住家飯 @ 家姐屋企 ( 31-AUG-2017 )

三餸一湯



煎立魚 - 好味呀   個皮脆卜卜   我睇住工人煎咗 15 分鐘   真係好有心機呢   咁家姐話佢成日食嘛   叫我一個人食哂成條魚   我真係食哂㗎   之後第日家姐問番工人有無食 ?!   佢話見我食得咁滋味   唔敢夾來食喎   車   又係佢叫我食哂嘅   哈哈

冬菇金針雲耳蒸雞 - 好味呀   因為我唔會煮金針雲耳   



金銀蛋莧菜 - 冰姑尋日先叫我買嚟食   今晚就有得食   感恩感恩   



我話要一碟薑蓉   



勝瓜鯪魚肉湯 - 諗住咁清無咩味   估唔到又有味喎   好味道



日本桃 - 4 個 $160   依家食生果真係貴過我食餐飯囉



( 31-AUG-2017  THU )

感恩又一覺瞓天光   臨醒之前發咗個夢   有個男人叫牛尾湯通粉   但要豬扒麵湯底   我心諗   牛尾湯又點會豬扒麵湯底呀 ?!   估唔到自己發夢嘅時候都咁清醒   哈哈   之後個侍應答佢唔可以轉豬扒麵湯底   答完就鬧鐘響   呵呵 ~

早餐又食吞拿魚治   好味道呀   但間嘢無冷氣咁   所以應該唔會再去住呢 ~



菇場超級忙呀   好在食飯前搞掂哂 ~

今日家姐放假睇醫生   所以約我食 Lunch 呀   勁開心呢 ~

呢間食店要比錢先嘅   咁我都諗住請家姐   我比完錢之後   家姐話今次又係佢講緊電話   好似唔想比錢咁   哈哈   上次同佢食飯   又係埋單比錢時佢講電話   咁我就比啦   真係好邪   哈哈   不過佢嚟陪我食   我一定請佢食飯囉 ~

特上盛海景丼 - 一般啦   



細細片嘅刺生



芝士豬排 - 我以為左上角係沙律醬添   一蘸落去係好有彈性   覺得好奇怪囉   家姐話係甜品來㗎   哈哈   之後食咗一啖唔敢再食   因為好重奶味



仍都好一般   呢間唔會再食   



咁家姐今朝 10 點半去佐敦睇耳鼻喉專科   因為佢話成日有嘢頂住出唔到嚟咁   個醫生串 Q 到爆   話家姐唔係鼻敏感   睇嚟做咩 ?!   家姐即時串番佢啦   話西醫話佢鼻敏感   同埋我唔嚟睇又點知自己唔係鼻敏感呢 ?!   之後個死人醫生仲衰格   話開 2 星期藥比妳食   妳食咗可能仲衰   咁家姐話開 1 星期啦咁   真係咩醫生嚟㗎 ?!   嫌錢腥 ?!   但啲死人態度唔好咁黑人憎囉 ~

姑娘又係衰衰格   好串咁問家姐   妳等咩 ?!   家姐話等妳比番張醫療卡同收據呀   呢間診所係咪顛㗎   咁家姐等嘅時候   話有個女人都同佢講   呢間啲姑娘怪怪哋咁 ~      

咁食完去一田睇下嘢   之後家姐話去 Panash 買包   因為星期三有折   咁我帶佢去啦   之後行行下   我話今日好似係星期四喎   其實今朝我做做下嘢   我以為今日係星期五添呀   咩事呀   哈哈 ~

送埋家姐搭車就番菇場   家姐話條街好熱   我話啱啱好   因為菇場真係好凍   間唔中都要出來解凍   個人舒服好多呢 ~

菇場又忙啦   好在 3 點左右搞掂   同冰姑傾偈   佢居然又話今日係星期五   做乜咁㗎   個個都記錯日子嘅   哈哈 ~

放工即走喇   坐小巴去家姐屋企   但一定要家姐嚟接我   因為我唔識行去呢 ~

咁我落車嘅時候   諗住過馬路先打比家姐   點知一落車就見到家姐企咗喺度   堅嚇一嚇囉   仲着白色衫添   哈哈   因為我無諗過佢咁快嘛 ~

可能今日真係好開心   全日都好餓咁   家姐都話好少有   哈哈 ~

食完包威化餅   再食 2 塊炸蝦片   勁好味呀   不過我條脷腫咗   所以唔敢食咁多呢 ~



麥包   你要健健康康呀  






咁今朝 Skype 8 卦   問佢咬親條脷係咪熱氣 ?!   佢答: 我上網睇呢   佢無講熱氣   係話因為唔知乜嘢條豬脷漲咗   所以容易咬到   笑死我呀   頂   同阿 mi 一樣   咩都加個豬字   係咪真係一諗起我   就即刻聯想到隻豬呀 ?!   哈哈哈哈 ~

家姐工人話我瘦咗好多   以前圓碌碌咁   我話依家唔係瘦咗好多   而係以前實在太肥呀   同埋我話一個人食飯   最主要食多啲菜   同埋要做運動   我地做 Office 實在成日坐   加上冷氣又凍   真係血氣完全唔運行   所以我依家都愛上徑步   真係要比時間自己郁下   唔可以懶囉 ~

差唔多 7 點開飯   食完再食生果   真係飽到上腦呢 ~

同家姐又傾下偈   咁家姐車我番屋企   所以我 8 點半都走喇   等家姐早啲休息 ~

番到屋企即沖涼   之後熨衫   一定要郁下嘛   哈哈 ~

熨完又上 Youtube 睇嘢   11 點鬆啲都瞓喇 ~

芝士辣肉腸薄餅 ( 30-AUG-2017 )

無心機真係唔好試整新嘢 



呢個角度無咁多餅皮   個樣好似好睇啲   哈哈哈哈哈哈



( 30-AUG-2017  WED )

尋晚瞓到半夜有啲熱   又轉番張冷氣被   之得一早蓋張冷氣被啦   哈哈 ~

今朝同樣去番另一間食早餐   今次我要咖啡少少奶   咁飲落已經有啲怪   我以為係少奶同少少奶嘅分別   咁 8 卦要奶茶少奶   佢食完哂嘢   最尾先飲嘅   一飲就話變哂味嘅   原來真係變咗味呀   哈哈   等我以為係少少奶分別添   之後換杯熱檸茶啦   咁我唔落糖家嘛   佢好驚咁叫我千奇唔好篤檸檬   唔係好傷胃   又幾細心噃衰仔 ~



番到菇場無肚屙喎   有啲失望   哈哈哈哈哈哈 ~

今朝好忙呀   做完有啲虛脫   但做未做完噃 ~

Lunch Time 買粉果同腸粉   但粉果唔熱   好難食囉   等我仲買夠 3 隻添   之後食腸粉   其實已經食唔落   要抖 15 分鐘先格硬食   依家有啲驚咗 ~



咁我上網睇 Manson 嘛   之後阿花話佢都有睇   呵呵   仲介紹我睇另一個   咁啱我尋晚都睇咗   我都係鍾意睇 Manson 多啲   哈哈 ~        

仍然忙啦   但無心機做   咁唯有慢慢做啦 ~

放工即走   依家電話同電腦時間終於一樣   咁唔駛下下遲 5 分鐘先走囉 ~

去超市買生果   之後番屋企喇 ~

其實唔餓   所以抹埋柜先整嘢食 ~

是日懶餐 - 芝士辣肉腸薄餅 

芝士辣肉腸薄餅 - 之前買咗一 Pack 薄餅   但已經過咗期好似一個月   咁點都要食啦   不過餅底都幾厚   唔係咁鍾意囉   同埋今次焗到好鬼乾   真係食到有啲痛苦   最後食剩 1/4 要掉   慘啦   仲有 1 塊點算好呀   嗚嗚嗚嗚 ~

我知個薄餅真係好樣衰   所以連家姐都好唔比臉   哈哈哈哈哈哈







食完洗嘢啦   聽到轟轟隆隆   以為貨車行過   點知原來行雷   因為今日咁好天   無諗過夜晚會落雨囉   但唔理喇   見無雨就即刻去徑步   但徑咗 1 個圈就落雨   要打道回府呢 ~

咁沖埋涼又上 Youtube 睇嘢   又係睇到 11 點幾先瞓呀 ~

雜豆炒火腿粒 ( 29-AUG-2017 )

( 29-AUG-2017  TUE )

感恩一覺瞓天光呀   所以覺得好精神呀 ~

今朝仲勁   沖涼搽 Cream 換衫 Jel 頭都只係 15 分鐘   所以 8 點唔夠就可以出門口呢 ~

掛住同 mi 傾偈   點知遲咗一個站落車呀   諗住行番菇場啦   不過實在太曬   所以都係搭架最平嘅巴士到菇場附近呢   感恩等咗 1 分鐘有車呀 ~

夠瞓真係成個人都爽哂咁   所以轉場食早餐 ~



咁尋日同 8 卦講   我今朝可能會轉場食早餐   不過佢好早見客   所以嚟唔到   佢知我轉場食早餐   佢話好想去食囉   咁其實尋日我都唔肯定今朝去邊間食嘅   咁我話等埋佢囉   點知佢覆我話起碼 11 點先番喎   我即話佢: 黐   等埋你嘅意思即係聽朝呀   佢自己都忍唔到笑咗出來 ~

佢仲搞笑   尋日知道今日大粒上哂大陸嘛   就好開心話   食早餐坐到 9 點半都得   點知唔夠 1 個鐘   就話佢 8 點半要去見客   都叫佢咪開心得咁早啦   哈哈 ~

佢邪我仲邪啦   今日忙足全日呀   尋日啲嘢未做都算   但今日仲有更加多新嘢做囉   好在今日好精神   開行 Turbo 做應該好快搞掂 ~

勁勁勁想食酸辣米線   所以一到 Lunch Time 即飛去買   今次好味喎   但食完好鬼飽囉 ~

仍然忙   但唔知係咪飽得滯   所以好眼瞓 ~

放工即走   買完包雜豆同芝士就番屋企 lu ~

仲未餓   所以徑步半個鐘先   雖然 6 點半   但個天都仲未黑   真係唔慣咁光嘅環境徑步   哈哈   我都係鍾意天黑徑步多啲 ~

番到屋企拖埋地   煮好哂嘢   沖埋涼先食嘢呢 ~

是日懶餐 - 雜豆炒火腿粒 

雜豆炒火腿粒 - 加咗咖哩來炒㗎   不過無咩味   是但咯   終於食哂包過期火腿   條粟米係上上星期六買   所以又要食埋去   唔駛食飯都夠飽   正 ~

咁家姐又 Whatsapp 問我食咩   佢見到成條粟米就話   胃唔好就唔好食粟米啦   之後同佢講想食薯片   但驚肥呀   但佢話食啦   好過食粟米   哈哈 ~

一路食薯片一路睇 Youtube 真係好正   但唔可以成日咁   堅肥死囉   呵呵 ~

睇到 11 點 20 分都瞓覺喇   難得想瞓 ~

雞扒粟米出前一丁 ( 28-AUG-2017 )

( 28-AUG-2017  MON )

嘩   尋晚喺咁發夢   啲夢仲好逼真   我只記得係去清邁咋   真係日有所思定啦   哈哈 ~

但換嚟係唔夠瞓咁啦   真係好攰   沖埋涼都 Feel 到完全唔係狀態咁囉 ~

今朝 8 卦遲咗嚟食早餐   咁食到 9 點先走   點知落好大雨囉   成對腳濕哂   慘 ~



番到菇場仲凍   之後又多嘢做   但真係唔想做囉   好攰呀 ~

Lunch 食吞拿魚包   今朝買定㗎   但好後悔買咗囉   因為無啦啦勁想食酸辣米線   8 卦又話買咗就食包啦   咁食囉   嗚嗚 ~

仍然不在狀態   但都要做嘢   唔知點解   食完抗生素   真係整到成個人都周身唔舒服咁   係唔知點咁   所以都唔食哂成個療程喇   食 3 日算喇 ~

放工即走   好餓呀   但點都等到 6 點半先煮   唔想成日太早食飯   哈哈 ~

是日懶餐 - 雞扒粟米出前一丁

雞扒粟米出前一丁 - 尋晚食剩 4 件雞   諗住煎香啲雞皮啦   不過我無落油   所以好快燶   咁是鬼但啦   淥熟算喇   我覺得自己真係已經懶到一個點囉   同埋最勁係罐頭粟米居然過期 2 個月   但無臭喎   一樣咁清   哈哈   但原來粟米 + 丁係好飽   食到一半已經好唔想食   但無理由咁嘥家嘛   真係由好熱食到好凍   救命 ~

食完抖陣先洗碗   今晚咩都唔做   抖陣就沖涼 ~

我覺得打風之後   天氣真係涼咗好多好多   我沖完涼都唔駛開冷氣呀   咁沖熱水涼嘅時候   仲覺得有啲凍添呀 ~ 

仍然睇下 Youtube   咁里奧大人 9 點幾番到嚟   我切個蘋果比佢食   因為我買咗好耐喇   呵呵 ~

之前喺淘寶買嘅北芪同新鮮當參   終於貨到   係里奧大人同事自己種㗎   加上我依家已經飲咗一大半   都好夠味   所以會繼續幫襯佢呢

11 點 15 分終於覺得攰啦   即飛去瞓呢 ~

翠河餐廳 @ 官塘 ( 27-AUG-2017 )

西檸軟雞好味呀   個皮脆卜卜   不過食唔哂啦   食剩 4 件要打包   要比兩蚊雞買外賣盒   貴咯



蝦醬通菜炒牛肉   我要食牛肉補補血



( 27-AUG-2017  SUN )

今朝瞓到 11 點   好似已經掛 8 號風球喇 ~

懶下床   再刷埋牙先叫醒里奧大人   但我就落去搵位先   因為 12 點就無早餐食喇 ~

好大風喎   好在無乜雨咋 ~

早餐食飽啲   因為咁晏食   唔會食下午茶喇   早啲食飯好過 ~

食完就番屋企   里奧大人就去拎雜誌 ~

都唔記得幾點改發 3 號風球添   但如果呢日要番工嘅話   我就一定要番囉   但星期日就唔理幾點改發 3 號啦 ~

唔知係咪食抗生素關係   我真係覺得食完之後   個人好攰咁 ~

又上 Youtube 睇旅遊節目   呢個星期勁睇 Manson 嘅旅遊片   我覺得佢勁好笑   我次次睇親都好開心㗎   之前有晚睇其中一 part   我仲大聲笑咗出來添呀   係笑到咳嗰隻   好耐無咁大笑喇   因為喺菇場呢   傾好笑嘢都唔可以笑出聲嘛   所以可以笑出來   真係好開心呢   哈哈 ~

不過估唔到連里奧大人都話好笑   話佢夠真囉   會講話唔好食   哈哈   佢邊睇雜誌邊睇佢   仲話我同佢好似   因為里奧大人聽佢比分係 63.15 分   即刻同我講: 佢比分同妳一樣   唔怪得妳咁鍾意佢   因為我比分一定唔會比齊頭數㗎   即係 10-20   我係比 17.5 咁呢   哈哈 ~

睇旅遊節目   次次都會睇到餓   所以 3 點幾就整熱個包   尋日買咗但無食   今日點都要食埋去啦 ~

我用牛油煎香個芝麻餐包   但原來影到超級樣衰   哈哈   唔講真係唔知影啲咩出來         



6 點半去食飯   估唔到大風大雨呢 ~

食完都番屋企喇   今晚無得徑步   又食咗飯   所以熨衫當做運動 ~

抖多陣就食貓山王   姑奶去完新加坡   佢好似買咗 1 個番嚟   比咗 3 嚿比我   不過就 Pack 好哂嘅   仲用保鮮紙包住啲榴槤   咁又好喎   感覺似真空包裝咁呢 ~

仍然睇 Manson   里奧大人話睇到佢都想去旅行添呀   所以我好鍾意睇旅遊節目   但唔要係 Hard Sell 樣樣話好味嗰隻   哈哈 ~

今朝真係瞓得太晏   差唔多 11 點 50 分先瞓   但其實只係有少少眼瞓咋   不過點都要瞓囉   聽日要番工嘛 ~

會所一號愉花園 @ 荃灣 ( 26-AUG-2017 )

我最期待嘅乳豬出場啦   但個皮硬嘅

配菜好味過蝦仁



仍都好期待嘅蟹鉗   點知係凍嘅   層粉漿又厚又硬   我同家姐講話 Club One 食物唔掂   點知佢第一句就話 Club One 唔掂㗎   到會之嘛   講講下里奧大人親戚都好似話呢間酒樓無廚房   啲食物係送來的



頭 3 樣嘢已經唔掂   而呢碟節瓜甫就可以用超級難食來形容   節瓜甫口感好霉   個芡汁先最恐怖   好似鼻涕咁   你睇到左邊個 Pat 芡汁嗎 ?!   完係係固體來囉

好在呢碗翅係熱咋



魚都係熱   但唔夠豉油   



又係鼻涕咁

個皮唔脆   不過都預咗   之後仲有炒伊麵同炒飯同甜品   不過我無食 lu   我見到個炒飯係白雪雪   無咩料咁囉   我真係第一次去飲   啲嘢係咁難食囉

( 26-AUG-2017  SAT )

今朝同家姐食早餐   所以又要早啲起身呢   呵呵 ~



傾下食下   真係好快就到 8 點 45 分呢   一出門口就見到家姐搭嘅巴士   即刻飛去截住佢啦   好在有幾個人上車咋   不過我真係覺得   個人越緊張就動作越係慢咁   哈哈   可能緊張得滯 ~

菇場又有好多嘢做   但唔想做住囉   不過其實咁唔好   因為成日記住有嘢要做   心掛掛咁   但真係好無 Mood 做囉 ~

今日兒甥女結婚   所以去觀禮   放工即走   咁里奧大人打的去   順便兜埋我去 ~

儀式 2 點開始   3 點半完畢   但我同里奧大人走先   因為我可能尿道炎呀   要去荃灣搵醫生睇   我驚聽日 8 號無診所開呀 ~

今晚去愉景新地飲嘛   所以直接去嗰頭睇醫生啦   感恩有診所開呀   因為星期六好少有門診呢 ~

咁我同醫生講話有尿道炎跡象   咁佢係都話係我個瘤影響   比佢摸啦   佢話好大個   但我唔會再做手術啦   我 10 年內已經做咗 3 次全麻手術   我唔想做第 4 次囉   同埋最緊要係良性   咁就無咁驚 ~

佢係都唔想比藥我食咁呀   但我話真係似尿道炎喎大佬   咁佢先肯開抗生素比我   暈 ~

食完藥真係好好多   起碼下腹唔再痛   感恩感恩 ~

咁里奧大人話 8 點先開席   所以去 Delifrance 食啲嘢 ~





食完就去酒樓喇   去到就同啲兒甥仔傾下偈   之後新人斟茶比我同里奧大人   勁有長輩 Feel  哈哈 ~

我哋同里奧大人啲阿叔坐一枱   佢 2 個阿叔居然鬧起交來   又拍枱又企埋身   仲手指指   之後里奧大人同唔知邊個分別按住佢哋啦   大佬   好驚佢哋爆樽囉   同埋好心啦   人哋喜宴呀   破壞哂氣氛   不知所謂 ~

好在酒樓嘅音樂夠大聲   人聲又夠嘈   唔係真係失禮死人   不過司儀哥哥都知有事發生   所以都行埋來話長輩有咩事囉 ~

好似 8 點開席   不過間酒樓嘅樓底唔高   加埋音樂同人聲   真係嘈到有啲頭痛 ~

差唔多 11 點走   好在打的番屋企   因為一上車就開始落雨   仲越落越大 ~

呢隻公仔好得意   我覺得佢個樣好奸



番到屋企即沖涼喇   好似聽朝會掛 8 號風球   估唔到一星期有兩個 8 號風球 ~

里奧大人瞓先   我就差唔多 12 點幾先瞓呢 ~

蕃茄薯仔肉丸湯 ( 25-AUG-2017 )

( 25-AUG-2017  FRI )

話咁快又星期五   應該係話   話咁快又差唔多過埋個 8月 lu ~

今朝食吉列魚柳餐   勁期待㗎   因為尋朝已經諗定今日 Happy Friday 食   點知件魚柳係霉嘅   嗚嗚   無諗過雪藏魚柳都會霉囉   食咗 1/3 真係頂唔順   但奇怪點解我當時唔換咗去呢 ?!



菇場唔忙   咁就好啦   因為所有大粒唔喺度嘛 ~

Lunch Time 出去行陣   再買咖哩魚蛋同粉果番菇場食 ~

嘩   我覺得食 10 粒魚蛋好似滯過食 10 粒燒賣咁嘅 ?!   食完真係頂住頂住咁㗎   食燒賣又無嘢㗎喎   今日做乜鬼   食乜都有啲嘢咁   哈哈 ~

開開心心等放工   番到屋企抖到 6 點半先煮嘢   其實唔餓   但想清埋啲嘢去囉 ~

是日懶餐 - 蕃茄薯仔肉丸湯

蕃茄薯仔肉丸湯 - 1 個大薯仔 + 2 個蕃茄 + 3 粒肉丸   薯仔再唔食就出牙   蕃茄都開始軟哂皮   但其實堅唔想食   但又驚夜晚餓   所以點都食囉   但真係好飽   食剩一半都倒咗去 lu ~

抖陣就徑步   徑半個鐘就番屋企喇   沖埋涼又睇 Youtube   爽 ~

聽朝早起   所以 10 點 40 分都瞓覺   咁啱里奧大人番到嚟   唔知佢係咪拎咗榴槤番嚟   我覺得勁臭   可能今日食滯咗   所以一聞到濃味嘢好反胃 ~

火腿炒米粉 + 西蘭花 ( 24-AUG-2017 )

( 24-AUG-2017  THU ) 

嘩   起身嘅時候好精神㗎噃   但坐車又好眼瞓咁嘅   真係唔得咁   要聽阿 mi 話要再早啲瞓呢   哈哈 ~

早餐食醬占多   想食啲酸酸咪咪嘢呀   但 8 卦食沙爹牛麵又好鬼香   突然覺得食多士好乾爭爭咁   衰 ~



依家差唔多日日都同 8 卦食早餐   所以茶記啲人都好自然比 2 隻杯   一係就問佢嚟唔嚟 ?!   如果佢早到   啲人又問番佢   我嚟唔嚟 ?!   諗番起之前同佢唔妥   我直頭係憎佢添呀   到頭來無啦啦又 Frd 番   其實果段時間   大家都無傾偈   但後來佢又開始同我 Skype   傾下傾下又 Frd 番   佢又好信我㗎喎   成日講好多秘密我聽   想我同佢分析下 ~

我成日都叫佢唔好同渠王講咁多公司嘢   條友係唔會撐佢㗎   咁有次 8 卦同西瓜 + 龍一齊傾嘢   龍就講咗一句嘢   咁 8 卦就同渠講啦   點知阿渠用番阿龍嘅語氣講番呢句嘢出嚟   仲同 8 卦講話特登比龍聽   8 卦好慶囉   咁阿龍實知係 8 卦講出嚟啦   所以佢話以後唔再講嘢比渠聽   我話佢囉   一早同你講咗   你唔聽之嘛 ~

菇場忙呀   不過好攰咁   做嘢都慢啲 ~

Lunch Time 出去食牛腩河   今次終於記得少河粉   咁嘅份量就啱啱好喇 ~

食完去萬寧買香口膠   之後再去惠康買支油   我買 1 支 600ml 嘅   家姐用細細支嚟形容   因為佢係用 2,000 ml 嗰啲   因為佢哋煮嘢用好多油同鹽   其實非常之唔健康   但話咗佢哋都係咁   我都唔再話 lu ~

好鬼熱呀   買完都要即番菇場 ~

好攰呀   條腰又痛   所以都無咩心機   放工都即走喇 ~

番到屋企即浸菜   6 點半開始煮嘢   好快有得食   呵呵 ~

是日晚餐 - 火腿炒米粉 + 西蘭花 

火腿炒米粉 - 其實包火腿過期 2 星期   好在無壞咋   仍然保留一份鹹香味   哈哈哈哈   今次好有心機炒米粉㗎   因為加咗蒜蓉落去炒   好味好多呢   哈哈 ~   

西蘭花 - 星期六買嘅   好在無壞 ~

洗埋碗就去徑步   依家習慣咗徑步   徑完真係舒服好多   但我見有個女仔   真係次次都係一路徑步一路睇劇   其實徑步嘅地方唔會話好光   咁睇都好傷神囉   同埋又要睇住前面有無人行   都好危險囉 ~

我唔可以一心二用   所以我徑步唔會聽歌   我覺得比時間自己思考一下仲好   咁我聽歌又會聽埋歌詞意思嘛   所以我都係想專心徑步多啲呢 ~

徑半個鐘夠喇   因為留番啲體力番屋企拖地呀   哈哈 ~

拖完地即沖涼   之後開機洗衫   話咁快又  9 點 lu ~

睇多陣電視   11 點唔夠都瞓喇 ~