2015年12月30日星期三

大阪王將 @ 九龍灣 ( 30-DEC-2015 )

北海道珍珠飯 + 元祖天津蛋 + 王將咖哩汁 ( Step 1 + 3 就 $45 )
我地要吉列豬扒 ( Step 4 )   所以加 + $18 - 好味呀   下次會再黎食   哈哈   


我地再要埋餃子 ( Step 5 )   所以再加 $18   食一個 set 要睇 5 個 step ~~~~~~~~~~


蒜片牛柳粒鍋 ( 配北海道珍珠米 / 豆腐味僧湯 / 漬物 ) ( $78 ) - 晴晴鍾意食   所以叫比佢食    


香辣野菜豚肉醬油拉麵 ( $68 ) - 都幾好味  


( 30-DEC-2015  WED )

原來又已經星期三喇   放假放到都唔記得星期幾   只係記得要番工 ~

咁之後嘅星期五又係 1月1日   如果星期六 off 就好啦   又可以放 3 日   如果聖誕節開始請假到 1月1日   即係請 4 日就連放 10 日   真係好正呢 ~

早餐無咩胃口   食奶醬多算喇 ~


菇場唔忙   認真清哂所有嘢   真係一身鬆哂   呵 ~

Lunch time 出去入票   之後食粥   食完即去買零食比表表   半個鐘頭行咗 2 間超市同 3 間零食店   我覺得自己好勁   一頭一尾喎   買嘢呢個原動力   真係零舍不同   哈哈 ~


番到菇場覺得勁熱勁攰呀   哈   好在無嘢做   可以抖下 ~

放工去拎中藥   今晚拎兩日喇   驚聽日無時間拎呢 ~

再行多兩間超市就番屋企   我覺得對腳好似就黎斷咁  哈 ~

開完機洗衫就諗住熨衫   點知將熨斗平放喺熨衫板   咁我行開咗 30 秒之嘛   估唔到成個熨衫板濕哂   咁熨唔到啦   個天都想我休息下呢 ~

晴晴今晚黎我屋企 print 嘢之後 scan 比學校   但無哂 ink   所以里奧大人準時放工   再去深水埗買 ink   咁晴晴放咗工   差唔多 7 點半就上到黎   佢喺九龍灣嘅時候打比我   問我食唔食西餅   我話妳唔係當我係阿婆   上黎屋企要買西餅比我呀嘛 ( 我覺得佢好婆仔囉   講"西餅"   大佬   講 cake 丫嘛   哈哈 )   之後佢話其實佢肚餓   想食件西餅   但驚肥   咁我話買一件 share 食啦   佢又話都係唔好喇   問完又話唔好   問黎做咩喎   嘩哈哈哈   但咁似我嘅 @@

佢上到黎之後見到筒綠茶餅就即開黎食   仲話我屋企超多零食   好在里奧大人唔喺度咋   唔係又嘈嘈嘈 ~

佢睇八卦雜誌見到有人離婚   咁我話如果父父出面有女人   妳會點呀 ?!   佢話會好嬲父父   之後我話如果舅母同父父離婚   咁會唔會黎探舅母架   佢好大反應話一定會啦   之後話妳地點會離婚架   哈哈   無聊問下啫   希望佢唔好認真去諗啦   嘩哈哈哈哈 ~

里奧大人 7 點半打黎話喺黃大仙   咁我同晴晴都去吉豚屋攞位 lu ~

點知要等 11 張枱   我地唔等喇   轉去大阪王將睇睇   坐出面就唔駛等位   我係驚晴晴凍啫   不過佢話唔凍   咁我地坐出面喇 ~

晴晴喺澳洲成日食 pizza   所以唔肥都難啦   咁佢番黎香港呢兩個月   佢媽咪就話佢要減肥   唔好食炸嘢唔好食油膩嘢   但今晚話食吉列豬扒   佢好驚   但其實佢好想食   我咪同里奧大人講囉   減肥無問題   戒口都無問題   但忍住唔食就有問題囉   明明鍾意要抑壓住   情緒受影響呀   可能我肥開啦   同埋晴晴咁後生   新陳代謝快   食小小完全無問題   又唔係餐餐咁食   同埋我覺得做運動就最好   又健康   唔係單單節食囉 ~

我之前嘅髮型師   晚晚食 2 個飯盒架   但身型 fit 到爆   因為佢會每晚做 gym 或者去跑步   人地開開心心咁食   開開心心咁減   咁先身心健康家嘛   依家搞到晴晴 d 方向錯哂   唉 ~ 

食完就番屋企整嘢   我叫晴晴等埋我沖完涼先好走   哈哈 ~

之後佢仲整緊嘢   我壓低咗把聲問晴晴 " 晴晴妳幾點走 ?!   因為開住電視   驚晴晴聽唔到   之後里奧大人話做咩咁惡 ?!   因為晴晴真係好驚咁答話仲整緊   嘩哈哈哈   我話無尾音問人嘢   原來真係好惡   sorry 呀   但其實因為我想切生果比佢食   想佢食埋先走   我點會咁惡對佢喎 ~~~~

咁啱尋晚媽咪比咗香梨同蓮霧比我   原來晴晴好鍾意食香梨   咁就好喇   難得佢鍾意食 ~    

晴晴無啦啦想借我部手機睇下   仲以為佢想打機添   原來佢睇我手機有無佢澳洲電話   如果無就幫我入番   我話無又點用妳 whatsapp 喎   之後里奧大人話又唔見妳驚父父無佢手機號嗎   哈哈 ~~~~

整到差唔多 10 點半先搞掂呀   我比錢佢搭的士又唔要   話搭地鐵好方便   佢真係大個女喇   但番到屋企點都要打比我報平安囉 ~

里奧大人 11 點唔夠話瞓   我話晴晴都未打電話黎   點可以瞓架   之後講完晴晴就即刻打黎   咁我地之後都即刻瞓喇   哈   好鬼攰呢 

沒有留言:

發佈留言