長洲 + Outback Steakhouse ( 銅鑼灣 ) ( 28-DEC-2015 )

炸蘑菇 

香煎蟹肉餅沙律 - 個蟹肉餅好鬼漏 @@

肉醬味肋骨雞槌拚盆

芝士白汁海蝦寬條麵 - 辣辣地幾好味喎    

雪糕朱古力軟餅 - 呢個我一定要叫比表表同小寶食架    

( 28-DEC-2015  MON )

今朝 9 點起身喇   食埋早餐   里奧大人就去睇醫生   因為隻腳仲有 d 痛   佢話醫生睇都唔睇佢隻腳就介紹骨科醫生佢睇   所以佢一番到黎就嬲爆爆咁   哈哈 ~



番到屋企就整 li 整 lu   11 點先出發去坐 619   等咗好耐車   之後再轉 603   最終都係 12 點 20 分左右先到碼頭   不過表表嘅粥仲未到   所以我地坐喺碼頭等佢呢 ~

今日天氣又係灰灰暗暗   尋晚又夜瞓   有 d 攰   哈哈   希望表表佢地唔攰啦 ~~~~

我地坐 12 點 45 分嘅[快船   1 點 25 分已經到長洲 lu ~

唔想太晏食 lunch   所以即去食嘢   食下傾下   時間過得好快   呢餐麻麻地架咋   希望佢地鍾意食啦   哈 ~

叫咗 1 支大藍妹

唔知咩例湯  

小寶急不及待   哈哈

蒜蓉蒸蝦  

椒鹽鮮魷 

避風塘炒蟹  

蒜蓉蒸扇貝 

豉椒炒蜆 ( 加辣 )

蒜蓉炒芥蘭  

芒果糯米糍 x 3 - 黎到長洲   當然要表表同小寶食番隻芒果糯米糍啦 

唔太熱   所以坐出面 

咁差唔多食完   里奧大人話去洗手間   之後表表無啦啦好緊張   細細聲同小寶講話無咗張單   咁小寶仲手持蟹腳   食到 lam lam 脷家嘛   嚇到佢即刻抹手走去比錢   笑鬼死我   其實表表同小寶唔係咁緊張   我都唔知原來里奧大人係去咗埋單   哈哈 ~  

之後行陣   表表想買平安包   小寶就掃咗雞仔餅同合桃酥同埋一包唔知咩來   好奇怪小寶好小會咁主動買嘢食家嘛   原來佢買比同事食嘅 ~

                       

買完都 4 點   經過允升就食埋甜品先   估唔到要等位   諗住平日   不過其實好多學生都放緊假   哈 ~

感恩等咗無耐就有位   表表相機塊唔知咩玻璃片甩咗出黎   所以里奧大人即出去買 AA 超能膠   咁坐喺度痴實都好丫   起碼唔駛企喺街度咁大風   又多塵 ~~~~

糖不甩 / 楊枝金露 
芒果糯米糍 ( 紫糯米皮 )  / 芝麻芒果腸粉 

芝麻糊豆腐花 ( 凍 )

呢餐又係小寶請我地   真係太客氣啦   表表唔知係咪喺出發前一星期   練定好 d 眼力   再叫小寶練定好身手鬧快比錢呢   哈 ~       

食完諗住行去小長城   經過海灘又影下相   都未去到小長城   表表話已經 5 點   唔怪得個天咁黑啦   咁我地唔去小長城喇   因為來回起碼個半鐘呢 ~   

喺度釣魚 ?!?!   實在太神奇喇 @@

咁打道回府啦   想同表表食大魚蛋   其實我都未試過   估唔到真係好味喎   呵 ~

好多人排隊

好幸運呀   因為呢兜係最後呢   我地買完之後就無得買 lu 

貓貓都聞到魚香味   哈 

熱辣辣



拎到 "呢咁 hea"   哈哈   因為好鬼熱呀   又驚趺喎   我地食咗大魚蛋 / 細魚蛋 / 墨魚丸 / 鯪魚球   但我地一致認為最好味係墨魚丸呀   哈   

大魚蛋好彈牙呀   又唔腥   都好好味架  



咁一路行去碼頭   一路聽小寶講鬼故   佢又細聲   真係要痴到好埋先聽到   人地唔知以為講咩驚天大秘密咁   嘩哈哈哈 ~

                         
佢好勁呀   居然唔驚鬼   仲一路講一路笑   我覺得佢好似講緊笑話咁   同埋佢講鬼故之前加多句係"真人真事"   嘩哈哈   喺你身上發生   我都知係真人真事黎嘅   哈哈 ~

之後坐大船出碼頭   咁架船就定好多   表表無咁辛苦呢 ~   

再搭地鐵去銅鑼灣 Outback   其實我真係唔知銅鑼灣有咩好食   我來來去去都係食南記同 Outback   所以今次好懶   仍然帶表表好 Outback   希望佢地鍾意食啦 ~~~~

8 點到 Outback   估唔到要等位   好感恩等咗 10 分鐘左右就有位 ~

一路食一路傾   無啦啦有一剎那好眼瞓啊   燈光太昏暗   加上有 d 攰   呆咗幾呆之後都清醒番 d   咁真係要搵人講下嘢   又輪到小寶繼續講佢工作上嘅"真人真事"啦   嘩   好在我真係唔眼瞓咋   唔係加埋佢 d 聲調語氣   我會即瞓着   哈哈 ~~~~

10 點半 last order   真係唔經唔覺又兩個幾鐘   小寶無啦啦話去洗手間   但佢 d 戲實在太差了   嘩哈哈哈哈   大佬呀   佢同里奧大人今日成日都話去洗手間   去到真係唔知真去定假去   嘩哈哈哈   不過咁   小寶第時一話去洗手間   我地就知咩事 lu   呵呵 ~

同表表一齊搭地鐵啦   不過我地係搭唔同嘅路線   所以一路扶手電梯之後就要分手喇   當然要攬下先啦   真係唔捨得佢地   好似見完無耐就要走咁   堅期待下次我地可以 6 個喺馬來西亞相聚呀 ~

番到屋企都即沖涼   又 12 點先瞓   聽日仲要番工   希望夠精神啦   呵呵 ~