海逸皇宮大酒樓 @ 紅磡 ( 30-NOV-2016 )

( 30-NOV-2016  WED )

今朝里奧大人上大陸   佢唔知摷咩   摷到嘈冤巴閉   真係勁想話佢   不過依家屋企好多紙箱   摷嘢真係好煩嘅   唉 ~

瞓到 7 點 45 分   其實好似無瞓過咁   仲瞓矮頸添 @@

諗住自己一個人會快手啲   點知 8 點 05 分先出門口   趕頭趕命   所以覺得今日有啲熱呀 ~

早餐想食甜嘢   咁就奶醬多啦 ~

菇場唔太忙   我可以 load 相   呵呵 ~

Lunch time 行咗陣   之後再買車仔麵   今日食飽啲   因為今晚起碼 8 點先食飯 ~

好嘢   菇場唔忙   可以繼續 load 相   但其實揀相好攰   所以都係揀下停下 ~

今晚食婆婆生日飯   所以放工搭巴士去紅磡   6 點就到紅磡   行咗 15 分鐘唔想行   咁去麥當勞食包細薯條   再問下大食同剪髮表妹幾時到   估唔到剪髮表妹話 15 分鐘後到   丫   之得早啲問佢啦   我唔駛食薯條 hea 坐 ~

6 點半見到佢啦   話要食好味嘅辣魚蛋喎   咁一齊食啦又   之後再同佢去搵 Emoji 萬樂珠   不過都搵唔到   所以行去酒樓 lu ~

表妹又話好辣好好食   咁買 2 串魚蛋 1 串燒賣啦   都唔係好好食囉   好在表妹都話味道唔同咗咋   哈哈   不過我其實都好飽   食咗 2 粒蛋蛋同 1 粒燒賣   其實叫佢食哂去   呵呵

人未齊   又同佢去商場行下   不過無嘢行又番番入酒樓   咁啱家姐同姐夫都行緊去酒樓   我喺後面叫家姐個名   佢以為聽錯   哈哈 ~

差唔多 8 點開席   今晚除咗里奧大人同埋另一舅父舅母無黎之外   真係差唔多齊哂人呀   呢 10 年都係分開食飯   依家大細舅父破冰   大家都好開心啦   雖然佢地仲未傾計   但肯一齊食飯已經好好 ~

我地同大舅父一家坐   加埋大食同剪髮表妹   咁我同剪髮表妹坐嘛   叫佢除隻勞力士黎戴下   點知我太多肉   扣唔到呀   我同家姐話我扣唔到錶帶呀   家姐話: 得架   扣得到架   之後家姐夾硬將我啲肉必入去   係都要扣到為止   笑死我呀   嚇到表妹死死下啦   佢叫家姐比佢隻我戴   唔好整爛佢果隻   哈哈   家姐係咁架   好似好熱心幫妳整到為止   但其實咩都夾硬來   好鬼怕佢   哈哈 ~

我大表妹仲搞笑   佢話將個女傳到大舅父度   隔咗 5 個位架   佢個女又唔太跟人   咁佢一嘢抱個女去隔離大食果度   已經喊緊   但大表妹叫大食快啲傳比剪髮表妹   笑到我地死   個女喊緊架   仲點傳呀   真係當個女係公仔咁 ~

今晚我超級開心呀   全程傾計又講笑   我覺得好耐無試過咁呀   笑到連佢地都問我笑咩   笑到咁開心   哈哈 ~   

9 點 10 分食完   又係傾下傾下先走   我同家姐姐夫行番出去坐巴士   佢地九龍城轉車   我就可以直接番九龍灣 ~

番到屋企都 10 點幾   里奧大人又執嘢   我又執啦   想清哂啲嘢   依家清得幾多得幾多   因為真係想有條生路行下   哈哈 ~

11 點先沖涼   抖多陣都瞓喇 ~ 

麻酸樂米線專門店 @ 九龍灣 ( 29-NOV-2016 )

豬仇家米線 (中辣) 

有機龍崗雞 (麻辣汁) 套餐 

上湯浸生菜

( 29-NOV-2016  TUE )

呢排都係瞓到 5 點幾都醒一醒去廁所   如果一覺瞓天光就更加好呢 ~

天氣仍然凍呀   但都係着緊短袖加厚外套   都懶得拎長袖衫出黎   呵呵 ~

早餐食芝腿治   之後 8 卦又黎埋   佢成日話我唔轉另一間餐廳食嘢   我話因為呢度杯飲品夠熱   其實真係唔熱   奶茶咖啡係暖嘅真係好難飲   飲完好反胃   咁佢依家咪一樣成日黎   因為佢試過幾間餐廳呀   一係等好耐   一係好難食   哈哈   所以我話成日黎呢間係有原因囉 ~

菇場忙呀   好攰添 ~

今日一定要食車仔麵呀   唔知點解突然好想食囉 ~

菇場忙下停下   難得大粒全部出 trip   點知做唔到私人嘢 @@

放工去幫里奧大人買麵包   之後去 Taste 買埋生果就番屋企 lu ~

里奧大人 7 點半先放工   好在 lunch 食車仔麵可以頂耐啲   唉   間唔中出街食係好   但成日出街食真係幾痛苦囉 ~

突然又好想食口水雞   咁去麻酸樂啦   唔想行咁遠 ~

里奧大人食飯會比錢埋單   依家好方便啦   可以八達通   咁佢嘟嘅時候   我話唔好意思呀   又要你比   佢知我玩嘢   所以佢即刻話你比丫   我話我無帶銀包   之後佢話我呢啲人   食完飯唔比錢之餘   仲會收番佢錢   呵呵   但我買嘢都會比錢啦   唔係一個仙都唔出架噃   不過佢覺得用我錢嘅人   一定係我最鍾意嘅人   如果唔係好難用到我啲錢   哈哈 ~  

食完即番屋企喇   要開機洗衫呀   沖埋涼再執嘢   不過好快搞掂 ~

攰呀   11 點唔夠都瞓 lu ~  

丸龜製麵讚岐烏冬專門店 @ 九龍灣 ( 28-NOV-2016 )

野菜魷魚好難食   口感腍 pat pat 嘅   得粉漿咁   仲要係開到好稀果隻咁喎    

其實好想食冷烏冬   但又好想食野菜天婦羅   兩者只能揀其一   因為兩樣一齊食會好飽   唔想嘥嘢囉

就咁食野菜天婦羅又驚唔夠飽   所以食個明太子飯團   乾爭爭但幾好味   哈哈

海老天婦羅 + 炸蝦餅 + 熱醬油烏冬 (中) - 里奧大人唔鍾意食冷烏冬   唔係可以痴佢幾啖黎食都好丫

( 28-NOV-2016  MON )

嘩   尋晚瞓得唔好呀   成日驚唔知醒起身   放得太耐假就會咁   啲人可能覺得我放假之後個樣仲殘過之前   哈哈 ~

今朝都凍凍地呀   但都唔拎厚褸出黎着   因為好似之後會熱番 ~

自己食早餐有啲唔慣添   好想食熱嘢   但食唔落麵餐   所以食腿蛋治 ~

菇場忙咗陣   仲以為 hea 過啦   點知忙到爆炸 ~

次次一忙就好快餓   勁想食車仔麵   點知休息一天   咁轉食酸辣米線啦 ~

仍然忙到爆炸   放工都未做完   如果做埋  起碼 7 點先放工   呵呵 ~

番到屋企即熨衫   6 點熨到 8 點   終於熨哂 3 機衫   勁攰 ~

里奧大人 8 點幾先番到九龍灣   我叫佢諗食咩呀   佢話烏冬   咁都好   我想食野菜天婦羅呀 ~

食完即番屋企喇   抖陣就沖涼   睇多陣電視   10 點半唔夠都一齊瞓喇   今日大家都好攰   哈哈 ~

栢檔極品海南雞飯 @ 九龍灣 ( 27-NOV-2016 )

以前同糟糟食 lunch 坐呢啲位   我地話係面壁思過位   但如果一個人食呢   坐呢啲位最好   唔駛望住唔識嘅人食飯   哈哈  

( 27-NOV-2016  SUN )

今朝 10 點起身   沖涼之後就落樓食早餐   抖陣就番教會喇 ~

奶油豬好味   但咖啡係暖囉   已經小奶   但都搞到我好反胃   真係好怕飲暖嘅熱飲

里奧大人居然食番同一樣嘢   

講道完畢就走喇   番屋企拎嘢就即去媽咪屋企整嘢喇   之後家姐同媽咪工人都黎埋   突然間好熱鬧呀   好開心呢 ~

工人知我會搬   所以主動話幫我抹嘢   實在太感動   請到呢個工人   係我同媽咪嘅福氣   所以我一早已經當佢係我屋企人咁看待   佢要食嘅要着嘅要用嘅   只要同我講   我實買比佢   始終佢地人工唔多   加上又無時間買嘢   我買比佢就最好 ~

家姐話佢 12 月中要番印尼 body check   聽完之後   我無哂心機   希望佢無事啦 ~ 

同埋佢真係好唔鍾意呢個僱主   我地點勸佢都要走   不過佢個僱主真係好衰格   爛咗花灑要媽咪工人比錢換   家姐咪話工人點解唔問番僱主拎錢   唔通冷氣機壞咗   又要佢換部新咩   衰格 ~

咁家姐比咗筆錢佢   當小小心意   因為家姐驚佢無錢用   工人話唔要   佢話未必再番黎香港   可能還唔到   家姐話番黎香港先還囉   其實比得佢   都唔係要佢還啦   但唔講個"還"字   佢就一定唔會要囉 ~

3 點一齊食 tea   食到 4 點半   食完就各自歸家 ~

黑椒牛肉絲炒麵 - 味道完全唔掂呀   咁家姐坐里奧大人對面   里奧大人倒汁落鐵板   又唔叫家姐坐開啲   一倒就倒落去   嚇到家姐以為咩事   笑鬼死     

炸脾紅豆冰真係好抵食   只係 $25   

工人嘅雞翼炒麵   我實拎埋辣椒醬比佢   佢好開心呀   同佢相處咗咁耐   同佢食嘢   佢一定要有辣椒醬或者豆板醬架   無辣不歡   呵呵             

5 點番到屋企   即刻開始執嘢喇   里奧大人一路執   一路叫自己唔好再買嘢   梗係啦   買咗咁多星矢 Figure   仲要擺喺床下底添   所以買咗其實等如無買   因為都睇唔到嘅   哈哈 ~

執到有啲眼瞓   所以 7 點出去食嘢 lu   再食埋雪糕就番屋企   里奧大人做公司嘢   我就 pack 廚房嘢   好想快啲清哂廚房同廁所啲嘢   了咗心事 ~

就咁 pack 煲同碗碟都 pack 到差唔多 10 點   好鬼攰呀   所以沖涼休息喇 ~

11 點幾瞓覺   但今晚瞓唔着咁噃   次次旅行之後都係咁   起身番工有壓力架   哈哈 ~ 

大快活 + 許留山 @ 九龍灣 ( 26-NOV-2016 )

我要 4 oz   估唔到有 2 盒牛肉   定係我落錯 order 呢   因為佢有 4 oz 同 8 oz 嘛   咁 8 oz 咪有 4 盒 ?!         

雖然係泡菜湯底   但都預咗唔會辣   所以加咗啲指天椒落去   成個湯當堂辣哂呀 

今次里奧大人食臘腸雞肉飯

Jumbo 芒之丸子 - 丸子好煙韌呀   但要 $59 就唔係咁值囉   

 有芒果布甸喺底

鮮果芒果布甸 x 2 - 呢個無咩特別  

唔知係咪芒果黑糯米   姑奶去到邊間都要食黑糯米   救命

芒果糯米糍 - 都唔煙韌嘅   

( 26-NOV-2016  SAT )

今朝 10 點都自然醒 lu   沖埋涼就去食早餐   差唔多 11 點幾   集運打黎話收貨   所以里奧大人要飛番屋企收貨呢   咁我都快快食啦   佢食剩大半份早餐呀   要打包比佢食   凍咗唔好食呢 ~

等佢食完就去媽咪屋企執嘢   差唔多 3 點半先食 tea   之後再去姑奶屋企整嘢   搞掂哂都 5 點幾   一出門口凍到呢   又落埋雨   仲更加凍 ~

雖然我知今日會凍   但無諗過咁凍   等我仲着 1 pc + 風褸   真係凍到滕滕震呀 ~

番到屋企即刻換床單同窗簾去洗   我要着番條 legging 再加厚風褸先覺得暖   天氣又凍又熱   真係好易病 ~

去到放低窗簾就食嘢喇   唔知係咪太凍   個人好快餓咁   要等埋窗簾洗好都要個半鐘   咁我話去大快活打邊爐啦   連續兩日大快活   聽日里奧大人一定唔會再話去大快活呢   哈哈 ~

食完去拎窗簾   姑奶同佢朋友話去許留山食糖水   咁好啦   一齊打的番去 ~

10 點幾先走   咁喺屋企樓下等 lift 嘅時候   里奧大人好愕然指住我件風褸   話原來唔跣水架 ?!   我話唔係呀嘛   玩嘢咩   等我頭先仲唔開遮   之後佢仲指住佢件風褸   話如果跣水啲水點係會咁咁咁   頂佢 ~   

越夜越凍   好在無落雨咋   抖多陣就沖熱水涼   平時開 37 度   今晚要開 42 度呀   里奧大人反而話 42 度好熱   但我覺得好正喎   所以佢成日話我   冷氣開最凍   熱水沖最熱   我話佢講廢話   哈哈 ~

沖完熱水涼真係舒服好多呢   睇下電視   又 12 點先瞓 ~

大快活 @ 九龍灣 ( 25-NOV-2016 )

里奧大人食窩蛋牛肉煲仔飯   佢一開個蓋就話熟蛋黎嘅   咁即係呢個煲仔飯   佢地擺咗喺度好耐啦   

( 25-NOV-2016  FRI )

依家去完旅行   多數會請多一日休息   年紀大唔襟捱 lu ~

10 點起咗身   沖埋涼就落去食早餐喇 ~

食完去 post office 整嘢   點知帶漏文件   咁唔整 lu   一陣先再黎 ~

里奧大人約咗 1 點前集運收貨   點知 1 點都未到   咁唔等喇   去埋 post office 整嘢就搭地鐵去旺角拎番部 tab   搞掂哂都 2 點   因為約咗 3 點驗眼   所以食埋酸辣米線先過去呢 ~

本來我話唔食架   但係食酸辣米線又 ok 喎   因為酸酸辣辣好開胃呢 ~

去到診所啱啱好 3 點   明明 3 點先開   但我要等 3 個人先有得驗   即係早到早睇 ~

因為驗埋青光眼   要放大曈孔   所以一定要里奧大人陪我   唔係佢可以留喺屋企執嘢 ~

本來我唔想驗眼   但我發覺右眼角有嘢頂住咁   成兩個星期喇   所以真係驚有咩事   加上對眼成日濛查查   真係要去驗驗囉   無事就當買個安心嘛 ~

醫生話我眼皮炎   內分泌脂肪好多   我以為 dirty 啦   原來佢話瞓得唔好   加上我又成日喊   所以搞到對眼更多脂肪   咁教我用熱水浸棉花敷眼   每日起碼 3 次   再開埋啲眼藥水比我   埋單 $785   希望可以 claim 得番啦   哈哈 ~

睇完就搭地鐵番屋企   對眼濛查查   衰里奧大人問我見到佢有幾多隻手指   我話無手指   之後佢勁快答話好喇   下次唔駛睇   可以慳番 ~

番到屋企又 pack 下嘢咁啦   里奧大人打極去間集運都無人聽   離哂大譜 ~     

7 點幾去大快活食嘢   食完就番屋企 lu ~

沖埋涼就睇戲   里奧大人話食蛋卷   我話佢好勁   頭先話好飽   依家仲可以食得落蛋卷 ~

喺墾丁嘅恆春老街買嘅手信   唔記得幾錢 1 pack   只記得 3 pack 就平啲   但我話 1 pack 就夠   里奧大人問咗我兩次係咪只買 1 pack   佢應該難以想像我唔買呀   哈   我對太飽肚嘅零食無咩興趣   呵  

佢話口感係好鬆脆   同埋好多黑芝麻好香喎   不過我話我真係食唔落   第日我試啦   真係好味道喎  

睇完戲都差唔多 12 點   係時候瞓喇 ~