2016年8月31日星期三

韓式辣雞翼 + 西蘭花 + 桑寄生蓮子蛋茶 ( 31-AUG-2016 )





( 31-AUG-2016  WED )

今朝里奧大人上大陸   雖然鬧鐘響咗之後都即瞓番   但瞓得唔係咁好囉 ~

早餐無咩胃口  食奶醬多算喇   之後 8 卦又黎埋   見佢食沙牛意   當堂有啲餓   哈哈 ~


菇場唔太忙   難得所有大粒唔喺度   所以咁 free 真係唔想做嘢   哈哈 ~

今年無 bonus   但估唔到有得加人工   勁開心呀 ~

Lunch time 出去食魚片頭米粉   點知一入餐廳   後面有人叫我    原來係呀嘈   咁原來溫總仲一早入咗去坐添   咁唯有一齊坐啦   慘   我食完都走先喇   唔想又聽是是非非 ~


周圍行下   都行咗 20 分鐘   開始有啲
熱   所以番菇場喇 ~

又要做長命 report   做做下又無啦啦好肚餓   即刻食曲奇餅呀   食咗沙糖果 6 塊先   留番好味嘅第日食   呵呵 ~


我覺得個膠樽幾硬淨   所以留番去   用黎裝香口膠都唔錯


我覺得拎出黎食一啲都唔方便囉   開完個袋   又要拻多次先可以食到粒香口膠   我覺得買一包嗰啲仲方便   一開就可以食得 


放工即走   條街好焗熱呀   最驚呢啲天氣 ~

今晚去 Taste 買蓮子同豬扒   又買咗 3 pack 芝士   依家見特價嘢就會買   但都會諗清楚自己係咪食得哂   如果唔係就唔買   實在唔想嘥嘢 ~

番到屋企即煲糖水   之後浸菜   抖多陣就預備煮飯喇 ~   

里奧大人 8 點幾先番到屋企   我都會等埋佢一齊食   反正唔太餓   一齊食開心啲呢 ~

是日懶餐 - 韓式辣雞翼 + 西蘭花 + 桑寄生蓮子蛋茶 

韓式辣雞翼 - 為咗清埋樽過期韓式醃肉辣醬   所以呢兩日唔係雞翼就係豬扒架喇   但仲剩番小小   下星期再用黎炒其他嘢   之後應該唔會再買佢架喇   哈哈 ~      

西蘭花 - 就咁灼就算喇   本來想開罐魷魚   但一陣仲要食糖水   所以都唔開喇   留肚食糖水好過 ~  

桑寄生蓮子蛋茶 - 最開心係清哂包桑寄生   呢期好鍾意清嘢同掉嘢   但就唔會即刻買番黎補貨   呢點最重要   唔係即係清極都有咁呢 ~

洗埋碗就抖陣   原來都 9 點幾   咁拿拿聲飲埋碗桑寄生茶就即沖涼喇 ~

咁淘寶好鍾意買一樣嘢就多送另一樣嘢咁   有時九唔搭八咁架   但又會啱用架喎   咁之前里奧大人買原子筆芯   佢話買咗 5 支   我話唔係送番 5 支比你咁好呀嘛   點知佢比我睇   有 50 支咁多呀   原來佢自己買咗 50 支呀   人地寫明 RM9.9 係 10 支   佢又唔睇清楚   咁依家叫佢買多支筆比我囉   最緊要用得番啲筆芯   咁我最多拎番菇場用   唔好嘥嘛 ~


竹炭包 (RMB6.5/個)   我一見到已經好鍾意喇   之後里奧大人話知我鍾意貓頭鷹   所以買呢個   但最估唔到我反而會鍾意隻貓多啲   哈哈


呢個竹炭包最正嘅地方係可以拆出來   所以我拎咗個貓咪袋番菇場擺呀   望住佢好開心呢


睇多陣電視   成 11 點 45 分先瞓呀   下次里奧大人上大陸   都係出去食好啲   咁啲時間好用好多咁呢 ~

2016年8月30日星期二

粟米粒炒豚肉 + 蒜蓉炒菜心 ( 30-AUG-2016 )



( 30-AUG-2016  TUE )

今朝涼涼地好舒服呀   人都精神啲咁呢 ~

好耐無食餐蛋治   所以今朝想食   之後 8 卦又同呀爽又黎埋   好在佢地食得快   咁唔駛傾咁耐   哈哈 ~


菇場唔忙   但就好鬼凍呀   我帶咗張披仔肩蓋膝頭哥   咁樣無咁凍   喺菇場一定要有保暖嘅嘢   唔係會凍死 ~


Lunch time 去食生滾粥   之後周圍行下   再買埋麵包比里奧大人做早餐就番菇場喇 ~


仍然 hea 等放工   都真係唔知好定唔好   哈哈 ~

放工番屋企   浸好菜   預備好哂材料   開機洗衫再煲埋麥茶   抖陣就拖地同抹柜喇 ~

差唔多 7 點先放工   我都即煮飯 lu ~

是日懶餐 - 粟米粒炒豚肉 + 蒜蓉炒菜心  

粟米粒炒豚肉 - 之前剩番 2 條粟米   今晚要清埋去喇   用韓式醃肉辣醬炒埋 d 豚肉   成個餸甜甜辣辣又幾好味喎   呵呵 ~  

蒜蓉炒菜心 - 雖然我唔鍾意炒嘢   但真係唔想食淥菜心   同埋主要係上次睇肥媽食平啲   佢話啲煮嘢其實可以有啲新意   唔係成日都係豉汁排骨咁   嘩   我覺得佢係講緊我咁呀   因為我真係煮嘢好悶   所以佢講完之後   我都睇下啲 Recipe   睇下有口啲易整嘅新嘢囉   始終我又懶   太複雜我唔會煮架   除非假期啦   如果放工番黎都攰囉 ~

洗埋碗就抖陣   差唔多 8 點半先出去徑步 ~

呢幾晚都飲芝麻粉   咁係里奧大人沖嘅   其實只係一小匙芝麻粉 + 1 小杯水   所以佢問我飲唔飲   我實飲   難得唔駛做有得飲嘛   哈哈 ~

睇多陣電視   11 點幾都瞓喇 ~

2016年8月29日星期一

蕃茄蝦仁蜆肉扁意粉 ( 29-AUG-2016 )


( 29-AUG-2016  MON )

尋晚 11 點瞓   今朝都夠精神   感恩感恩 ~

好記得上星期六食完麥樂雞之後   個喉嚨有啲唔舒服   之後條脷都腫埋囉   連食嘢都痛   咁都諗住隔多兩日就睇醫生   但咁啱有晚早咗瞓   第 2 朝條脷真係無咁痛   咁之後都唔係話太夜瞓啦   前前後後都痛咗個幾星期   到依家條脷完全唔痛 lu   所以我依家覺得有咩唔舒服   最好治療方法就係瞓覺呢 ~

早餐食芝腿治   其實想食濕嘢   但諗起好大份就唔想食 lu ~


菇場忙下停下   話咁快就過咗半日   爽 ~

Lunch time 又未餓   所以去百佳買食物袋   又去埋萬寧行下   感恩香口膠做出位價 $12.5/2包   仲要有綠色 Airwaves   因為家姐尋日先話想要綠色呢隻味道   所以我又買咗 8 包   比 4 包佢呢 ~


我覺得依家食零食真係可以叫做貴囉   呢度 5 塊豬肉乾要 $20   下次唔會再買 lu  


再行多陣就買燒賣粉果番菇場食   開始餓喇 ~


可以 hea 住等放工   里奧大人 4 點去上環見客   咁應該同我差唔多時間番到屋企呢 ~

放工去街市買菜同雞翼   費事聽日落雨濕濕去街市呀 ~

番到屋企無耐   里奧大人就番黎 lu   見佢食 Oreo 餅乾   以為佢肚餓   佢話唔係   之後聽見佢又關柜桶   我問佢係咪好肚餓   佢忍唔住笑住話唔係呀   開柜桶拎其他嘢咋   仲話我為食嘅人先會成日開柜桶搵嘢食喎   其實我想話佢啦   我開住抽氣扇都可以聽到仍關柜桶嘅聲   駛唔駛咁大力呀 @@

7 點開餐算快喇   咁一陣可以一齊徑步喇 ~ 

是日懶餐 - 蕃茄蝦仁蜆肉扁意粉 

蕃茄蝦仁蜆肉扁意粉 - 清埋啲雜豆同堆幾隻蝦仁   再加 1/3 包蜆肉就煮到一碟意粉   其實真係好方便 ~

搞掂哂都 8 點   抖多半個鐘就去徑步   話咁就就徑咗半個鐘   今晚又涼涼地   所以徑步都好舒服 ~

沖埋涼就食車厘子   之後睇多陣電視   11 點就自己瞓先喇 ~

2016年8月28日星期日

翠河餐廳 @ 九龍灣 ( 28-AUG-2016 )

生炒排骨


南乳粗齋煲


豉汁蒸鯧魚


( 28-AUG-2016  SUN )

一覺瞓到 8 點半   其實都醒醒地   不過里奧大人未起身   咁我都懶下床   估唔到佢 9 點半都醒埋   之後佢話尋晚成 2 點先瞓   但反而仲早咗起身   哈哈 ~

里奧大人知我鍾意去靚記食早餐   話難得咁早   咁去食啦   我話其實我尋日已經食咗   不過是但啦   反正佢都鍾意食嘛   所以沖埋涼都去食早餐 lu ~


食完就去 Taste 買豬骨   夾咗 4 件西施骨   居然要 $47.8   真係心都痛埋   一包湯包都好似差唔多價錢咋   好在今次唔駛加粟米紅蘿蔔   唔係一定過百   講緊係一煲湯咋   依家煲個湯真係貴   但唔飲又唔得喎   好在之前買定啲乾螺頭   咁都唔係平   但起碼可以分幾次煲   點都平過每次 $50 豬骨囉 ~

番到屋企抖陣就番教會   崇拜完畢就即走喇   約咗家姐食 lunch ~

今次試下新開嘅亞萊泰   都唔好食嘅   之後發現佢地原來都有早餐食架   都係餐蛋麵呢啲   真係生意難做   泰菜館做埋早市 ~

泰農冬蔭功扎肉拚肉碎湯河 ($46) - 一擺上枱都覺得唔好食   全中啦   


泰農海南雞配黃薑飯 ($52) - 啲雞好多肥膏   好在個飯都好香黃薑味   但個 waitress 真係唔掂囉   佢放落我面前嘅時候   幾乎成盤嘢倒落黎咁呀   嚇到我嘩咗一聲   但佢個樣完全覺得無問題   家姐話唔明佢做咩   係都要喺我地中間夾硬放喺我面前囉


+$8 轉飲菠蘿冰 / 椰汁珍多冰 - 完全唔掂   菠蘿冰只係幾粒菠蘿+好甜嘅糖水   真係飲杯凍檸茶好過        


難得家姐又黎   咁順便拎呀 mi 嘅炸魚皮同酸薑酸木瓜比佢試   佢話啲薑好酸   哈哈 ~

咁又拎埋包之前喺 Big C 買嘅炸豬皮 share 嘛   不過"益"嘅   即掉啦   好在 50B一包咋 ~   

家姐要 2 點走呀   趕住番屋企餵狗仔   咁我送埋佢坐車   我都番屋企 lu ~

煲好湯又執下個零食柜   之後就熨衫   里奧大人就瞓晏覺 ~

差唔多 5 點幾就煲好湯   飲埋之後就去舖頭喇 ~

雪梨椰片補肺湯 (海椰片 / 雪梨乾 / 蜜棗 / 雪耳 / 南杏 / 北杏 ) - 煲出來都有 5 碗   但無咩味   好在之前買咗樽鹽咋   唔係都幾難飲下   哈哈  


今晚約埋姑奶食飯   估唔到見到 2 姑奶一家   好奇怪點解佢唔約埋一齊食   原來兒生仔唔鍾意等囉   咁又係   次次約埋一齊食飯   起碼要等佢半個鐘先食得   姑奶老公就堅持等埋先一齊食   但個仔就好餓   所以今次同個仔講明話只係一家人食先黎咋   笑死 ~

不過我同里奧大人就唔會咁等囉   食住等架咋   同埋都唔好意思坐茶記咁耐啦 ~

里奧大人問姑奶   買比佢老公果部睡眠窒息機好唔好用   佢話喎   好驚借肋部機之後   部機突然壞咗   佢會窒息喎   里奧大人即話呢啲買之前都應該知啦   唔係買咗之前先知呀嘛 ?!   咁即係唔會用啦   同埋呢部機又唔提供氧氣   點會無啦啦會窒息呢 ?!   

之後姑奶行先   里奧大人同我講話知佢姐夫一定唔用   係姑奶堅持要買之嘛   大佬   成八千蚊呀   好在呢啲機唔係要申請等有機先買咋   唔係妳買完唔用   人地有需要果啲就無得用囉 ~

食完去舖頭拎嘢   之後傾一陣計   差唔多 9 點先走 ~

即打的番屋企   里奧大人去徑步   我就沖涼休息喇 ~

之前喺曼谷買架   過咗期 2 日   所以要即食啦   以為辣辣地   點知都無咩味嘅   不過我鍾意食呢啲薯條嘅口感   但家姐同里奧大人就鍾意食薯片多啲    



今晚 11 點即瞓   我條脷腫咗成個星期呀   兩次早瞓之後條脷都無痛   所以都想早啲瞓呢 ~

2016年8月27日星期六

大阪王將 @ 九龍灣 ( 27-AUG-2016 )

香辣野菜豚肉醬油拉麵


和風炸雞五味海苔飯   今次試香辣蘑菇汁   都 ok 


元祖餃子 + 特飲 (+$30)   



( 27-AUG-2016  SAT )

今朝約家姐食早餐   所以 7 點 10 分起身喇 ~

家姐 7 點 50 分到咗   佢行路特別快   個個同佢行都會問佢係咪好趕時間 ?!   但其實佢話慣咗   咁我都明嘅   因為冰姑又係行得勁快   但冰姑係第一快   家姐只係第二快呢 ~

佢一坐低就問我   佢係咪行得好快 ?!   我話真係呀   因為我坐喺玻璃窗位嘛   突然有個黑影飛過   我都知係佢   因為之前好多人經過唔會咁囉 ~



順便比咗呢支香水比家姐   之前馬莎有 7 折就好抵   所以買支大嘅   咁佢話想要香水   咁我就比佢啦   好後悔買得 1 支   哈哈            


一路食一路傾   不過家姐要番工   我地 8 點 35 分都走喇   咁我送埋佢上車都走喇   感恩等咗 5 分鐘就有車   咁我又係等 5 分鐘後有車   感恩感恩 ~

9 點 01 分番到菇場   遲到一分鐘咋   呵呵 ~

菇場唔忙呀   上下網又傾下計   好快就放工呢 ~

今日要喺菇場附近百佳買埋啤酒先番屋企   因為得佢係 $48/6支   好在我問一問里奧大人要唔要咋   估唔到佢話要   不過驚我重   話買 4 支就夠   我話係一pack 6支架   之後我買夠 2 pack 比佢   再買 2 包紅糖   真係好重囉 @@

真係入袋前做一下深呼吸   先有勇氣拎上膊頭架   之後有電話都唔會聽   要一氣呵成行去巴士站呢    


咁要番屋企先啦   無理由拎去食嘢嘅地方   因為咁即係兩個人要拎 = 兩個人都辛苦   咁倒不如我一個人辛苦好過   反正都拎開 ~

喺屋企抖到 2 點先去食嘢   我想買牛油紙   所以去得寶食嘢 ~

依家 d 嘢真係貴到呢   1 細卷牛油紙要 $10   我真係買唔落手   所以最後都係寧願焗完灘涼   用多一倍時間就一倍時間啦   起碼唔駛錢 ~

勁餓呀   食完之後又覺得勁飽   哈哈 ~   

今次啲尖椒又係好辣   勁想同家姐黎食   不過好驚佢黎食又唔辣囉  


涼拌麻辣豬手   咁我就咁食呢盒豬手   食到大半已經好飽   但唔想又拎走   咁食埋去啦   下次都係唔好夾硬食   食完好滯囉  


水餃重慶酸辣粉 - 個湯底好酸呀   所以唔覺有辣味    


但因為好鬼辣呀   所以去食雪糕先   之後去 Taste 行下啦   咁啱睇到我正想上網買嘅 Smartech 牌字嘅吸塵機   不過好似貴過上網   所以都係番屋企睇埋價錢先買 ~


番到屋企即睇價   上網買就平 $100   但就唔知幾時先送到貨   咁我話寧願去 Taste 買   因為個職員都好好人   當幫下人囉 ~

番到屋企都抖下喇   尋晚瞓得勁唔好   今朝又早起身   所以都有啲攰 ~    

咁抖到 4 點左右真係突然間好眼瞓   一合埋眼已經瞓到   但我電話嘅東網又響一響   嚇到里奧大人即刻拎部電話入房   佢知我好難得話瞓晏覺   所以佢唔會比嘢嘈住我呢 ~   

一瞓瞓到 4 點半   爽哂呀   真係精神好多呢   呵呵 ~

6 點幾落去 Taste 買吸塵機   原來用中銀卡簽帳   滿 $500 就送一張 $50 超市 coupon   咁又好喎   即係喺 Taste 買只係貴 $50   感恩感恩 ~

呢部 "多功能迷你強力旋風吸塵機" 特價 $748 都抵   原價要 $1,498 架   仲送埋架車仔   同埋粉紅色嘅隔熱墊同大湯匙                  


買完就里奧大人拎番屋企   我就去大阪王將攞位 ~

今晚焗曲奇   食完要即番屋企喇 ~

焗呀焗   里奧大人就去徑步   咁我就沖涼先喇 ~

諗住學人整到 Mrs. Fields Cookies 嘅口感   但都唔得嘅   同埋我又用咗粗粒黃糖   點知唔溶呀   所以里奧大人同家姐問一粒粒果 d 係咩嘢來   哈哈   但佢地反而話有啲脆卜卜   口感幾得意

              
灘凍哂 d 曲奇   都差唔多 11 點   咁睇多陣電視   12 點都眼瞓 lu   但里奧大人居然話唔眼瞓   咁唔理佢喇   我自己瞓先呢 ~

2016年8月26日星期五

雙丸冬蔭功麵 + 唐生菜 ( 26-AUG-2016 )




( 26-AUG-2016  FRI ) 

呵呵   尋晚瞓得唔錯   好開心呢 ~

今朝又好想食腿蛋治   但塊方包唔新鮮囉 ~


但其我次次都會拻咗好多麵包出來   好折墜囉  


菇場唔太忙   咁就好喇   因為唔太想郁   哈哈 ~

Lunch time 出去食粥   之後去百佳買參蜜   買 3 送 1   平均 $4.2/支   咁就好抵啦   上次仲以為 $4.4/支最平添   所以又買咗 8 支比里奧大人 ~


咁我有隻智慧齒生得好入   其實有啲蛀咗   但就唔會繼續蛀落去   所以我想買小朋友牙刷   咁可以刷入啲嘛   諗住喺萬寧買支買支 $15.9 嘅用住先   好在無買住咋   估唔到清貨只買 $23/pack   仲有2支牙刷+2支旅行裝牙膏    所以即買 3 pack   真係好鍾意買到平嘢嘅感覺   哈哈 ~


條街好焗熱呀   一路行一路流汗   真係勁想番屋企沖涼囉 ~

好嘢   菇場唔忙   可以抖下   唔知係咪出咗一身汗   個人有啲攰添呀 ~

放工即番屋企   今晚要焗朱古力曲奇比家姐   點知無買到自發粉   而係買錯咗盒泡打粉   咁即去 Taste 買啦   但一包好貴   要成 $29   仲要 11月到期   我喺 759 買咗包低粉同高粉都只係 $27   反而買盒自發粉要 $29   我唔會買囉   咁再去惠康睇啦   得番特惠牌   咁 $8.9 都抵啦   中國造都照殺   反正今次係試下口感   覺得好食先再另一個牌字 ~

番到屋企差唔多 6 點 45 分   里奧大人啱啱放工   咁我整好哂 d 麵粉份量就煮嘢喇 ~
     
是日懶餐 - 雙丸冬蔭功麵 + 唐生菜 

雙丸冬蔭功麵 - 泰國嘅即食麵份量係比較小嘅   所以今晚同里奧大人講話食泰麵   佢即話要煮 2 個先夠食   如果平時佢話食 2 碗菜先夠食就好喇   哈哈 ~ 

唐生菜 - 前晚食剩   今晚一定要食埋去啦 ~

搞掂哂就抖陣   今日呀喂又比咗手信比里奧大人   係呀 mi 自家制嘅酸木瓜 / 酸薑同酸梅   仲加多包炸魚皮   發達喇   但炸魚皮真係食唔落   所以放入雪柜   咁樣就唔會林呢 ~

里奧大人好緊張打比我   話呀 mi 叫呀喂比啲嘢比我   我話我唔知喎   之後佢 send 咗張相比我   咁我就知係酸薑呢   估唔到仲醒咗包炸魚皮比我   真係好多謝笠笠同呀喂呢 33      



放好哂入雪柜就同里奧大人去馬莎買裇衫   今次抵呀   買 2 件送 1 件   買滿 $1,000 用 HKBS 卡仲有 八五折   佢買 $599 一件嘅款   原價就一定唔買架喇   依家折咗即係平均每件 $340   我覺得咁就合理喇   不過馬莎啲料又真係襟着好多   唔會洗幾洗就好霉咁 ~

9 點 10 分番到屋企   即焗曲奇喇   但無牛油紙   所以照焗 3 塊先   但我衰心急   一焗完即拎   點知散鬼哂   之後覺得真係要放涼先拎上來   咁即係要用多一賠時間   所以唔整住喇   但就再焗 1 塊試下 d味道同口感先囉 ~

最後都係留番聽日買咗牛油紙先再焗   好味就比家姐   咁叫里奧大人試食啦   估唔到佢話好味   仲問我有無多 1 塊添 ~

沖埋涼就食龍眼   之後又忍唔住執下廚柜   見到小強屍   咁我用廚房紙執佢啦   feel 到佢係脆身   因為平時一執起就搞掂   但今次係碎唒咁   即同 mi 講   佢話係部機發揮嘅作用   之後里奧大人再上網睇   話用機初期   會迫到啲強出來   聽見到驚   哈哈 ~   

整下 recipe 又睇下電視   成 12 點先瞓呀 ~