蕃茄洋蔥炒豚肉 + 西蘭花 ( 31-MAY-2017 )

( 31-MAY-2017  WED )

呢排教細咗個冷氣   反而瞓得唔好   但之前又勁凍   真係難搞喇   哈哈 ~

今朝瞓到 7 點 40 分先起身   但其實都係瞓下醒下 ~

早餐食米粉餐   其實唔餓   不過想食啲濕嘢咁囉 ~



菇場唔忙   可以抖下 ~

Lunch Time 未餓   咁菇場又凍   所以出去周圍行下   行到個身暖哂就買包番菇場食呢 ~

仍然 Hea 到放工   爽爆   留力今晚去街市買餸   哈哈 ~

菇場嘅電腦時間係 17:30   但電話就係 17:27   相差 3 分鐘呀大佬   所以我其實係 5 點 33 分先走囉   唔係大粒睇到電話   以為我早走呀   哈哈 ~

去完街市買餸就即番屋企喇   好鬼熱呢 ~

番到屋企都 6 點半   即預備喇   浸完菜就拖地   搞掂哂諗住抖啦   但無耐里奧大人話放工   咁要開始煮喇 ~

今晚到我想食出前一丁   咁益埋里奧大人都有得食   佢最開心   哈哈 ~

是日懶餐 - 蕃茄洋蔥炒豚肉 + 西蘭花 

蕃茄洋蔥炒豚肉 - 里奧大人成日包雲吞   咁我特登煮洋蔥   殺哂佢啲菌 (希望) ~

西蘭花 - 咁如果我煮麵   我就會淥菜先   之後就煮餸   最後就淥麵   要是炒餸   仲要多啲時間   所以個菜有時會凍㗎   我又開住風扇周圍吹   仲更加快凍   里奧大人話個菜凍咗   但浸落啲麵度就好食   因為啲湯熱   我心諗   你唔係因為我講完姑奶啲菜凍   你話番我呀嘛   我煮咁耐嘢   菜唔係第一次係凍   你依家先嚟講 ?!   如果係咁   你個人都幾狗下   對人唔對事   下次再係咁講   我一定會問佢係咪有心講說話比我聽呀 ?!

搞掂哂就沖涼   之後休息 ~

里奧大人依家一番到屋企   就會話今晚早啲瞓   之後沖完涼就會話我瞓喇   今晚又係播帶咁   我話你又嚟呀 ?!   佢瞓之前   特登笑住同我講: 我瞓喇   我話唔該你真係瞓先講瞓啦   唔好不斷重覆講   雖然你哋屋企人 Style 係咁   但我真係覺得好煩囉 ~   

今晚勁攰   我 10 點 50 分都要瞓覺喇 ~

臘腸豉椒臘腸蒸排骨 + 西蘭花 ( 30-MAY-2017 )

( 30-MAY-2017  TUE )

今日假期   瞓到 10 點幾都自然醒 lu   爽 ~

梳洗之後就去食早餐   食完就去超市買餸 ~



番到屋企勁喇   係咁執嘢掉嘢抹嘢   12 點搞到 2 點   咁里奧大人話想瞓   唔食下午茶   咁我無問題啦   飲埋尋日啲湯當做下午茶仲好呢 ~

佢 3 點幾起身   又再煲番熱啲湯比佢   之後我就狂 Delete 手機嘅相   因為張卡剩番 1G 比我影相咋   所以要 Delete 好多相呢 ~ 

其實我好唔想開相薄   因為有媽咪嘅相   我次次一睇   個心會即刻實哂   有時夜晚唔小心睇到   果晚我會瞓唔着架   依家有時一起身   都覺得媽咪係咪走咗呢 ?!   但定一定神   知道係事實   又會即刻想喊咁呢 ~

所以我一定要喺中午整相   咁起碼有幾個鐘頭我冷靜一下嘛 ~

話咁快就 5 點幾   我都預備喇   今日我好勞動呀   所以好快餓   6 點 20 分就開飯喇   哈哈 ~

是日懶餐 - 臘腸豉椒臘腸蒸排骨 + 西蘭花  

臘腸豉椒臘腸蒸排骨 - 豉汁一定要送飯嘛   同埋發覺真係好耐無夜晚食飯咁   所以勁想食囉   咁里奧大人今晚仲裝飯添呀   佢話個汁好食   所以想食飯   真係從來無聽過佢話裝飯㗎   所以好開心呢我 ~

西蘭花 - 以前買 2 個就淥 2 個   但有時會係夾硬食   依家醒喇   淥 1 個就夠   同埋依家好驚食得太飽   個胃會痛呀 ~

搞掂哂就沖涼   之後食生果睇電視 ~

即學阿 MI 咁切生果   一開廿四   哈哈   



咁里奧大人 10 點就瞓   但佢由 9 點半開始講 : 我瞓喇   講咗幾次   我忍唔住話佢   瞓就瞓啦   講幾十次   講到我都煩埋   如果我話瞓   我會即瞓㗎   唔會不斷係咁講我瞓囉 ~

睇多陣電視   11 點都瞓   今晚有啲攰呢 ~

辣肉腸 + 菜心 + 蕃茄粟米南瓜湯 ( 29-MAY-2017 )

( 29-MAY-2017  MON )

尋晚瞓得唔係咁好   今朝起身有啲難度   哈哈 ~

今朝去 KFC 食早餐   呢份早餐勁抵   $15 咋   又飽肚   不過就好熱氣囉 ~



菇場忙咗陣   之後可以 Hea 過 ~

Lunch 食牛什米   唔知點解突然間勁想食呀 ~


食完再去買湯料   今日好鬼熱呀   買完即番菇場喇 ~

仍然 Hea 過   但真係好攰咁   差啲瞓着添呀   但好在無瞓着咋   一枱頭見到西瓜碌入嚟   嚇鬼死   其實都 5 點 10 分啦   番嚟做咩喎 ~

放工即番屋企   煲好湯諗住抖陣   點知里奧大人放工   咁我要預備喇 ~

今晚淥福麵比里奧大人   我食餸飲湯就夠了 ~

是日懶餐 - 辣肉腸 + 菜心 + 蕃茄粟米南瓜湯  

辣肉腸 - 原來過咗期   我仲成日以為 7 月先到期   仲有 1 Pack 要快啲清埋去喇 ~

菜心 - 上星期買㗎   所以今日一定要清埋去呢 ~

蕃茄粟米南瓜湯 - 好想飲湯   呢個湯最方便   食湯渣又飽   哈哈 ~

搞掂哂就拖地   之後即沖涼喇 ~

睇多陣電視   又同冰姑傾下偈   成 12 點先瞓呀   好在聽日放假   呵呵 ~     

八方雲集餃子專門店 @ 官塘 ( 28-MAY-2017 )

( 28-MAY-2017  SUN )

今朝 8 點 45 分起身喇   沖埋涼就去一粥麵食早餐 ~





番完學再崇拜   上次番主日學無食早餐   個人好似好攰咁   咩都入唔到腦   但今次食咗早餐先番主日學   真係精神好多   聽嘢都有心機呀   哈哈 ~

今次番學又有得着   再次聽到話我哋嘅祈禱   唔係樣樣都要神去成就   而係在當中學習順服   其實我都係咁   同埋每日一定會感恩祈禱   仍都相信神嘅美意 ~ 

呢大半年   我真的生命跌倒啊   我真的緊緊依靠神   每樣唔愉快嘅事情   都當係一個磨練   一個學習嘅機會   但其實我有啲係做唔到嘅   因為知道啲人係點樣對我   我真係好難接受呢 ~

崇拜完畢就走喇   約埋姑奶去佢屋企整嘢 ~

整到差唔多 3 點   之後即去食下午茶喇 ~

食完就去官塘廣場買手機電   之後去駱駝漆拎淘寶嘢   搞掂哂就番屋企喇   話咁快又 5 點 lu ~

之前喺淘寶買㗎   十幾蚊人仔   勁抵玩

搓到阿 BOB 咁鬼樣   哈哈哈哈

                

頭先坐架小巴   Chok 到我好唔舒服   頭又作痛   真係第一次咁呢 ~

抖咗陣   無啦啦仲好攰添呀   居然由 6 點 20 分瞓到 6 點 50 分   平時一定唔會呢個時間午睡㗎   好驚夜晚瞓唔到囉 ~

瞓醒就好好多喇   但未餓   所以 8 點幾先去食嘢 ~

沖埋涼   睇埋電視   里奧大人仍然唔太舒服   佢 10 點都瞓 lu   我就差唔多 12 點先瞓呢 ~   

辣雞煲 @ MIMI 屋企 ( 27-MAY-2017 )

辣雞煲 (中少辣) - 今次要 1 隻雞   店舖分開 3 個盒裝   仲另外比一個湯底   其實呢鍋只係放咗 2 盒雞咋   仲有一盒要食完先再放   可想而知份量幾多呢   配菜又好多   件件都咁大件   真係唔吝惜啊   呢個雞煲勁好味   有機會又要再食呀   哈哈  



炸魚皮 - 阿喂必買㗎   因為知道我哋鍾意食呢   其實我哋來來去去都係食嗰啲   但我真係唔覺得悶   因為真係好味道   同埋可能真係好開心   食咩都好食咁呢



脆骨腩 - 依家真係必食   咁我唔知原來個魚頭係搭嘅   仲要收錢添   阿 MI 話街市係咁㗎   實會搭啲嘢   唔怪得啲人話人多咀   就講 "買魚呀 ?! 喺度搭咀 "   哈哈   但佢搭個魚頭比我就慘啦   我一定話唔要囉   唔係錢唔錢問題   而係我唔會煮家嘛   番到屋企真係會即掉   見到隻魚眼   覺得好恐怖呀  



明明阿喂話買雲吞同水餃   點知一開只見到雲吞同魚皮餃   我同阿 MI 以為比錯囉   但原來阿喂係無買到水餃呢   咁之後淥黎食啦   阿喂個樣好慘咁話啲雲吞好鹹   我初初以為得我係咁咋   好在我哋 4 個都覺得鹹

蝦卷 - 里奧大人話鍾意食   阿喂阿 MI 實記得   所以我成日同阿奧講   佢哋話鍾意食咩   你一定要記住   因為人哋真係成日記住你鍾意食咩啊   咁諗住就咁淥熟算啦   不過阿喂話唔香口   叫個老婆即刻去煎過

紅酒 - 一定唔係我飲啦   阿奧就飲啤酒   我飲西柚味汽水   今次最勁   總共飲咗 3 罐汽水   阿 MI 同家姐屋企一樣   又係成個雪櫃都係嘢飲   一開雪櫃勁開心架   雖然我都係飲嗰啲

( 27-MAY-2017  SAT )

今朝我 8 點半都起咗身   但就懶床   咁里奧大人可以瞓到 9 點半先醒呢 ~

9 點半鬧鐘響   沖埋涼就落去食早餐 ~





諗住 11 點就出門口   點知里奧大人無啦啦肚痛   所以 11 點 15 分先出到門口 ~

坐小巴去荃灣   諗住舒舒服服啦   點知架小巴好似無冷氣咁   好在我唔係着長袖咋   唔係成身汗都似   其實我初初以為佢停車熄匙等客   心諗呢個司機又幾好喎   點知原來真係壞冷氣   嗚嗚 ~

去到荃灣都 12 點   一落車即入千色店過冷河   咁啱見到 Milan 有啡色皮鞋   咁里奧大人試鞋   我就打比阿 MI 啦   之後有個黑影貼住我行咁   立一立眼見到把長頭髮係咁 Fing   我都估到係阿 MI 啦   但里奧大人話頭先已經見到 MI 㗎喇   哈哈   可能我掛住睇鞋呢 ~

之後同阿 MI 去正隆行買嘢先   買完再帶我地去荃灣廣場睇鞋   里奧大人自己試   我同阿 MI 就一齊試   勁開心呀   好有旅行 Feel 咁呀   咁之後里奧大人行埋嚟   阿 MI 即話對鞋 OK 呀   我仲以為佢試完鞋   過嚟望我哋咋   呢一刻我覺得冷落咗里奧大人咁呀   哈哈   唔怪得佢成日話我陪佢買嘢   其實係自己買嘢多啦   今次又買咗 1 對鞋   開心開心 ~   

阿 MI 有好嘢實介紹我食   今次就介紹咗烏酸梅同羅漢果柑桔   咁再買半磅夏威夷果仁比家姐   



我買咗 1 對鞋就走喇   原來已經 1 點 45 分   要食嘢喇   阿 MI 都應該好餓了   今次去金不換食泰菜呢   呢間坐得舒服呀   同埋我好鍾意啲燈光 ~

冬蔭公湯金邊粉 ($52) - 都好味啊   如果再辣啲就更好   



鹹魚帶子粉飯 ($57) - 阿 MI 一睇個餐牌   就話阿喂一定食燒鱔飯   佢真係咩都掛住阿喂先㗎   之後佢話食呢個炒飯   里奧大人最鍾意炒飯啦   呢個飯都好味道呀   又唔油

泰國凍咖啡 - 好飲呀   唔似茶餐廳咁濃   啱哂我
    


坐低無耐   阿喂都嚟埋 lu   咁快齊人   勁開心   因為太耐無見佢地喇 ~

今日我特登請假㗎   諗住同里奧大人同 MI 一齊行山   之後再 Join 埋阿喂放工一齊食下午茶   但後尾阿喂原來放 1 點   可以同我哋 Lunch   咁里奧大人即刻話唔行山喇   因為一行就起碼 4 點先行完   無時間傾計喎   同埋難得阿喂又放早   我聽完佢咁講都好開心呀   因為佢本身係好想行山家嘛 ~

咁阿喂同 MI 講話見到好多人排隊   阿 MI 問邊度 ?!   咁阿喂仍然話好多人排隊   阿 MI 再問邊度 ?!   成個過程我睇住   笑死我   我覺得阿 MI 好有耐性   哈哈   其實我都想知邊到多人排隊嘛   我同阿 MI 都以為佢係話一田呀   因為頭先阿 MI 同我講話一田好多人排隊呢   原來佢係講雞煲店 ~

之後里奧大人問阿喂唔知咩   我同阿 MI 即刻機關槍咁掃佢呀   笑死我   阿喂即做個拎住 AK47 掃射嘅動作   里奧大人就話佢尾音都未發完   我哋已經係咁掃落嚟   哈哈哈哈 ~

食完就一齊去街市買邊爐料   之後就去番千色店買鞋   咁因為里奧大人睇咗款   但未試   所以話唔好個個陪佢試鞋喎   咁要麻煩阿喂 MI 先去拎雞煲   之後再番嚟   咁唔駛嘥咗時間 ~

我就再買多 1 對鞋   因為只係二百幾蚊   算平喇   我之前睇親嗰啲要成五佰   我又唔係咁捨得買囉 ~

里奧大人終於喺 Milan 買到 1 對皮鞋   再喺 Mirabell 買咗 1 皮鞋 1 短靴   好在阿 MI 話千色店做緊 30 週年優惠   咁就可以再平啲咁   加埋買咗好似三千左右   拉上補下都係抵嘅   我成日覺得男裝嘢特別貴咁㗎 ~

之後再去買埋對防 UV 手襪   因為買滿 $1,500 有 Cash Coupon   所以夾埋哂所有嘢就一次過比錢呢 ~

我哋比錢嘅時候   阿 MI 喂都番嚟喇   個職員幫我地夾單計數   咁就可以拎盡啲優惠   最後拎咗 $50 Cash Coupon ~

防 UV 手襪 (特價 $49/對)   買黎去旅行用架   之前里奧大人成日叫我買   但我睇見人地嗰啲   好似貼住哂啲肉   我覺得好唔通風咁囉   今次親眼見到同摸到   個料好舒服   所以即買喇
 


咁睇完鞋   再去新秀麗睇背囊   咁阿喂拎住哂啲食物   雙手 Fing Fing 話究竟今日係 Shopping 定 Gathering 呀 ?!   笑死我   不過真係唔好講笑   幾次想買嘅嘢   都係喺荃灣買   仲要係做緊特價   今次無時間咋   唔係去埋新之城睇衫添呀   哈哈 ~

我次次買嘢   基本上都係里奧大人比錢   所以阿喂成日覺得我唔比錢   哈哈   但我話佢買多多嘢比我   都彌補唔到我心靈上嘅傷害呀 ~

買完就去 MI 屋企喇   去到 MI 屋企   真係拖鞋都未着就即刻拎嘢飲   但其實次次都係阿 MI 拎比我   我先記得有對私家拖喺度   哈哈 ~

我地真係好耐無去佢屋企   咁我問佢掉垃圾係邊個垃圾桶呀 ?!   佢話: 妳太耐無嚟喇   哈哈哈哈 ~

話時話   真係接近 2 個月無見   無計啦   里奧大人 4 月超級忙   阿喂又忙   我又唔舒服   所以真係個個 OK   我就即請假喇 ~

之前托阿 MI 幫我買嘅 6 包喉糖   一去到即比我

之前阿 MI 屋企 DIY 大工程   咁我哋又一齊 "參觀" 喇   哈哈   堅覺得阿 MI 好鬼勁   一手一腳油油同黐貼紙   連里奧大人都覺得阿 MI 好有心機同耐性   比着我 ?!   一定會叫里奧大人幫手做囉 ~

搞掂哂就各自各活動   男嘅入房   女嘅坐廳   哈哈 ~

阿喂同里奧大人就上網研究背囊   又睇下 4 骨褲   我覺得佢哋好似老表咁呀   一見就黐埋一齊   好多嘢傾咁呢 ~

咁我同阿 MI 又坐梳化傾密偈啦   衰喂一出嚟   就特登放輕腳步   同縮埋個膊頭咁行   但我覺得好好笑   硬係唔可以正正經經咁行   哈哈哈哈 ~

6 點半預備   7 點可以開餐   今晚唔開局喇   因為實在唔夠時間吹水呢   我又 10 點要走 ~

食完辣雞煲再打邊爐   估唔到份量啱啱好   好在聽阿 MI 講話唔好買菜   唔係又要留番佢哋聽晚食㗎喇   實在鍾意去 MI 屋企食嘢   因為佢哋唔會浪費食物   我哋食唔哂都唔駛驚呢 ~

一齊食一齊吹水   真係好鬼開心   最緊要晚餐簡單   唔係阿 MI 唔會坐定定一齊吹水囉 ~

食完就男人喺廳睇電視   我就陪 MI 洗碗   次次入廚房   我都會望下佢個玻璃兜有咩嘢食   哈   我都覺得自己超級勁 8 卦   我其實覺得去佢屋企   好似去我家姐屋企一樣   咩都拎嚟睇下   今次 MI 又比咗 2 包梳打餅我試下   嘻嘻 ~   

搞掂哂就食生果   喺 MI 屋企   把口唔係講嘢就食嘢   哈哈 ~

一路睇電視一路食生果   我同阿 MI 就坐地下   坐地下食嘢   感覺真係好正   咁當然要睇係邊個屋企啦   佢屋企地板咁乾淨   基本上我瞓喺度都唔驚呢 ~

阿 MI 切生果   原來佢一片片咁切嘅   我只會一開 4 咋 



話咁快就 10 點   我哋 Call 車走喇   依家我哋自己落樓搭車㗎   感覺仲唔似老表 ?!   哈哈 ~

番到屋企都即沖涼   之後抖多陣   11 點幾都要瞓覺 lu ~

百樂門國際宴會廳 @ 九龍灣 ( 26-MAY-2017 )

金裝拚盤 



百樂門一品燒雞



濃湯魚滑浸菜苗



水蜜桃鳳梨生炒骨



干扁肉欖四季豆



清蒸海石斑



( 26-MAY-2017  FRI )

今朝又好似想落雨咁   真係好唔鍾意落雨   情緒會低落   同埋整到成身濕哂   又塞車   但唔落雨又唔得喎 ~

早餐食吉列魚柳餐   估唔到 2 塊魚柳   飽到我呢   同埋感覺到超級熱氣咁呀 ~



菇場唔忙   hea 埋下星期一   所有大粒又回歸了 ~

Lunch Time 食健康餐   最搞笑我肥仔豪問我   話係咪尋日釀三寶咁 Heavy    咁今日要清清哋呀 ?!   我話唔係呀   我以為今日會落雨   所以買咗支乳酪   咁咪做埋 Lunch 囉 ~

         

好嘢   仍然 Hea 到放工   今晚同里奧大人屋企人做節   都唔明端午節有乜好做 ~

放工去德福行下   好在我咁啱想去莎莎買指甲油   之後又行下 MP   但真係好攰又好凍   所以要坐下公園呢 ~

里奧大人 6 點 45 分放工   之後一齊去百樂門喇 ~

7 點食到 9 點   又係講番幾十年前啲嘢   又係不斷重覆又重覆   錄音機咁   真係得佢哋樂在其中   大佬   講到我都識背喇 ~

咁我仲係咳嘛   姑奶話我真係病壞   佢講 2 次   我都費事彩佢   佢做社工真係死得人多   唔問候都算啦   仲咁樣講嘢   我家姐次次一聽到我咳咋   就好緊張問我仲咳嘅 ?!   真係親疏有別 ~

打的番屋企   之後即沖涼 lu ~

今晚 11 點都瞓喇   聽朝 9 點半要起身呢 ~

嘉興糉 + 菜心 ( 25-MAY-2017 )

啡色原來係美心嘅嘉興糉   係鹹咗啲   但糯米好煙韌呀   唔似食糉   哈哈   其實我初初以為係梘水糉   我一剪開見有豬肉   即係鹹糉啦   里奧大人仲搞笑   一見到啡色就話留番最後食   因為係甜嘅





( 25-MAY-2017  WED )

今朝都幾好天   有少少陽光咁呢 ~

早餐食奄列餐   食到好飽呀 ~



菇場唔太忙   又繼續寫 Blog ~

Lunch Time 未餓   咁周圍行下   行到 1 點就買嘢食番菇場喇 ~

仍然 Hea 過等放工   爽爆 ~   

番到屋企即抹櫃   自從咳完之後   個人都仲未回復最佳狀態咁   定係個人濕重呢   硬係好攰咁 ~

唔想成日記住仲有糉   所以一次煮哂 3 隻糉   同埋襯新鮮好食埋佢喇   哈哈 ~

最勁係真係食得哂   菜心都食哂喎   依家我食嘢真係要慢   今餐仲要糯米   所以仲要咬碎啲先吞   用多咗時間食呀   哈哈 ~

洗埋碗都 9 點半   之後即沖涼喇 ~

睇多陣電視   11 點即瞓覺   因為好攰咁呀 ~ 

翠河餐廳 @ 官塘 ( 24-MAY-2017 )

梅菜扣肉 - 啲五花腩肉好 "鞋"   好似食緊瘦肉咁



魚香茄子煲



( 24-MAY-2017  WED )

今朝里奧大人上大陸   但出面落好大雨呀   睇嚟有排落了 ~

7 點半起身   唔夠 8 點出門口   點知等車等咗 20 分鐘   之後又塞車   差唔多 9 點先落車   咁就買芝腿治番菇場食算喇 ~



菇場忙下停下   大粒唔喺度   個個 Hea 住過   爽 ~

Lunch Time 出去買車仔麵   食到一半已經唔想再食   同埋飲一啖凍鴛之後   個頭即刻痛   唔知做乜鬼   唔好又病啊 ~



仍然 Hea 過   放工即番屋企 ~

好攰呀   里奧大人又唔知幾點番到嚟   咁我都唔煮喇   休息一下 ~

今晚即刻食番粒 Panadol   真係唔敢再吽到好番喇   自己攞嚟辛苦 ~

里奧大人可以 8 點幾番到屋企   咁就一齊去食嘢 lu ~

食完都即番屋企喇   之後即沖涼   食埋沙律就休息 ~

今晚都攰呀   11 點唔夠都瞓喇 ~