( 31-MAR-2016 THU )
嘩 又回南咁天 今年啲天氣真係唔多舒服咁 所以一見有太陽就一定出去行下 唔係又唔知幾時見到佢㗎喇 ~
今朝同里奧大人夾手夾腳拎哂啲報紙比阿婆 但仲有 1 大袋拎唔到 聽日再拎埋就清哂㗎喇 之後就會隔日比佢 唔駛拎得咁辛苦 哈哈 ~
早餐食芝腿治 好似好耐無食咁 真係唔知自己年紀大無咩味雷 定真係依家啲嘢無咩味 基本上芝士係鹹鹹香香家嘛 但呢塊芝士係無味 只係口感似芝士囉 但見佢係片裝芝士嚟㗎 因為有次我見到佢拻咗塊膠紙呢 不過就睇唔到係咩牌字 哈哈 ~
菇場忙呀 好在 11 點搞掂 可以抖下 ~
Lunch Time 行過大圈先 之後再買酸辣米線番菇場食 ~
仍然 Hea 過 呵呵 放工番到屋企換對波鞋就去徑步喇 因為仲係好飽 同埋唔想食完出去徑 再煮比里奧大人食 好趕咁 唔鍾意囉 ~
條街好鬼焗熱呀 徑咗半個鐘就走喇 番到屋企都差唔多 7 點 換好衫就熨衫 熨到 7 點半就煮埋啲韭菜水餃 食完就煎魚同炒脆肉瓜 想快啲洗哂啲嘢先呀 ~
等呀等 佢 8 點幾終於放工啦 我都預備煮嘢 lu ~
是日懶餐 - 燒汁鯖魚 + 蒜蓉炒脆肉瓜
燒汁鯖魚 - 買咗就要煮架喇 唔係擺擺下又過期 ~
蒜蓉炒脆肉瓜 - 懶呀 如果唔係用豆豉炒 咁樣會好味好多 依家就清清哋啦 哈哈 ~
等埋佢食完 我洗埋碗 差唔多 10 點先沖涼呀 之後再熨幾件衫就休息 留番聽日熨 因為好焗熱 熨幾件衫已經想出汗咁 所以即停 我唔想再沖多次涼囉 ~
(阿表話外賣放落碟呢 感覺都靚啲 唔似外賣 我認同㗎 所以我為咗要里奧大人食哂啲瓜 我都由暖壺度拎番出嚟 擺得整整齊齊 果然食得哂呀下)
睇埋 "Do 姐有問題" 就即瞓喇 呢啲咁嘅天氣 真係唔郁都會攰呀 ~
老上海燻魚 ($68) - 好多細骨呀 之後比條細骨插住啲牙肉呀 好在拎得番出嚟 但之後啲牙肉好痛囉
上海酸辣湯 ($35/位) - 里奧大人知我鍾意飲 就一啖都唔飲架 點叫佢都唔飲呢 其實佢又真係幾好 哈哈
回鍋肉跟叉子 ($82)
婆婆擔擔麵 ($48)
( 30-MAR-2016 WED )
里奧大人今朝上大陸 叫佢拎支參蜜之後 我都瞓番 lu ~
唔知係咪呢排每日飲咗一杯圓肉杞子茶 瞓得都 OK 雖然有時半夜醒咗 但都好快瞓番 感恩 ~
今朝好餓呀 所以食米粉餐 但唔知點解覺得個五香肉丁好似有陣椰奶味咁 食到我好辛苦 ~
嘩 又要還債 差唔多 Lunch Time 先搞掂 ~
去 Panash 幫家姐買包 之後行多陣就番菇場喇 今日食黑椒吞拿魚包同椰絲包 因為尋晚要幫里奧大人買今日早餐 泰昌特價 $16/4 個呀 梗係買 4 個啦 就咁 2 個都要 $16 囉 我無理由唔買夠 4 個啦 ~
忙下停下又放工 今晚探媽咪 我一落車就胃酸倒流去喉嚨 勁刺喉呀 嗚嗚 ~
去到佢都係瞓 不過我都同佢講咗醫生話佢咩情況 我重點係講佢點懶 本來諗住 6 點 45 分走 點知坐下坐下都 7 點 10 分 咁走喇 佢開始開眼睇電視喇 不過我唔會因為佢精神就會同佢傾偈 佢自己唔珍惜在先 所以我都唔會理佢 講完拜拜即走 ~
行到半路見到家姐 企喺度傾咗幾分鐘 所以我變咗送車尾 嗚嗚 ~
里奧大人同我都 8 點左右到九龍灣 咁直接去上海婆婆喇 食完就番屋企即刻開機洗衫 之後沖涼 今晚好攰 所以唔想熨衫 要休息下呢 ~
又係 11 點幾先瞓 嚟緊又話潮濕 真係想 10 點半就瞓 但又好似早得滯咁 哈哈 ~
( 29-MAR-2016 TUE )
嘩 今日生活又回復正常喇 但勁唔想起身 之後同里奧大人講話 放 4 日假呢 應該放多 1 日 而呢 1 日係比我哋適應番 估唔到里奧大人答我話 無人叫妳番工前 1 日去玩家嘛 哈哈哈 係喎 點解我諗唔到嘅呢 衰佬 ~
對腳終於唔痛喇 真係要行多啲山 緞練番好個身體先 唔係唔掂呀 哈哈 ~
早餐食熱狗 我覺得呢幾日好似食滯咗咁 其實唔餓 但就唔想食多士乾爭爭囉 ~
菇場忙咗陣就 Hea 喇 大粒又唔喺度 所以勁 Free 啱架喇 假期之後第 1 日番工真係無乜 Mood 做嘢呢 哈哈 ~
Lunch 食麥皮 我差唔多 1 點 15 分先食 食完就啱啱開工 ~
之後醫生打電話比我 醫院啲醫生好好人 之前佢太忙 所以唔得閒打比我 我都預咗佢唔打㗎喇 估唔到又會打番比我 感恩 ~
醫生話媽咪腎指數係 160-190 算正常 要限水 1 分升 但最好保持偏脫水狀態 因為驚啲水排唔到出嚟 之後話要食清淡 依家嘅去水丸係 For 輕鹽份嘅 食得太鹹排唔到水嘅話 又要入番醫院架喇 ~
無胃口 Check 咗咽喉又正常喎 醫生睇番記錄都話媽咪鍾意食有味嘢 唔關食道事 咁我都放心 我初初驚媽咪咽喉有問題嘛 ~
我問醫生如果叫媽咪大力深呼吸會唔會氣喘 佢話唔會 但就唔可以快 因為驚回唔到氣 醫生都話媽咪懶啦 佢話媽咪同佢講話唔怕死 最怕係啲女唔比佢瞓 因為真係好攰喎 我覺得媽咪真係黐黐咃 點可能瞓足一日 23 小時零 58 分鐘㗎 仲可以唔轉身咁瞓架喎 已經生肉瘡 醫生話生開就會周圍生 同埋會爛肉㗎 真係以為唔比妳瞓係害妳咁 嘥氣 ~
放工去街市買餸 之後番屋企 浸完菜就拖地 之後包餃子喇 ~
8 點開餐 點知里奧大人打嚟話放工 但我點都要食先喇 好鬼餓 之後到佢喺鑽石山嘅時候 我就預備煮佢嗰份啦 問佢食幾多隻 佢話 8 隻 我話咁少 食 12 隻啦 之後佢又笑啦 話我問佢做咩 哈哈 我成日都係咁 佢都習慣了 ~
是日晚餐 - 韭菜豬肉水餃 + 炸魚皮
韭菜豬肉水餃 - 今次去呀伯果檔買 $6/半斤 但細塊啲嘅 咁下次去番遠少少番喇 咁唔駛包咁多隻 哈哈 ~
炸魚皮 - 阿喂喺行山嗰日買比我哋㗎 今晚點都要食喇 阿 mi 話炸魚皮係醃過 同埋有胡椒味 果然堅好味呀下 哈哈 同埋我鍾意夠薄脆呢 ~
等里奧大人食完 我再洗埋碗就落去萬寧買奶粉 阿奧幫大陸同事買呢 我同佢話只可以買 1 罐 因為驚個個同事叫佢買 人哋以為走水貨就慘喇 ~
里奧大人無啦啦又話食雪糕 咁食啦 佢食凍嘢就無問題 我話 "想" 飲凍奶茶咋 就話唔好生冷嘢 衰 ~
番到屋企即沖涼喇 睇埋 "Do 姐有問題" 就瞓喇 今晚好攰 哈哈 ~
PART 2/2
坐到 3 點半都走人喇 因為開始有啲餓 同埋仲有其他地方行呢 ~
我哋走嘅時候 再轉過頭望下 原來已經無哂人
行番落去
又見到幾個紮營
又望番上去
見到海鷗
坐喺度望星都唔錯
出番去食嘢 lu
行得幾快 哈哈
快啲行番落嚟啦 餓呀
繼續行
女生們在野餐
又影下相留念
好想 "捐" 入去睇下 哈哈
快
好多牛牛呀
佢哋好乖 行埋一邊
唔知係咪大肚呢 ?!
保護色
行出去睇下有咩好影先
其實我想拎呢嚿石頭番屋企
食埋嘢就行番出去 經過碼頭 原來有大船 里奧大人走過去問 大船坐 30 分鐘 ($13) 去到碼頭 但大飛就 10 分鐘 ($20) 到碼頭 之後我哋行埋先囉 因為見到好多大飛泊喺度 唔驚無得走呢 哈哈 ~
喺呢度食嘢 已經 4 點喇 唔想再搵
望住呢度
信望愛 如今常存的有信, 有望, 有愛, 這三樣; 其中最大是愛 (歌前13:13)
諗起阿喂同阿 mi
我想食香茅辣醬雞肉炒麵㗎 點知老闆話乜都無 只得餐肉麵同烏冬 但我唔想食餐蛋喎 諗住走㗎喇 之後佢話食味菜肉絲米啦 啱啱有燒肉喺度 咁好啦 食埋先走 ~
味菜肉絲炒米
食飽就走 lu
因為想行呢度 哈哈
去塔門海傍街睇睇
@ 天后寶樓
又影下
對唔到焦添 但效果都唔錯喎 呵呵
望到碼頭 都好多人等緊船噃
如果我坐呢啲出船出碼頭 我應該係全日最靜嘅時候 因為驚到唔敢出聲 哈哈
燒緊乳豬
行入啲睇睇
假狗咁 真係唔郁㗎
倒及牙好搞笑
肥滕滕好鬼得意呀
啲人趕住搭船 ?!
我地就慢慢行入去
唔夠膽行入去影 哈哈
行到入去都無乜嘢睇 所以又出番嚟喇
好鍾意呢啲磚
未拆好嘅屋 ? 定係起緊嘅屋呢 ?!
夜晚經過 夠哂恐怖 哈哈
就快天黑喇 所以要走了
日落 lu
行呀行 差唔多 5 點幾就走喇 大船排長龍呀 我估起碼 100 個人 咁我地當然坐大飛啦 我哋係 Last 兩個上呀 一上船即開 正呀 其實出去碼頭應該係 5 分鐘左右㗎咋 勁快 ~
行去坐大飛喇
無咁大浪 但歪埋一邊囉 但唔知係咪因為有浪呢 之後又無歪埋一邊 感恩 ~
里奧大人坐最前
安全到黃石碼頭
一落碼頭 Apps 話 2 分鐘之後開車 咁即跑啦 但其實唔係好遠 所以跑兩嘢都 OK 嘅 哈哈 ~
感恩去到就上車 所以好快出到西貢碼頭呢 ~
坐 94 號巴士去西貢市中心
呢兩張櫈好有鬼戲 Feel 哈哈
里奧大人諗住食菠蘿包 點知賣哂 估唔到佢話有啲失望 不過今次到我唔想食 好奇怪 哈哈 但點都會再去多次西貢陪里奧大人食菠蘿包呢 因為真係真係好少見佢會話失望囉 ~
都 6 點食喇 本身都有啲想食 Pizza 但如果食 Pizza 只係食一塊大嘅 再加個沙律 好似好悶咁 所以我話食泰菜呢 但食完就超級勁勁勁口喝 要飲 2 支細汽水呢 ~
泰式拚盤 ( Spring Roll / Fish Cake / Prawn Cake / Satay ) $158 - OK 呀
牛丸金邊粉 (冬蔭功湯底) ($45) - 加辣先好味道
食完就坐小巴番屋企 去完行山就多嘢洗 里奧大人負責洗行山鞋 我就洗護膝同背囊 ~
11 點幾瞓喇 次次里奧大人一話瞓覺 我就會第一時間飛去廁所 之後就入房 佢話我超衰格 因為咩都唔熄就瞓 咁今晚佢話瞓嘛 之後我見佢行入書房整嘢 咁我裝下佢啦 佢喺度陰陰咀笑 勁恐怖 我問佢笑乜 ?! 佢話我呀 如果佢入房瞓呢 我就會即飛入房 但見佢入書房整嘢 我就慢吞吞整下嘢先行入房 黐黐哋線咁話呀 哈哈 ~
