滷水拼盤 + 齋滷味 ( 外賣 ) ( 17-DEC-2015 )

里奧大人今日中午食剩嘅招牌炒飯   話想我試下咩叫招牌炒飯喎 @@   我覺得好奇怪囉   因為居然有豆豉鯪魚 @@   

( 17-DEC-2015  THU )

嘩   今朝凍呀   濕度仲只得 38%   如果我唔駛番工   我一定狂洗嘢   哈哈 ~

今日真係要着長袖衫喇   仲要帶條大披肩添呀   要好好保護條豬頸肉   攝一攝好易病架   黎緊多飯聚   唔可以病呢   呵 ~

早餐食奄列   唉   真係食到好悶   但又唔想搵新地方食   因為來來去去其實都係三文治囉 ~

菇場唔太忙   因為 system shot 咗   咁仲慘   一好番又係咁趕番之前 d 嘢 ~

Lunch time 唔餓   沖咗杯麥皮   因為諗住食完出街   點知食咗一啖   個胃即痛   但沖咗細半杯  唔好嘥   咁唯有慢慢慢慢咁食囉   食完都已經 1 點 10 分   咁唔出去 lu ~

媽咪 1 點半打黎話出院   感恩感恩   之後仲特登話我知腎科會再排期覆診   即係佢記得我上次發顛話佢唔記嘢   咁即係其實佢知我會嬲   但點解唔戒口呢 ?!  

個 system 仲係 shot   咁我可以 skype 傾計同 load 相   不過無啦啦個胃勁痛啦   抖唔到氣咁   之後痛到連背脊都痛埋   乜鬼事呀   嗚 ~

放工去 Taste 買嘢   之後即番屋企   今晚 Ogawa 送貨黎呢 ~ 

師傅  6 點 15 分到喇   Ogawa 門市 d 人講嘢完全離哂大譜   叫里奧大人將張單比師傅   所以里奧大人千叮萬囑話記得比師傅   點知師傅話張單記住 keep 一年   因為有保養   嘩   好在無比師傅啫   門市個女仔係咪想唔做呀   講嘢唔清唔楚   我覺得呢個女仔真係好不知所謂   里奧大人話如果唔係見我鍾意   唔會買添呀   仲有係個女仔知我地想快 d 要   話佢地有板車   叫我地可以自己推番屋企   大佬  27 kg 呀   成個細雪柜咁大   自己點推呀   真係信佢一成都死   呢 d 人做嘢真係完全無 heart   妳呢刻係做 sales   但當妳做番客人身份   妳會點諗呢下 ?! 

收完貨就開機洗衫   之後再熨衫   里奧大人 6 點 45 分放工   我要等埋佢番黎先可以煮飯   因為佢 lunch 食唔哂盒炒飯   留番今晚食呢 ~

佢一番到黎話頭先喺商場撻生魚呀   個 pat pat 有 d 痛   我問佢有無人扶佢起身   佢話無啦   佢跌完之後就即刻一個鯉魚大翻身就即走   話跌倒好樣衰呀   仲唔即走咩   哈哈 ~  

是日懶餐 - 滷水拼盤 + 齋滷味 ( 外賣 ) 

滷水拼盤 - 突然間好想食豬耳   不過呢盒嘢有埋豬脷同豬頭肉   其實我只係食哂 d 豬耳   豬脷就切粒炒飯   但我其實唔食豬脷架   但唔想嘥囉   下次都係唔買呢盒嘢   好驚   哈哈 ~ 

齋滷味 - 又係突然好想食酸齋   所以又買黎食下喇    咁之前剩番 d 粟米   又淥埋 2 條黎食   所以今晚呢餐完全唔知點咁   哈 ~

搞掂哂就沖涼   之後按摩   再睇下雜誌   11 點瞓喇 ~