2016年5月31日星期二

酸梅麵豉蒸排骨 + 菜心 ( 31-MAY-2016 )




( 31-MAY-2016  TUE )

依家習慣一出門口同出 lift 都第一時間望隻鴿   今朝見到黃色一 pat 嘢灘喺度   嚇死我   以為 BB 死咗   好在望多陣   見到 BB 郁咋 ~



今朝其實無胃口   但驚一陣晏晝會餓   所以食米粉餐   食咗 40 分鐘先食完   因為真係唔想食   最搞笑食咗 2/3   呀姐想收   我話仲食架   佢話都凍哂啦   做咩唔快啲食 ~


菇場忙下停下   今日中午請半日假搞 fat fat 啲嘢   所以其實都心不在焉   好驚一陣做漏嘢 ~

放工即走   約咗媽咪工人同家姐工人喺的士站等   之後一齊坐的士去 fat fat 屋企   一去到就執番啲嘢   睇下邊啲要拎走   感恩好 2 點就搞掂  之後坐的士去紅磡   交低哂 fat fat 啲嘢就走喇 ~

唔熟紅磡   總之見路就行   見到有間食魚蛋粉就入去食喇   因為附近唔見有茶餐廳   一坐低望下手機   原來都 2 黠半 lu ~


食下傾下   差唔多 3 點半就坐巴士番屋企   勁熱呀   去埋街市買餸   再同里奧大人買麵包就即番屋企沖涼喇 ~

用相機影  


再手相機影   哈哈  


同一個動作   好得意呀   我次次影相都叫里奧大人講嘢細聲啲   驚嚇親佢地   之後我同里奧大人講   唔知佢望唔望到我地嘅呢 ?!   佢好大反應話點會望唔到呀 ?!?!   佢有眼家嘛   點解我問埋咁白痴嘅嘢嘅   可能我成日向下望佢   又有窗遮住   所以覺得佢望唔到我咁囉 


里奧大人 6 點 40 分放工   咁就好喇   早啲食飯早啲休息 ~           

是日懶餐 - 酸梅麵豉蒸排骨 + 菜心

酸梅麵豉蒸排骨 - 買咗樽酸梅麵豉好耐啦   係時候清下去 ~  

菜心 - 呢期 d 菜心好甜   又平喎   $11/2斤   一次買兩餐菜就最好   呵呵 ~ 

又胃酸倒流   背脊都痛埋   但唔敢同里奧大人講   因為我頭先食條粟米已經比佢鬧   係咁話粟米難消化   但我話已經放咗 1 星期喇   唔食就壞   最多咬爛啲囉 ~

我 10 點幾瞓喇   里奧大人話睇多陣 "狼牙捧" 先瞓   其實套戲嘢叫琅琊榜   不過我地喺谷度叫狼牙捧   易記啲嘛   哈哈 ~

2016年5月30日星期一

丸龜製麵讚岐烏冬專門店 @ 九龍灣 ( 30-MAY-2016 )

野菜天婦羅 + 鱈魚排 + 濃口醬油冷烏冬 (中)   依家炸物做優惠價   只係 $20/2件   咁就抵啦


胡麻雞柳天婦羅 + 炸蝦餅 + 濃口醬油熱烏冬 (大) - 烏冬好煙韌   我最鍾意呢 ^^ 


( 30-MAY-2016  MON )

今朝同里奧大人食早餐   之後佢約咗 11 點同馬小姐搞 fat fat 啲嘢   好感激里奧大人咁落力幫手   佢次次一搞 fat fat 啲嘢   半夜就會紮醒   驚有嘢會漏咗要做   所以即刻起身寫低要做嘅嘢 ~




一番菇場即整嘢比龍王   條友叫我朝早比佢   但佢成 12 點先番   我同里奧大人講話佢正 8 婆   又叫人做比佢   自己又咁遲番   如果唔係我請假搞 fat fat d 嘢嘛 ~

今朝勁忙呀   對手未停過  好耐無試過咁忙呢 ~

Lunch time 唔餓   所以出去行半個鐘   之後番菇場喇 ~

里奧大人搞到 1 點半先走得   佢話熱到佢嗌救命   哈哈 ~

我仍然忙呀   咁聽日到我去搞 fat fat 啲嘢   咁即請聽日半日假   所以要更加快啲做哂啲嘢呢 ~ 

唉   個胃超級勁脹   頂到上心口咁呀   想嘔想嘔咁   勁辛苦 @@

4 點先食個蛋糕   其實食唔落   但驚一陣又餓到暈喎   煩 ~

放工去惠康買生果   之後即番屋企休息喇 ~

又睇 Minions   睇咗十幾次喇   不過就次次睇啲咁   次次睇親都好開心   所以我一開電視就睇佢呢 ~

里奧大人 6 點 40 分放工   感恩我開始有胃口   里奧大人話食完再去食雪糕   我食咗幾啖過口癮就算   因為真係好鬼飽呢 ~


我同里奧大人講話今晚斷斷續續睇咗 3 次 Minions  喇   佢話一星期睇 3 次 ok 喎   我話今晚睇第 3 次喇   之後佢喺度笑   話好恐怖喎 ~

咁睇電視啦   見到畫面濛查查   但講緊登格熱嘛   以為比蚊釘完之後   睇嘢會濛查查   之後廣告完咗   個畫面都係濛查查   果下驚呀   以為自己對眼有事   之後再按下其他制   原來頭先唔小心按到 3D   嚇鬼死 @@

10 點瞓到 10 點半   之後醒咗   里奧大人就話要瞓喇   佢都好攰   咁一齊瞓啦   難得瞓到 ~

2016年5月29日星期日

大阪王將 @ 九龍灣 ( 29-MAY-2016 )

元祖大阪小丸子


飯五味海苔飯 / 元祖天津蛋 / 王將咖哩汁 / 吉列魚柳 - 我無胃口   食里奧大人小小飯算喇   


五味海苔飯 / 元祖天津蛋 / 王將咖哩汁 / 煙三文魚


元祖餃子 + 宇治抹茶 X 2


( 29-MAY-2016  SUN )

尋晚瞓得唔好之餘   仲要心口附近兩邊都刺痛   痛醒 2 次   勁想叫醒里奧大人   因為我好小咁痛法   不過就算果刻有事   我都唔會入醫院   所以最後都係慢慢抖氣   之後都瞓得番 ~      

今朝 6 點 45 分起身   對眼差啲開唔到咁滯   勁痛呀   即用熱水敷眼   當堂好好多呢   之後即沖涼洗頭出發喇 ~

家姐佢地就約埋朋友去成坤食早餐   我地就同工人就去翠河   就腳啲嘛   之後家姐話佢地都係去翠河食早餐   搞嘢囉 ~

佢地朋友仲早過我地到翠河   咁我地叫早餐嘅時候都只係 8 點   姐夫有對夫婦朋友都黎埋   佢地住上水架   家姐都話叫佢地唔好黎   佢地話要黎   真係好有心   好感激佢地呀   之後佢地話一出地鐵見到姑姐姑丈佢地   話去緊大酒店方向   咁我話我快啲食   唔想無人喺度 ~ 



    
其實我食唔落   咁等埋里奧大人同工人食完早餐   再買埋早餐比媽咪   我話我地上大酒店先   家姐陪朋友   去到大酒店唔見姑姐喎   不過唔理喇   問佢地可唔可以燒嘢   佢地話可以   咁叫工人燒喇   之後大酒店個人都有幫手燒呢 ~

儀式 9 點半開始   所以我地約親人 9 點一定要到場 ~

姑姐姑丈表哥一行五人 8 點幾到咗   之後到里奧大人屋企人   媽咪屋企人就 9 點過啲先到   咁我同家姐同媽咪傾計   當然一路講一路喊啦   家姐話每個星期都會同呀妹食一次飯架喇   嗚嗚嗚嗚嗚嗚   喊到我地死死下   之後家姐朋友話唔好喊呀   要媽咪放心走呀 ~

儀式 9 點半開始   之後去火葬場   其實我唔知當時時間   去到見到媽咪工人自己坐   我話做咩唔同埋家姐工人一齊坐呀   佢話想坐出面個位望到媽咪   佢真係好錫媽咪   所以我同佢講   一日佢喺香港   而我一日仲喺度   我就係佢喺香港嘅親人   總知有咩事都唔駛驚   打比我就得架喇 ~   

火化之後就脫孝   之後去王朝盛宴食英雄飯   擺咗 4 圍   感激所有人出席同幫忙 ~

我同姑姐佢地坐   傾下講下   我都放鬆咗啲   但其實傾完都唔記得講過啲咩   呢排都係咁   個腦仍然一片空白   只要千其唔好講媽咪   我情緒都 ok ~

真係頂里奧大人啲家姐唔順   唔夠飽就一陣再自己出去食過啦   居然同里奧大人講話   食呢啲餸要
食飯   妳以為係喜宴嗎?!   咁有心情食嘢嘅 ?!   好意思嗎 ?!   咁拿羞家嘅嘢真係只有佢地做得出   真係想串佢地   駛唔駛加多個乳豬拚盤比佢地做餸 ?!

里奧大人成日話佢啲家姐黎上山係好有心   其實我聽到好反感   呢啲係基本禮貌   同埋唔好成日自己人讚自己人啦   比人笑咋唔該 ~   

差唔多 12 點幾散席   佢地一講叫我堅強   我就即忍唔住喊   所以佢地其實個個都想叫我放鬆啲   但知我情緒唔穩定   個個只會交帶里奧大人同家姐睇住我   家姐話里奧大人所有家姐叫佢一定要睇住我   因為媽咪走咗之後   其實我真係唔想講嘢唔想笑   佢地驚我抑鬱   我其實都驚驚地   不過我覺得係呢個月係咁   搞掂哂所有嘢   我心情應該都會好番啲嘅 ~

坐 619 番屋企   因為頭先好多灰飛黎飛去   番到屋企即沖涼洗頭喇 ~

里奧大人無啦啦熨衫   我話等我聽晚熨啦   大家都攰   佢話得啦   不過佢真係好勁   可以熨啲唔熨啲   佢之後都唔好意思呀 @@      

睇下電視瞓咗 10 分鐘   之後醒咗   但無耐又瞓番   里奧大人話見我瞓得咁林   幫我冚被同熄電視   佢都入房瞓   瞓到 4 點都醒喇   都瞓咗 1 個鐘   都夠架喇 ~

我依家間唔中會同里奧大人講   如果我死咗之後   佢要點點點   咁我話我依家對妳好好   我會祝妳再另娶一個老婆   但個樣同性格會同我一樣   佢都會有每月一痛   等你點都會記住我呢 ~

之後我睇睇下電視   係旅遊節目嘛   我同佢講   我話我都係帶埋你去   佢好開心話去邊   我話帶埋你同我一齊走呀   哈哈   呢下我笑咗出黎   佢梗係以為我話帶佢去邊度旅行啦   咁啱睇緊旅遊節目丫嘛   之後佢都笑咗好耐   話果下真係唔知話帶佢去邊呢   哈哈 ~

大食今晚喺九龍灣做嘢   做到 6 點幾   咁佢尋晚已經話今晚會喺九龍灣   但我話驚心情未平復   所以睇下點先   咁今日佢再講   即係想同我地食咁   咁又難得佢同我都喺九龍灣   咁約埋佢食飯啦   反正我都想請佢食飯   之前講好咗嘛 ~

食下傾下   我話第時佢要做我安息禮拜嘅司琴   之後佢話如果佢死咗先咁點   里奧大人即刻話叫我播歌扮彈琴   笑死我   串我就最叻   平時又唔見咁轉數快 ~

之後大食話佢有個學生係做 typing clerk   話佢彈琴好似打字咁大力   仲要係打 manual 打字機咁打法喎   呢下好爆   因為 manual 機要好大力打家嘛   哈 ~                

食到 8 點幾   我同里奧大人去 Taste 買生果   佢又話陪埋我地買完先番屋企   真係好細路仔咁 ~

沖埋涼就休息   里奧大人幫我吉耳仔   但佢話我隻耳都腫腫地   唔怪得吉到我好痛啦   哈哈 ~

好攰呀   所以 11 點唔夠就瞓喇 ~

2016年5月28日星期六

翠河餐廳 @ 北角 ( 28-MAY-2016 )

西檸雞


鹹排骨蒜子油麥菜煲


咖哩雞扒飯


艇妹炒麵


( 28-MAY-2016  SAT )

今朝 10 點起身   即刻沖涼洗頭   落街食早餐喇 ~

好開心見到鴿 BB 呀   掛住影相   lift 都唔記得按   哈哈 ~   





番屋企抖陣   Double Check 哂所有嘢   12 點出門口去東海堂買包裝蛋糕   諗住買兩打   點知得番 6 件   咁照買   之後再去德福啦   又係買得 6 件   平時好多貨家嘛   所以去到地鐵站嘅美心西餅再買 12 件包裝蛋糕囉   其實可以去新都城買   不過我話見到即買喇   一陣去到又無   真係精神緊張呢   哈 ~

坐地鐵嘅時候收到冰姑 whatsapp   佢真係真係好有心   會記得呢一日   同埋已經講咗幾次   呢個星期六日會好忙   給我加力   自從媽咪走咗之後   呢段時間我真係好難過好難過   佢真係由朝到晚陪住我   成日叫我快食飯快休息   感激打令 ~  

1 點唔夠到新都城喇   咁我地去海港下午茶嘛   咁見到已經有人排隊等拎飛   咁我地都等喇   因為都無心情周圍行 ~

媽咪工人 1 點 40 分都到喇   之後家姐 姐夫 工人都到埋   一有位就入去坐 lu ~

家姐話拎啲點心比媽咪食   我當然無問題啦   同埋其實媽咪鍾意食嘅嘢   我地都鍾意食   口味差唔多   哈哈 ~

食下傾下   之後家姐話朋友提佢要剪咗媽咪啲衫袋褲袋   但唔知點解要剪   總知人叫佢做乜就做乜   所以里奧大人同姐夫都話   可能係人地鄉下習俗係咁呢 ?!   唔係人叫做咩就做咩   我同里奧大人講話剪就剪啦   唔好成日問點解點解   佢鍾意點就點啦   心情已經好難過   佢認為安心就比佢做囉   之後工人即刻去買較剪   咁都已經 3 點喇   我話要走喇   想早啲去大酒店打點下 ~

翡翠筍蝦餃皇 


蟹籽燒賣皇  


滷水鵝掌翼 


甜醋豬腳薑


中山甜薄罉


香煎蝦米腸 


茄子什菌長春卷  


蒜蓉蒸鮮魷 


清香養顏紅棗糕 


海鮮炒飯 


家姐同我講   話媽咪工人星期五發夢見到媽咪   媽咪同佢講話要出院   記得拎件衫比佢   工人話啲衫已經喺北角架喇   我同家姐講話媽咪好憎我   家姐叫我唔好咁講   媽咪都無話憎妳   我話妳等我良心好過啲   媽咪憎我係啱架   我把口又賤   又成日鬧佢嘛 ~

我地坐地鐵去鰂魚涌   今日好焗熱   我問里奧大人同家姐覺唔覺   因為佢地成日都話我怕熱   好在佢地都熱咋   哈哈 ~

講明今日天氣唔好架喇   感恩由出門口到大酒店都無落雨呢 ~

3 點半到鰂魚涌   咁里奧大人同媽咪工人去 MP 買支裝水   我同家姐姐夫就去大酒店喇 ~

同家姐一齊見媽咪   我地喊啦   媽咪工人喊得更勁   冷靜咗之後就要打點嘢喇 ~

呀 mi 呀喂 4 點 45 分到咗   最奇怪係堂官都未到囉   所以就傾計啦   笠係咁講其他嘢   因為佢知我一講媽咪啲嘢就喊   同埋佢講咗好多就係叫我對里奧大人好啲囉 @@   之後又約我地去行山   佢地真係好有心   其實喺呢段日子   我都好小搵佢傾計   佢仍都唔敢搵我   知我一講就喊   但佢就會問里奧大人我咩情況   同埋我有時我用 whatsapp 問佢嘢   佢答完之後就會即問我近排點   但其實心情都仲未平復   佢就不斷安慰我呢 ~         

因為佢地之後仲要去上水   特登抽時間向媽咪鞠躬   感激感激 ~

大食表妹又係 5 點唔夠黎幫手   佢真係好乖   我同佢講話唔該哂   佢第一句就話姨媽我都有份   我好感動 ~

我只知道唔可以同人講多謝   只可以講有心   我都教里奧大人咁講   咁家姐同呀 mi 呀喂講再見   堂官話唔可以講再見   丫   點知喎 @@

之後教會傳道人到咗   又傾計呢   不過我開始越黎越情緒激動   只係不停喊喊喊   我真係好唔想講嘢   只係想喊 ~

姐夫 d 朋友同屋企人   媽咪屋企人   里奧大人屋企人都陸續黎咗   教會另一對同工夫婦到咗   傾咗一陣   佢地話見好多親朋都黎咗   見我地行開行埋   所以話都唔阻我地   其實我同佢地講咗有心之後   我都一路喊   我同佢地講   我只係好想喊   嗚嗚嗚嗚嗚嗚 ~

好似 7 點幾破地獄   咁啱姑姐姑丈表哥 嬸嬸堂哥堂細佬佢地黎到   一見姑姐   我都忍唔住攬住佢喊   我話好掛住媽咪呀   佢話唔好喊   搞到姑姐都喊埋   唔可以咁呀 ~

喊完舒服啲   安頓好姑姐佢地   無耐就見到 CC 同兔兔   我又係忍唔住攬住 CC 喊   其實我知唔好   咁樣搞到佢都喊埋   但真係忍唔住   之後佢地幫手摺嘢   其實我見到好多人都幫手摺嘢   好感激佢地幫忙呢 ~ 

我唔知原來道教咁多儀式要做   以為只係破地獄咋   大食表妹知我勁傷心   所以佢一見到我喊   佢就會埋黎攬住我   咁親密嘅動作   佢平時唔會做架   因為佢話唔鍾意比人攬同拖手   但我知道佢今晚全程係望住我   因為我間唔中都問佢餓唔餓嘛   我一望佢   佢已經望緊我   同埋見我一激動就會企喺我身邊   因為里奧大人幫我招呼親朋   而我   只係靜靜地坐埋一角喊   乜都做唔到   喊到好攰   好在無暈   只係無力同頭痛   大食居然拎咗支白花油比我   佢可能見到我成日捽住個頭呀   所以真係好肯定佢係咁望實我   驚我有事   我真係覺得自己超衰格   成日話佢孤寒又點點點   但其實佢係最關心我   我真係要改下自己把死人口   唔好成日只話人缺點呀 ~

好似 8 點要出去燒嘢比媽咪  差唔多行到個爐附近   突然灑咗一陣大雨   好大粒嘅雨   果下就驚喇   因為好多人無帶遮   表弟好好   係都要遮我   其實我有件外套遮住個頭   不過好感恩   灑咗一陣就無雨 lu ~

之後一齊番大酒店   同 CC 傾多陣計   我叫佢地快啲走喇   大酒店超級凍呀   我對手根本係冰硬哂   所以佢應該更加凍呢 ~

親朋都陸續走喇   剩番媽咪屋企人同姐夫啲朋友   咁即叫佢地食蛋糕喇   驚佢地餓   我就無胃口喇   好在夠分咋   唔係肉酸   因為我無諗過姐夫朋友同屋企人黎幫手呢   家姐又無講 @@

9 點要清場   因為要打點埋聽日嘅嘢   所以我地同埋大食 姐夫啲朋友最後先走   搞掂哂都 9 點半   一齊去食飯喇 ~

諗住坐地鐵   不過大食話 619 喺附近   咁跟佢啦   點知佢都唔係咁熟   最後行到去北角坐 619   之後佢話佢都係唔坐巴士   坐地鐵番屋企   咁之得頭先一齊搭地鐵啦   咁佢可以唔駛行咁遠嘛 ~

佢頭先好搞笑   我同佢一路行一路傾   佢可能見我仲係好傷心   問我駛唔駛拖住佢隻手   佢會比我拖   哈哈 ~    

番到屋企差唔多 11 點   即沖涼洗頭喇   咁個人其實腦海空白   里奧大人叫我   我係無反應   佢見我無吹頭   即拎個風筒出黎比我吹頭   其實呢幾晚都係咁   要是平日咁樣   佢會話我懶架   哈 ~

今晚好感恩   儀式好順利   但好多人一黎到   第一句就話好大雨呀   其實我地只係出去燒嘢果陣先淋咗一陣雨   所以真係唔知出面天氣係點呢 ~   

望到自己對眼   眼皮完全腫哂   對眼得番一條線咋   唔怪得個個人都話我對眼腫哂啦   我唔覺嘛   但就覺得對眼喊到濛查查囉 ~ 

12 點幾都喇   要瞓喇   聽朝好早起身呢 ~ 

2016年5月27日星期五

辣茄汁豬柳 + 蠔油燜節瓜 ( 27-MAY-2016 )




( 27-MAY-2016  FRI )

今朝 3 號風球呀   勁驚囉   千其唔好打風呀 ~

好餓呀   早餐食吉列魚柳餐   好耐無食   記錯以為雙腸添   唔怪得呀姐覺得我落單有啲奇怪啦 ~


菇場唔太忙   但 11 點幾就開始忙喇   真係要開行 Turbo 做呢 ~

Lunch time 落去行陣   買埋個菠蘿包就番菇場喇 ~

準時開工   都好耐無試過咁喇   做呀做   諗住做完抖下   點知又有嘢做   我放工準時走嘛   龍王打黎話係比唔到佢   我話係   我彩佢傻囉   得 45 分鐘邊做到哂   我已經盡力做   同埋明知今晚要就講明比我知   我唔做其他嘢住啦   之後佢叫我星期一朝早比佢   我話 ok   唔好諗住我幫妳開 OT 呀   最憎啲人   急又唔講   又唔早啲比人   話要就要   咁麻煩妳自己做啦下 ~

番到屋企抖陣就煮定節瓜   咁里奧大人 6 點 45 分放工   我就開始煮飯喇 ~             

是日晚餐 - 辣茄汁豬柳 + 蠔油燜節瓜 

辣茄汁豬柳 - 諗住整生炒排骨   點知都炸唔脆嘅   咁炒埋一堆算喇 ~  

蠔油燜節瓜 - 尋晚剩咗 2 個節瓜   但點都要煮囉   其實我仲剩咗一大碗湯飯   所以要里奧大人食哂呢 2 個節瓜   佢一見到就話太多太多   我話唔好成日一拎碟餸出黎   就話太多太多食唔哂   我覺得好煩囉   未食就嘈嘈閉 ~

搞掂哂就沖涼   里奧大人話買芒黑白比我食   想我今晚好瞓 d   但我話唔駛   今晚瞓得唔好係正常呢 ~

其實唔眼瞓   但 12 點幾先瞓喇   點都要瞓 lu ~      

2016年5月26日星期四

節瓜鹹蛋淡菜瑤柱肉粒湯飯 ( 26-MAY-2016 )



( 26-MAY-2016  THU )

感恩一覺瞓天光   但其實半夜都醒咗一醒   不過好快可以瞓得番呢   感恩 ~

早餐食米粉餐   真係好想食濕嘢呀   哈哈 ~


菇場唔忙   可以抖下 ~

Lunch time 未餓   出去行咗 40 分鐘   再買埋菠蘿包番菇場慢慢食 ~

里奧大人 4 點去官塘見客   見完都係 5 點幾   但今晚我話一定要煮飯囉   所以我放工即走   去 Taste 買埋梅頭就番屋企喇 ~

浸埋淡菜同瑤柱   煲埋飯   再開機洗;衫   等到 6 點 15 分就滾湯   7 點有得食   算快架喇 ~      

是日懶餐 - 節瓜鹹蛋淡菜瑤柱肉粒湯飯

節瓜鹹蛋淡菜瑤柱肉粒湯飯 - 里奧大人今日 lunch 話想食湯飯   好在無食   同埋我都朝早同佢講咗今晚食湯飯架啦   又唔記住   仲同我講話 : 原來今晚真係湯飯架 @@   個湯加咗淡菜瑤柱真係好味好多   真係無買錯淡菜喇   同埋最緊要我記得自己買咗  唔係又嘥嘢架喇 ~

搞掂哂就沖涼   諗住休息   點知李小姐打黎   話今日約咗馬小姐飲茶   叫馬小姐幫手買啲祭品   佢地真係好有心   樣樣盡力去做   之前我地聯絡唔到   我地個個都好心急   所以依家一聯絡到就快快手做嘢   感恩 fat fat 有咁好嘅朋友呢 ~

睇多陣電視   11 點都瞓喇 ~ 

2016年5月25日星期三

嚐越 @ 九龍灣 ( 25-MAY-2016 )

咖哩麵包蝦 ($108) - 我覺得咖哩唔香囉      


啲蝦都幾彈牙  


個包就夠脆喇   索哂啲咖哩汁   我就唔太鍾意咁食法   哈哈  


嚐越脆春卷撈檬 ($65) - 春卷都唔脆架   食完啲皮仲痴牙添呀 @@   個醋汁又無咩味   唉 


馬拉盞炒嫩菜 ($68) - 好一般啦 


( 25-MAY-2016  WED )

成晚發夢   好似無瞓咁   所以鬧鐘響咗   懶咗一陣床先捨得起身呀 ~

里奧大人成日拎完 d 嘢又唔會放番好   今朝又唔記得帶 headphone   咁好在我有帶   咁借比佢啦   之後我話我係叮噹   乜都有   諗住借 d 易話自己好   點知比佢串番轉頭   佢話 : 係啦   簡直係無缺添啦   唔用都有 ( 即係乜都買買埋埋又唔用 )   同埋妳人一生只係缺一樣嘢之嘛   就係缺德   哈哈   衰佬 ~    

早餐食豬扒包   家姐問我係咪好餓   哈哈   我話唔係   唔想食三文治咁悶啫 ~



菇場唔忙   做下 filing   又過咗半日 lu ~

食完 lunch box 就去拎褲   去埋 759 買蟹柳比家姐就番菇場喇 ~

里奧大人 1 點幾上大陸見客   希望可以早啲番到香港啦 ~

放工即走   原來里奧大人已經喺九龍灣   咁叫佢去旅行社比錢先   之後我差唔多 6 點先到旅行社   佢啱啱搞掂哂 ~

好想食越南嘢   所以去嚐越試下   不過味道真係好一般呢 ~

番到屋企就即打比馬小姐   傾好哂 fat fat 嘅嘢   約定好日子   再打埋比李小姐   不過佢果日唔喺香港   所以我地再約時間   但最後都唔可以改到囉   所以無辦法 lu ~ 

咁再打番比李小姐   佢都好唔開心   覺得好對 fat fat 唔住   我話唔緊要   最緊要係有心嘛   佢叫我幫佢買祭品   不過我話我係基督徒   幫唔到佢   咁我話妳同馬小姐聯絡啦   佢應該幫到妳   之後經馬小姐同意就比埋電話號碼佢   佢地自己搞掂就最好   因為我依家好多嘢都記唔到   一陣做漏仲麻煩 ~

嘩   傾完都 9 點   即沖涼喇   今晚都有啲攰   10 點半都瞓覺 lu ~