2017年7月31日星期一

大雜會 + 粟米 ( 31-JUL-2017 )




( 31-JUL-2017  MON )

尋晚 2 點幾聽到滴滴聲   都心知不妙   原來又係冷氣機滴水   起咗身整完一輪都瞓番   但瞓得唔好啦   唉 ~

瞓到 7 點 45 分先起身   但都唔係咁精神   哈哈 ~

今朝諗住飲咖啡提神   點知杯咖啡好怪   同平時唔同   咁最後換咗杯奶茶少奶   點知都唔係囉   但唔換啦   咁我明明話要芝士吞拿魚烘底   佢又無烘   咁就要換啦   我問 8 卦我有無講烘底 ?!   佢話我有講烘底呀   呢朝咩事呀 ?!

 
菇場忙咗陣就可以 Hea   之後 8 卦無啦啦講話唔再去頭先果間食早餐   我話做咩咁決絕 ?!   佢話個身成陣油煙味   我話頭先搭 Lift 已經講咗啦   同埋之前都話有   但你係都要我陪你之嘛 ~

Load 下相   好快又到 Lunch Time   好鬼餓咁呀   所以好想食酸辣米線   哈哈 ~

今次要中辣   又幾辣咁喎   不過好耐無食米線   覺得自己好大食   下次都係唔好搞 lu ~



菇場唔忙   繼續 load 相 ~

放工即走   見唔餓就去徑步先啦   徑咗 20 分鐘   之後里奧大人話師傅一陣會到   咁我都即上樓喇   今朝 Call 個師傅又話一陣覆   嗰個一陣等咗成日啦   不過今晚嚟都好   始終都想知咩事嘛 ~

佢 6 點 40 分整到 7 點   話部機安裝嘅時候一高一低   水係向低流   所以幫我整高咗少少   希望唔會再漏   我心諗   上次夠漏啦   又唔見你咁講   暈暈哋呢 ~

之後我即拖地   搞掂哂就蒸熱啲餸   尋晚食剩太多   今晚要食埋去   加多條粟米   不過原來食唔落   一陣再食   哈哈 ~

抖陣就沖涼   差唔多 9 點先食條粟米   激死   之得唔淥啦   但果下驚自己唔飽嘛   唉 ~

食食下嘢   家姐打電話嚟   話遲啲同埋剪髮表妹一齊同婆婆食飯   咁無問題啦   之後 Whatsapp 比表妹啦   佢話好呀   但唔好咁快約阿婆   我差啲噴嘢   但家姐唔知咩事   表妹話今晚約咗阿婆   阿婆就會日日打嚟問㗎   笑死我   其實個個都好驚婆婆咁囉   日日打嚟問同一樣嘢   就算話咗去旅行   佢都會日日打來   救命 ~

睇下電視   同冰姑傾下計   話咁快就 11 點   叉埋電就瞓喇 ~

2017年7月30日星期日

煎杏鮑菇 + 酸梅麵豉蒸排骨 + 福花 ( 30-JUL-2017 )








( 30-JUL-2017  SUN )

今朝 10 點半左右起身   梳洗之後就去食早餐喇 ~





食完去買黑木耳同山渣   買完即番屋企   因為好想大掃除呀 ~

里奧大人 12 點半出咗去   咁都好   唔好阻住哂 ~

清潔咗 2 個幾鐘   廚房廁所都清潔埋   感覺成間屋戾乾淨哂咁   恨恨清潔一次   咁真係唔駛成日再大清潔咁架 ~

沖埋個涼又睇電視   3 點左右飲碗湯   食湯渣真係好飽   好在只係紅蘿蔔同粟米 ~

又係時候郁下喇   咁就熨下衫啦   之後執衣柜   仲有一半未執   搵晚再執 ~

里奧大人好似 5 點半番到嚟   咁我又話整熱啲湯佢飲先   唔係一陣又話食唔落飯   麻鬼煩 ~

今日真係好焗熱   煮完飯都成身汗   老實講   真係無可能一坐低就食   要抖下先可以食囉 ~

是日懶餐 - 煎杏鮑菇 + 酸梅麵豉蒸排骨 + 福花

煎杏鮑菇 - 想煮呢個餸好耐   終於動手啦   咁我有一兩塊係切厚咗   咁里奧大人一食就話好韌   我話叫佢咬耐啲囉   咁我食又唔覺韌   原來佢夾咗厚身嗰塊   唔怪得啦 ~

酸梅麵豉蒸排骨 - 夏天好想食酸咪咪嘅餸   無啦啦又好想食排骨   咁就煮呢個啦   今次買 $20 腩排   但里奧大人話飲完湯好飽   樣樣食好少   我又唔餓   所以又剩番好多隔夜餸   嗚嗚 ~

福花 - $6.5 咋   所以買黎煮囉   呢個菜好似都有益架 ~

洗完碗就沖涼   本來諗住徑步出汗   但洗完碗已經成身汗   所以都係唔出 lu ~

抖陣就食木瓜   之後睇下電視   11 點都瞓喇 ~

2017年7月29日星期六

南瓜粟米紅蘿蔔豬骨湯 ( 29-JUL-2017 )

冰姑每晚嘅晚餐   都會見到有碟炸蒜辣椒豉油   次次我一見到就覺得好吸引   久而久之   我依家都成日整碟辣椒豉油   但就無炸蒜囉   同埋我唔會食啲指天椒落肚㗎   好辣呢   哈哈



( 29-JUL-2017  SAT )

今朝同家姐食早餐   同佢食早餐最好   食唔哂佢包底   哈哈 ~





食下傾下   咁佢話尋日陪糟糟去 SuperDry 買 2 件 Ttee   咁家姐都買咗件風褸   原價要千幾蚊 1 件   咁佢地買 3 件有 7 折   所以都係二千唔駛就搞掂 ~

咁糟糟比錢嘅時候   Sales 又話買多 2 件只係比多 $273   咁家姐又買啦   之後買完再計數   Sales 又話買多件只係加百幾   糟糟一聽到就話又要買多件 ?!   咁梗嚇死佢啦   佢簽卡嘛   不過家姐都照買   百幾蚊件 tee   依家好難搵嘛   所以依家只係好似 $1800 左右買咗 5 件 Tee 同 1 件風褸    咁就抵爆啦   明明諗住千幾蚊只係 2 Tee 1 風褸   依家買到 6 件喎   呵呵 ~

到家姐比番 $1,500 佢啦  佢又話 $1,000 得   咁梗係   次次同家姐食飯都係家姐比錢   佢仲賺緊   哈哈   不過佢都好錫家姐嘅   好多時去旅行都會買手信比家姐   見辣椒油好味又買比家姐咁   佢叫我家姐做家姐添㗎   叫蝕哂   哈哈 ~

我成日都話家姐個樣係比人蝦嘅樣嚟㗎   因為對眼唔夠惡呀   我唔笑個樣係惡   但佢唔笑個樣都唔係惡囉   咁家姐都話   佢同事尋日先同佢講   睇妳個樣都係似比人蝦㗎喇 ~      

8 點 45 分又番工喇   好在等咗 2 分鐘就有車   感恩感恩 ~

菇場唔忙   咁就好喇   星期六真係好唔想忙囉   無 Mood 做嘢   哈哈 ~

家姐比我㗎   佢話佢同事喺加拿大買平好多呢



放工即走   去街市買餸   今日勁焗熱呀   買完餸出嚟   成身汗 ~

番到屋企抖陣   嘆夠冷氣就出去食下午茶   原來都 3 點 lu ~


每樣食到一半已經好飽   其實我想食薯條多啲囉   感覺無咁飽肚  



食完就番屋企煲湯   啲汗係咁流呀   咁里奧大人今晚唔番來食   我唔駛煮飯   食湯渣都夠飽咯 ~

搞掂哂就休息   眨下眼又 6 點半   係時候開餐喇 ~ 

是日懶餐 - 南瓜粟米紅蘿蔔豬骨湯

南瓜粟米紅蘿蔔豬骨湯 - 其實想煲老黃瓜   不過街市得番啲細細條嗰啲   所以唔買喇   咁煲南瓜都好丫   啲湯渣健康又飽肚   哈哈   今次醒喇   記得係買煲湯排骨   好味好多㗎   啲肉起碼係腍囉   買 $40 都唔係好多嚿咋   始終骨重嘛 ~

食完抖陣就出去徑步半個鐘   勁焗熱呀   不過流一身汗真係好正   我指做運動嘅時候   因為我期望係出汗嘛   但煮飯出汗就唔多鍾意啦   哈哈 ~

番到屋企即沖涼   由熱變暖再凍水   勁正   因為真係實在太熱喇 ~

沖完涼見到里奧大人   嚇鬼死   咁整番熱碗湯比佢飲   我都休息 lu ~

依家多數喺電視睇 VIUTV 之前啲節目   真係幾好睇喎   可能見到啲人有新鮮感啦   哈哈 ~

今晚自己 11 點幾都瞓先喇   出咗一身汗真係比較攰啲咁呢 ~      
 

2017年7月28日星期五

灑家 @ 官塘 ( 28-JUL-2017 )

流汁叉燒包 - CC 話想食   都好喎   我都好想食呀   哈哈       



爽脆鮮豬潤湯麵 - 咁 CC 想食豬手麵   我個樣係 "咦'   但都可以食   不過唔食有手指位部份   佢話唔知出嚟係咩部份㗎喎   咁又係   咁我話手指位我唔咬囉   妳叫啦   之後佢就話   其實我哋食嘅嘢係完全唔同   哈哈哈哈   都係㗎   頭先我話食豬肚   佢即刻 "咦'   我唔食㗎   



鹹菜胡椒豬肚湯 - 咁我落胡椒粉嘛   CC 話個湯好辣   妳飲下辣唔辣先落啦   但我覺得飲到最尾嗰幾啖   有胡椒粒就辣辣哋囉   可能佢喉嚨唔舒服   同埋本身唔食辣呢   佢同 8 卦都食得好清好清

 

鮮豬潤肉丸粥 - 個粥底都好杰   肉丸好濃味   係咪有鹹魚定咩呢 ?!   唔記得添   但就唔係豬肉嘅濃味   都好食喎  



( 28-JUL-2017  FRI )

今朝無咩胃口   可能感冒未清哂 ~




菇場好忙啦   諗住西瓜唔喺度可以 Hea 過   天呀   點解呀 ~

Lunch Time 唔餓   又食健康餐   呢隻綠茶味有紅豆粒   雖然得幾粒   但食完真係好飽飽滯滯咁   下次都唔好再買綠茶味喇 ~




仍然忙呀   所以好快放工咁 ~

今晚約咗 CC 食飯   佢就嚟生日   所以我話請食生日飯呢   我話同佢去酒樓食啦   一定唔會比人趕   佢話兩個女人去酒樓食飯好老餅咁   所以係都要話去灑家 ~

我 6 點 15 分左右到   之後無耐佢都到喇 ~

佢離遠見到我時   我見佢 O 咀   以為佢覺得我咁早到啦   之後佢一坐低就話 : 妳靚咗呀 ~

笑死我啦   我話係咪搽咗唇膏呀 ?!   佢話根本唇膏只係薄薄一層咁搽   同埋好淺色   之後叫我抹咗去   咁我即抹   佢話真係靚咗呀   我話咩事呀   阿 mi 又話我容光煥發   但我無食太太口服液喎   可能染咗髮   個人精神咗就真呢 ~

咁好搞笑囉   其實之前同 CC 傾開偈   咁佢知我發生咩事嘛   所以好鬼擔心我   點都會出嚟食飯   但就要睇佢細佬番唔番媽咪屋企食先   佢細佬咁啱唔番   所以即同我食   但其實我邊晚都無所謂   最緊要佢得閒啫 ~

我話我感冒未好   唔好坐咁埋   佢話佢喉嚨都痛緊呀   唔係咁邪嘛   咁大家坐番埋一齊啦   以毒攻毒   哈哈哈哈 ~

CC 成日覺得自己勞氣就話自己係更年期   咁事實佢個人係無咩火嘅   咁今晚又話呢兩係好易出汗   以前唔會出汗㗎   我話唔出汗係唔好㗎   依家妳出汗先係正常囉   關更年期咩事呢 ?!   聽妳講更年期呢 3 個字都聽咗十幾年   到依家都仲未更囉 ~

之後喇   又話自己老花   啲字睇唔到   我話我都睇唔到添啦   佢又話我散光喎   咁我話妳頭先話我靚   係咪睇唔清楚我㗎   條友話可能真係老花   哈哈哈哈 ~

咁又講下旅行嘢嘛   之後佢無啦啦好認真同我講話: 好喇   講番正經嘢   笑死我   旅行好唔正經咩 ?!

咁傾呀傾   好在佢想法同我一樣正正常常   佢同埋阿 mi 同冰冰想法都係一樣   咁我就放心喇   因為即係大家諗嘅嘢係一樣   對事唔對人也 ~

講講下佢仲眼濕濕想喊   嚇死我咩   我真係好感動   佢真係好擔心我 ~

我其實真係無嘢   講咗出黎知解決方法就 OK   但一講起媽咪   我真係忍唔住喊   因為無嘢可以比媽咪離開我更傷心 ~

喊完之後   我話放心啦   好唔開心段時間已經過咗   我堅無嘢喎   食得瞓得   要是我唔開心   我真係無胃口食嘢   仲更加唔會煮嘢同出街囉   呵呵 ~

話咁快又 8 點 40 分   係時候走人喇   雖然呢度無限時   又無人等位   但都係唔好坐咁耐喇   諗住轉場去 Food Court 食糖水   但無位   所以一齊行陣商場算喇 ~

佢帶我去三聯   話好多書睇㗎   妳可以打書釘   真係笑死我啦   我話妳係咪真係覺得我會好悶呀 ?!   我話我屋企好多書同食譜啦   之後條友串我話啲書係咪 8 婆雜誌 ?!

但其實佢之前已經叫我搵嘢讀下   跑下步   我話我放工之後番到屋企都忙架喎   煮埋食埋洗埋啲 時間好快就過   睇多陣電視又話瞓覺喇   有時又想休息下   絕對唔會係浪費時間架噃 ~

我話我好感恩   每日唔同嘅時間   都有朋友陪到我   要早有早   要夜有夜   哈哈哈哈 ~   

送埋佢去搭車   我兜多個圈就番屋企 lu ~

番到屋企差唔多 10 點   原來里奧大人啱啱番嚟無耐   咁等佢沖埋涼先   我想睇多陣電視先沖 ~

嘩   睇埋新聞   11 點 40 分先瞓 ~

2017年7月27日星期四

丸龜製麵讚岐烏冬專門店 @ 九龍灣 ( 27-JUL-2017 )

反正睇咗醫生   所以就食野菜天婦羅同鮭魚飯團   呵呵



( 27-JUL-2017  THU )

嘩   感冒呀   個人好攰添 ~

早餐食牛肉麵   因為好想食濕嘢   同埋最緊要 8 卦喺度   又可以比大半碗佢食   哈哈 ~




佢幾乎每朝都食雙蛋   仲食埋蛋黃   不過佢唔嘥嘢嘅   所以飽都要食   我最欣賞佢呢樣嘢
 


番到菇場抖陣就飲 Hot Lemon   雖然遲咗飲   但都唔理喇   唉   個人呆呆滯滯咁   所以真係唔想有嘢做   驚做錯呀 ~



Lunch time 出去食魚湯飯   呢排真係成日食剩哂啲嘢咁   但真係叫嗰時好餓   不過食多幾啖就飽   只從上個月胃唔舒服幾次之後   真係無以前咁好食力   要是想食哂呢   就一定要分兩次慢慢食   咁就好啲   個胃響警號喇   唔可以唔理咯 ~



食完行個大運就番菇場喇   好攰呀 ~

估唔到又忙   不過真係慢慢做咯 ~

放工去睇醫生   好在無發燒同埋唔係流感   只係普通傷風咳   不過拎定假紙先   但其實我聽日都應該番工   始終唔想成日放病假囉 ~

睇完都 6 點 10 分   咁去食嘢 lu   之後食埋雪糕   行下商場先番屋企   因為今餐太 Heavy   一定要行囉   行咗半個鐘   呵呵 ~


冰姑話朋友教佢食 Vanilla 味雪糕   可以醫感冒   咁正嘅治療法   早啲同我講吖嘛   哈哈



番到屋企即沖涼休息   睇下電視   食埋藥   又唔係好眼瞓喎   所以都係 10 點半先瞓呢 ~

2017年7月26日星期三

鵝肝蝦仁炒飯 + 菜心 ( 26-JUL-2017 )






( 26-JUL-2017  WED )

今日好好天氣呀   實在太好喇 ~

早餐食牛扒餐   咁一轉新場   我會影餐牌比家姐睇   佢就估我食咩   真係兩姐妹囉   佢又話係食牛扒餐   尋日佢同糟糟食日本嘢   我揀嘅同佢揀嘅係一樣   哈哈 ~




8 卦碗白雪雪通粉   佢又係食好清㗎   我落胡椒粉呢   佢覺得我黐線咁㗎   哈哈 



菇場忙下停下   但應該真係感冒   但吽唔出嗰隻   係咁流鼻水 ~

好啦   菇場實在太凍   Lunch Time 出去食水餃粗麵   但其實唔餓   但想食熱嘢囉 ~



食完行大圈就番菇場喇   一諗起入雪房嘅感覺就好驚   哈哈 ~

好在唔忙   但係咁打噴嚏   咁問 8 卦係咪好凍   佢又話唔係   仲話我應該唔舒服添 ~

放工即走啦   番到屋企浸定菜   今晚食得好 Heavy   所以要早食   因為要去徑步 ~

是日懶餐 - 鵝肝蝦仁炒飯 + 菜心  

鵝肝蝦仁炒飯 - 影比家姐睇   佢話咁大碟飯係咪諗住聽日帶飯 ?!   我話係一個碗仔嘅飯咋   但影相好似好多咁   哈哈   本來想就咁鵝肝炒飯   但好似好單調咁   咪加幾隻蝦囉   但其實就咁食飯就飽   食埋幾隻蝦更飽 ~

菜心 - 真係好腍甜呀   但我都要蘸辣椒豉油   因為我食嘢食味呀   嗚嗚 ~

好喇   洗埋碗抖陣就出去徑步   徑 20 鐘先啦   都出咗一身汗   爽 ~

番到屋企即沖涼   但仍然流鼻水   所以都係食粒 Panadol 先喇 ~

雖然唔多舒服   但就唔係話好好好眼瞓咁   所以今晚都係 11 點幾瞓 ~      

2017年7月25日星期二

芝士焗雞翼粟米 ( 25-JUL-2017 )






( 25-JUL-2017  TUE )

感恩又一覺瞓天光呀   不過其實好似 7 點左右醒咗一醒   但唔理喇   照瞓   等鬧鐘響先醒   呵呵 ~

今朝食沙爹牛肉麵餐   其實我無咩胃口   口淡淡   所以想食濕嘢   咁 8 卦又喺度   比大半碗牛肉麵佢食   我食少少就可以   條友上次話喎   有佢陪食早餐係最好   我問點解 ?!   佢話食唔哂就比佢食   哈哈哈哈   咁又係嘅   如果知佢同我食   我可以食麵餐呢啲   因為有時食三文治真係食到好悶囉 ~



菇場忙下停下   但好鬼凍啦   勁想快啲 Lunch Time ~

其實 Lunch Time 都唔餓   但係咁流鼻水咁   所以去食麻辣米線   已經要少米線   但都食剩半碗   堅嘥嘢   但真係食唔落   唉   仲要食完唔覺驅到寒喎   即係無料到 ~



諗住準時放工   衰渠又比嘢我做   咁做唔係問題   我唔趕住走   但催我做之後   佢又走咗   正宗 8 婆   不過我都一定搞掂哂嘅   始終妳話急嘛   費事比人搵籍口話我囉   呵呵 ~

5 點 45 分先走呀   唔怪得 8 卦成日話渠 6 點前一定走   但啲嘢就叫 8 卦跟   所以 8 卦都話佢衰格   做同事唔係咁囉   分工合作嘛 ~

番到屋企都預備嘢食喇   今晚食 Heavy 嘢   所以早食早消化   哈哈哈哈 ~   

是日懶餐 - 芝士焗雞翼粟米

芝士焗雞翼粟米 - 為咗清包 7月 8 日已到期嘅 Mozzarella Cheese   所以就焗呢個粟米雞翼   樣樣都係食剩嘅嘢   煮埋當一餐真係好好   哈哈   但仲剩半包 Cheese 呢   慘 ~

今晚飽到反肚   其實個人勁攰   但洗埋碗都拖下地   想郁多啲呀 ~

沖埋涼就食埋金奇異果幫助消化   買咗 2 星期啦   真係作壞喇   好在今晚食咋 ~

唔得喎   仲係好飽   所以又熨埋衫同床單   熨床單先勞動呀   次次熨完真係作出汗咁㗎 ~

又同冰姑傾計  咁叉埋電   差唔多 12 點先瞓 ~

2017年7月24日星期一

黑椒豚肉炒烏冬 ( 24-JUL-2017 )




( 24-JUL-2017  MON )

今朝有落雨   但之後又有陽光   我會當佢今日都會落雨呢   哈哈哈哈 ~

早餐食奶油多   完全無胃口咁   但唔食又唔得嘛 ~



菇場忙下停下   其實唔錯嘅   始終成日上網都唔係咁好呢 ~

Lunch Time 唔餓   所以食健康餐   唉   好似作感呀   衰毫升啦   今朝一齊過馬路   咁我問佢係咪好番   佢無答   我問佢係咪流感 ?!   佢話係   嗰下我都驚呀   我哋仲咁近距離傾偈 ~



Load 下相又傾下偈   好快就放工 lu ~

放工即走   諗住喺屋企附近買啲嘢   不過唔啱心水   咁番屋企 lu ~

好餓呀突然   所以 6 點半煮嘢食   早食早休息 ~  

是日懶餐 - 黑椒豚肉炒烏冬
  
黑椒豚肉炒烏冬 - 尋晚食剩大半碟黑椒豚肉   咁加埋個烏冬   真係 10 分鐘唔駛就煮好   個烏冬係之前喺吉野家打邊爐食剩㗎   好在獨立包裝   話時話都差唔多放咗一年   見佢今年 9 月到期就食埋去先啦   仍舊煙煙韌韌架噃   正呀   哈哈哈哈   依家盡量清雪櫃食物   之前特價買買埋埋又買咗好多嘢   係時候清喇要 ~

食埋抖陣只係 7 點幾   洗埋碗就沖涼   再開機洗衫就休息喇 ~

無啦啦係咁流鼻水   好驚囉   但又唔眼瞓喎 ~

咁同冰姑傾下計   又差唔多 11 點半   有啲眼瞓   所以即刻瞓 lu ~

2017年7月23日星期日

黑椒洋蔥炒豚肉 + 煎雞翼 + 菜心 ( 23-JUL-2017 )








( 23-JUL-2017  SUN )

今朝瞓到 10 點半   刷牙洗臉之後就去食早餐 lu ~



一開電話   原來家姐好早 Whatsapp 我   話 10 點掛 8 號風球   尋日天文台先話唔會發 3 號風球   點知今朝無啦啦 8 號風球   想點先 ?!

食完就番屋企   抖陣就沖涼喇 ~

2 點改掛 3 號波   是但啦   唔駛番工就乜波都 OK 啦 ~

寫下旅遊 Blog 又已經 2 點半   咁去食下午茶喇 ~

食完隻咖哩角 + 飲埋杯紅豆冰已經好飽   所以雞翼留番今晚食   呵呵





食完就番屋企抖   之後差唔多 4 點半就飲埋啲湯   今日飲就勁祛水囉   好在真係早飲咋   哈哈 ~



6 點 15 分預備   7 點有得食   算快㗎喇 ~

是日懶餐 - 黑椒洋蔥炒豚肉 + 煎雞翼 + 菜心

黑椒洋蔥炒豚肉 - 今次整得好惹味   但我無咩點食   因為仲係好飽   所以食剩大半碟   留番聽晚煮烏冬   呵呵 ~   

煎雞翼 - 我食埋下午茶食剩嘅雞翼   所以呢 4 隻整比里奧大人食   下次真係焗雞翼算喇   煎嘢真係好煩   啲油彈到周年係   最慘係好易煎燶   嗚嗚 ~

菜心 - 煮半斤菜心   呢期啲菜心好腍甜呀   就咁食已經好好味呢 ~   

搞掂哂就沖涼   之後睇下電視   里奧大人 11 點就瞓   我又瞓唔到住   所以聽下歌   11 點半先瞓呀 ~ 

2017年7月22日星期六

蜜糖焗雞扒 + 老黃瓜赤小豆扁豆豬骨湯 ( 22-JUL-2017 )






湯渣好味呀   所以次次煲湯係唔駛食飯   食湯渣都飽哂呢



( 22-JUL-2017  SAT )

今朝約家姐食早餐   但我又唔係太餓   所以家姐食到好飽   哈哈哈哈 ~



咁糟糟依家成日約家姐食早餐嘛   但其實家姐平時都只係喺公司食麵包呀   燒賣腸粉做早餐   好少會好似我咁出去食   咁最搞笑係   家姐上次去大家樂   佢早到   就搵定位同買埋嘢食   糟糟一嚟到就有得食   家姐都串佢   話妳就嘆啦   一坐低就食得 ~ 

糟糟成日咩都想食   好味就食哂   唔好味真係唔食㗎   衰到死 ~

尋日佢哋食早餐   佢想食牛扒同牛尾湯通粉   但個餐一定要分開叫   咁家姐就話佢食牛尾湯通粉 Share 食囉   咁 Share 食就最好樣樣唔同嘛   家姐買咗牛扒雙蛋+多士   另外一個係牛尾湯通粉+火腿腸仔+牛油餐包   點知家姐分得半塊牛扒+半隻蛋+腸仔+牛油餐包呀   衰糟唔食餐包咋   唔係家姐連餐包都無得食添呀   哈哈   死嘢   蝦我家姐   下次見到佢一定拻死佢   哈哈 ~

糟糟要食多士   但家姐個樣好慘咁同我講話:   我夠鍾意食多士咯   笑死我



家姐 Send 呢張相來   又唔講做咩



之後再 Send 埋呢張比我   但仍然無講咩   哈哈哈哈   之後話今朝講嘅   同糟糟食早餐只分得咁多咋   慘呀呢   笑死我   



菇場唔忙呀   可以寫旅遊 Blog ~

話咁快放工   今日自己食下午茶   所以番去屋企抖陣   去埋超市買嘢   之後先買麥樂雞餐番屋企食呢 ~


食唔哂半包薯條   又要留番今晚食



食完抖陣   煲埋個湯就搞掂   聽下歌   原來都 5 點半   里奧大人啱啱番嚟 lu ~


好耐之前煲湯   因為太多料   成煲湯滾唔起呀   我就奇怪點解啲湯料唔郁嘅   好在真係睇下咋   之後再 "北" 番起啲湯料   煲湯先識得滾咋   其實今次都滿哂   所以每 10 分鐘要望一望囉



7 點開飯   不過我只係飲湯同食薯條   就咁煮個冬蔭功米粉比里奧大人算喇 ~ 

是日晚餐  - 蜜糖焗雞扒 + 老黃瓜赤小豆扁豆豬骨湯

蜜糖焗雞扒 - 唔想炒嘢   所以焗雞扒 ~

老黃瓜赤小豆扁豆豬骨湯 - 上次家姐講開呢個湯   我又好想飲   所以又煲啦   尋晚喺街市買咗包赤小豆 ($7) 同扁豆 ($13)   乜原來扁豆咁貴㗎 ?!   老黃瓜就 $8   2條粟米 $5.5   西施骨 $40   咁都抵飲   青紅蘿蔔就貴好多咯   不過我想祛濕嘛   所以要飲老黃瓜湯呢 ~

搞掂哂都 8 點幾   沖埋涼就休息喇 ~

睇下電視   11 點幾都瞓 lu ~