龍灣先食嘢   所以 7 點左右就去到 Outback   今次食個 Appetizer   飲咗 3 杯冰水之後超勁凍   加埋坐喺風位   我着咗風褸加埋里奧大人件裇衫   笠埋頂帽都仲凍呀   食哂嘢就即走喇 ~

我問里奧大人   樓下 d 人望唔望到我   佢話唔知   叫我落去向佢狂揮手   睇下見唔見到喎   ( 佢一路講一路笑架   之後話就算見到都扮見唔到我   等 d 人以為我做咩狂揮手 --__-- )

次次都覺得呢個黑糖包超級好味架   但今次唔覺   可能唔餓呀   哈  

肉醬味肋骨雞槌拚盤 - 我同里奧大人講   話點解 Appetizer 份量會咁多嘅   食完都夠飽   之後佢話人地可能 6 個人食   每人一件咋喎   係喎   我無諗過咁多人食添

 

好鬼凍呀   坐到 8 點都走喇   咁行咗陣就去搭巴士   離遠見到 619   所以我好緊張同里奧大人講話有 619   嚇到佢以為咩事   哈哈 ~

番到屋企即沖涼   抖陣又睇下電視   12 點幾先瞓呀 ~