燒汁焗鯖魚 & 雞翼 + 魚片炒麵 + 菜心 + 蕃茄豆腐三文魚骨腩湯 ( 31-JUL-2016 )

( 31-JUL-2016  SUN )

今朝 9 點半起身   沖埋涼就落去食早餐喇 ~

食完番屋企抖陣就番教會   崇拜之後就去街市買餸同生果   里奧大人就番屋企瞓陣 ~

星期二會打風   所以今次買定 3 晚嘅餸   又買埋龍眼同水蜜桃   重鬼到我呢   之後再去 Taste 買 2 磅雞翼就即番屋企喇   隻手就黎斷喇   哈哈 ~

望下個鐘已經 2 點   搞掂哂所有嘢都趾唔多 3 點   好餓呀   要出去食下午茶喇 ~

我同里奧大人講話今次要食勁嘢   佢以為我食飯   哈哈   我話食燒鴨瀨呀   之後佢話咁叫勁嘢咩 ?!   我話平時只係食雞翼餐咋   你唔係無留意呀嘛 ~

之後去優品 360 買 Hoegaarden   $22.5/3支   好在阿喂話我哋知咋   呵呵   里奧大人買 6 支   我之前喺 759 又買咗 6 支比佢   佢真係有排飲 lu ~

番到屋企即熨 2 機衫   之後預備煮飯喇   今日全日無停過   不過我又好 Enjoy 㗎喎   但就唔可以個個星期係咁   因為會好攰同好悶   哈哈 ~

5 點幾熨完衫就預備滾湯   之後抖陣就煮嘢喇   煮完都 7 點   早啲開餐早啲徑步 ~

冰姑又寄嘢比我   實在太客氣啦   

明明話只係寄 2 包石蜂蜜糖比我   點知又寄埋印尼撈麵

佢仲當我細路仔咁   寄埋朱古力餅乾比我喺秋季大旅行食   哈哈   

今晚真係黐咗   其實真係一個炒麵同個湯已經好夠   我又唔駛煮得咁辛苦   里奧大人話家姐嚟埋食都食唔哂呀   哈哈 ~ 

是日晚餐 - 燒汁焗鯖魚 & 雞翼 + 魚片炒麵 + 菜心 + 蕃茄豆腐三文魚骨腩湯 

燒汁焗鯖魚 & 雞翼 - 我諗住焗番熱尋晚食剩嘅 3 件雞扒   反正開咗爐就焗埋鯖魚啦   但驚里奧大人唔夠食   所以焗雞翼   最後食剩 3 隻雞翼   唯有做聽日嘅 Lunch Box 啦 ~

魚片炒麵 - 2 個麵餅 + 1 條魚片 + $4 韭菜   炒埋成盤咁多   我今晚都食唔落麵   又留番聽日做 Lunch Box 同埋晚餐啦   因為食剩 2/3 呀   我帶唔到咁多 ~       

菜心 - $7/斤銀川菜心   好耐無食菜   所以點都買黎食   同埋要食哂去呢 ~

蕃茄豆腐三文魚骨腩湯 - 勁想滾呢個湯好耐   新鮮三文魚骨賄喺 MP 買只係 $27   我覺得都抵   點知今日喺 Taste 睇只係要 $14 咋   下次喺 Taste 買算喇   今晚實在無咩胃口   嘥咗嚿豆腐   同埋好在個湯唔腥咋   所以我會再滾呢個湯   因為啲三文魚可以食到   紅衫魚就食唔到呢 ~   

洗埋碗抖到 8 點 20 分就出去徑步   徑到 9 點都番屋企 lu ~

沖埋涼就休息   食埋西瓜又睇下 "歡樂頌"   不過今晚 11 點幾都要瞓   聽日要番工呢 ~   

墾丁茶坊 @ 九龍灣 ( 30-JUL-2016 )

鹽酥雞排配香菇肉燥飯 ($64) - 啱啱食完熱狗無耐   其實唔太餓   食咗 1 件咋   咁里奧大人又話熱氣唔幫手食   咁唯有打包啦

香菇肉燥飯就要食哂啦   唔可以拎走   

好在呢個有啲陳醋   食完飯就食埋啲雲耳   人哋明明係前菜   但我就最後先食   哈哈

秘製紅燒牛肉湯麵 ($70) - 里奧大人話戒牛   但又食牛   因為炸嘢唔食得喎

凍柑桔檸檬綠茶 / 水蜜桃綠茶

( 30-JUL-2016  SAT )

今朝 7 點 40 分起身   咁就可以 8 點出門口   唔駛咁趕 ~ 

早餐食麵餐   好耐無食麵餐   食完飽到上喉嚨   下次咪搞 ~

菇場當然唔忙啦   呵呵   可以做自己嘢 ~ 

無啦啦勁想飲茶   所以放工去 mega BOX   里奧大人就去攞位先 ~

前菜 - 我都係鍾意食蝦片多啲  

沙律明蝦角 - OK 好味  

鮮蝦炸春卷 - 我其實麻麻哋鍾意食春卷   細細個成日食   食到有啲驚  

蜜餞叉燒腸粉

鹹菜胡椒豬肚湯 - 飲到最尾就好勁胡椒味   但酸菜好腍   我唔鍾意腍 Pat Pat 口感

蛋黃千層糕 - 唔鹹唔香又唔甜      

飲到 3 點幾   之後周圍行一陣就去大眾睇書喇 ~

我落扶手電梯見到 Minons   即刻捉住里奧大人隻手係咁 "呀呀呀"   佢以為我整親   哈哈

喺大眾各有各睇書   我就睇阿呢嘅豬仔 4 格   好好笑呀   之後睇到好攰   頂唔順出去書局出面啲櫈坐下   合埋眼瞓咗 2 分鐘添呀   哈哈   之後唔番入去喇   靜靜哋坐喺出面等里奧大人出嚟 ~

話咁話又 4 點 40 分   我勁口渴囉   諗住買嘢飲   咁經過 Ikea   我聽到里奧大人話可樂十蚊    我話貴啦   去 AEON 啦   之後佢話係熱狗 + 可樂十蚊呀   咁叫佢即排隊買喇   哈哈 ~

飲完食完又精神好多喎   咁再睇下有無零食   最後買咗包薯片就走 lu ~   

嗰陣好興 Angry Bird 嘅時候   用咗 $9.9 買個 Apps 繼續玩㗎   但買完之後就玩咗手機   咁就無再繼續玩 lu

再去 AEON 買把縮骨遮 (折咗係 $71.10) 同飯素   之後去埋 Living Plaza 買 2 個玻璃樽   終於買哂要買嘅嘢   勁開心呀 ~

鰹魚飯素 ($9.9/包)   里奧大人問可唔可以送炒麵食 ?!   我話無人咁食   多數送白飯   因為飯無味   哈哈

唔想番淘大食   所以去墾丁茶坊食埋晚飯先走呢 ~

食完就坐 Shuttle Bus   因為對腳好攰   唔想行   咁去埋 MP 買三文魚骨腩就番屋企 lu ~

番到屋企即沖熱水涼   今日喺商場凍咗成日呀   下次去商場成日嘅話   都係唔好着裙   對腳一凍就會成身凍咁 ~

等埋里奧大人沖埋涼   就一路食薯片一路睇 "歡樂頌"   勁爽 ~

 Ikea 買嘅薯片   特價 $19   因為 8 月 15 日到期   但又幾好味喎   有啲蒜蓉味   同埋唔係太油  

睇下睇下   原來已經 1 點   要瞓啦 ~  

韓式辣醬排骨 + 黃芽白 + 齋滷味 (外賣) ( 29-JUL-2016 )

( 29-JUL-2016  FRI )

今朝天氣好好   但就好焗熱   平時我好少會出汗   但今朝行到出汗呀 ~

無啦啦好想食芝腿治   所以覺得好好味   因為呢排好少會覺得早餐好味   哈哈 ~

菇場唔太忙   咁做下私人嘢啦 ~

Lunch Time 去南北行買完胎菊 ($32 會員有 9 折)   咁又未餓住   所以行多陣啦 ~

去到 759 見到 Hoegaarden  $12.9   正價有 6 折   即係 $7.7/支   勁抵囉   所以即 Line 比里奧大人知   佢話買 4 支   但我買夠 6 支   原來都幾鬼重 ~

原來已經一 點   即去買埋豬軟骨酸辣米線番菇場食喇   今次食到背脊都流汗   真係第一次咁囉   勁想番屋企沖涼呀   哈哈 ~   

仍然唔忙   輕輕鬆鬆放工去 ~

今晚去 Taste 買排骨同齋滷味   之後即番屋企喇   浸埋菜就熨衫   熨咗幾件衫   里奧大人就打嚟話放工   咁我都預備喇   今晚炸嘢   又煮擔擔麵比里奧大人   所以要多啲時間呢 ~

是日晚餐 - 韓式辣醬排骨 + 黃芽白 + 齋滷味 (外賣)  

韓式辣醬排骨 - 半煎炸排骨   可惜唔夠脆囉   個醬汁係韓式辣醬 + 茄汁   都幾好味㗎   其實今餐最想清埋盒辣醬   但仲剩細半盒   下次一次過整哂去算喇   反正又唔係好辣   呵呵 ~     

黃芽白 - 又清埋喇   勁開心   真係好鍾意清哂啲嘢 ~  

齋滷味 (外賣) - 真係唔知點解   我次次去 Taste 都好想買齋滷味   咁前晚我同里奧大人講話去 Taste 買菜   佢都問我做咩唔買齋滷味   因為見我好多時都會買   哈哈 ~  

洗埋碗抖陣   8 點半出發去徑步   徑咗 25  分鐘   條街實在太焗   如果唔係可以徑耐啲呢 ~

咁我沖涼啦   之後里奧大接到肥仔電話   咁啱佢喺九龍灣   所以即約金姆指見面   佢哋係中學同學嚟㗎   所以我好羨慕里奧大人囉   好多朋友都係中學大學嘅同學   可以 Keep 到咁耐好難得嘛 ~

真係邪   今晚阿仔打嚟搵我   仲傾咗一個鐘頭電話   我同佢都識咗 20 年以上   中間 10 年都無聯絡   但我手機就有佢手提電話號碼同屋企電話號碼   就係因為玩 Pokopang   所以先聯絡番   初初佢 Add 我嘅時候   我都唔知係咪真係佢   因為手機號碼未必個個用咁耐嘛 ~

今晚咩事呀   我同里奧大人都同舊朋友傾偈   但其實同舊朋友傾偈真係好開心   好多回憶都番哂黎咁架   以前做嘢真係好開心   無壓力   放工又會成日出街買衫食飯同唱 K   依家老喇   鍾意搵啲靜靜哋嘅地方   食下嘢傾下偈咁呢 ~

里奧大人差唔多 11 點先番到喇   佢好開心咁喎   最搞笑話肥仔食碗米線好大碗   有 5 個餸呀   因為我哋平時多數 1 個餸之嘛   里奧大人無理由齋坐嘛   但淨飲又唔抵   所以食雞翼套餐   里奧大人話食 1 隻   叫肥仔食 2 隻   肥仔話食唔到咁多   但最終都食埋去 ~

咁今晚一齊睇 "歡樂頌"   咁我諗住放低包零食喺枱   點知見到隻小強喺枱呀   好在佢唔郁   我一嘢拍死佢   之後再入廚房   望到廚柜有隻小強   即叫里奧大人拍死佢   因為我唔夠高   我頂   已經放哂強宅同噴 Bio Kill   我仲整埋番梘水同咖啡粉架噃   唔通因為咁樣已引哂出嚟 ?!

今晚 12 點幾先瞓   不過里奧大人仲未瞓   佢夜瞓都唔驚啦   聽日唔駛番工   我就慘啲   哈哈 ~   

黑椒雞絲意粉 + 黃芽白 ( 28-JUL-2016 )

( 28-JUL-2016  THU )

尋晚瞓得好好呀   但今朝鬧鐘都未響   里奧大人就好大聲話鬧鐘無響囉   嚇到我都醒埋   好在當時都已經 7 點 20 分   唔係一定鬧爆佢   難得我咁好瞓   又比佢嘈醒咗 ~

天氣好好呀   如果無咁熱就更好啦   但反而里奧大人話熱到流汗   我又無汗喎   可能佢又長袖裇衫又底衫啦   但佢話唔着底衫仲辛苦   啲汗痴住件裇衫喎 ~

其實今朝好餓   但去到茶記又唔餓   所以食奶油多算喇 ~

菇場忙下停下   感覺真係似番工   哈哈 ~

11 點幾開始餓呀   食下糖同百力滋頂住   一到 lunch time 即去食炒麵 + 紅豆沙   但其實食完炒麵都好飽   之得唔好叫紅豆沙先啦 ~

真係飽到上喉嚨頂   所以又周圍行   行咗 20 分鐘就番菇場喇 ~

繼續忙下停下   所以好快就放工 lu   今晚直接番屋企   最鍾意咁樣 ~

唉   一入廚房   唔知係咪見到小強   因為依家比佢哋嚇到精神衰弱   有黑嘢郁就覺得係佢哋囉 ~

開機洗衫就抖下先   里奧大人 6 點 50 分放工   咁我都預備煮嘢 lu ~   

是日懶餐 - 黑椒雞絲意粉 + 黃芽白  

黑椒雞絲意粉 - 里奧大人講咗兩次話好好食   我當然開心   因為用現成黑椒汁整之嘛   超級簡單   今次係用一塊大雞扒整㗎   本來可以整多啲意粉   但我要食埋啲麻辣豬手   食唔落意粉   所以佢話點解次次啲餸多過意粉   不過我真係唔識預份量   但多都唔緊要   最多我帶 Lunch Box 啫   依家唔會下下掉嘢㗎喇 ~  

黃芽白 - 前晚買咗 1 大棵   分兩晚食就最好   估唔到又幾甜噃 ~

洗埋完就焗油   焗 10 分鐘就搞掂   之後即刻去沖涼 ~

今晚都幾攰   所以 11 點都瞓喇 ~    

醉香居 + 麻辣串串香 @ 九龍灣 ( 27-JUL-2016 )

泰汁燒鯖魚 ($16) - 其實就咁食已經好好食   反而我覺得泰汁唔夾鯖魚呢

川味雞軟骨 ($10) - 一大陣格甩底味   可能落得太多孜然粉呀

煎釀三寶 ($20/9 件) - 想食好耐㗎喇   今次隻尖椒好辣   所以要買豆漿飲呢 

 

麻辣涼拌豬手 ($26) - 食剩半盒   打包留番聽晚   

大大碗麻辣熨 ($38) - 今次我唔食喇   咁里奧大人次次都食米線   我就食紅薯粉   咁今晚試下啖米線啦   同里奧大人講話口感好得意   原來佢今晚轉食烏冬   唔怪得咁口感啦   好在同佢講咋   唔係以為米線口感係咁添   哈哈  

( 27-JUL-2016  WED )

咁有時入到房又瞓唔到   就會同呀里奧大人講下無聊嘢   咁尋晚佢話隻腳凍   我幫佢搓熱去啦   因為我手心好慶家嘛   搓兩搓即熱   之後佢話其實佢覺得隻腳凍凍哋好舒服   超 ~

之後我話我成日咁熱   想改英文名叫阿 Hot   佢話好呀   再話妳個身型係 S 型   咁妳記得改名嘅時候   喺個 Hot 字前面加個 S   咁先形容得似妳呀   哈哈哈哈   衰到無朋友 ~

今朝里奧大人又上大陸   真係辛苦佢喇 ~

我 7 點 40 分都醒喇   天氣熱   都係早啲起身好啲   可以慢慢行   真係好唔鍾意沖完涼又出汗囉 ~

早餐食熱狗   真係好想買其他嘢入餐廳食   唔駛咁悶   哈哈 ~

菇場忙呀   做到有啲頭暈   可以太耐無咁忙   唔太習慣   有啲緊張 ~

唔太餓   咁 Lunch Time 就出去行下   之後再買個菠蘿叉燒包番菇場食喇   新鮮出爐勁好味呀 ~

菇場仍然忙下停下   咁都好   好快可以放工 ~ 

今日星期三   又諗起以前逢星期三都同媽咪家姐食飯   所以情緒突然好低落好低落 ~

本來今晚煮飯㗎   但頭又痛   心情又唔好   所以出去食喇 ~

去埋日本城買掃把   再去買漂白水就番屋企 lu ~

里奧大人 8 點左右到九龍灣   諗住叫佢食另一檔湯麵   不過材料多數係丸類   佢唔太鍾意   所以又食番麻辣燙喇   之後佢話唔好再嚟食   開始有啲驚   咁又真係難為咗佢嘅   成日就我食麻辣燙 ~

我同里奧大人講   話一見到佢就最開心   佢話我講到好似好耐無見咁   之後佢話如果唔見佢一星期會點 ?!   我話會瘦 5 磅   佢話見到我肥咗 10 磅妳就死   哈哈 ~

番到屋企就比佢沖涼先啦   我要開機洗衫嘛   同埋切西瓜比佢食   所以我成日話番到屋企係最忙 ~

今晚好搞笑   里奧大人收到佢 CEO 嘅 Whatsapp   原來特登 Send 張 Minions 新床單比佢睇   仲講明話比你老婆睇   因為里奧大人成日同佢講   我好鍾意阿 Bob   仲話睇到啲劇情都識背添呀 ~

反正開咗電視   我又睇番 Minions 呀   佢即刻大笑呀   哈哈 ~

其實我鍾意睇 Minions 係因為鍾意佢地夠簡單   好少事都已經好開心   唔會覺得人哋害佢   永遠帶着一份童真   次次睇完佢哋   我真係開心好多呢 ~

依家年紀大   童心真係未必有   但擁有唔害人已經好好   哈哈 ~

不過我覺得做人其實最緊要簡簡單單   唔好強求   凡事感恩   有咩唔開心就當一種苦練   唔好成日怨天怨地   辦法總比困難多嘛   點解要比唔開心困住自己喎 ~

自從媽咪走咗   我都好傷痛   但已經係事實   我要面對嘅係將來   唔可以日日咁傷痛過活 ~

所以我次次一諗番起以前   就會記得阿 mi 話要向前望   唔好回望過去   雖然我都仍然會諗番以前   但希望時間可以快啲沖淡唔開心嘅嘢啦 ~

今晚有啲攰呀   所以 11 點都瞓喇   好難得覺得攰嘛   哈哈 ~