元氣壽司 @ APM ( 31-OCT-2017 )

有 2 層嘅高速列車車軌   最多運送 4 碟   一次送哂來就要快快手拎啦   最慘張枱又細   咁我哋又同時 Order 8 碟壽司   放低碟壽司無耐又要再拎另一碟   感覺好急趕   因為啲壽司一到就會 "必必" 聲響   咁隔離左右都有人落 Order 家嘛   幾乎全程係咁 "必必必必"   我覺得好煩囉          



炸蝦天婦羅壽司 X 2 - 乾到呢     



醋鯖魚壽司 - 好味呀   

芥辣八爪魚軍艦 - 我好鍾意食

 
飛魚子軍艦 - 呢碟都鍾意食   



海鹽赤海蝦壽司 - 呢期好想食蝦   



炸蝦卷 - 里奧大人食嘅 



牛油果軟殼蟹卷 - 都係里奧大人食嘅   佢話唔食生冷嘢喎  



"必必必必" 



炙燒黑椒蠔壽司 X 4 



迷你泡芙 - 凍食來㗎   都幾好味   因為唔甜



( 31-OCT-2017  TUE )

尋晚無開冷氣瞓   就咁開風扇   估唔到又 OK 喎   無熱醒 ~

早餐食芝腿治   其實依家唔想食咁多醃制嘢   但又唔想食咁多蛋喎 ~



菇場忙到爆肺   真係做到手震震   好鬼攰呀   哈哈 ~

Lunch Time 出去食水餃米   我真係好鍾意食㗎    因為我鍾意食木耳絲   但又唔鍾意食一隻隻嘅木耳   好怪呀呢   等如我唔鍾意食肉絲雞絲   但豬扒雞扒又 OK 喎 ~



菇場仍然忙   不過今日應該會做哂啲嘢㗎喇   正 ~

要幫糟糟睇相機   所以放工去 APM   無啦啦好想食炒栗子   所以去買黎食   依家 $40 磅都好貴咯   所以我買半磅   過下口癮就算了   同埋真係粒粒都熱辣辣   咁我又凍喎   即刻食咗 8 粒   當堂成身暖哂呀   食剩半包留番聽晚   始終栗子好鬼飽肚   唔可以一下子食咁多呢 ~

咁里奧大人 6 點 15 分放工   我地食完先睇 lu   今晚一定要去食壽司呀   因為勁想食好耐   所以揀咗元氣喇 ~   

我話買咗炒栗子   里奧大人問我喺邊度買 ?!   我話喺佐敦嗰邊   佢碌大對眼話去到佐敦買 ?!   我話係去坐佐敦小巴果度買呀   哈哈   諗住佢會記得嗰邊有栗子買嘛   想慳番幾隻字都唔得添 ~

食完就去睇相機   試玩咗一陣   再同糟糟傾咗陣就番屋企喇 ~ 

番到屋企抖到 8 點就出去徑步   我話最少要徑半個鐘   因為今晚我食咗栗子同飯   里奧大人好疑惑咁問點解食栗子就要徑步 ?!   我話食栗子好肥咁嘛   所以咪要徑囉   佢成日覺得我啲 Logic 好怪   不過我自己都覺   哈哈 ~

呢個天氣做運動真係好舒服   不過就無汗出   始終我唔係跑步   但我最主要係比自己郁下   因為我實在太懶   所以依家難得自己肯徑步   希望會堅持落去呢 ~

徑完半個鐘就番屋企喇   沖埋涼就休息 ~

里奧大人諗住聽日上大陸   同同事交接同 Say Bye   點知阿水又串串共   有嘢唔做係咁點里奧大人做   真係彩佢都傻   同埋里奧大人都走啦   仲有咩理由叫里奧大人跟新嘢呀   真係好有問題 ~

今晚勁喇   10 點瞓覺喇 ~

魚片頭米線 + 鹹蛋節瓜魷魚湯 ( 30-OCT-2017 )

( 30-OCT-2017  MON )

今朝好攰喎   唔知點解 ~

8 卦話食到唔知食咩好   所以我話去大快活啦   不過呢間唔好食   我地唔會再來了 ~



菇場勁忙呀   但個人好攰   做嘢都慢過人 ~

Lunch Time 未餓   出去買節瓜蕃茄   再行多陣就買燒賣粉果番菇場食   望下手機   原來已經 1 點 15 分   要快快番菇場喇 ~



仍然忙爆   要遲幾分鐘先放工 ~

番到屋企即預備喇   里奧大人 6 點半放工   番到黎要等多陣先可以開飯呢 ~

是日懶餐 - 魚片頭米線 + 鹹蛋節瓜魷魚湯  

魚片頭米線 - 壽桃牌米線都唔滑嘅   好在買咗 1 Pack (3 包)   仲剩 1 Pack 下次就 Share 食   咁今晚蘸南記辣椒醬嘛   越食越辣   但即場食係無呢啲感覺架 ~

鹹蛋節瓜魷魚湯 - 好想飲湯   呢個最方便呢 ~

里奧大人話同事阿水叫佢留低 1 星期幫幫手   但呢個阿水就係周圍放暗箭嘅同事   所以里奧大人即刻 Say No   本來有 2 個同事同阿水好 Frd   夾埋阿水一齊篤里奧大人呀   但依家佢哋又好話阿水唔好   叫里奧大人唔好留低   梗係啦   今日開會   佢哋同阿豪比阿水插   梗係唔想人哋幫阿水啦   呢間公司啲人真係好怪 ~    

又食花生   又食雪條   見到佢食嘢   我就最開心   即係代表佢無壓力喇 ~

勁攰   係咪講話唔想徑步   平時我只會話想徑步嘛   所以最後都唔徑喇   抹下嘢好過 ~

沖埋涼就開機洗衫   之後休息喇   里奧大人 10 點都瞓喇   我今晚都早咗   11 點就瞓呢 ~

住家飯 @ 家姐屋企 ( 29-OCT-2017 )

我今朝先同里奧大人講   話叫佢聽晚一定要番屋企食飯   因為我好想食茄汁蝦碌   估唔到今晚有得食   啲蝦仲咁大隻添   好滿足呀



南乳齋 - 好味呀   我自己就唔會整 lu 



冬菇花膠燜鴨掌 - 家姐指住碟餸   細細聲話工人特登整比我食㗎   之後再話整咗碟薑蓉比我食   其實我話初初唔敢食   以為蒸咗雞呢

東星斑 - 係魚就好味啦   哈哈   



燒鵝 (外賣半隻) - 又係想食好耐㗎喇

菜心 - 好甜呀  



芽菜 - 特登再整比姑姐食  



西洋菜湯 - 今日食嘅嘢   樣樣都想食好耐   呢個湯都係   上次經過菜檔   見到西洋菜   即諗起媽咪會煲比我飲   估唔到今日有得飲   係咪媽咪比指示家姐煲㗎 ?!   哈哈  

 
( 29-OCT-2017  SUN )

今朝 10 點起身   里奧大人 9 點幾都醒咗喇   佢話今日仲開心   因為一覺瞓天光   感恩感恩 ~ 

沖埋涼就去食早餐喇   今朝可以慢慢嘆早餐 ~





咁食完見仲有好多時間   就去三聯書局睇下有無 Minions 座枱月曆   問職員又話無   不過我都會自己再搵囉   居然比我發現咗 2 個呀   仲只係 $39   真係超級勁開心呀   最搞笑係里奧大人都好開心   因為我講咗好耐想買   但好多都無貨   佢就會記住   一見到文具店就會入去問人有無 Minions 座枱月曆   係都要買到為止呢   反而佢要嘅嘢   佢係自己搵   我有時仲衰   係完全唔記佢話想要添呀 ~

買完就番崇拜喇   今日講題好啱我哋聽呀   做任何事都要依靠神   神會帶領每一步 ~

人生最偉大嘅成就   唔係從來唔跌倒   而係跌倒之後能夠站起來   咁又係   有邊個人嘅人生無苦難無憂愁呢 ?!   但妳永遠將呢啲負面情緒放到最大   根本同逃避無分別   因為唔願改變   咁點解唔可以積極面對任何事呢 ?!   

我人生受過唔少嘅大打擊   但如果自己長時間維持呢個負面情緒   真係好易令人出事囉 ~

聽完道就即走喇   約咗叔叔嬸嬸同細姑姐飲茶   好在家姐同姐夫可以早到   可以同佢地邊食邊等我哋呢 ~

話咁快又一年   見到叔叔最開心   佢好正面㗎   我成日話同佢行山   我實唔得   因為佢行得好快嘛   佢即刻會話唔好講唔得   無嘢係唔得嘅 ~

最估唔到係細姑姐都嚟咗香港   仲會逗留 3 個月添呀 ~

飲完茶都 1 點半喇   係時候走人 lu ~

我哋坐地鐵再轉巴士去將軍澳拜爸爸媽咪   估唔到無咩人   去到可以上車   感恩感恩 ~

唉   又喊死我了   所以其實呢日心情都比較沉重 ~

我人生永遠會有一個遺憾   就係媽咪病嘅時候   我仲話媽咪成日瞓   唔體諒佢其實係好辛苦   呢一點   我係永遠唔會原諒自己的 ~

但呢個唔係我負面思想   而係我要警惕自己   要好好控制自己情緒 ~

搞掂哂就去油塘嘅大本營    原來都 3 點半了    咁搵個地方坐下食下傾下   之後我同里奧大人就同嬸嬸去商務買小說   我地有折嘛   佢話得番一本咋   所以佢好開心呢 ~

柚字蜜雞翼



雞翼尖 - 辣辣哋好味呀   同埋我想食雞翼尖好耐啦   今次食到   真係好滿足呢 

炸洋蔥圈 - 呢個麻麻哋



買完就打的去家姐屋企   今日家姐工人唔放假   咁之前個工人都黎埋   佢一見到我就話我瘦咗   呵呵   我其實只係瘦咗 8 磅   再瘦多 10 磅就差唔多   努力努力 ~

家姐佢地出去買燒鵝   咁我同里奧大人就陪嬸嬸傾偈   之後我就同工人一齊掉哂啲即食麵   2016 年 5 月嘅都有   如果唔掉   家姐真係會食埋   仲會話此日期前最佳之嘛   但年幾喎   我真係唔會食囉 ~

6 點左右開飯   食下傾下   真係好開心   但都係嗰句啦   加拿大太遠喇   要是過去玩   起碼要請 2 星期假   不過有機會嘅話   我都想去下   一次過探哂所有叔叔姑姐當細佬妹   諗起都開心 ~

食食下飯   最搞笑嬸嬸無啦啦笑住話   佢哋掉哂啲過期嘢   好在家姐聽唔到咋   之後同番工人講   佢哋個樣都驚   因為家姐唔比掉嘛   但其實掉咗都唔知囉   最多咪話工人做 Lunch 囉 ~

差唔多 8 點幾   大家都走喇   糟糟借咗家姐架車   咁糟糟就來家姐屋企   之後家姐同糟糟送埋叔叔番屋企   順便認路   有糟糟就唔驚啦   但得家姐一個車嘅話就好危險喇   哈哈 ~

我同里奧大人坐巴士番屋企   番到屋企都 9 點   即沖涼喇 ~

今晚好飽   但唔想徑步   所以沖完涼就熨 2 機衫   估唔到唔駛開冷氣   仲無出汗添喎   天氣真係涼咗好多喇 ~

熨完都 10 點   再睇多陣電視   11 點即瞓   今日都好攰呢 ~

七本 (居食屋) 日本料理 @ 旺角 ( 28-OCT-2017 )

泡菜餃子鍋 - OK 喎   估唔到咁有多隻餃子   仲要係熱辣辣添   正呀

吉列海鮮咖哩飯 - 突然間好想食蝦同埋食飯   所以叫呢個喇



( 28-OCT-2017  SAT )

今日係重陽節假期   又可以瞓到自然醒   不過我今朝 10 點都醒咗 lu   里奧大人就 9 點半已經醒咗添 ~

我一起身   佢好開心咁話終於瞓得好   我都好開心呀   我覺得搵錢係緊要   但對我來講   里奧大人有健康嘅身體先係最重要呢 ~

咁梳洗之後就去食早餐   食完番屋企抖陣   11 點半出門口 ~



今日送 B 仔最後一程   所以約咗家姐同姐夫同工人   12 點 10 分喺官塘地鐵站等 ~

咁我同里奧大人就行陣 APM 先   因為我要去 MUJI 買棉花糖比家姐同工人呀 ~

里奧大人無啦啦仲話有啲餓   要買件蛋糕食呀   聽到佢話食嘢   我就最開心   因為之前佢真係食好少嘢   直頭話唔食都得添呀   搞到我勁擔心佢呢 ~

12 點半去到 TLC 寵物緣寵物善終服務   之後安排坐入房   無耐就捧住 B 仔入來   我同家姐喊到死死下   工人都有喊   姐夫就坐喺度無反應   只係睇手機   所以里奧大人同我講囉   話點解佢好似對隻狗無感情咁嘅 ?!   外人見到   以為係唔識 B 仔呢 ~

我今次無同 B 仔一齊影相呀   我要嘅回憶係開心嘅   我唔想開相簿就見到凍冰冰嘅 B 仔   咁家姐當然有影相啦   之後里奧大人話忍唔住都要幫 B 仔影相   佢話本來唔想影   因為始終睇咗唔開心   但最後覺得   呢刻唔影就永遠無機會影   所以就影喇 ~

等埋火化   咁工作人員話睇唔睇埋啲骨 ?!   姐夫即話唔睇   嗰下我真係覺得佢好鬼衰啦   你唔錫隻狗係你事   家姐咁錫 B 仔   一定點都想睇哂成個過程先走   所以我即問家姐   妳想唔想睇 ?!   家姐即話睇呀   所以我哋又再等半個鐘   其實我都預哂整個儀式要 2 個半鐘 ~     

工作人員話 B 仔啲骨好散   手腳骨好脆   但頭骨整齊   家姐話 B 仔手腳係唔好㗎   成日要食藥   佢同豬仔一樣   成日食藥   所以出來嘅骨都係唔好呢 ~

尋晚糟糟隻狗   住咗一晚診所就走咗   不過佢心臟不嬲都唔好   要長時間租部機比佢㗎   同埋呢排佢嘅情況都唔係咁好   所以都預咗差唔多㗎喇   唉 ~ 

搞掂哂    2 點幾就走得喇   姐夫想食啲濕濕哋嘅嘢   咁去米線陣食啦 ~

我嘅松葉蟹捧+彈牙魚腐米線 (麻辣蕃茄湯底) - 其實我都鍾意食蕃茄湯底   但自己整得無厘味道囉   可憐           



里奧大人嘅雞肶肉+爽口牛丸米線 (麻辣蕃茄湯底) - 牛丸口感好腍   好怪囉   唔知點咁

家姐嘅黑醋豬軟骨+彈牙魚腐米線 (醇醋酸辣湯底 -大辣) - 湯底唔好味   大辣都係唔酸唔辣 



姐夫嘅滑牛肉片+滷水豬大腸+爽口牛丸米線 (清湯底) - 家姐話影啦   難得咁清   哈哈哈哈  

姐夫食完就出去行陣   我地就繼續食繼續傾   咁家姐買咗參茸海味比叔叔   我同家姐每人夾 $3,000   我話除 3 份   里奧大人即同家姐講   當妳老公係外人呀 ?!   我同家姐一齊話: 係呀係呀   家姐仲話   一講到錢   話知妳當佢賤人啦   最緊要唔駛比   哈哈哈哈   之後里奧大人狂笑   因為佢話無諗過我哋   為咗幾百蚊答佢係喎   我話幾百蚊唔係錢呀 ?!

家姐就番屋企   我同里奧大人又行陣 APM   勁開心呀   終於有得試食爆谷   我覺得呢隻好貴嘛   所以唔捨得買 ~

好味道架   不過就甜咗啲   哈哈  



食到好飽   真係好想行街   所以搭小巴去佐敦買 Jel 喇   又行埋裕華國貨   唔好講笑   我好鍾意去裕華睇嘢傢俱㗎   好古色古香   但好鬼貴   所以只能睇不能買呢   哈哈 ~

行完又去超市睇嘢   買咗蔬菜條同甜豉油同金華火腿   之後我周圍行啦   里奧大人自己就睇人切新鮮八仙果   最後都買咗包   佢話食完個喉嚨好舒服喎 ~

第 1 次見新鮮八仙果   仲要係好大個

咁我想買 Minions 坐枱月曆嘛   里奧大人話信和可能有   咁去睇下   所以就行去旺角喇   比着以前一定要坐車   依家就鍾意行路   不過咁   其實天氣唔熱先行咋   哈哈 ~

好大個鹹蛋黃



去信和都唔見有   再去唔知邊間 Mall 又係無   咁行到都攰喇   所以去食嘢 lu ~

其實唔太餓   但真係好想坐   哈哈 ~

食完就行陣女人街   之後搭小巴番屋企 lu ~

今日都行咗幾多路   所以唔去徑步   沖埋涼就休息喇 ~

睇多陣電視   11 點幾先瞓 ~

秋月居 @ 九龍灣 ( 27-OCT-2017 )

里奧大人唔食熱氣嘢嘛   咁我食哂成個脆脆啦   勁飽肚同埋勁熱氣   雙眼同鼻窿好似慶合合咁呀   不過真係好好味   哈哈         



里奧大人只食沙律菜   







( 27-OCT-2017  FRI )

秋天感覺真係令人好舒服   自從 10 月中打完個風之後   天氣都持續清涼   正呀 ~

早餐食奶醬多   嚟緊放假又要食重量級早餐   所以番工就食清清哋   哈哈 ~

菇場勁忙啦   旺季又來臨了 ~

Lunch Time 出去食雲吞米   因為無哂水餃 ~

食完又行個大運   依家好天氣   一定要出去行呢 ~

仍然忙啦   里奧大人 3 點喺葵興見客   所以我放工都即走喇 ~

今晚唔煮喇   去九龍灣食嘢 ~         

里奧大人終於頂唔順   辭職唔做喇   我舉腳贊成呀   佢做呢份工真係有史以來最辛苦嘅一份   佢係跟新 Product   無人教你點做   又無得睇番 之前 Email   有關 Technique 又唔熟   問同事嘢又唔理你   好喇   咁自己搞掂哂啦   個阿 Head 就話咁咁咁   呢樣唔得嗰樣唔得   客又唔批   但其實個客係批咗囉   所以真係吃力不討好   最慘係成日比人放暗箭   佢人生第一次遇到呢啲同事   我仍都第一次聽到啲同事會係咁衰囉   佢比我睇埋啲 Email 對話   我直頭火都來   所以我話辭職唔做   係一個最正確嘅決定 ~

佢對上一份工   初初做都好有壓力   又係無胃口同瞓唔到   但起碼同事會幫你手搞掂   阿 Head 又會教你點做   但呢份工呢   佢跟個客一個月   足足瘦咗 10 磅   無胃口食嘢又瞓唔到   唔怪得佢上次話做得咁辛苦   唔知為乜   原來佢講緊公司   佢做嘢好少會咁呻法   仲要係日日呻唔同嘅衰嘢   啲嘢係一日衰過一日   我真係當劇情咁聽㗎 ~

今日佢辭咗職   個人真係開心咗咁喎   居然話想行 mega BOX   咁行啦   聽日又唔駛番工 ~

我同里奧大人講話想去旅行   咁去商務睇旅遊書   睇咗半個鐘   買埋本書就走喇 ~

番到屋企都 8 點幾   沖埋涼就休息 lu ~

里奧大人 10 點幾都瞓   咁佢搽 Cream 啦   居然搽到流鼻血   成日叫佢細力啲啦   佢就好似擦地板咁大力   咁佢隻手指尾直插鼻窿   即時流血啦   嚇鬼死我 ~

冰格又無冰   咁好在有冰咗嘅魚片頭   咁比佢當冰咁敷住啦   佢按住鼻窿時   我望下佢個鼻窿   仲流緊血   真係嚇到我腳軟   按咗成 10 分鐘   終於無流血 ~

次次一上 Youtube 睇嘢呢   就唔想咁快瞓   所以我又 11 點幾先瞓 ~