大家樂 @ 官塘 ( 28-FEB-2017 )

黑醋豬軟骨都幾好味   但啲飯好腍囉

( 28-FEB-2017  TUE )

嘩   咁就過咗個 2 月份喇   真係快到 "dum" 一聲咁喎   我覺得好似放完新年假期無耐咁咋喎 ~

今朝勁想去 KFC 㗎   不過頭先打咗好多個噴嚏   好驚作病   如果再食炸嘢   好易仲招㗎   所以都係去番茶餐廳食芝腿治算喇 ~



菇場唔忙   不過晏晝要 Pack File   所以都想抖陣先   哈哈 ~

Lunch Time 買車仔麵   再買埋麵包比里奧大人就走喇 ~

其實唔餓   不過一陣要 Pack 嘢   一定要有力   如果唔係我諗住今日食菠蘿叉燒包   唔知點解突然好想食佢呢 ~



好喇   拖咗成年幾先 Pack File   所以好想快啲搞掂   唔係西瓜一陣又嘈嘈嘈囉   煩 ~

就咁拎啲 File 出嚟   放哂喺 Conference Room 枱面   之後條腰勁痛呀   要停工喇   可能差唔多每月一到   腰好痛   所以想 Pack 都 Pack 唔到   但激死我啦   食到咁飽無得郁 ~

整下呢樣又嗰樣   好快放工   今晚唔煮喇   想休息下 ~

番到屋企即開機洗衫   熨埋衫就抖下   里奧大人 7 點幾先放工   我話去大家樂食嘢算喇 ~

食完番屋企   抖陣就沖涼喇   又話呢兩日回暖   但我仍然覺得凍喎 ~

睇埋 "千奇百趣" 就瞓喇   今日好攰   個肚開始有啲扯住咁   都應該嚟㗎喇 ~

味噌煎豬扒 + 芥蘭 ( 27-FEB-2017 )

( 27-FEB-2017  MON )

今朝起身好 OK 呀   感覺唔似星期一番工咁呀   感恩感恩 ~

無咩胃口   早餐食奶醬多算喇 ~



菇場忙咗陣就可以 Hea 過   爽呀 ~

阿 mi 買比我嘅絨毛毯   舖喺膝頭哥上面   真係暖好多呢   菇場真係好鬼凍   連我一向怕熱都覺得菇場勁凍呀   所以拖鞋都要買密頭   唔係真係由頭凍到落腳呢      

                     

好餓呀   所以 Lunch Time 出去食墨魚丸河   今次食得急得滯   食到一半   個胃有啲脹   唔敢再食喇   嗚嗚   嘥鬼哂 ~



買咗盒大樹菠蘿   之後再去百佳買 8 支參蜜   因為 $17.2 有 4 支都抵   買完即番菇場   唔係會腰斷 ~

好嘢   仍然 Hea 到放工 ~

放工去超市買餸   又買下其他嘢   之後就番屋企喇 ~

番到屋企即浸菜同醃豬扒   搞掂再開機洗衫同拖地   正想熨衫嘅時候   里奧大人打嚟話放工   原來已經 7 點 15 分   咁唔熨衫喇   要預備晚餐 lu ~   

是日懶餐 - 味噌煎豬扒 + 芥蘭  

味噌煎豬扒 - 啲豬扒已經剁咗啦   同埋我用光波爐焗   估唔到都咁鬼 "鞋"   呢碟豬扒又鹹又 "鞋"   我都同里奧大人講話唔想食由佢   我自己都頂唔順   哈哈 ~  

芥蘭 - 拻菜嘅時候已經覺得佢好老㗎喇   估唔到真係老   所以食剩大半碟呀   唉   今餐完全唔掂呀   激死我 ~

搞掂哂再沖埋涼   等埋里奧大人沖埋涼就食大樹菠蘿   佢好怕食呢樣生果   不過我話好有益   同埋唔係成日買到靚嘅   所以點都要食 3 嚿囉   好在佢肯食咋   唔係我要出絕招   就係話胃痛食唔到咁多呀   哈哈 ~

聞就好香大樹菠蘿味   但食落又無咩味喎  



睇多陣電視   11 點都瞓 lu ~

好運印尼餐廳 @ 官塘 ( 26-FEB-2017 )

加多加多 ($48) - 一睇個樣都覺得唔掂   個沙爹汁得個甜字

印尼炒飯 ($65) - 無特別   



印尼炸雞 ($75) - 炸到超級勁乾   就咁食真係好易梗親囉   所以我問佢有無辣醬   濕濕地易入口

呢個辣椒醬好辣   我食完之後覺得成身慶呀   但又無出汗喎   奇怪  



( 26-FEB-2017  SUN )

今日又大一歲喇   祝自己生日快樂   身體健康 ~

里奧大人 9 點已經醒咗   不過我話唔番教會呀   好想瞓   因為尋晚瞓得唔好呀 ~

之後我一瞓就瞓到 11 點 10 分   要起身喇   驚里奧大人肚餓呢 ~

梳洗後就即去食早餐喇   食完去買咗摺櫈   之後就番屋企 lu ~ 



番到屋企即刻再試下個 Headphone   真係勁鍾意呀   之後我問里奧大人幾時買 ?!   佢話星期五放工買㗎   唔怪得星期四嗰晚好緊張問我拎番張 Credit Card 啦   原來如此 ~

其實我之前真係好嬲佢   但收到呢份禮物   覺得佢又其實真係好緊張我   起碼佢會主動走去買禮物   又搵埋生日歌   事實佢生日   我真係咩都無做㗎   佢呢份心意   真係令我好感動 ~   

可能有時啲嘢   佢想兩方面都做得好   咁唯有犧牲我啦   希望我可以快啲放低啦 ~

第一眼睇佢外表   已經好鍾意㗎喇

終於擁有佢   真係好開心呢



我唔係 I-phone   所以只能用電話校大細聲囉      



里奧大人話咁樣影   就知佢帶緊 Headphone  

呢張我影㗎   佢話咁樣唔知佢做緊咩喎   哈哈



開心完一輪就即開機洗衫   之後熨衫   等里奧大人早啲拎去姑奶屋企   之後我再繼續熨熨熨   熨 3 機衫呀   勁攰   差唔多熨咗 2 個鐘   熨完即沖涼喇 ~

里奧大人就差唔多 3 點就番到屋企   叫佢買麥記餐 Share 食呢   咁今晚可以早啲食飯 ~

里奧大人就睇書   我就再開多次機洗衫   搞掂就揀旅行相喇   其實放假唔想望住部電腦   不過成日喺菇場揀揀下又要做嘢   我覺得揀咗成年都未揀完咁   好想快啲搞掂哂呀   哈哈 ~

里奧大人 4 點幾話瞓陣   但 5 點半一定要起身   叫我叫醒佢   不過我叫佢教鬧鐘   我驚揀到唔知時間   同埋我話瞓耐啲都得啦   最多求其食囉   佢又話唔想瞓太多   驚夜晚瞓唔到 ~

6 點左右到餐廳   睇雜誌又話好快爆場   我食到 7 點幾都唔爆喎 ~

不過唔會再黎啦   因為真係唔好食   試過一次就算喇 ~

里奧大人去埋買 2 個紅豆大菜糕就番屋企喇   咁我沖涼先   之後叫佢沖埋涼   我就煮湯丸喇 ~

其實佢講咗好多次話食湯丸   不過又驚我辛苦   一係就大家都好飽   但話今晚點都要食喎   唔想擺咁耐   仲要話一次食哂添   又唔係大粒   唔想食一半又留一半喎 ~



食完就休息喇   今晚真係有啲攰   加上又凍凍哋   真係唔多想願郁   哈哈 ~

今日不停咁開住抽濕機嘛   佢開抽濕機倒水嘅時候   好大聲話 : 嘩   好似妳咁呀   我以為佢話我成日抽水啦   點知佢話似我咁半桶水   哈哈哈哈   正衰人 ~

11 點唔夠都瞓喇   難得星期日晚有睡意呢   呵呵 ~

打邊爐 @ MIMI 屋企 ( 25-FEB-2017 )

全餃宴   阿喂就麻麻哋啦   哈哈   唔好意思   



腐皮鮮蝦卷 - $20/半磅得 5 條   真係好貴下   但又真係好好味   哈哈     



炸魚皮 x 2 - 真係百食不厭   



酸齋 / 齋鴨腎 - 呢度 $40 又抵喎   份量都好多   同埋都好味呀   阿 mi 又特登焗熱呢   我話平時就咁即食㗎咋   佢個樣好似好驚咁   哈哈 

芋角 x 2 / 鹹水角 x 2 - 仍都喺齋舖買㗎   估唔到拎到番屋企變成咁樣   芋角明明好靚仔㗎   激死我   咁齋舖職員叫我買 5 件   我問係咪平啲 ?!   佢話唔係   我估佢懶得找錢比我   因為 5 件 $20 囉   



水餃 / 雲吞各一打   魚皮餃半打 - 我真係好鍾意食餃子   放湯同蒸都鍾意㗎   但里奧大人同阿 mi 就鍾意煎   香口啲喎            



冬菜苗 - 阿 mi 浸菜嘅時候   突然問我呢啲係咩菜   我記得係冬菜兩個字   所以答佢係冬菜頭   之後阿 mi 話冬菜苗呀   哈哈   好在無叫人幫手買斤冬菜頭   唔係比人鬧死都似

3 個都動手   不過男嘅就夾嘢比自己食   女嘅就淥嘢比人哋食

( 25-FEB-2017  SAT )

今朝 7 點 25 分起身   之後里奧大人話佢都醒咗   話一齊食早餐   但我第一個反應話: 下   其實好似好衰咁   哈哈 ~

家姐 8 點左右到喇   一坐低叫完早餐又傾下偈 lu ~ 

家姐問里奧大人咁早身嘅 ?!   里奧大人答佢醒咗   我咪話囉   鬼唔知你醒咗咩   唔通你瞓住行落嚟呀 ?!   哈哈 ~ 

咁我同家姐 Share 蕃茄通粉   我哋個蕃茄通粉嚟先   家姐就叫侍應拎隻碗   之後里奧大人碗蕃茄通粉都嚟埋   家姐話以為佢幫我哋分埋   笑死我   邊有咁好服務呀   同埋同妳分到兩碗咁大喇喎 ~

家姐話我生日陪唔到我   我話我依家唔重要 lu   佢即刻話次次生日都係里奧大人陪妳家嘛   我已經忍唔住想喊   因為我好掛住媽咪   好在里奧大人即轉話題 ~

8 點 50 分走人   番到菇場又已經  9 點 15 分喇 ~

又係忙  次次星期六都忙   想 Hea 下都唔得添 ~

咁里奧大人想去荃灣睇背囊   咁我話約阿 mi 佢哋   但我忙緊   叫佢搞掂哂先同我講   哈哈 ~

感恩阿 mi 佢哋又得閒   今日又即興聚呢   開心開心 ~

忙到 11 點幾   真係覺得有啲蝕咁呀   哈哈 ~

里奧大人又坐小巴去荃灣   咁我都坐小巴喇   我真係唔鍾意搭地鐵囉 ~

諗住聽歌 Relex 下   點知無啦啦勁想喊   其實今朝食早餐已經想喊   我都知自己一定要喊出嚟   所以我都忍唔住喺小巴度大喊   今年係第一個媽咪唔喺度嘅生日   再唔喊出來   我會顛 ~

喊完舒服哂   但勁驚阿 mi 以為我同里奧大人鬧交   哈哈哈哈 ~

我 1 點 50 分落車   里奧大人已經到咗千色店 lu ~

咁約咗阿 mi 2 點 15 分   咁我同佢行陣先   睇咗啲背囊   不過唔啱心水   咁 2 點 12 分開始行去 Pacific Coffee   但迷咗路啦   最後都遲咗幾分鐘   真係唔好意思 ~

同阿喂去埋換件衫就走喇   今次食西餐   阿 mi 話去荃新天地嗰頭   對於我嚟講   荃灣區都好多商場   反而愉景新地都成日聽 mi 講   但唔知喺邊   哈哈 ~

行下傾下   啲路越行越熟面口   原來之前去稻坊都經過嘅   之後再行去餐廳嘅商場   原來我同里奧大人都嚟過嘅   我哋仲喺大家樂食下午茶   因為等去酒店接阿表呢 ~

叫埋嘢食都差唔多 3 點喇   我都有啲啲餓   今餐講明我請   因為上次屈咗阿喂同里奧大人偷錢呢   最搞笑阿 mi 話佢都有份   我話 Sorry 無佢份   佢就即同阿喂講: 無我份呀   呢餐你請我   哈哈哈哈 ~

海鮮忌廉湯 - 第一碗好鹹呀   換咗另一碗就無咁鹹   



欖油蒜片鮮蝦扁意粉 - 一上碟我話好細碟   阿 mi 就話阿喂又係咁講   又比佢入到位   哈哈   味道 OK 呀   但份量真係唔太多喎    



黑松露薯條配脆炸雞翼 - 我記得好似阿 mi 好開心話里奧大人食炸薯條呀 ?!   所以阿 mi 一定叫   因為阿 mi 要訓練佢食多啲熱氣嘢   哈哈   阿喂又話雞翼好鹹   不過我無食呀   掛住傾偈   我真係可以唔駛食咁多嘢

墨汁海鮮意大利飯 - 我食第一啖覺得生生哋   不過我唔敢講出來   驚啲男人形住係生米   之後阿 mi 食第一啖就話啲米生生哋   呵呵   阿喂就話尋日嗰間餐廳好味啲   講咗幾次   咁即係想佢食多啖都難   哈哈哈哈   



美式薄餅 (辣肉腸) - 好細件咋   1 開 4   但切到好唔平均囉   切到長方形同正方形咁      



我同阿 mi 要少奶   我覺得好飲呀   我無落糖㗎   但都可以飲哂成杯   正呀        



一路食一路傾   勁開心呀   再傾埋今晚食咩就走喇 ~

今日太即興   所以晚餐一定要非常簡單   因為想阿 mi 抖下   唔想我哋嚟又要麻煩佢呢 ~

去正隆行買話梅肉   我同阿 mi 諗住要半磅   點知半磅原來都好多   咁我同 mi 半磅 Share   咁先係 $40 咋   兩大包呀   上次喺大孖買一包細細都要 $20   阿 mi 仲話兩日唔夠食哂   咁今次呢包應該起碼食一星期喇啩   哈哈 ~

                    

買完再買餸   阿 mi 帶我去青林睇下   地方真係好乾淨   同埋 BBQ 食品真係好新鮮   如果官塘都有間就好   因為我覺得雪柜要有啲凍肉會好啲   隨時可以煮黎食   呵呵 ~

阿喂同里奧大人去買炸魚皮   我同阿 mi 就去牛丸哥哥度買蝦卷同餃類   之後一齊買埋湯丸同買菜   咁阿 mi 佢哋買燈膽   我哋喺出面等佢哋   原來隔離係齋舖   咁即問 mi 佢哋食唔食齋滷味   佢哋話食   我就買喇 ~

買完晚餐   阿 mi 佢哋去埋拎淘寶嘢   我就諗住搵表妹拎嘢   不過佢仲未番嚟   咁我都走 lu ~

之後一齊搭車番屋企   男人們整淘寶嘢   女人們就喺廚房整嘢 ~

搞掂哂   我入 mi 間房    企喺窗邊望下   之後里奧大人入嚟   佢話比我嚇死   問我做咩無啦啦企咗喺度   哈哈哈哈   的確係幾恐怖嘅   無啦啦有個人企喺度 ~

5 點半開局   今次每人做莊 20 舖   但今次個個都好難中呀   阿 mi 話換咗隻大碗   咁平均啲   所以今次真係要諗   阿 mi 舖舖合埋眼口 "up up" 先擺   笑死我   哈哈哈哈 ~

阿喂做莊   買定嚟手



阿喂 7 點話餓呀   咁我哋都預備晚餐 lu ~

傾下食下   好快又 9 點幾   洗碗埋又開局喇 ~   

阿 mi 話食完餐飯做莊果然唔同   哈哈哈哈   佢做莊啲小動作真係笑死人   哈哈 ~

但阿喂真係輸哂之前贏嗰啲籌碼呀   所以阿 mi 就串佢   要用老本喇 ?!   嘩哈哈哈哈 ~

里奧大人成日叫我同 mi 買大啲   幫補下佢喎   哈哈  鬼咩   佢贏我地兩個都係得 $400   但阿喂舖舖買 $1,000   即係要比多 $600 出來  呵呵   咁不如叫阿喂買細啲好過啦   哈哈 ~

輸剩 $29,800 咋   我覺得自己係有出無入   雖然贏咗幾舖   但真係 $1,000 都無呀   慘  



里奧大人做莊呀   阿喂次次都好大揀啦   所以我成日話我唔想做莊呀 



玩下笑下   里奧大人手機鬧鐘響   原來已經 11 點喇   係時間走人喇 ~

今次我贏咗 $9,800   全靠里奧大人臨尾一舖賭 2 萬   呵呵 ~



Call 埋車   等多陣就落樓喇   一落樓先知頭先落咗雨   所以更加凍呢 ~

上到的士先醒起唔記得計食飯錢呀   今次太失策喇   唉 ~

里奧大人又同我訓話   話成日要人哋陪妳玩大細   人哋都唔想玩   妳下次唔好咁呀下 ~

11 點 35 分就番到屋企   拿拿聲先沖涼   因為好鬼凍呀   哈哈 ~

咁同阿 mi Line 緊   等埋里奧大人沖埋涼   原來都 11 點 58 分   咁諗住瞓㗎喇 ~

點知一到 12 點   里奧大人手機響貓貓狗狗哼嘅 Happpy Birthday   佢又同我講生日快樂   阿 mi 又 Line 同我講生日快樂   同一時間呀   真係突然間唔知做咩好   哈哈哈哈 ~

之後里奧大人無啦啦拎個 GP 電芯環保袋比我   話生日禮物   原來係 Minions   佢話好事成雙   買多隻等我開心啲喎   但我話呃人嘅   再睇張梳化真係本身嗰隻   之後佢話搞錯咗   又拎個環保袋出來   話呢個先係真   我以為佢送曲奇餅比我呀   原來係 Headphone   勁開心感動呀   因為我真係想要好耐   次次睇完聽完都話好貴   都係唔好買   估唔到佢靜靜雞買比我 ~

之後我問佢   所以今晚特登 set 時間準時走呀 ?!   佢話係呀   又話唔敢同阿 mi 佢哋講   驚佢哋唔小心講咗出嚟   哈哈   我話第個妳就驚啫   阿 mi 一定唔會啦   之後佢仲話勁驚我沖涼嗰陣   首生日歌播咗出嚟呀   話果時已經 11 點 40 分   好緊張   哈哈哈哈   唔怪得我沖沖下涼   佢問我有無事啦   其實嗰下都覺得奇怪   我同平時沖涼時間差唔多之嘛 ~

本來好眼瞓   比佢搞到我勁開心   所以又 12 點幾先瞓啦   哈哈 ~

蕃茄洋蔥黑豚肉意粉 + 蕃茄南瓜紅蘿蔔栗米湯 ( 24-FEB-2017 )

( 24-FEB-2017  FRI )

瞓得都 OK 啦   可能凍凍哋好瞓啲呀   哈哈 ~

今朝特登早啲起身   等里奧大人可以慢慢嘆早餐呢 ~

雖然早起   我都只係同平時早 5 分鐘到茶餐廳咋   今朝又食沙爹牛肉米   因為晏晝想買埋煲湯料先食嘢   要有氣力先拎到呢 ~



菇場忙呀   預咗啦   西瓜效應   哈哈 ~

Lunch Time 即出去買煲湯料   拎到腰都差唔多斷   咁買埋燒賣粉果就即番菇場喇 ~



食完又要開工喇   真係好充實呢 ~

4 點左右搞掂   終於可以抖喇 ~

放工即番屋企   滾埋個湯就開機洗衫   里奧大人 7 點幾放工   咁我都差唔多預備喇 ~

是日晚餐 - 蕃茄洋蔥黑豚肉意粉 + 蕃茄南瓜紅蘿蔔栗米湯

蕃茄洋蔥黑豚肉意粉 - 本來我想整黑椒汁   不過里奧大人話想蕃茄   但今次衰咗啦   唔記得落生抽老抽   變咗無色同無咩味   激死我   里奧大人就話清清哋 OK 呀   我話無味就無味   唔駛安慰我   因為我要改善家嘛 ~

蕃茄南瓜紅蘿蔔栗米湯 - 勁想飲呢個湯好耐喇   其實就咁食埋湯渣已經好鬼飽 ~

無啦啦又頭暈暈   都應該差唔多每月一到   咁洗埋碗就即沖涼休息喇 ~

里奧大人差唔多 10 點就食薯片飲啤酒   佢諗住拎多幾支啤酒放雪櫃   點知打爛咗 1 支   抹來抹去又吸塵   因為驚有玻璃碎   終於搞掂哂   10 點半先食得嘢   以前我一定幫佢抹呀清潔呀   依家唔會 lu ~

今晚成 11 點半先瞓   如果聽日唔駛番工幾咁好呢   哈哈 ~

住家飯 @ 姑奶屋企 ( 23-FEB-2017 )

釀三色椒 - 里奧大人麻麻哋㗎   同埋無汁   佢仲更加唔想食

我叫里奧大人唔好食黑色燶咗嗰啲   姑奶話唔怕喎   我真係頂唔順話佢   食呢啲係會致癌㗎   妳唔係唔知呀嘛 ?!   同埋唔明點解易潔鑊會煎燶嘢囉

                 

釀豆腐 - 都 OK     



釀茄瓜 - 凍咗好油   所以剩番好多   



韭菜花 - 超級勁老又多渣   



唔記得咩魚湯   但凍囉   同埋覺得有啲腥   我依家真係好怕飲佢啲魚湯

( 23-FEB-2017  THU )

尋晚瞓到好似暈咗咁   里奧大人話半夜好嘈呀   我話我完全聽唔到   我一覺瞓天光呀   仲要瞓到咁林   真係好耐無試過咁喇   感恩感恩 ~

早餐食奶醬多   我不嬲係奶醬多多醬   但今日講咗奶醬多多奶   阿姐問番我係咪奶醬多多醬呀 ?!   我先知自己講錯   哈哈   所以我覺得阿姐做嘢真係好有 Heart 呢 ~



菇場忙啦   邪爆   次次西瓜一唔喺菇場   我就實忙 ~

Lunch Time 出去食墨丸河   好在今次無脹胃咋   下次會再食   呵呵 ~

食完就行下一田   再去南北行買包杞子就番菇場喇 ~

仍然忙呀   所以話咁快就放工咁 ~

今晚遲走   去到商場都 6 點 20 分   里奧大人 6 點 50 分放工   咁好似等咗唔係好耐咁   哈哈 ~

我以前會期待一番到去有飯食   依家一番到見到一碟碟餸已經喺枱   我就覺得好驚   一定係凍哂嘅   除咗蒸魚   不過有人煮埋   我都唔出咁多聲 lu ~

但我都想話   以前我放工夠要煮飯啦   我都唔會一早煮定哂   要是咁   我好快可以煮完休息添   里奧大人做嘢辛苦   我煮嘢又唔係話好食   再加埋凍冰冰   我自己都頂唔順   就算我放入飯壺   我都唔會話特別早煮   因為我都驚飯壺唔夠熱囉 ~

今晚又落毛毛雨   又無得徑步 lu ~

沖埋涼就休息   11 點唔夠都瞓喇   好鬼凍呀   哈哈 ~