茄汁豬扒 + 乾蔥蒜炒菜心 ( 31-OCT-2016 )

( 31-OCT-2016  MON )

尋晚 10 點半即瞓   今朝起身都 ok 精神   但其實仲係有啲攰咁囉 ~

勁想食餐蛋治   咁食啦   但食一半已經好飽   之後抖咗成 10 分鐘先再食   凍咗無咁好食   同埋感覺更加漏咁 @@

菇場唔太忙   可以抖抖 ~

Lunch time 都仲未餓   咁就周圍行下先啦   行到 1 點 15 分就買燒賣粉果番菇場食呢 ~

仍然 hea 過   同冰姑傾計   講到炸蒜 指天椒 豉油就咁撈飯都已經好好食   之後越講越餓   慘 ~

放工即走   里奧大人去大陸見客   坐直通巴番九龍灣   咁我開門啦   點知有人開門比我   果下真係有啲嚇死   無諗過佢咁快番到屋企   佢話早我一部 lift 咋 ~  

洗完米就浸菜   之後抖陣   諗住坐定定睇報紙   心血來潮走入廚房睇下啲飯仲有幾耐煲好   頂   原來無按制   又要再等多半個鐘先開飯   嗚嗚 ~

是日懶餐 茄汁豬扒 + 乾蔥蒜炒菜心  

茄汁豬扒 - 諗住煮意粉   但覺得好似送飯好味啲   所以都係煮飯呢   今次個汁又好好食   次次求求其其都好食   係咪咁邪呀 ~ 

乾蔥蒜炒菜心 - 唔係頭先傾完指天椒乾蔥豉油   我真係諗住就咁淥就算喇   攰丫嘛   但自己又真係好想食囉   所以點都要整乾蔥蒜   哈哈 ~ 

洗埋碗就陪里奧大人去拎雜誌   因為我好飽   想行下   點知里奧大人話想食雪糕   咁就去食喇 ~

約咗搬運公司 8 點黎報價   佢 7 點 55 分都到咗   傾完都 8 點幾   之後我即洗碗喇 ~

沖埋涼就休息   咁里奧大人坐梳化睇雜誌   咁我挨住佢啦   挨挨下都瞓着咗   應該瞓咗 15 分鐘   因為我記得睇哂 "喵喵星" 嘛   之後再望個鐘已經 10 點 45 分   我同里奧大人講話入房瞓先喇 ~

土司工房 @ 九龍灣 ( 30-OCT-2016 )

娘惹麵線套餐 - 材料得 2 隻蝦毛 + 半隻蛋同豆腐乾   個汁係越食越甜   食到一半已經想反胃   不過點都要食埋去啦   唉        

五香肉丁蛋公仔麵套餐 - 里奧大人話無胃口   所以食個呢個餐喎   

唯一抵讚係杯熱檸水好夠熱   

( 30-OCT-2016  SUN )

今朝 8 點電話響   里奧大人出去傾啦   其實我都醒醒地   因為諗住陪里奧大人食早餐嘛 ~

佢話改早咗半個鐘   所以唔同我食喇   話太早   瞓下好過   咁同里奧大人傾陣計   睇佢地一陣點搞 ~

佢 8 點 45 分出門口   咁我都番入房瞓喇 ~

之後佢講番   話佢最早到   佢地遲哂到   所以即話鬼佢地   等佢同唔到老婆食早餐   哈哈   其實最憎啲人係咁   話早就早啦   點知根本係原定時間   嘥鬼氣 ~

唉   個人其實係攰嘅   但又好似瞓唔到咁   咁攣黎攣去啦   再睇下個鐘原來都 9 點 20 分   我比多 10 分鐘自己   如果瞓唔到就起身喇 ~

好在又瞓到   一醒已經 10 點 40 分   咁家姐同媽咪工人會去媽咪屋企   咁我都去 lu   所以沖埋涼就去 Taste 買零食餅乾   再去美心買蛋糕比工人   之後去食早餐喇 ~

食完去媽咪屋企   工人見到我即喊喇   之後我捉佢隻手   佢將我隻手放喺佢塊臉度   感覺佢真係好掛住我咁   真係好有親人嘅感覺   但其實我都好掛住佢架   只不過我成日唔得閒囉   同埋我番完教會佢已經走人   難得今日我一個人   即去見見面 lu ~

我覺得好似幼稚園抽獎咁呀   哈哈

家姐差唔多 12 點黎到   傾到 1 點半就各自歸家喇   媽咪工人就去家姐屋企   因為家姐特登焗咗啲麵包比工人食呢   真係對我都無咁好呀   哈哈 ~

我就去埋街市買菜   再去 Taste 買豬扒同排骨   之後再買杯百香 QQ 就番屋企喇   好攰咁 ~

差唔多 3 點幾食個砵仔糕   好味道呀   煙煙韌韌最鍾意   最勁係由頭食到尾都有豆   哈哈   咁我又問家姐味道如何啦   估唔到佢語音比我話好煙韌又多豆   啲豆又好 juicy   咁就好喇   我成段嘢 send 比呀 mi   無花無假   哈哈 ~

第一次見底部都咁多豆   哈哈   所以真係食一個已經好夠飽   

好記得有次 mi 整曲奇餅比我食   我又比幾塊家姐   佢鍾意到不得了   話好好食呀   之後話 : 呀妹點解妳啲曲奇餅唔係咁嘅 ?!?!?!?!   當堂傷透了我的心 @@

睇睇下電視   原來已經瞓咗 1 個鐘呀   之後熨 2 機衫   都 5 點幾 lu   里奧大人啱啱番到屋企 ~

搞掂哂爛灘子   見到佢都攰   陰公 ~

抖到 7 點幾就去食嘢   咁我出去按 lift   聽到里奧大人關木門   之後再關鐵閘就行出黎   我話做咩唔鎖門   之後佢話無鎖匙   大鑊啦咁   居然大家都無拎鎖匙   邪再於我無帶銀包   否則我一定會銀包 + 鎖匙包一齊放入袋囉   咁唯有即問家姐喺邊啦   因為佢有我屋企鎖匙嘛   好在佢喺屋企等食飯咋   咁可以即刻揸車拎比我囉 ~

去到土司工房   咁里奧大人去拎 menu   我就搵位坐啦   土司工房有樣好   永遠實有位   咁我坐 4 人位   但見個袋仔放喺枱與枱之間   隔離張枱又布人坐   我以為係佢   將個袋仔條帶 fing 番去佢果邊   但見咁啱有個男人去 cashier 比錢   我驚個位係佢   所以我即起身   之後原來佢唔係坐我呢個位   咁我照坐番入去   一嘢 fing 開個袋仔去隔離枱   我知個女仔望住我   但我無理佢   都痴根   點會將自己個袋咁放架   不知所謂 ~

番到屋企   里奧大人即沖涼   仲諗住佢瞓   點知原來上網睇劇   哈哈 ~

我沖埋涼就休息喇   睇多陣電視   10 點半都一齊瞓喇 ~

部隊鍋 @ 阿 MI 屋企 ( 29-OCT-2016 )

準備開餐

呀 mi 買咗 1 pack 辛辣麵   食剩 4 包就比埋我   里奧大人發達喇   哈哈

旺菜

鬼馬墨魚滑 - 呀 mi 知我地鍾意食   所以又整比我食呢   好記得之前問里奧大人食唔食鬼馬墨魚滑   佢好開心話: 好呀   我無諗過佢咁大反應   哈哈  

炸魚皮 - 又係呀喂特登買架   今次好快食哂   但唔知邊個食哂   呵呵

芒果西米露配小丸子 - 勁正呀   睇番都想食

我想試真露好耐啦   所以呀 mi 話買黎飲   我睇韓劇啲人飲到好似飲水咁飲  但呀 mi 話酒精成份有 20%   好猛架   佢都飲到燒腸咁滯   比佢嚇一嚇   我都唔敢咁大啖飲   細細啖咁飲   所以我覺得無料到囉   之後佢成日話我好似雀仔飲水咁   衰啦   想我死咩   不過加咗青檸係易入口啲   呀 mi 果然夠細心

乳酪米酒 - 又係我話飲架   最緊要有呀 mi 喂包底   唔係就唔買黎飲架   因為我真係飲 1 杯仔試下味道架咋   呢隻甜甜地   易入口呀   

好開心呀 mi 鍾意呢個紙巾盒   

( 29-OCT-2016  SAT )

今朝約咗家姐 8 點食早餐   不過我 7 點 20 分都起身喇 ~

我 7 點 45 分到咗茶餐廳   家姐 5 分鐘之後就到喇   好在我早啲去咋   哈哈 ~

食到 8 點 40 分   送埋家姐搭巴士   我都飛去搭車番工喇   感恩去到有車   番到菇場只係 9 點 07 分   遲咗小小 ~

菇場忙呀   搞到 11 點左右就搞掂   諗住 hea 啦   老闆佢地又喺隔離房開門   成日都係咁   想蛇下都唔得   嗚嗚 ~

1 點即走   去鑽石山地鐵車廂 join 里奧大人一齊去荃灣   里奧大人次次同我搭地鐵   佢一定唔會企門口位   因為佢知我想坐   所以次次一見人落車就好緊張叫我去坐   有時 2 個站都會叫我坐架   好搞笑   我真係懶得咁緊要嗎 ?! 哈哈 ~

咁約咗 mi 喂 2 點 15 分喺路德圍等   我地 2 點唔夠已經到荃灣 lu   咁我地去到刀削麵店都未見 mi   所以我即去排隊等位   我無諗過咁多人食架   無耐佢地都黎到喇   見呀喂成頭汗   唔知以為佢跑黎   哈 ~

里奧大人一見 mi 就話今晚要 9 點走   其實我勁失望架   諗住最快都 11 點走家嘛   不過舖頭有突發事發生   今晚佢要同姑奶傾下策略囉 ~

我話 3 碗 share 食   因為我其實唔太餓   但呀喂係都要每人一碗   又話細碗咗好多   咁好啦   每人一碗啦   但最後得佢一個食得哂碗麵咋   勁 ~


麻辣豬扒刀削麵 / 麻辣大腸刀削麵 
麻辣牛腩刀削麵 / 麻辣燻蹄刀削麵

啲麵唔太熟   所以勁有咬口   但啲餸就好味道   好入味   有機會會再食   呵呵   

食完即去正隆行買嘢   我買 nuts   呀 mi 就陪里奧大人買其他嘢比大陸同事   買完即走   今日要爭取時間呀 ~

我只係要半磅夏威夷果仁   其他就買比家姐焗麵包   

感恩去到即有小巴   真係連個天都知我地好趕咁 ~

去到 mi 屋企   完全覺得好似去到家姐屋企咁   無拘無束   又會自動自覺開雪柜睇下有啲咩嘢飲   但又唔係飲架喎   但見到咁多嘢飲又好開心   所以我發覺自己真係好多手 ~

呀 mi 又整咗砵仔糕比我地呀   又搞到佢添   佢仲整埋比家姐添呀   勁有心   多謝笠笠 33 ~

之後到里奧大人拎個紙巾盒出來   放完紙巾入去就擺喺枱度   呀 mi 當然唔知係送比佢呢   知道之後勁開心啦   哈哈   因為 mi 鍾意米字旗嘛 ~

其實上次去完 mi 屋企之後   第晚里奧大人就問我   呢個米字旗紙巾盒好無睇 ?!   其實我知佢係送比 mi   咁我好驚訝咁問佢點解送比呀 mi ?!   佢話見到呀 mi 入紙巾嘅情況   所以想買個紙巾盒比佢   果下我勁開心啦   原來佢都會留意人地做緊啲咩呢   今次好抵讚呀下 ~               

好喇   大家抖咗一陣都唔夠   就比呀喂大爺召入書房去研究淘寶   好小咁齊心做一樣嘢   哈哈 ~

咁我又好自然摸下張書枱   成張枱都係好順滑   爽嘅   係感覺一粒塵都無   又唔會有啲位係立痴痴咁   所以我摸咗好耐   對手嘅動作係好似洗緊牌咁   真係好難想像點可以滑   我以前日日抹柜   柜面都唔會咁滑囉 ~

之後又裝下佢個櫃啲 file   入去佢房摸下瞓下張床單   勁無禮貌   哈哈   見到佢間屋咁整齊乾淨   真係有啲唔捨得走   哈 ~

我唔知點解   次次去 mi 屋企   我真係會周圍摸  盆栽枱同鞋柜面呀   雪柜門同門頂又摸下   連咖啡機隔離嘅樽蓋都會摸下   點解可以咁爽架   之前呀表話呀 mi 間屋無塵   我覺得無可能   但當去過佢屋企   好指細咁望   真係無塵架喎   但佢明明成日開窗家嘛   真係好想去佢屋企住下   睇下佢點清潔   哈哈 ~

咁呀喂同里奧大人仍然喺房唔知咩搞   我就同呀 mi 出廳傾密計   最鍾意咁   呵呵 ~

之後呀喂自己無啦啦好靜咁坐喺餐枱篤電話   咁問佢咩事啦   原來佢話里奧大人要做公司嘢   咁我地開始唱 k 喇 ~

唱到聲都拆埋   年紀大喇   真係唔可以唱快歌   追字追到死咁滯   希望唔好嚇親佢地啦   哈哈 ~

里奧大人好似 6 點左右搞掂就出廳啦   咁今晚早走嘛   差唔多 6 點幾就預備嘢喇   今次見呀 mi 成日望住個鐘   搞到我都唔好意思 ~

呢餐最開心係里奧大人   佢想食部隊鍋好耐啦   所以我話你真係要多謝呀 mi   人地特登整比你食架 ~

咁我又去廚房幫呀 mi 啦   其實我只係齋企   佢話咁快就搞掂   之後再整埋個部隊鍋   又係好快搞掂 ~

出到去   呀喂話聽歌   我話聽乜鬼   我以為佢播唱 K 嘅歌呀   咁如果開電視   我地咪傾唔到計囉   原來佢係播 MP3 歌   哈哈 ~

我其實仲未餓呀   但我見里奧大人好開心咁夾好大碗辛辣麵   佢之前都成日話最緊要有辛辣麵   其他咩都無所謂喎 ~

準時 9 點 10 分食糖水   見住呀 mi 望咗幾次鐘架喇   所以我覺得今晚係限時食飯囉 @@

咁諗住 10 點番到九龍灣   但里奧大人屋企人好多變數   所以佢 9 點半左右打比佢地   睇下駛唔駛傾   之後佢話唔駛去傾嘢   咁就好喇   我直頭好似放鬆哂添呀   哈哈   我想傾耐啲嘛   本來想唱 K 架   但里奧大人就唔係咁啱囉   咁唔緊要   繼續吹水 ~

呀 mi 成日望住鐘   其實食得唔安樂啦   真係唔好意思 ~   

好似 11 點 call 車   佢地又送我地落樓啦 ~   

11 點番到九龍灣   都真係好快   番到屋企即沖涼   再傾下計   12 點先瞓 ~

鹹蛋節瓜冬菇湯飯 + 炸魚皮 (外賣) ( 28-OCT-2016 )

( 28-OCT-2016  FRI )

話咁快就 10 月尾 lu   之後就話過年   講講下都好快 60 歲   我成日以為 60 歲就可以用兩蚊雞搭車   點知原來係 65 歲   要是行到   真係周圍去喇   我成日覺得依家車費好貴   慳食慳買可以慳   但車費好難慳   因為點都要搭車嘛 ~

今朝里奧大人早咗 10 分鐘起身   我都醒咗 lu   所以佢今朝可以去茶記慢慢嘆早餐呢 ~

咁我總站落車嘛   但到總站架車都唔停   我同司機講話有落囉   佢驚一驚啦   佢以為架車無人呀   可能我 dup 低頭篤電話   佢見唔到我囉   好在我知道自己差唔要落車啫   如果唔係就原車番去就慘喇 ~

其實唔餓   但都食魚柳餐啦   因為今朝會坐耐啲嘛   之後 8 卦又黎埋   佢食完麵餐   我份魚柳餐都仲有半份未食   哈哈 ~

菇場超級忙呀   無啦啦九萬樣嘢堆埋黎   一時間有啲接受唔到呀 ~

今日吃米粉   洗埋碗就落去行下   呢排無咩心情落街   但今日落街之後   又覺得落下街行下   鬆一鬆真係唔錯呢 ~    

咁我去萬寧買 Neutrogena 洗臉膏   番到菇場就拎番啲嘢出黎   順便拎埋啲單出黎   發覺張單係買 Loreal 嘅 Cream   咁我明明買 Neutrogena 家嘛   以為自己拎錯啦   但無拎錯喎   正想打比萬寧   之後我見到 Neutrogena 張單   妖   原來自己搞錯呀   因為我尋日買咗 Loreal 嘅 Cream   張單無拎出黎   好在無打比萬寧   唔係肉酸死啦 ~

嘩   忙到爆肺   龍王又喺度催催共   最憎係咁   所以唔鬼理佢   真係以為我服侍佢一個咁 ~

放工都未做完架   不過我都走架喇   留番聽日做 ~   

去街市買節瓜同炸魚皮   之後番屋企喇   里奧大人 4 點喺上環見客   6 點左右都番到屋企   不過我話無咁快食得   哈哈 ~

是日懶餐 - 鹹蛋節瓜冬菇湯飯 + 炸魚皮 (外賣) 

鹹蛋節瓜冬菇湯飯 - 加埋淡菜同蝦仁   真係好鬼正   我勁鍾意瓜粒湯飯   因為一鍋搞掂   唔駛洗咁多嘢   哈 ~  

炸魚皮 (外賣) - 呢檔炸魚皮真係幾好味   里奧大人話炸魚皮送啤酒好正   我話覺得好滯喎   都係薯片夾啲 ~  

搞掂哂都 8 點   開埋機洗衫就沖涼   之後休息 lu ~

又係 10 點 45 分瞓覺喇   里奧大人仲早添呀   佢呢排膝黎膝去見客   又揹住個重背囊   真係唔攰就奇咯 ~

煎鯖魚拚鴨胸 + 金菇娃娃菜 ( 27-OCT-2016 )

咁我唔食麵   食埋啲咖哩薯仔啦   飽到呢   依家見到咖哩都唔想食   哈哈 

( 27-OCT-2016  THU )

瞓得唔係咁好   早餐無咩胃口   真係要食甜嘢咯 ~

菇場唔忙   好悶咁   但有嘢又唔想做喎   衰 ~   

今日有 Lunch box   真係次次煮咖哩都要連食 3 餐   所以次次煮 1 次咖哩   之後會隔好耐先再煮   真係會食到好驚呢   哈哈 ~

仍然 hea 等放工   放工直接番屋企   估唔到呢幾晚都唔駛去街市   依家覺得食唔哂真係唔會格硬煮哂去   寧願留番第晚食好過 ~

里奧大人今日上深圳見客   6 點左右都番到屋企   咁好在今晚煮嘅嘢無難度   可以 6 點半開餐呢 ~   

是日懶餐 - 煎鯖魚拚鴨胸 + 金菇娃娃菜 

煎鯖魚拚鴨胸 - 一鑊煎哂   再一碟上哂   真係好懶呢   哈哈 ~  

金菇娃娃菜 - 終於清埋 2 棵娃娃菜   里奧大人負責食菜   我負責食金菇   我又要食埋咖哩薯仔   食到好飽   但見剩番啲金菇同娃娃菜   本來想掉   一夾起原來都剩好多菜   咁真係掉唔落手   咁做聽日 lunch box 啦   反正又剩咗幾嚿鴨胸   叮個超米又當一餐   都唔錯 ~

洗埋碗就開機洗衫   之後就沖涼休息喇 ~

今晚 10 點 45 分都瞓喇   呢排其實 10 點半都開始眼瞓   不過成日 meme 摩摩先入去瞓囉 ~  

咖哩薯仔雜丸雞膇 ( 26-OCT-2016 )

下次唔買有芝麻嘅薄餅   我又心急呢   所以好鬼易燶  



( 26-OCT-2016  WED )

尋晚半夜醒咗   之後好耐先瞓得番   慘   咁今朝里奧大人上大陸   我都可以瞓到 7 點 45 分   可以瞓多 15 分鐘真係算好好架喇 ~

早餐食芝腿治   諗住食啦   點知家姐打黎   話今次焗個麵包好好食   賣相又靚過之前喎   之後一路講一路笑   咁佢今朝焗完麵包   新鮮出爐好熱嘛   佢諗住番公司先切   但工人就話幫佢切啦   之後工人切切下突然好驚話做乜咁嘅 ?!?!   家姐又好驚咁問佢乜事   工人話點解咁硬切唔到嘅 ?!   原來家姐放埋塊搞麵粉嘅鐵片一切焗呀   嘩哈哈   其實好在焗完要切啫   如果直接放麵包入口就大檸樂啦   又會咁唔小心都有嘅   下次佢焗比我食   我會"練"下有無硬物先食呢   哈哈 ~

佢又問我食乜早餐   我話芝腿治   佢好驚訝咁問我係咪無胃口 ?!?!   我話芝腿治喎   點會無胃口呀 ?!   佢話覺得食三文治係無胃口   因為見 d 人早餐多數食麵餐喎 ~

菇場唔忙喇   可以抖下   呢排好攰   無咩 mood 做嘢 ~

Lunch time 出去食粥   菇場太凍喇   要食啲熱嘢暖暖身 ~

好嘢   仍然唔忙 ~

放工即走喇   番到屋企拎哂材料出黎   見成包薯仔出哂芽   慘   又要落番 Taste 買包薯仔 ~

搞掂哂就熨 2 機衫   真係好攰囉   分開 2 次熨   咁里奧大人差唔多 8 點番到屋企   我都預備整熱啲嘢 lu ~   

是日懶餐 - 咖哩薯仔雜丸雞膇

咖哩薯仔雜丸雞膇 - 田師傅咖哩都唔錯   因為我太多料   咁啲水要過哂啲料嘛   加得太多水   試味覺得唔辣   要加多幾隻指天椒   咁就當堂唔同哂喇   咖哩要辣辣地先好食家嘛   哈哈   咁今晚煎埋 2 塊芝麻薄餅   難煎到呢   已經慢火慢慢咁煎架喇   下次就咁買油蔥餅算喇   唉 ~ 

洗埋碗都 9 點幾   即沖涼喇 ~

真係超級勁攰   同里奧大人 10 點半即入房瞓喇   哈哈 ~ 

蜜糖焗雞膇 + 金菇娃娃菜 ( 25-OCT-2016 )

食埋隔夜湯渣   仲飽過食 1 碗飯 @@

( 25-OCT-2016  TUE )

瞓得 ok 啦   但又唔係好   始終半夜都係醒一醒囉 ~

好餓呀   食麵餐   之後 8 卦又黎埋   佢食米粉餐   我食到一半   佢已經食哂   果然超級勁快 ~

菇場忙呀   好在 12 點左右就搞掂 ~

Lunch time 去買麵包比里奧大人做早餐   咁我都順便買個菠蘿叉燒包做 lunch   之後再買啲零食比呀 mi 就番菇場喇 ~

其實唔餓   不過點都要食個包   菇場實在太靜   顯得個膠袋聲特別嘈   如果 3 點先食呢   感覺好似偷食咁架   拎個膠袋都要輕輕力咁呢   哈哈 ~

無啦啦又忙下停下   所以覺得好快就放工咁 ~

放工即番屋企   浸埋菜就開機洗衫 ~

里奧大人差唔多 7 點半就放工   咁我都預備煮嘢喇 ~

是日懶餐 - 蜜糖焗雞膇 + 金菇娃娃菜  

蜜糖焗雞膇 - 解凍咗 7 隻   但又唔想食咁多   咁焗 4 隻算喇   留番 3 隻聽晚煮咖哩 ~  

金菇娃娃菜 - 我好鍾意食金菇架   但里奧大人就唔鍾意   話"銀"胃   我話咬碎啲咪得囉   同埋我覺得就咁蘸辣椒豉油都已經好好味呢 ~     

洗埋碗   抖多陣就沖涼喇 ~

今晚 10 點 25 分都入房瞓喇   真係好鬼攰呢 ~

秋月居 @ 九龍灣 ( 24-OCT-2016 )

蟹捧壽司 / 螺肉軍艦 / 蟹子軍艦

碰碰秋月居沙律 

香蒜牛肉鐵板飯 

( 24-OCT-2016  MON )

尋晚半夜三更個喉嚨痛到呢   吞口水就勁痛   根本完全瞓唔着   里奧大人話我丫大個口瞓喎   之後我用佢金句話 "折墮啦"   徑步之後瞓得仲衰 ~

尋朝既里奧大人食芝蛋治   搞到我都好想食   哈哈 ~

菇場勁忙啦   嗚   喉嚨又痛   又勁眼瞓   真係比死更難受 ~

我最驚係發燒先兆咋   所以里奧大人叫我用念慈奄沖水飲   咁飲完之後又好啲   我又不斷食喉糖   個喉嚨真係無咁痛咁喎 ~

其實諗住 lunch time 瞓覺   不過又瞓唔到   咁去買嘢食啦   突然好想食燒賣粉果呀 ~

仍然忙呀   如果可以瞓陣再做就好喇 ~

里奧大人今日上深圳見客   咁佢搭直通巴番黎   5 點幾已到九龍灣   咁我都唔煮喇   去秋月居食嘢   估唔到依家 6 點先開舖   叫里奧大人去牛下坐住等我來啦 ~

放工即走   join 埋里奧大人就行下得寶啦   6 點即去食嘢 lu   因為我好餓呀 ~

食完番屋企   抖陣就沖熱熱水涼   當堂舒服哂 ~

差唔多 8 點幾   里奧大人諗住徑步   點知姑奶又約佢去滿記   佢話今晚把口未停過   哈哈 ~

9 點幾佢番到屋企   話要徑步喎   實在太飽喎 ~

呢排撞邪   瞓極唔夠咁   所以我 10 點 45 分即入房瞓喇   瞓得幾多得幾多   哈哈 ~  

青紅蘿蔔粟米豬展湯 ( 23-OCT-2016 )

( 23-OCT-2016  SUN )

今朝 9 點起身   沖埋涼就落去食早餐喇 ~

番到屋企抖陣就番主日學   崇拜完畢就去買啲嘢   之後就番屋企 lu ~

2 點幾食 tea   我就番屋企煲湯   里奧大人就拎嘢去大姑奶屋企 ~

我仲諗住瞓下   不過又瞓唔到   但個人又好攰   都唔知做乜鬼咁攰   唉 ~

里奧大人 4 點幾番到屋企   之後唉聲嘆氣   以為裝修有問題   之後話覺得好折墮   要咁多家姐幫手   我心諗   你家姐幫你手係應該啦   等如你去舖頭幫你家姐手   咁係咪你家姐好折墮先 ?!?!?!   都痴痴地   咁我話你多啲祈禱啦   佢居然話祈禱都無用啦   要檢討一下點解會咁樣喎   好呀   好一句祈禱都無用   我會好好運用佢呢一句   如果晴晴叫我幫手祈禱   我一定第一句話祈禱無用   妳係要檢討一下妳讀書方法呢 ~

好在我教會啲教友   個個都好正面   唔係好似里奧大人同佢啲家姐咁負面   一係怨天怨地   一係就睇錢大過天   行為又自私   所以有時同朋友講起佢地係基督徒   佢地都好大反應   真係無神論都好過佢地囉 ~

我真係好怕里奧大人成日咁多負能量   好很煩   有好多嘢我唔講出黎   係唔想嘈交   但唔好成日覺得自己係啱啦   你屋企人啱哂先得架   佢地思想長期處於 60 年代   夠膽死同我講話唔可以單獨同男仔食飯   之後再話妳成日同女仔食飯 ?! 佢係咪同性戀 ?!?!?!   我覺得佢地真係痴痴地   所以我唔會同佢地講我啲嘢架   覺得係浪費時間   佢以為地球圍住佢轉咁   可悲 ~

抖陣就開機洗衫   6 點半可以飲湯喇 ~

是日懶餐 - 青紅蘿蔔粟米豬展湯  

青紅蘿蔔粟米豬展湯 - 突然間好想飲呢個湯   所以即煲   今晚飲湯同食湯渣就算喇   咁樣都好飽呢 ~

搞掂哂去徑步   出咗一身汗都唔錯   希望好瞓啲啦 ~

沖埋涼就休息   11 點唔夠都瞓喇 ~