2016年4月30日星期六

雲桂坊風味米線棧 @ 佐敦 ( 30-APR-2016 )

台式幹拌麵 - 因為最低消費要每人 $30   所以求其叫碗麵食   但呢碗唔好食     


小鍋酸辣米線  


( 30-APR-2016  SAT )

今朝 7 點 50 分起身   咁喺屋企附近 KFC 食埋早餐先番菇場   好在無遲到 ~


菇場居然忙   不過不在狀態   但點都要做囉   其實咁都好   好過我亂諗嘢 ~

咁我第一時間都同西瓜講定話可能之後有嘢搞   可能要突然請假   之後佢話啲嘢係會程序搞架   逐樣逐樣咁   有程序架   果下我想話佢   係咪以為我又會詐詐弟弟請假呀 ?!   佢比我感覺好似驚死我請假咁   之後佢話佢媽之前都係佢搞嘅   唔識可以問佢   我一定唔會問佢   一陣同我 count 埋時間話幾多個鐘頭搞掂   唔駛請一日假都似   但其實講真   佢一句話 ok 明白咪得囉   點解講埋呢啲嘢   令人咁反感呢 ?!    

放工同里奧大人一齊去北角   約埋家姐 姐夫食嘢   姐夫鍾意飲茶   我地無咩所謂   咁里奧大人喺 group 話想食泰國嘢   但其實佢整鬼家姐   咁我同家姐又無胃口   所以一路行一路搵   點知一出商場就見到有間泰菜館   邪呀   哈哈 ~

我同家姐真係無胃口   但點都要搵地方坐家嘛   4 個人食 3 個 tea set 都每樣食剩一半   係好嘥   但真係食唔落 ~

泰式冬蔭功蝦湯金邊粉 


香葉肉碎飯加蛋


泰式濕炒海鮮河


食完即走   因為約咗大酒店經理 3 點傾嘢呢 ~

我其實好想基督教儀式   因為我想安安靜靜   但家姐好想道教   咁我都尊重家姐決定   佢好開心呀   仲好多謝我地接受佢要道教儀式   其實儀式唔重要   我最想佢個心舒服啲啫   但我就唔會參與儀式   咁其實家姐都明白架喇   因為我由信主開始   已經話唔會裝香比爸爸呢 ~

之後經理話無報夢係好喎   代表一路好走   咁家姐最安心   因為佢成日話媽咪無報夢比佢 ~

傾到差唔多 5 點    之後各自走喇   家姐佢地番屋企   我地就出旺角同晴晴拎 tee 再行去佐敦買洗頭水 ~

其實我唔餓   但我都要顧及里奧大人嘛   所以我話佢鍾意食就入去喇   唔駛理我 ~

食完就坐小巴番屋企   之後里奧大人拎埋張中銀信用卡就去衛訊買手機   買咗部 LG V10   原價 $4,100   咁計埋回贈同埋 cash coupon   減咗 $250   都好丫   因為多人   同埋差唔多 10 點   所以都唔過機資料住喇   聽日先搞 ~

咁頭先送咗張德福商場商店 $50 cash coupon   咁周圍睇下嘢   啱就用埋去啦   不過無嘢啱添 ~ 

沖埋涼就休息喇   之後里奧大人問我鍾唔鍾意部電話   我話你用家嘛   你鍾意就 ok 啦   留番部 G4 我用得架喇   佢話部電話係送比我架   唔怪得啦   成日問我鍾意咩色   又要我揀電話套   仲要係我鍾意嘅款式   又無啦啦 backup 我電話資料落電腦度   我都覺奇怪   你買電話啫   無啦啦又搞埋我部電話都有嘅   原來係送比我嘅 ~

其實我都無心機   唔想講嘢   知道自己全日係縐哂眉   真係笑都唔想笑   同埋好多人講嘢都唔太上心   總知叫我行就行   企就企   唔好要我諗   有啲嘢直頭好似斷咗片咁   諗番好耐先記得 ~

今晚 11 點幾都眼瞓喇   希望瞓得好啦   依家好怕合埋眼呢 ~   

2016年4月29日星期五

秋月居 @ 九龍灣 ( 29-APR-2016 )

帆立貝併三文魚鐵板飯 


蟹撐壽司 / 螺肉軍艦


超大菠蘿汁


( 29-APR-2016  FRI )

今朝 8 點 20 分起身   食埋早餐就去覆診 lu ~ 


好日唔搭地鐵   一搭又話有信號固障   好在 9 點 40 分到診所   我去到係排第 2   但其實我應該係第 1 個嘅   因為我 book 左 10 點   咁即係先到先等 ~

醫生 10 點半先番到黎   第 1 個女人唔知去咗邊   咁所以到我   即係我都係第 1 個   感恩 ~

醫生同我 say hello 之後就縐哂眉望住我   縐到我坐低為止   我話係咪面青青呀   佢話係呀   之後我喊住話媽咪啱啱走咗   佢都即拎紙巾比我   再問媽咪點解走   之後安慰我   話呢一刻最緊要有老公支持住妳呢 ~

覆診再做埋婦檢   差唔多 11 點就搞掂   其實今日晏畫係陪媽咪覆診架   依家唔駛   所以我唔想番屋企住囉 ~

里奧大人仍然開緊會   咁我 whatsapp 問家姐今日食咩   佢話本來同同事 farewell   不過無心情所以唔去   我話陪佢食好無   之後佢打黎喇   聽佢把聲都幾開心   所以我話我依家搭車黎   我呢個路盲算勁喇   坐 110 巴士   咁開個 apps 睇   都有印象佢巴士站嘅位置   北京道有站   咁我行啦   之後要過 subway   點知出錯出口   錯有錯着   都諗住搵唔到就搭地鐵   點知行前見到有個臨時巴士站   濛查查見到好似 110 定 410   再行前啲真係 110   咁啱有架巴士頂住   咁我就趕到車喇   記得媽咪叫我對家姐好啲   應該係媽咪教我行路定啦   想我陪家姐   唔係我邊會咁好彩   哈哈 ~

諗住去千兩   點知原來搬咗   我同家姐無胃口   所以我話去 food court 食嘢算喇 ~

越式小食拚盤 ($65) - 食剩一隻雞翼   其實真係咩都唔想食   但我想家姐食啲嘢   因為佢仲要番工呢 


家姐食食下又喊   我一定唔可以喊   佢話媽咪無報夢   嬲我地   我話唔報夢唔等如周圍去   我話主耶穌會帶住媽咪   放心啦 ~

佢話媽咪工人話我探媽咪果晚   媽咪起身問我喺邊   工人話我走咗   媽咪話走又唔同佢講拜拜   工人話因為妳瞓緊覺   之後媽咪工人話媽咪早兩日話遲兩日會死   家姐話工人做咩唔同佢講   工人話媽咪成日都講死   唉   我同家姐咪話邪囉   所以佢都話媽咪係點都會走   之後家姐又怨成日自己開 OT 無探媽咪   我話唔好諗咁多   最緊要媽咪走得舒服   我地唔捨得就一定   我地將來都會見嘛   佢依家同爸爸朱朱好開心咁生活呢 ~

家姐話姐夫同佢講   以後得番兩姐妹   要好好地喇   家姐話點解姐夫無話仲有佢   哈哈 ~

本來去太古城坐 606   但見係去小西灣   所以家姐話下一班先係過海   咁我話唔等啦   陪佢番公司附近   果度都有個站   之後家姐突然話好在頭先無上車   原來果個站真係去小西灣   如果我上咗就爆笑喇 ~

我今次唔喺牛頭角落車   試下喺九龍灣工業區落車   因為以前番工都會坐 606 過海   記得行去淘大都唔遠   但個 building 變咗個地盤   所以兜大圈   咁樣行番屋企都幾遠   可能個人好攰啦 ~

番到屋企都 3 點幾   勁攰呀   不過又瞓唔着   咁就熨 2 機衫啦   唔係里奧大人又會熨   佢呢個星期成日見客   頻頻樸樸好辛苦   我唔想佢咁辛苦呢 ~

佢去完太子再去葵興見客   番到黎九龍灣都 6 點   咁去秋月居食嘢 lu ~

食完就番屋企   之後沖涼休息 ~

唔知講開咩   我同里奧大人話我想死   死咗就算   之後佢好話: 咁佢呢 ?!   唔駛理佢架 ?!   oh   咁又係   估唔到佢反應咁大 ~

10 點幾都好眼瞓   所以都入房瞓喇   聽日要番工 ~

2016年4月27日星期三

栢檔極品海南雞飯 @ 九龍灣 ( 27-APR-2016 ) + ( 28-ARP-2016 )

二人套餐 ($155)
極品海南雞 (半隻)


香煎手剁魚香肉餅


翠綠時菜


雞油香飯 x 2 


( 27-APR-2016  WED )

里奧大人問我瞓得好唔好   我話麻麻地   因為好似成身慶合合咁 ~

無咩胃口   早餐食奶醬多算喇 ~


菇場唔太忙   咁寫寫下 blog   老闆突然笑笑口指住我枱面講嘢   大佬   勁驚呀   之後原來佢話幫我放咗枱面杯 yogurt 入雪柜   好奇怪喎   放喺枱度都望到嘅   哈哈 ~

無啦啦好餓   所以 lunch time 一到就即去買酸辣米線番菇場食喇 ~


里奧大人喺上環見完客都 5 點幾   居然去食下午茶米線餐   我話食小小嘢咪得囉   唔係一陣陪唔到我食飯嘛 ~

放工去探媽咪   咁無啦啦轉咗樓層   以為咩事   姑娘話因為情況穩定   所以轉房呢 ~

去到見到負責姑娘   話媽咪都係啲水排唔到   所以心口唔舒服   又係叫佢食清淡啲   唉   個個都咁講   但媽咪唔聽   激死我 ~

我尋晚同媽咪講話唔探佢   佢話乜我唔係唔黎咩 ?!   我話黎睇下妳   幾日之後先再黎 ~

之後佢又係好好瞓啦   咁 7 點我都走喇   無同佢講拜拜添呀   其一嬲嬲地   其二係佢瞓得好林   所以我唔叫佢啦   訓訓下比人叫醒都驚家嘛   因為我都係咁 ~

唔知食咩好   所以試下柏檔喇 ~

食完就番屋企沖涼休息   好攰呀   所以 11 點都瞓喇 ~

( 28-ARP-2016  THU )

零晨 1 點幾電話響   點知係玩電話   頂佢 ~

之後 3 點幾電話又響   原來係媽咪工人   佢話醫院打黎話媽咪情況唔好   叫我地即刻趕去醫院    我同里奧大人即起身刷牙   打比家姐又唔通   好在媽咪工人打比家姐工人   所以大家都即趕去醫院   之後我兜埋媽咪工人一齊去醫院 ~

去到醫院   媽咪搶救緊   我不斷祈禱   好驚   因為太突然   我聽到醫生話打咗強心針   我已經心知不妙   之後家姐黎咗   到 3 點 48 分左右    醫生出黎話媽咪走咗 ~

我心裡好難過   家姐喺咁喊   我唔可以喊   我要安慰家姐 ~   

咁 call 咗舅父呀姨同 fat fat   大舅父母先到   之後呀姨姨丈同表弟   大食媽咪喺大陸黎唔到   細舅父要開工又黎唔到   之後 fat fat 都黎埋 ~

之後姑娘同我地講   3 點幫媽咪轉身   發覺媽咪心跳好微弱   所以即 call 醫生搶救   話媽咪走得好舒服   係好似瞓覺咁   而我地個個望到媽咪個樣   都走得好舒服   呢方面係我唯一嘅安慰 ~

醫生話幫媽咪打咗 12 支強心針   再搶救 40 分鐘   平時只會搶救 30 分鐘   但最終都唔得 ~   

真係見唔到媽咪喇   我成個人都崩潰爆喊   我同佢地講   我覺得自己好賤   成日鬧媽咪   媽咪一定唔想見到我   但我同媽咪講話叫佢搵定個好地方等我   叫佢同爸爸朱朱好好地生活   唔再有病痛   開開心心呢   我地一齊陪到媽咪 6 點幾   送到媽咪去安靜室就走喇 ~

我地打的   兜埋工人   咁舅父舅母就落淘大坐巴士番屋企 ~

里奧大人今日要見假   所以一定要番工   7 點半佢都出門口   其實佢好想陪我   但我話我 ok   唔好影響工作 ~

我根本瞓唔到   開住電視   希望睇睇下瞓着   不過都唔知有無瞓着    哈哈 ~

加拿大嬸差唔多 12 點打黎問候我地   之後佢話佢呢排都成日打乞痴   佢話上星期表妹嘅媽咪走咗   今日又走到媽咪走咗消息   不過佢都安慰我   話媽咪走得舒服係一種福氣   咁事實係   雖然好突然   但媽咪身體咁差   我都好驚佢要洗腎   依家舒舒服服咁走   我係唔捨得   但我都相信神嘅安排呢 ~

之後我又睇電視   其實我只係想有聲   里奧大人見完客就即趕番屋企   原來都 5 點幾 lu ~

7 點幾都未餓   里奧大人自己煮丁丁   我就食半條粟米就夠喇   真係無胃口 ~

沖埋涼又睇電視   到 10 點終於好攰   入房瞓喇 ~

2016年4月26日星期二

杯麵 ( 26-APR-2016 )



( 26-APR-2016  TUE )

今朝里奧大人上大陸   6 點 15 分就要起身   咁鬧鐘響我都會醒一醒   叫佢帶埋麥茶就瞓番   之後佢個鬧鐘 7 點 20 分又響   尋晚已經叫佢熄咗本身嘅鬧鐘家嘛   佢又話熄咗   但依家又響   真係有 d 掹囉   好攰丫嘛   同埋我鬧鐘 7 點半就響   大佬   個幾鐘頭響 3 次鬧鐘   趕去搭飛機咩 ?!   真係人都顛   所以我再教到 7 點 40 分先起身呀   但咁搞法   根本瞓得唔好 ~

呢啲天氣   個人有啲濕重嘅感覺   同埋覺得牙肉有啲腫   所以今朝食蛋牛治   唔想食多士   驚好熱氣 ~


番到菇場即焗杯牛蒡茶   希望飲咗好啲啦 ~

今日有 lunch box   食完都唔落街行喇   好攰 ~

里奧大人上親大陸都差唔多 8 點先番到屋企   咁我都探媽咪啦   又見無落雨   如果落雨就唔探架喇 ~

買埋袪濕料就去媽咪屋企   之後工人話佢想嘔   佢話打咗比姑娘   姑娘叫佢坐直    因為佢食完飯就即瞓喎   所以坐直好啲 ~

咁我見佢手腳係腫嘅   摸落去係硬嘅   之後 send 相比里奧大人同家姐睇   佢地都話腫   要入院   但我問媽咪佢又話唔氣速   心口又唔痛   但唔理喇   我依家好聽家姐話家嘛   但我同媽咪講話家姐叫佢入院   佢唔想架   我叫佢打比家姐   佢打比家姐話: 呀妹痴線架   叫佢入院   之後家姐話對腳好腫要入院   乖啦   唔駛驚   我就唔會氹佢架喇   叫妳入院為妳好咋 ~

我星期五都話腳腫架啦   又話唔係   問咗工人星期日飲茶食咗咩   食鴨飯   不過係 4 個人 share 食   我心諗   食小小當無問題   但問題係妳比啲咩人食嘛   痴痴地   之後我問多兩問   條友黑面   我都費事問   反正我都知係因為食嘢而水腫 ~

之後媽咪又話死就死啦   最緊要死得舒服   不過我當聽唔到   我只係覺得佢她煩   呢一刻佢個樣點辛苦   我唔覺得佢好可憐   我只係覺得佢好討厭   入院自己攞黎   仲要煩到人 ~

救護員一黎到都話媽咪腳腫啦   腫到上膝頭哥喇   話再唔入   今晚就會好辛苦 ~

之後救護員問媽咪有無氣速   佢又話有小小   頭先我問又話無   真係發神經 ~

今日天氣都焗熱   救護員見媽咪着住件褸   問媽咪係咪好動   工人話佢諗媽咪會凍   所以比佢着住   救護員同工人講話妳唔好用妳自己諗就當係   但其實媽咪懶到死   比咩佢又唔知   人叫佢着就着架   救護員再教工人   媽咪腳腫應該點同佢按摩   但治標唔治本   我直接同救護員講媽咪懶到死   係郁都唔係下下靠工人   係靠自己囉 ~

其實依家聞氣真係唔好   因為以前媽咪一氣速   會聽到佢 hehe 蝦蝦聲   但依家咁聞氣   如果氣速都聽唔到 hehe 聲   因為妳一定係夠氧氣   但救護員話我 concept 啱一半   佢講咗好多學術性名詞   話肺點抖氣   之後佢話有啲人個肺有事   個動作係企喺度烏低個頭大力抖氣   咩地心吸力等到呼吸好啲   果下我勁驚   我行山嘅時候就係咁呀   但唔知係咪我以前衹過肺結核   所以肺唔係咁好呢 ~

好感恩今次我可以跟埋車   一上車就 check 血液含氧量   得 60 咋   所以我不斷急切祈禱   求神加力比媽咪   最終指數好快去到 8x   感恩感恩   可以開車入院喇 ~

入到急症室無耐就種豆同打去水針   種得豆就即係要入院啦   之後聽到媽咪要照 xray   呀姐話唔駛換衫 ?!   姑娘話 urgent xray 呀   果下聽完有啲驚   定係不嬲入院都係咁呢 ?!   因為我好小陪佢喺急症室入面架 ~

咁我問工人究竟佢食過啲咩   佢話早餐去大家樂食炒麵同粥   有時下午茶仲想食燒鴨瀨   咁佢打比家姐   家姐唔比   佢話同工人講話想死   但工人都唔會買   佢就打比 fat fat 話想食燒鴨   fat fat 居然買半隻比媽咪   之後工人話媽咪食完幾嚿就好開心   但頭先一入院就話好驚死   我真係覺得好很煩   我同工人講   食咗唔應該食嘅下場就係入醫院   自己辛苦之餘仲要係煩到人囉 ~          
媽咪照完出黎又入番房   之後話等上房   原來都 8 點 45 分   我驚里奧大人餓呀   所以我同媽咪祈禱完就走喇 ~

一上的士就打比里奧大人   問佢想食咩   佢話咩呀 ?!   我食咗喇喎   我嬲嬲地話又話等埋我食   佢話我喺 line 入面叫佢自己食嘢先   佢話 ok   我都話 ok 架喎   我都有印象講過   但當時喺急症室入面要睇實醫生有無黎   同埋唔方便拎電話出黎   所以打幾隻字就算   都唔記得自己打過 d 咩添   之後我話蝕咗啦   之後唔搭的士趕番黎啦   嗚嗚 ~

我話食杯麵得喇   佢覺得我好慘   之後佢話煮五香肉丁麵我食   我話唔駛   我唔係你咁鍾意食丁丁囉   同埋又要我洗   我好攰呀   唔想做嘢   所以食杯麵算喇 ~

番到屋企即沖涼   沖完涼食嘢就最舒服   咁佢又買咗麥當勞餐   食剩包薯條   咁我又食埋去啦   雖然呢餐又杯麵又薯條   勁唔健康同超級 heavy   但又好鬼正喎   最正係食完唔駛洗嘢   呵呵 ~ 

之後我同里奧大人講   話有樣好緊嘅嘢同佢講   佢個樣好驚咁   哈哈   我話今朝佢個鬧鐘又響呀   搞到我無覺好瞓   佢話佢搞錯咗   原來無熄到   唔好意思   之後我話下次上大陸   你將本身嘅鬧鐘擺喺梳化墊底下   唔好嘈到我呀 ~

今日雖然擔心又勞氣   但我都會選擇唔出聲   講多無謂   同埋喺醫院都安全   但我就唔會晚晚探媽咪   我講過話亂食嘢而入院   我唔會理佢   一星期探兩次已經好足夠   反正人地關心妳妳覺得人煩 ~

我同里奧大人 冰姑同呀 mi 話媽咪入院   佢地問完媽咪咩事之後   就會叫我唔好咁勞氣   不過頭先比佢激一激   我發覺自己由喉嚨到個肚都脹住哂咁呀   勁唔舒服 ~

勁攰呀   11 點都即瞓喇   但唔知係咪本身熱氣   再加埋食辣杯麵同薯條   個身好似慶合合咁   唉   希望今晚瞓得好啦   哈哈 ~

2016年4月25日星期一

豚肉炒銀針粉 + 蒜蓉菜心 ( 25-APR-2016 )




( 25-APR-2016  MON )

尋晚 10 點半瞓   瞓咗 9 個鐘都係攰攰地   唔通熱氣 ?!

里奧大人話背脊痛   所以請病假   嘩   我都想唔番   不過唔想詐病   呢啲好邪架 ~

食埋早餐   飲埋咖啡都小小攰   不過我都鍾意番工嘅   只係成日諗住可以瞓晏啲就好啲咁啫   哈哈 ~


菇場忙忙地   但 10 點幾就有 free time 喇   所有大粒唔喺度   勁爽 ~

Lunch time 出去食粥   之後行陣就番菇場喇   條街好焗熱呀 ~


行行下我打比里奧大人   我叫佢即刻落黎金姆指   佢好緊張問係咪我已經喺度   我話係呀   之後佢勁大聲勁心急語氣話: 妳又唔早啲講   我依家即刻落黎   我話依家幾點呀大佬   1 點幾喇   仲坐喺度默默等妳咩   笑鬼死我 ~ 

3 點幾終於落咗場大雨   希望無咁焗熱啦 ~

放工即走   里奧大人 5 點 15 分先有得睇   我話佢起碼 6 點先搞掂   所以我番到屋企   佢都未番黎呢 ~

咁我即刻滾番熱啲湯   咁佢上黎即刻有得飲   之後佢都留黎   叫佢坐多陣就飲湯   早啲飲好   最怕夜晚又要係咁去廁所 ~

里奧大人次次飲完湯都食唔落飯   所以陪佢落去萬寧買奶粉啦   番到屋企就預備煮嘢 lu   咁 7 點半就可以食喇 ~  

是日懶餐 - 豚肉炒銀針粉 + 蒜蓉菜心 

豚肉炒銀針粉 - 之前買咗 1 磅豚肉   原來都好鬼多   所以分開兩次食就最好   今晚我飲完碗湯都食唔落嘢   因為食埋啲湯渣真係好鬼飽   但無理由嘥家嘛 ~ 

蒜蓉菜心 - 頭先我將豉油老抽倒落隻碗度   之後再淋落銀針粉度炒啦   咁有剩豉油   第一個想法就係倒咗去   但又好嘥咁   所以停一停再諗   就比我諗到煮滾啲豉油淋喺菜度   又好味又唔嘥嘢   所以我好羨慕啲人可以見乜煮乜   又將剩咗嘅嘢用黎煮其他嘢    如果我咁勁就好 lu ~

洗埋碗就沖涼   再做埋 mask 就抖喇   好鬼攰   我覺得對眼皮係 dup 緊落黎   但唔想 9 點瞓   哈哈 ~

咁睇多陣電視   真係頂唔順喇   10 點半即入房瞓呢 ~

2016年4月24日星期日

Saizeriya @ 九龍灣 ( 24-APR-2016 )

水牛芝士比薩


肉醬焗意式雞肉雲吞


焗白汁雞肉菠菜


吞拿魚配蕃茄辣汁意大利粉


中華海草


( 24-APR-2016  SUN )

今朝瞓到 12 點先起身   爽   但個 body 仍然係攰   哈哈 ~

但里奧大人話瞓得麻麻地喎   好熱咁   不過唔知做咩   尋晚真係兩個都成身慶合合咁   可能沖完熱水涼即瞓   佢話兩個加埋有成 70 度添呀   所以張被好鬼熱   痴線   零舍誇張   哈哈 ~

梳洗之後就去食早餐   其實都係午餐 lu   所以食飽啲   一陣唔駛下午茶   慳番啲呢 ~

里奧大人話我唔食麵   驚我唔夠飽   我話菠蘿油好滯架 




里奧大人要做公司嘢   我叫佢番屋企先   唔駛陪我去買餸 ~

遲起身啲時間真係超級勁唔見駛   所以咩都加快速度   今日一定要開機洗幾件冬天褸   一機洗 4 件衫已經爆哂   又難乾   不過我點都要洗   擺咗好耐   即係我心掛掛好耐   今日洗完就了咗心事架喇 ~

咁尋晚煲咗 d 牛蒡茶   煲翻熱再飲   唔係又唔記得架喇   我同里奧大人話 3 點前要飲哂   驚太晏飲茶   夜晚瞓唔着呀 ~   

之後煲埋湯就熨衫   搞掂哂又 3 點   咁抹埋廁所就抖喇   條腰好痛呀   本來想煮   但知狀態唔好   一定煮得唔好食 (平時已經唔係好   其實可以用差黎形容添呀)   所以我話出去食 lu ~ 

湯又煲好   同里奧大人話 4 點前好飲哂碗湯   唔係驚半夜成日去廁所   衰過唔瞓呢 ~

靈芝養肝湯 (雞骨草 / 蜜棗 / 雲苓 / 靈芝片)


好喇   到我抖喇   因為驚多人   所以 5 點 40 分出發去 Saizeriya   去到 5 點 50 分都要等位   好在等咗 25 分鐘左右就有位   其實本來想唔等   想去食韓國嘢   但一走又叫 number   唔係咁邪呀嘛   所以等埋囉 ~

食食下嘢   里奧大人話尋日 4 點幾諗起家姐咁話我   佢都嬲醒咗   所以我話我次次同佢地食完飯   夜晚瞓得唔好就係咁   我講出黎嘅時候   佢會叫我唔好諗啦   我話係好自然會諗架   依家佢終於明白點感受啦   哈哈 ~

佢又再講   記得唔好同家姐嘈   我話唔會啦   佢地想點就點   唔關我事   唔好問我想點就得喇 ~

餐廳好鬼焗   所以食完都即走   順便去價真棧買杞子   $35/300g 抵   不過好細粒   但我都想試下   最多落多幾粒囉   哈哈 ~


咁行行下經過藥房   里奧大人同我講話好在我行前佢幾步   唔係我實嚇死都似   我話巨強呀 ?!   佢話係會飛果啲添呀   佢講完之後   我即刻好自己咁大力 fing 下頭髮   再 fing 下條裙呀   勁驚 ~

好飽呀   喺商場行個圈就番屋企喇   番到去已經 7 點半   即切西瓜比里奧大人食   我叫佢 8 點前好食哂呀   唔係夜晚係咁去廁所   之後我喺度笑    今日講咗幾次幾點前幾點前要飲哂啲咩食哂啲咩   人都顛   哈哈 ~

開埋機洗衫就沖涼喇   里奧大人又做哂公司嘢   所以一齊睇戲呢 ~

仍然好攰   所以同里奧大人 10 點 40 分即瞓   大佬   唔夠瞓加上聽日星期一   好難頂架   哈哈 ~

2016年4月23日星期六

叙苑粉麵茶餐廳 + 滿記甜品 @ 九龍灣 ( 23-APR-2016 )






( 23-APR-2016  SAT )

今朝差唔多 8 點起身   要快手快腳搞掂出門口   感恩去小巴站即有車呢 ~

早餐食豬扒包   今次好大塊豬扒   所以好飽 ~


菇場唔忙啦   忙都唔願做呀  哈哈 ~

放工就約埋里奧大人去德福買湯包   之後行到 2 點幾就食嘢 lu ~

已經叫小飯   但都一樣好多飯囉   咁我食咗幾啖飯先嘛   之後里奧大人就將啲飯分開一半   我話我已經食咗幾啖喎   要佢食番多啲   之後佢喺度奸笑   真係當我傻呀   哈哈



食到超級超級勁飽   之後去 MP 睇生果   估唔到 1/4 個馬來西亞西瓜特價   只係 $14.9   即買啦   之前 1/4 都要成 $30 架   但確實又真係清甜又多汁嘅   不過我唔食得囉   太涼好易頭暈 ~

師傅 3 點打話半個鐘頭後到   好在買哂嘢啫   尋晚明明話今晚 5-7   之後就話 4-6   真係好在預咗今日係裝冷氣   唔會行得遠   唔係就趕頭趕命咁囉 @@

執好哂啲嘢   師傅就到喇   整咗大半個鐘就搞掂   之後到我清理現場   咁順便又抹下柜   執下嘢咁啦 ~

之後家姐打黎話頭先有個 whatsapp 話 "明天會和婆婆一齊探媽咪"   佢以為係我   奇怪點解會咁講   話其實原來係阿姨黎嘅   佢再講唔知咩   但佢係串緊我   之後佢又話尋晚約咗朋友比嘢佢   佢差啲唔記得   我話落 reminder 囉   佢話落咗都唔記得   我話咁妳自己落完 reminder 都要自己記住   唔可以依賴電話家嘛   之後佢話慣咗 reminder 就唔會自己記住   我話我唔會咁囉   之後佢問我聽日係咪探唔探媽咪   我話唔探喇   佢細細好串嘅語氣話: 都估到妳唔會咁好架喇   我聽完之後話好啦   拜拜 ~

我慶到即 whatsapp 比冰姑   因為我知我就黎爆燈   之後我喊呀   同里奧大人講話家姐咁講我呀   佢聽到都覺好"銀"耳   而我都覺得佢唔開心   因為佢知我好緊張媽咪嘛 ~   

我話佢地個個都當我衰人   因為咩都唔比媽咪食   係咪痴架真係   亂比佢食嘢叫對佢好   所以我同里奧大人講話今次絕對對佢地死心喇   佢地之後再食咩   我唔會再理   問我想食咩嘅話   我會話媽咪想食咩就叫咩   我唔會理   入醫院就入醫院啦   唔關我事 ~

次次我叫媽咪郁多啲   就話媽咪腎唔好   呀姨話腎唔好都攰   我話呀姨係咪醫生呀 ?!   醫生都話媽咪懶呀   要郁多啲   基本上醫生話得妳懶   妳都好勁   醫生通常用詞係好正面家嘛   就係睇妳啲進度記錄   無理由會無進展   叫佢行慘過攞佢條命咁   人地先咁講咋 ~   

里奧大人知我成日為媽咪擔心又勞氣   佢同我講話   妳地嘅方向唔一致   一定係鬧交收場   佢話唔好為媽咪而傷感情   我話佢同 mi 講嘢係一樣   所以我都知點做   我話其實最麻煩係媽咪   好在依家佢只問家姐食唔食得   家姐話唔食得   佢都照買   家姐就激氣   咁都好  唔好煩我 ~

之後我話我對媽咪唔好嘅話   我唔陪佢覆診啦   唔上網搵資料食咩對腎唔好啦   媽咪一話想食啲咩   我同里奧大人即上網睇下好唔好   好似花生合桃咁   上網睇資料仲要睇埋包裝有無 sodium 成份架   唔係一話食就買囉   而佢自己從來無陪媽咪覆診啦   但就會陪姐夫覆診   車出車入   又唔見妳咁陪媽咪 ?!   我都唔話佢啦   媽咪入咗 2 個幾月醫院   我印象當中姐夫只係探過媽咪 1 次   因為佢地約咗朋友食飯   比我感覺係順便探埋媽咪   住咁近都唔探媽咪   有無話佢唔好呀 ?!   好多嘢我唔講出黎咋 ~

一路抹嘢一路喊   但咁都好   今次終於心淡   我同里奧大人講   個伴原來真係咁重要   陪我走每一段路   真係要有佢扶持   唔係我真係唔掂呀   嗚嗚 ~

今晚要去舖頭幫手   所以里奧大人 6 點就瞓一陣   唔知係咪喊完黎   我差唔多 7 點都好眼瞓   所以喺廳度瞓咗半個鐘呀   瞓完就好精神喇   哈哈 ~

出去食嘢   我話想食炸魚皮   咁去叙苑喇 ~

里奧大人話喉嚨有啲唔舒服   所以食完就去食芒黑白   佢幾次食完都話喉嚨舒服咗啲   唔知係咪椰汁清熱關係呢 ?!

番到屋企拎埋啲嘢   再去買芒黑白比姑奶就打的去舖頭喇 ~

9 點到   姑奶 11 點半走   佢走咗之後   反而做得更快   因為佢係咁叫里奧大人依樣點果樣點   叫到我到煩埋   哈哈 ~

搞掂哂都 2 點半喇   即打的番屋企喇   沖埋涼抖陣   差唔多 3 點先瞓呀  ~

2016年4月22日星期五

韓式辣醬炒豚肉 + 菜心 ( 22-APR-2016 )




( 22-APR-2016 FRI )

呵呵呵呵   又 happy friday 喇   我要開開心心   哈哈 ~

早餐食奄列餐   之後 8 卦又黎埋   今朝天氣好差咁呀   明明個天都光光地嘅   點知轉個頭望出去   個天已經黑哂   8 卦話早啲番菇場   話驚落雨   但我就未走住囉   其實佢走咗仲好   我可以睇報紙   依家就算一齊食早餐   我都唔係咁想講嘢   因為佢做咗一件令我好反感嘅嘢  所以佢唔黎   我仲開心   不過我地來來去去都係食果幾間   實會撞到囉 ~ 


菇場忙下停下   清哂自己啲嘢就最安樂   呵呵 ~

今日有 lunch box   我都鍾意食芋絲架   但里奧大人話"銀"胃喎   我話咬爛啲咪得囉 ~

個天時光又時黑   所以都係唔出街行喇 ~

放工即走   里奧大人今日 1 點去深圳見客   估唔到同佢差唔多時間番到屋企附近   我話一齊上樓啦   好難得咁啱嘛   咁佢一路行   我一路笑一路啤住佢   啲人
望住我呀   可能以為我痴線呀   哈哈 ~

浸埋菜就開機洗衫   6 點半開始煮嘢喇   7 點有得食   算係快   因為煮簡單嘢 ~ 

是日懶餐 - 韓式辣醬炒豚肉 + 菜心

韓式辣醬炒豚肉 - 下次都買豚肉 lu   薄薄地最正   因為快熟   哈哈   呢個餸好味呀   辣辣地   送飯一流   所以今晚要食飯   哈哈 ~

菜心 - 有幾條苦嘅   好恐怖   下次真係去番買開果幾檔算喇   諗住貴啲好啲   點知仲衰   嗚嗚 ~

搞掂哂就去超市買嘢   好在里奧大人無陪我   因為我一出門口   就話送抽濕機黎   但好奇怪囉   明明話打比我家嘛   估唔到打比里奧大人   可能我頭先啱啱入 lift 呢 ~

行到差唔多 9 點就番屋企喇   沖埋涼就熨衫   10 點半就搞掂   終於可以抖下 ~

今晚都幾攰   11 點 15 分就瞓   如果。。聽日唔駛番工就好 lu ~   

2016年4月21日星期四

豉汁排骨蒸芋絲 ( 21-APR-2016 )




( 21-APR-2016  THU )

呵   好在對眼唔腫架   不過里奧大人話腫喎   但我真係唔覺喎 ~

早餐食芝腿治   今次啲芝士溶溶地就好味好多呢 ~


菇場又係忙下停下   一望個鐘已經 12 點 10 分   時間過得勁快 ~

Lunch time 去一田買湯包   之後去買車仔麵番菇場食   好耐無食喇   但又唔覺得話好好味咁   哈哈 ~


仍然忙下停下   無啦啦又暈暈地  唔知係咪頭先食咗白蘿蔔呢 ?!

暈下又忙下   又好快放工 lu   呵呵 ~

今晚去街市買餸   買完番到屋企都 6 點 15 分喇   浸完菜就醃排骨   之後煲八珍湯   煲好都 7 點 15 分   唔餓就去徑步啦   不過徑咗 1 個圈之後   驚自己無熄火   所以即番屋企喇 ~

原來有熄火   不過我唔再落去徑步啦   咁飲埋碗八珍湯就預備晚餐 ~ 

搞掂哂就沖涼啦   越沖越熱   心諗唔係唔舒服呀嘛   之後醒起頭先飲碗八珍湯   有當歸嘛   可能有啲影響   咁尋晚又係越沖越熱   原來自己教咗 40 度熱水   之後教番 37 度就舒服喇   哈哈 ~ 

沖完涼就食嘢喇   里奧大人話今晚 8 點 15 分先放工   好在佢依家知道夜放工就會打比我   叫我自己食先   咁我唔駛等佢咁耐呢 ~      

是日懶餐 - 豉汁排骨蒸芋絲  

豉汁排骨蒸芋絲 - 簡單方便   又可以帶埋 lunch box 先正嘛 ~ 

洗埋碗就休息喇   今晚都幾攰   所以 11 點都瞓 lu ~
 

2016年4月20日星期三

翠河餐廳 @ 官塘 ( 20-APR-2016 )

西檸軟雞 


生炒排骨


( 20-APR-2016  WED )

今朝里奧大人要去機場見客   所以又陪我食早餐   好開心呢 ~



菇場居然忙   咁都好   眨下眼又 lunch time ~

家姐話呀姨婆婆會星期日探媽咪   我話未必得閒   之後唔知講開咩   話婆婆想我地每晚探媽咪   我話都痴痴地   唔駛做呀 ?!   叫佢自己晚晚探囉   講就天下無敵   之後家姐話其實我地探得唔多   咁其實我都承認   探佢佢又瞓   同埋佢又唔珍惜   而得妳快啲走   咁點會有人想探妳呢 ?!   妳咁錫媽咪   叫妳探妳又話晚晚放 8 點   咁其實如果妳真係要探   妳望一眼都可以   妳覺得自己有虧欠嘛   所以唔好同我講話無時間呀   邊個住得近呢啲無謂嘢 ~

成日覺得同媽咪一齊住   佢就會好番咁   因為有人 mon 住佢食嘢同埋知佢做運動   我話佢忽上腦定啦   我 9 個鐘頭唔喺屋企   點 mon 佢呀   核心問題唔係在於我呀   真係頂佢唔順   完全唔用個腦諗嘢 ~

今日有 lunch box   飽鬼到呢   仲食唔哂啲扁意粉添呀   但真係唔可以夾硬食   因為已經飽到上喉嚨頂呢   唉   之後同自己講   短期內唔再食咖哩   嗚嗚 ~


仍然忙下停下   好快又放工 lu ~

今晚同媽咪 家姐食飯   我一去到媽咪屋企   佢當然係瞓啦   咁是但佢啦   之後我見到包魷魚絲   上次就見到包花生   唔應該食嘅都有齊   咁工人叫佢坐啦   我望到佢額頭好似黑黑地咁   我話妳真係要郁下啦   成日又亂食哂   排唔到毒好煩架   郁多啲唔駛揹機   可以去遠啲食嘢   咁仲好啦 ~

咁家姐 whatsapp 我   話想同媽咪食乳豬   咁我話是但啦   有事佢負責就得架喇 ~   

之後同佢傾下計咁啦   隔咗陣   佢無啦啦又話會死   又叫我對家姐好啲   我話妳放心   我對家姐好好嘅   之後佢又講聽日可能會死   我都唔理佢   咁驚死又亂食嘢 ?!   驚死就郁多啲啦   唔係就咁坐喺度嗌死死死   應該梗加積極面對人生啦 ~

家姐好激氣話無乳豬呀   我心諗都痴痴地   乳豬幾咁鹹呀 ~

去到餐廳   媽咪又話死   可能聽日會死   我無出聲架   因為我唔覺得佢慘   只係覺得好煩   家姐話喎   醫生話妳無嘢   只係話妳懶   要郁多啲   我細細聲再同佢講   仲要唔好亂食嘢   之後媽咪話醫生話佢生 cancer   我話點解咁講   佢話醫生同佢抽血咁講   之後我話妳咁勁嘅   出動到醫生同妳抽血 ?!   我話醫生係唔會同人抽血架   家姐再問點解咁講   佢話佢覺得   我真係好想話佢都忽忽地   咁Q驚死就咪亂食嘢啦 ~

之後佢同家姐講   話我頭先話佢會死喎   呢下我火黎   我話妳咪亂講   我無講妳死   工人都話無啦   之後我黑面   我唔食嘢   同埋我真係好飽   咁家姐仲話叫我唔好咁   我叫佢唔好再講   因為我已經好想喊   同埋我喉嚨已經谷到好難吞口水 ~

咁家姐問媽咪仲想食咩   佢話想食咖哩牛腩同豉汁炒蜆   家姐真係睇下餐牌有無   真係忽上腦 ~

媽咪應該知我好嬲   話我唔食嘢佢會好激氣   我想話慳啲啦   我全程都無望佢   不過家姐又食唔哂   我先夾硬食   每樣餸剩 1/3 呀   無理由嘥嘛 ~

咁佢話隻狗依家每星期做一次針灸   每次五百蚊   我話一早就唔應該養狗啦   為咗間屋有生氣有聲就養   人地養狗係成日陪佢落街   唔係有病就帶佢睇醫生   比錢醫佢就好   之後佢話咁點解我要供樓   我都費事理佢   九唔Q搭八   養狗養到佢咁   其實個個都話啲狗最可憐囉   好在唔係得我話   唔係跟得佢地多   真係以為得自己樣樣都係錯   佢地做嘅嘢就最有智慧呢 ~

之後同佢講話媽咪今日都食咗雪糕新地   家姐好錯然   問我點解會知   我話我掉垃圾   見到垃圾桶有 2 個雪糕杯   即係媽咪同工人每人一杯啦   家姐話媽咪尋日打比佢   問佢可唔可以食雪糕   家姐話唔好   之後媽咪喊   我即刻話痴痴地   所以我話其實佢問完妳都會買   打比妳真係好多餘   我仲話佢可能諗住呃埋妳話無食添   但人在做天在看   我好日唔會掉垃圾家嘛   點知一掉就見到雪糕杯   等如佢上次買蛋散咁   無諗過我會探佢   又比我見到   所以其實我都同家姐講   根本佢點都會買   是鬼但佢啦   唔好煩到我就得架喇 ~    

同佢行埋萬寧就番媽咪屋企   媽咪第一句問我有無食哂嘢   我知佢知我嬲   咁我都好平淡語氣答佢話食哂   但就無望佢嘅   我覺得我唔走人已經好好 ~

我覺得媽咪隻腳係腫   但家姐話唔係喎   唔係硬嘅腫   叫媽咪郁多啲就得   我話佢郁先得架   不過妳話唔腫就唔腫啦   妳咁有經驗 ~    

之後同家姐傾計   傾到 9 點走喇   其實家姐只係唔鍾意我唔比媽咪食嘢   覺得我好衰咁   但其實佢只會累死媽咪   不過頭先單嘢之後   我決定唔再話唔比乜唔比物   反正我話唔比   佢地會照買照食   由他吧   總知我對手無染到鮮血就可以了   妳地鍾意點就點啦   唔好煩我   而我都唔再講咩   唔好問我意見  唔好叫我上網查依樣果樣   家姐叫工人同媽咪覆診嘅時候   錄低醫生講咩   我心諗都忽上腦   醫生叫媽咪唔好出街食   妳咪一樣同媽咪出街食   咁聽醫生講咩   對妳有乜很用呀 ?!?!?!   佢唔知我會陪媽咪覆診   不過我當日問完醫生嘢   我都會誇大醫生所講嘅嘢比佢知   睇下佢係咪仍然亂比嘢食比媽咪食   之後會問番佢   妳叫我聽醫生講咩   但妳又唔係聽醫生講   咁聽黎做咩 ?!   睇佢點答   呵呵 ~

里奧大人今晚 6 點唔夠番到屋企   一番到去佢都做緊公司嘢   咁我都沖涼先喇   情緒低落   要沖熱水涼冷靜一下 ~

我問里奧大人   如果有一日我比媽咪 家姐激到暈咗入醫院   你會點做   佢話都唔需要問佢地 d 咩   因為佢都知媽咪 家姐都係唔用腦嘅人   但就一定比臉色佢地睇   因為激到我入院   哈哈   佢好小答我假設性問題架   所以佢知道有大單嘢發生   哈哈 ~ 

我忍唔住大喊   話頭先激到我就黎死呀   我話我樣樣咁上心   但到頭來得到 d 乜    個個當我衰人   之後佢用手幫我抹眼淚鼻涕呀 (如果我睇戲咁喊   佢就拎紙巾比我   今次居然用佢自己隻手抹   佢好小見我咁激動   我估佢都心情緊張亂了   哈哈)~

咁佢一路抹一路叫我唔好激氣   驚我甲狀腺翻發   當下我覺得佢真係好愛我   次次我一激氣   佢第一時間就驚我依樣翻發果樣翻發   其實佢真係好驚我有事呢 ~~~~

喊完真係舒服 d   已經忍咗好耐   唔喊可能我會谷死 ~~~~

今晚雖然極之非常唔開心   好在可以同呀 mi 同冰姑呻   再同里奧大人呻埋   心情鬆咗好多   因為我真係好驚   我咁對媽咪   係我嘅錯 ~

同冰姑 whatsapp 到 11 點半呀   原來已經咁夜   係時候要瞓喇   真係第一次咁夜   佢知我唔開心   所以點都會同我傾   事實傾完真係舒服好多   所以今晚好多謝冰姑同 mi 笠呢 ~