( 30-SEP-2016 FRI )
又星期五喇 聽日就 10 月 時間過得真係快 ~
早餐食腿治 以前唔鍾意食單拚架 依家覺得單拼份量啱啱好 ~
菇場忙呀又 忙到都唔知自己講咩 我叫 8 卦幫我整個 Excel 表 我只要睇我要嘅嘢就得 點知我話 "我只係睇唔要嘅嘢" 笑到佢楝眼水呀 哈哈 之後我話其實佢比咗佢個 Excel 表比我 真係幫咗我好多 我話 "你比我差好遠" 佢就特登分開講 "你比我 差好遠" 但我意思係 "你比咗個 Excel 比我 同無比我嘅話 真係差好遠 因為我做小好多嘢呢" 哈哈 ~
Lunch 食燒賣粉果 唔知幾時會食厭呢 哈哈 ~
仍然忙到嘔白泡 真係忙到知做邊樣好 @@
放工即走 忙咗成日 其實真係好在唔駛 OT 唔係真係命都無 ~
去埋 Taste 買嘢就番屋企 拖埋地再開機洗衫 之後熨 2 機衫 勁攰 ~
里奧大人 7 點 15 分放工 咁我都預備煮飯 lu ~
是日懶餐 - 蜜糖單骨雞翼 + 蕃茄螺絲粉 + 紅莧菜
蜜糖單骨雞翼 - 其實我想煎架 不過真係太攰 所以用光波爐焗就算喇 ~
蕃茄螺絲粉 - 煮完唔想食 之得唔鬼煮咁一大碟啦 ~
紅莧菜 - 好老呀 下次見咁平都係唔再買喇 又洗餐死 又老 嘥鬼哂 ~
里奧大人話約咗大姑奶聽朝 10 點半食早餐 我話下次唔好假期約佢食早餐啦 麻鬼煩 我想瞓到自然醒家嘛 之後佢話都係差唔多時間起身啫 我即刻話 雖然係差唔多時間起身 但自然醒係唔駛教鬧鐘 但約咗佢食早餐係咪唔駛教鬧鐘呢 ?! 唔好成日將兩樣嘢合埋一齊講囉 ~
洗完碗就抖喇 今晚好攰 都唔出去徑步喇 里奧大人自己出去徑呢 ~
睇埋電視 11 點幾都瞓 ~
( 29-SEP-2016 THU )
感恩呀 尋晚瞓得好好呀 唔知係咪同徑步有關呢 里奧大人話佢次次徑步都瞓得好喎 我都希望係咁啦 ~
餓呀 食奄列餐 但個奶油豬超級極度難食 根本唔係脆豬 唔知佢地邊度入貨 餐包同呢啲包都好難食 我見好多人都會走包呢 ~
菇場唔太忙 爽 ~
帶咗支雞骨草番工飲 都幾好味 我覺得都幾重羅漢果味
Lunch time 唔餓 但照食麥皮 已經過哂期架喇 唔想再擺咁耐 不過都仲要起碼食多8次先食完 慘 哈哈 ~
菇場無啦啦又忙 仲要係煩果隻 ~
忙到 4 點幾就拿拿聲食埋個雞尾包 其實唔餓 但唔想又留番聽日食 ~
放工去街市買菜 之後飛番屋企喇 ~
洗菜都洗咗咗差唔多 10 分鐘 水費貴過菜 哈哈 開埋機洗衫就抖喇 唔想晚晚熨衫 所以依家多數一熨就熨 2 機嘅衫 咁其中一晚就可以抖喇 ~
7 點幾開始煮嘢喇 里奧大人 8 點先放工 佢番到屋企 我先啱啱煮完咋 ~
是日晚餐 - 蕃茄雞扒 + 金銀蛋紅莧菜 + 炸魚皮 (外賣)
蕃茄雞扒 - 清埋星期日買嘅 4 個蕃茄 煮埋出黎好鬼多汁 真係唔想嘥 所以留番起佢 聽日整意粉 ~
金銀蛋紅莧菜 - $5 有 4 扎呀 超級勁抵 同埋冰姑成日叫我食多啲紅莧菜 但我話香港唔係成日有囉 所以今晚見到即買喇 ~
炸魚皮 (外賣) - 無啦啦勁想食 買開果檔又無開 咁去買另一檔 呢檔係有埋雲吞水餃買嘅 估唔到都幾好味 唔係剩係得個脆字 里奧大人好搞笑 我問佢好唔好食 佢話今次好食 不過無呀喂買果間咁好食 食親炸魚皮就一定聽到呀喂個名架 哈哈 ~
洗埋碗都 9 點 今晚都好想徑步 所以抖 15 分鐘就去徑喇 ~
徑下徑下 其實好快就 25 分鐘 今晚涼涼地 徑步真係好舒服呢 ~
番到屋企即沖涼 睇埋電視 11 點 40 分先瞓呀 ~
呢碗麻辣燙真係好抵食 我最鍾意佢夠多餸呢
白蘿蔔都有 3 大嚿
口水雞 - 食咗 1 件咋 又要打包番屋企 之得唔叫啦
( 28-SEP-2016 WED )
今朝里奧大人上大陸 叫佢帶埋麥茶 我都即瞓番喇 ~
7 點 45 分起身 雖然趕 但我之前醒一醒再瞓 咁再瞓多 15 分鐘 真係好好多咁呢~ ~
早餐食蛋治 啲蛋熱辣辣真係好正 ~
菇場忙呀 忙到 11 點幾就搞掂 ~
今日有 lunch box 就係前晚食剩嘅銀針粉 好在無"叔" 咋 ~
呀 mi 話飲咗雞骨草好瞓啲 我食完 lunch box 即去買喇 好似好耐無落街咁喇 其實食完落去行下 真係幾舒服 無咁飽飽滯滯咁架 ~
去藥房買雞骨草 我問點賣啦 佢只係話有 但又無講價錢同份量係點 之後又無理我 等咗陣佢叫同事拎包雞骨草出來 問我係咪要一包 都痴孖總制嘅 成包米咁大呀 睇我都唔似生咗 18 個細路啦 比咁多我做咩嘢呀 我話我邊要得咁多呀 你比兩人份量我啦 ~
買咗 $20 雞骨草同茯神 ($21/4塊) 加多個羅漢果 ($5) 依家真係乜都貴哂 前幾年羅漢果好平之嘛 買完再行一陣就番菇場喇 ~
番到菇場可以 hea 過 爽 ~
放工即番屋企 之後就煲雞骨草 洗成 10 分鐘先乾淨 洗到我呢 唔怪得媽咪果時話叫我唔好煲 要洗好耐啦 ~
好攰咁 所以都唔熨衫住 睇下電視休息下好過 ~
里奧大人 8 點番到九龍灣 好在我早啲落去搵位 估唔到今晚都幾多人呢 ~
飽到上心口 所以番到屋企抖陣就一齊去徑步 ~
9 點 15 分出發去徑步 徑 25 分鐘 我番屋企沖涼先 ~
搞掂埋煲雞骨草就睇陣電視 11 點幾都瞓喇 ~
里奧大人見到咁擺就勁開心啦 佢最鍾意食燒味飯 哈哈
( 27-SEP-2016 TUE )
又瞓得唔好添 慘啦 最衰比班賤人激一激 搞到我呢排瞓得咁差 ~
早餐想食甜嘢 咁就食奶醬多喇 ~
菇場忙呀 希望忙埋今朝就可以抖啦 ~
Lunch time 出去幫里奧大人買麵包 之後買埋酸辣米線就番菇場喇 ~
今次啲湯好杰咁 好似擔擔麵啲湯底 哈哈
抖咗陣又忙 好在忙個幾鐘就搞掂 ~
放工去 Taste 買生果 之後都番屋企 lu ~
有驚喜呀 好爽脆呢 雖然我覺得呢包 $50 好貴 但依家食完就覺得都值呢 哈哈
煲埋麥茶就可以抖陣 6 點半預備煮嘢 里奧大人 7 點放工 咁番到黎就有得食 lu ~
是日懶餐 - 焗叉燒 + 蠔油節瓜燜冬菇 + 齋滷味 (外賣)
焗叉燒 - 想整好耐 不過買唔到肥梅頭 咁星期日早去街市 所以有得買 買咗 $30 醃咗 2 晚 夠哂入味 呵呵 ~
蠔油節瓜燜冬菇 - 又係星期日買嘅節瓜 今晚一定要清 ~
齋滷味 (外賣) - 無啦啦好想食 咁就買啦 要對自己好啲 ~
搞掂完就開機洗衫 之後沖涼喇 ~
今晚食雪糕月餅 食啲甜嘢 睇下係咪好瞓啲先 ~
玫瑰朱古力 都幾香玫瑰味
以為啡色係拖肥味朱古力 點知原來唔係 餡就係雲喱拿雪糕 右邊係朱古力雪糕
睇埋電視 10 點 45 分都瞓喇 有啲攰 ~
( 26-SEP-2016 MON )
尋晚半夜咗 2 次身去廁所 下次都係 4 點前好飲湯 次次太夜飲都瞓得唔好 得不償失 哈哈 ~
有 d 餓呀 早餐要食芝腿治 ~
菇場仍然超級忙呀 完全係無停過手 ~
Lunch time 出去行一陣 買埋燒賣粉果就番菇場喇 ~
仍然超級忙 放工都未做完 咁留番聽日先做 lu ~
放工即番屋企 浸埋菜就拖地 其實成個人都散哂咁 不過都想拖地囉 之後再熨 2 機衫 里奧大人 7 點放工 我都預備煮飯喇 ~
是日懶餐 - 煎蝦卷 + 擔擔麵醬炒銀針粉 + 菜心苗
煎蝦卷 - 尋日買定架喇 今日點都清埋去 依家無啦啦好鍾意用 5 層鑊煮嘢 好似好夠鑊氣咁 其實呢隻 5 層鑊比我打入冷宮好耐 因為覺得佢好鬼重 之後買咗隻美亞鑊代替佢 上次執嘢 都係覺得用番 5 層鑊好啲 無理由咁貴買隻鑊番黎擺家嘛 寧願用到佢又殘又舊呢 哈哈 ~
擔擔麵醬炒銀針粉 - 落鑊先記得要加龍蝦丸 咁我可以做 lunch box 嘛 不過都未解凍 所以都唔加喇 留番聽晚食好過 ~
菜心苗 - $9/斤都抵 我其實鍾意食菜心苗 不過就懶 唔係咁想逐條拻花芯出黎囉 ~
搞掂哂就諗住熨埋未熨嘅西褲裇衫 點知里奧大人自己熨 咁就好喇 我可以沖涼 呵呵 ~
呢排同里奧大人都有睇 "律政強人" 都幾好睇咁 ~
今晚都幾攰 11 點唔夠都瞓喇 ~
( 25-SEP-2016 SUN )
今朝番主日學 8 點 45 分要起身喇 沖埋涼就落去食早餐 抖陣就番教會喇 ~
番主日學間房好焗呀 所以之後勁唔舒服 係咁流鼻水 好似焗傷風咁 唉 ~
我番完主日學就去街市買餸 里奧大人就同朋友媚姨番崇拜 之後佢地就 lunch 咁我唔去嘛 所以我都費事番崇拜 ~
買咗 3 日餸 諗起幾日唔駛再去街市就勁開心呢 哈哈 ~
雖然呢排我勁唔開心 但又無話好唔想煮飯喎 我覺得煮嘢食都幾開心 因為煮嘅都係自己鍾意食嘅嘢嘛 ~
番到屋企沖個涼 再飲杯 Hot Lemon 之後煲湯 再開機洗衫 ~
食埋塊多士就睇下電視 里奧大人 2 點幾番到屋企 之後話一陣約埋菜菜仔飲嘢 但就番黎買咗啤酒先 奇奇怪怪 咁不如一次出去 夜晚食完飯先番黎買啦 滕黎滕去做乜鬼 ~
感恩買到啤酒 咁番到屋企我都喺梳化瞓着咗喇 瞓咗 15 分鐘 大佬 唔好傷風呀下 ~
5 點 45 分開始煮 差唔多 6 點半先搞掂 咁我自己食先喇 想早食早休息 ~
里奧大人 7 點唔夠番到屋企 我都差唔多食哂 lu ~
是日晚餐 - 茄汁蝦碌 + 唐生菜 + 金蟲草潤肺湯
茄汁蝦碌 - $80/斤海蝦 我買咗半斤 但家姐話唔係海蝦 因為無理由咁平喎 咁食落口感係咁爽 但又唔係霉喎 咁即係咩蝦呢 哈哈 ~
唐生菜 - 加埋啲乾螺頭 里奧大人話點解咁韌 我話湯渣黎架 唔好嘥嘛 ~
金蟲草潤肺湯 - 南北行湯包好似無咩味咁 煲埋得 4 碗 正路好夠味丫 同埋我已經加咗 $10 瘦肉同 5 粒乾螺頭喇喎 奇怪 ~
里奧大人出去徑步 最衰我今日唔舒服 唔係都出去徑步 難得呢啲天氣清清涼涼嘛 ~
喺街市買咗 $20 龍珠果 媽咪好似之前都有食過 但我當時食又覺無咩味 所以唔鍾意食 但前排無啦啦好想買黎食 但見 Taste $20/pack 好貴咁 所以唔捨得買 終於今日喺街市有得買 仲要 $20 咁多添
真係好攰呀 我 10 點半都入房瞓先喇 ~
丹麥優質豚肉鍋 - 沙爹湯底
( 24-SEP-2016 SAT )
今朝 7 點 10 分起身喇 約咗家姐食早餐 好開心呢 ~
家姐 7 點 40 分左右到咗 食下傾下 話咁快又 8 點半喇 我送埋佢坐巴士先番工 感恩大家都好快有車 咁就唔駛遲到喇 哈哈 ~
菇場忙呀 其實星期六真係無 mood 做嘢 但今次啲嘢好急 唔做唔得呢 ~
放工即走 里奧大人約咗大眼妹一家飲茶 本來我都去架 因為月中星期已約好咗 點知里奧大人話佢自己約咗佢地飲茶 問我去唔去 ?! 本來我話去架 之後諗諗下條氣唔順 最後都係唔去囉 都痴 q 線 之前約好係一齊飲家嘛 依家問我去唔去 不過其實我都唔想去嘅 太耐無見 唔知講咩好 ~
諗住去 Taste 用埋張 $50 cash coupon 點知比錢先知餘數要用里奧大人張南洋卡簽 麻鬼煩 好在買得唔多嘢咋 唔係就煩啦 其實我諗住自己擺番架 但 cashier 叫我比番佢擺 咁仲好 呵呵 ~
3 點幾食埋半包薯片 再加 1 條粟米 真係夠哂飽 ~
又鹹又硬 我覺得食呢啲口感嘅薯片 會好飽肚咁呢
里奧大人差唔多 5 點番到屋企 我話今晚想去大家樂打邊爐 6 點要落樓架喇 次次打邊爐就好快無位呢 ~
去到都要等陣呀 感恩等咗 5 分鐘就有位 ~
食完再去 Taste 買嘢 但真係好鬼飽 見到零食都想反胃 咁買 1664 啤酒啦 不過 free 嘅 Tiger 啤又無貨 所以聽日再黎 如果真係無就買其他嘢 ~
番到屋企抖陣就去徑步 徑咗 25 分鐘 好舒服呀 之後里奧大人話想食甜嘢 咁就啱喇 快快手手食埋啲雪糕月餅呢 ~
家姐之前比我地架 仲比咗 6 個雪糕批 有排食 lu
沖埋涼就休息喇 睇多陣電視 又係 11 點幾瞓 ~
( 23-SEP-2016 FRI )
又 9 月尾喇 啲時間過得勁快 咁都好 好想快啲過哂 2016 年呀 ~
早餐食腿蛋治 食完就嘆報紙 我鍾意朝早睇報紙架 因為對眼清啲咁呢 次次放工番屋企睇報紙 對眼濛查查咁 都唔知係咪老花 ~
菇場仍然超級勁忙呀 不過心情唔好 做錯好多嘢添 好在最後再 double check 改番啱咋 之後咩都唔諗喇 專心工作 ~
今朝媽咪工人 whatsapp 同我講 話多謝我比佢啲褸 之後話尋晚發夢見到媽咪 話媽咪叫咗佢一聲 同埋同佢講有件褸 真係好神奇呀 ~
Lunch time 食酸辣米線 我覺得食酸辣米線會開心啲咁架 ~
又繼續忙喇 起碼忙埋聽日先搞掂呢 ~
放工去媽咪屋企拎嘢 之後再去買燻蹄就番屋企喇 勁攰 ~
呢度係 $50 當參 買咗咁多次都無問我要唔要切片 等我次次都要慢慢剪 @@
同家姐 share 就最好 太大包食唔哂 但放得耐又林 呢下最煩囉
抖咗陣就抹柜 里奧大人 7 點放工 咁今晚只係煮米粉比佢食 所以我又可以抖下 呵呵 ~
食埋洗埋就沖涼 里奧大人就去徑步 ~
睇下電視打下機 10 點半里奧大人同姑奶去滿記傾密計 唔好成日諗住自把自為 以為好掂 有時真係好多謝佢地 比我咁輕易就睇到人性最醜惡嘅一面呢 ~
今晚睇埋 viu TV 講靈界嘢 以前就好驚 依家唔驚 lu 反而想更加知多啲咁 ~
里奧大人睇劇 我差唔多 12 點都自己瞓先喇 聽朝要早起身呢 ~
上次里奧大人已經想食腸粉 但賣哂 所以今次佢第一時間即去買腸粉呢
今次魚肉嘅口感有啲霉
一碗 share 食其實最好 一個人食一碗真係太飽喇
( 22-SEP-2016 THU )
今朝里奧大人上大陸 鬧鐘響完 我即瞓番 真係好眼瞓呢 ~
早餐食奶醬多 今朝唔可以咁飽 因為 lunch box 有好大盒飯呀 ~
菇場超級勁忙 好耐好耐好耐無試過咁喇 爽 ~
見到 lunch box 咁大盒 其實真係唔係咁想食 哈哈 慢慢食 食咗 45 分鐘先食得哂 ~
仍然超級勁忙呀 所以話咁快就放工呢 ~
今晚好想食麻辣米線呀 所以都係唔煮飯 lu ~
放工番屋企 熨 2 機衫就當做運動 ~
里奧大人 8 點幾到咗 我就啱啱好開始肚餓喇 呵呵 ~
食完番屋企沖涼 抖多陣 11 點幾都瞓喇 ~
