海蜇燻蹄 (外賣) + 滷水雞翼 (外賣) + 豆苗 ( 31-JAN-2018 )

( 31-JAN-2018  WED )

今朝里奧大人 6 點起身啦   好在尋晚放定支唔凍嘅咖啡比佢   我唔駛起身   哈哈 ~

我繼續瞓啦   咁凍真係好好瞓㗎 ~

天氣咁凍   大食啲都無人怪妳㗎   所以食米粉餐   哈哈哈哈 ~

菇場忙下停下   但完全無 Mood 啦   所有大粒唔喺度   做嘢真係對唔住自己   嘻嘻 ~

今日阿墨 Last Day   所以菇場同佢 Farewell   又去飲茶喇 ~

有個同事超級勁怪   船頭問佢食啲咩 ?!   佢話乜都食   之後就夾哂佢面前嘅點心落自己碗度   豉汁鳳爪 蝦餃 腸粉 燒肉   我頭先見佢已經係咁   其實妳可以夾兩樣先都得   反正我哋預咗每人一粒   唔夠食一定會再叫   但唔好咁樣囉   之後佢全程都係食食食   真係無停過口㗎   分分鐘大食過 8 卦添呀 ~

菇場唔忙   又傾下偈   CC 無啦啦問我電費幾錢 ?!   話我成日熨衫   但我話點都無開冷氣咁勁啦   佢話我連底褲都熨   佢會黐喎   咁放入洗衣機嘅   基本上我全部都會熨   床單床冚乜都熨   熨平咗又好放啲   所以我鍾意熨衫   但最唔鍾意熨里奧大人啲西褲   因為成日熨到雙骨   哈哈   同埋佢啲褲都好難熨   太多袋喇   熨到起鏡面   我會無咩心機熨囉 ~

正想食甜嘢   咁啱有散水餅食呢   呵呵

今晚遲咗放工   因為有啲手尾要搞埋   唔想又瞓唔着    哈哈 ~

里奧大人今晚番香港   咁就好喇 ~

咁我見有時間   就去大成街市買餸啦   其實好鬼凍唔想行   不過算啦   當做運動 ~ 

買完魚就去買無花果乾   乜原來咁鬼貴   好記得淘大 Taste 開張   一大包好鬼平   依家要 $60 半磅   有啲係 $200 一磅添呀   不過我覺得買半磅最好   一個樽可以裝哂嘛 ~

咁順便又去燒味檔買餸   唔想食丸同水餃呀 ~

諗住整 2 塊牛油多士食啦   但唔見咗袋方包   仲以為里奧大人驚凍   所以拎埋上大陸食   但其實佢又唔會拎我啲嘢食家嘛   咁打比佢問   佢話無   呢下驚喇   要是我唔小心放咗喺佢個袋   咁就大鑊了   因為佢個袋留喺工廠   下次唔駛拎來拎去   但麵包就一定發霉到九彩啦   好在後尾原來趺咗落梳化邊邊位   真係嚇死我呀   我都知自己尋晚心急   拎完無放好方包   因為我完全無印象放咗喺邊呀 ~

里奧大人話 8 點半左右番到屋企   咁今晚只係淥菜同淥麵   咁好快手   咁我都抖下嘛   一望個鐘原來已經 8 點   真係要預備   因為煲水都要時間嘛 ~

是日懶餐 - 海蜇燻蹄 (外賣) + 滷水雞翼 (外賣) + 豆苗  

海蜇燻蹄 (外賣) - $20 盒咋   估唔到份量都唔小   味道又 OK   下次可以再買 ~  

滷水雞翼 (外賣) - $12 有 3 隻都抵   同埋幾入味 ~    

豆苗 - 買咗 $20   呢度一半咋   呢期好唔想食菜咁   好奇怪   但出街食菜又無問題喎 ~

洗埋碗都 9 點   沖埋涼都休息喇 ~

11 點幾即瞓   天氣凍好快眼瞓   呵呵 ~

韓式辣醬焗豬肶仔 + 蒜蓉香草牛油多士 ( 30-JAN-2018 )

里奧大人食意粉   我食多士



( 30-JAN-2018  TUE )

今朝勁凍呀   全副禦寒衣物上陣   其實只係冷帽 + 大披肩 + 毛毛靴啫   哈哈 ~

又落埋毛毛雨   真係好唔鍾意又寒又濕嘅天氣   今日都係全日無陽光㗎喇 ~

今朝同家姐去淘大 Toast Box 食早餐   好想家姐飲杯咖啡   因為我覺得好飲 ~





我覺得火腿香腸唔煎無問題   但煙肉唔煎真係唔好食囉 

食到 8 點 45 分就走人   家姐去搞文件   我就番工   感恩大家都好快有車 ~

菇場唔忙   清 Filing 最好時機也 ~

Lunch Time 出去食   之後去買麵包   再周圍行   今日突然間好想行下 ~

好嘢   可以 Load 旅行相   但 Load 到 3 點   個 8 卦又要同我對表   對到 5 點呀   好在終於搞掂   真係好怕啲嘢唔 Match   雖然係煩   但點都想搞掂囉 ~

抖多陣就放工   番到屋企都唔願郁   真係好鬼凍 ~

家姐星期日買咗 2 包炸蒜比我   我都估佢係都要買到為止   細細包要 $17   呢度 2 包   唔怪得家姐話好細包啦   哈哈



6 點半預備   里奧大人 7 點半放工   番到嚟可以即刻開餐 lu ~

是日懶餐 - 韓式辣醬焗豬肶仔 + 蒜蓉香草牛油多士  

韓式辣醬焗豬肶仔 - 用叉燒醬醃咗一晚   之後見焗到有啲乾乾哋咁   又搽啲韓式辣醬   估唔到味道又好好喎   里奧大人都好鍾意食   咁下次再整先 ~   

蒜蓉香草牛油多士 - 突然間好想食   所以即買埋蒜蓉同香草   不過可能太多牛油   件多士唔脆   哈哈 ~

食完再洗埋碗都 9 點   咁即開機洗衫同沖涼喇 ~

差唔多沖完涼   聽到里奧大人把聲   原來佢叫我   話好少沖咁耐   鬼咩   凍吖嘛   沖完成身熱辣辣先舒服嘛   哈哈 ~

今晚仍然落毛毛雨   又無得徑步   咁熨衫啦   其實熨衫都好正㗎   成個人會暖哂呢 ~

天氣凍   真係唔想咁夜瞓   所以 11 點幾都瞓喇 ~

XO 醬炒西蘭花蝦仁 ( 29-JAN-2018 )

( 29-JAN-2018  MON )

嘩   今朝凍咗好多呀   加上又剪短咗頭髮   一定要帶頸巾囉   真係吹邊度都算   但吹到條頸就特別容易病咁㗎   所以真係要好好保暖呢 ~

早餐食餐蛋治   要食啲熱嘢暖暖身 ~



菇場忙咗陣   呢兩日希望可以盡情 Hea   因為所有大粒都出咗 Trip   呵呵 ~

Lunch Time 出去買菜同炸魚皮   之後再買 Lunch 番菇場食   真係唔想周圍行   好鬼凍呀 ~

無啦啦好攰   無計啦   呢啲咁嘅天氣   真係想精神都難 ~

放工去買糖水   呢排無滾湯   所以食糖水 ~

番到屋企抖陣   諗住食完飯先熨 2 機衫   不過越坐越凍   最後都係熨衫當做運動   熨完衫真係成個人暖哂架 ~

里奧大人差唔多 8 點放工   話天氣凍要食辛辣麵   咁是但啦   番到屋企食自己鍾意嘅嘢係開心嘅   但就唔可以成日咁食囉 ~

是日懶餐 - XO 醬炒西蘭花蝦仁  

XO 醬炒西蘭花蝦仁 - 最主要係想清包急凍蝦仁   依家真係下定決心清哂冰格同雪柜啲醬料   唔想屋企咁多嘢 ~

洗埋碗就開機洗衫   沖埋涼就食糖水   天氣凍   我都要食碗熱嘅紅豆沙   里奧大人就綠豆沙   其實食糖水都貴   但自己又唔得閒煲喎 ~

11 點都瞓覺   真係好喇   因為真係唔知做咩鬼好攰咁囉 ~

翠華餐廳 @ 香港國際機場 ( 28-JAN-2018 )

又食蝦仁喇   所以依家絕對肯定係佢覺得食蝦勁有益



炸醬麵 x 2



x 2



魚片頭湯河 x 2



( 28-JAN-2018  SUN )

今朝 10 點起身   但其實次次都係里奧大人起身先   佢搞掂哂就會叫我起身呢 ~

短頭髮真係勁方便   所以基本上我係快過里奧大人搞掂   因為佢要剃鬚同 Jel 頭   我只係搽 Cream 最耐   但呢排咁凍   短頭髮真係好易攝親囉   所以一定要帶大披肩   即係又多一樣嘢拎 ~

諗住去另一間新開嘅餐廳食早餐   但去到門口位置都覺得焗   已經開咗門添喎   咁坐入去咪仲焗 ?!   所以里奧大人話去另一間食 lu ~

今次又試一間新嘢   真係唔明點解   氣溫降低咗少少   咁就唔開冷氣咁   大佬   人流一樣係咁多家嘛   焗都會病㗎 ~

食完就番教會   依家好比心機聽道   因為靈命真係無成長過咁   唉 ~

崇拜完畢就去德福行下   之後再食啲嘢 ~



咁買咗杯百香果蜂蜜加珍珠   我飲第一啖   里奧大人正想落扶手電梯   我即刻扯番佢上來   因為我話無珍珠呀   咁叫里奧大人再飲   佢都話無   因為正路第一啖係已經啜到珍珠   咁拎番去加珍珠啦   嗰個職員都話佢唔記得加珍珠 ~

如果呢杯係里奧大人一個人飲   而佢都加咗珍珠   我估佢飲到最後先會發覺無珍珠囉   哈哈 ~

同里奧大人買埋對波鞋就去姑奶屋企   今日去送機呀 ~

打的去機場   4 個人去機場嘅話   真係打的好過 ~

Check-in 搞掂就去食嘢   咁啱 2 姑奶兩公婆都到咗   咁一齊去翠華啦 ~

6 點 35 分機   但 5 點 20 分要到閘口   我哋就話奇怪囉   早成個幾鐘 ~

5 點都埋單走人喇   晴晴 Daddy 離境嘅時候有問題呀   話 Boarding Pass 同 Passport 個名唔同   情況同我嬸嬸一樣   嬸嬸係因為 Space 位問題   但佢就係因為澳洲只打 2 組字問題   咁華人好多都係 3 組字家嘛   不過又教精咗佢哋   一定要 Check 下自己個名   哈哈 ~

搞掂哂又再次離境   咁 2 姑奶就車我哋番屋企   去到隧道口比錢   無啦啦話架車壞咗   好在最後撻番着咋   有驚無險 ~   
   
晴晴 Daddy 打來話差唔多起飛喇   佢係最後一個上機   但當時只係 5 點 55 分   早咗成 40 分鐘開機呀 ~

番到屋企都 6 點幾   又唔餓   咁里奧大人做公司嘢   我就抖下   7 點半去徑步   徑半個鐘就番屋企   因為條街好凍   哈哈 ~

呢件淘寶買㗎   着咗 3 次已經嚴重起毛粒   四十蚊人仔就係咁嘅質素   呵呵

不過唔緊要   淘咗個強勁去毛粒機   搓幾搓就無哂無啦   勁呀呢   呢個毛粒機要成百蚊人仔㗎   算大手筆㗎喇   哈哈

沖埋涼就休息   里奧大人就搞掂埋少少手尾就可以休息   原來都 9 點幾   要拿拿聲食埋啲雞肉乾喇   但里奧大人話要食個杯麵   咁同佢 Share 啦 ~

姑奶頭先喺林珍香買嘅雞肉乾   唔係咁好食

好少咁夜咁食法   所以點攰都要等到 11 點先瞓   呢排咁凍   都真係會好早瞓呢 ~

金滿庭京川滬菜館 @ 九龍灣 ( 27-JAN-2018 )

五福臨門大拚盤 - 麻麻哋



燻魚



醬爆雞丁 / 金磚豆腐 - 豆腐好味   但勁熱氣   我食咗半條   個鼻哥窿已經慶哂   唔敢再食了   



宮保明蝦球 - 呢期姑奶叫親餸都有蝦   肯定又覺得食蝦有益   要日以繼夜   夜以繼日咁食食食   食足廿年  



回鍋肉 - 油到呢



擔擔麵 - 無食呀   其實仲叫咗片皮鴨 紫心蕃彩浸豆苗㗎   不過我唔影喇   費事又問問問   堅覺好很煩   所以我只係影我前面果啲算喇

( 27-JAN-2018  SAT )

今朝同家姐食早餐   開心開心 ~

呢個早餐可以揀薯角或者沙律   家姐話食薯角好啲   因為一定係新鮮炸   我無諗呢樣嘢喎   果然新鮮炸起   超好味呀   哈哈          



食完鹹要食甜



佢一見我飲咖啡少奶   佢個樣仲慘過我咁   勁搞笑   但我習慣咗又好 OK   反而我見到係正常奶   我要即換   因為我飲完會好唔舒服咁呢 ~

無啦啦又話我細個好有主見   話食牛扒就牛扒   唔會食奄列   佢梗記得呢單嘢   因為佢次次都被迫陪媽咪食奄列   哈哈 ~

又話細個要佢夾錢買遊戲機   但又唔比佢玩   爸爸買零食一定係 4 份   我就一定食咗 3 份   鬼叫佢食得慢咩   哈哈哈哈   家姐細個個樣好慘   可能真係成日比我蝦都未定   好在佢無童年陰影咋   我覺得 ~

咁我話依家對妳好就得啦   買嘢食等妳食到驚為止 ~

不過我成日都同自己講   將來我會照顧家姐   但唔會同家姐講   雖然家姐都話明唔駛我照顧   我唔講比佢知係我好驚將來照顧唔到佢   要是能力做到   我必定做   但我唔會拍哂心口話我照顧妳   我唔想好似里奧大人啲屋企人咁   成日話會照顧乜照顧物   我覺得唔駛成日講啦   做啦唔該   講就容易   人地仲覺得妳好好添   但我就覺得唔該靜靜哋做出來   唔好成日聲大大講出來囉   煩 ~   

8 點 45 分走人   今朝遲咗 20 分鐘先番到菇場   好在老闆未番 ~

忙咗陣就 Hea 過   尋日 8 卦叫我幫手做嘢   我話星期六唔會做嘢㗎   佢碌大對眼問我咁做咩 ?!   我話關你咩事 ?!   總知唔做公事   哈哈 ~

堅無 Mood 喎   不過 Urgent 就一定要做啦   想死咩   哈哈 ~

里奧大人去九龍灣剪髮   佢剪完就啱啱 1 點   之後約喺九龍灣等啦   食埋 Lunch 再行一陣   差唔多 3 點就去姑奶屋企整嘢 ~





里奧大人整嘢   我就瞓啦   估唔到勁好瞓   里奧大人話我瞓咗一個鐘呀   之後佢差唔多搞掂   我話比我再瞓多陣   又瞓咗半個鐘   但原來已經 6 點喇   要即出發去酒樓喇 ~

晴晴 Daddy 番咗來   所以今晚食埋團年飯   唔駛又再食多次 ~

8 點 15 分要交枱   之後各散東西   我同里奧大人去 Uniqlo 睇嘢   之後再去 MCL 拎爆谷同汽水   一陣喺屋企睇戲食㗎 ~

番到屋企即沖涼   之後開機洗衫 ~

睇睇下戲   里奧大人又話想染頭髮   咁幫佢染啦 ~

搞掂哂就繼續睇戲   睇完再整下其他嘢   12 點先瞓 ~

臘潤腸蒸飯 + 忘不了白菜 ( 26-JAN-2018 )

( 26-JAN-2018  FRI )

又星期五喇   話咁快又過咗差唔多 1 個月   可能真係呢幾年都好忙   覺得啲時間過得好快咁呢 ~

早餐食米粉餐   其實唔餓   但想試下係咪食粉麵類會精神啲   哈哈 ~



菇場忙呀   清埋哂啲嘢就可以了咗事喇 ~

做做做   但真係唔眼瞓喎   不過我其實都唔會朝朝早粉麵餐   因為真係好鬼肥   同埋會食大個胃咁   最大問題係 12 點半都無餓嘅感覺   雖然我依家鍾意行路   但始終有時好忙   中午唔想特登行半個鐘   之後先食嘢咁囉 ~     

Lunch Time 出去行下   家姐話午餐肉平喎   咁我去買啦   行咗 3 間都無哂貨   咁買埋包白菜就走人喇   再望手機已經 1 點幾   係時候買嘢食番菇場喇 ~

依家一做啲煩嘢   好自然就要食番啲甜嘢   唔係人都顛   但其實我好少買甜嘅糖   多數買薄荷糖   因為夠醒神   同埋薄荷糖唔可以一次過食好多嘛   其他糖就可以食不停   所以都係買薄荷糖係好啲   嘻嘻



8 卦話老闆 5 點半走   咁我話即係我要遲走啦   之後佢話老闆心諗   平時 5 點半咁多人走   點解今晚 5 點半無人走   哈哈 ~

番到屋企就抖下   7 點開餐   食完抖陣喇   差唔多 7 點 50 分去徑步   雖然落毛毛雨   但照徑啦   徑咗 2 個圈   之後里奧大人打嚟話放工   因為今晚另外煮水餃辛辣麵比佢食   所以我都要番屋企預備 lu ~           

是日懶餐 - 臘潤腸蒸飯 + 忘不了白菜

臘潤腸蒸飯 - 啲冷飯係星期一㗎喇   點都要食埋去啦   都懶得炒飯   加 2 條臘潤腸就算喇 ~

忘不了白菜 - 無啦啦勁想食白菜   所以喺超市買咗 1 Pack   估唔到幾好味喎   呵呵 ~

洗埋碗就開機洗衫   之後沖涼休息 ~

睇多陣電視   11 點 10 分都自己瞓先喇 ~

蒜芹炒米粉 ( 25-JAN-2018 )

( 25-JAN-2018  THU )

個天又係灰灰暗暗   真係無咩心機咁囉 ~

早餐同 8 卦試新嘢   之後應該唔會再嚟食   哈哈哈哈    都話佢啦   日日話試   依家試咗又話唔會再嚟   麻鬼煩 ~

菇場忙呀   要盡全力清哂溫總啲嘢   真係想每晚瞓得好   唔駛成日記得要做 ~

今朝全程唔攰喎   所以做嘢好有衝勁 ~

Lunch Time 未餓   咁出去行陣   到 1 點先去食嘢 ~

魚片頭少河多蔥腩汁   死 8 卦成日話我麻鬼煩   哈哈

今日全日都唔眼瞓   係咪因為真係早午餐都食飽呢 ?!   但平時唔餓   食多士都夠飽喎   但就唔會話有氣力嗰隻囉   聽日再試米粉餐做早餐先 ~

定係今日 Ad<om 搬咗位   唔駛成日聽佢安排司機做老闆啲私人嘢呢 ?!   佢坐咗喺我隔離個幾月   我日日聽佢安排司機點點點   呢啲唔係老秘做嘅嘢   而係助手做嘅嘢   我好少聽佢安排司機做公事囉   99.8% 係私事   已經有 2 個司機喇喎   但估唔到連小朋友啲食飯餐單都要佢幫手揀囉   救命   同佢傾開偈   佢都話未必做得長   因為老闆係 " 唔駛急最緊要快" ~

8 卦次次入老闆房都係幾乎跑入去咁   我話駛唔駛跑呀 ?!   佢即話有次佢上廠   個同事行去拎辦比老闆   佢話老闆喝個同事   你係要跑   唔係要行   呢下堅喎 ~

仲有好多怪嘢   真係唔講唔知   所以老闆番咗來香港   跟佢地嗰啲先慘呢 ~

咁我要拚命做埋啲嘢   5 點 25 分終於搞掂哂一 間公司   仲有另一間就要聽日做喇 ~

放工番屋企   又唔餓   所以 6 點半就去徑步   徑半個鐘就番屋企煮嘢食 ~

今晚里奧大人要喺大陸同阿頭 & 同事食飯   咁我又要自己食 lu ~

是日懶餐 - 蒜芹炒米粉  

蒜芹炒米粉 - 我勁愛蒜芹架   就咁齋炒米粉已經勁好味   2 扎加埋只係 $5 咋 ~

食完抖陣都 8 點幾   沖埋涼再敷 Mask   之後熨 2 機衫   搞掂哂就休息了 ~

里奧大人 11 點幾先番到屋企   咁傾下偈   成 12 點先瞓   之後佢先沖涼 ~

魚肉燒賣 + 蕃茄南瓜粟米湯 ( 24-JAN-2018 )

( 24-JAN-2018  WED )

感恩一覺瞓天光呀   7 點半起身都精神   呵呵 ~

今朝又凍凍地咁喎   咁都好   唔好太熱   因為下星期又 9 度   突然急凍好辛苦呢 ~

家姐好搞笑   一早 Whatsapp 問我眼唔眼瞓   阿 mi 又問幾點番到屋企   真係係人知我搵表妹整頭髮就一定會好夜   哈哈哈哈 ~

家姐話我剪短後生咗同靚咗   似番佢細妹   頂佢   之後我話越來越似媽咪   我話我係小媽咪   哈哈哈哈   黐線 ~

早餐食甜嘢   感覺開心啲 ~



番到菇場   我啲同事話我精神咗   同埋佢哋覺得我剪得好短   但其實都係膊頭之上之嘛   可能真係長頭髮太耐   佢哋習慣咗我長頭髮呢 ~

唉   忙啲煩嘢   依家一做親煩嘢   就要食番啲糖   唔係會好頭痛 ~

Lunch Time 仲未餓   所以出去街市買菜   之後先去食 Lunch ~

真係好鬼攰   但行下又好啲咁   不過無可能喺走廊行來行去啦   人陣比人捉入青山都似 ~

放工即走   今晚里奧大人都要喺大陸過夜   所以今晚會超勁簡單 ~

習慣咗一番到屋企就扎起頭髮   今晚都係   之後先醒起剪短咗扎唔到啦   哈哈 ~

浸浸切切搞一輪   滾好湯就再開機洗衫   要抖喇 ~

是日懶餐 - 魚肉燒賣 + 蕃茄南瓜粟米湯

魚肉燒賣 - 蒸 8 粒燒賣   其實覺得勁嘥煤氣   但仲剩 6 粒又唔想食埋去喎   始終燒賣都好飽肚   今次蒸就好味喇   煙煙韌韌咁   蘸煲仔飯豉油好好味㗎 ~

蕃茄南瓜粟米湯 - 3 個蕃茄 + 1 斤南瓜 + 1 斤南瓜搞掂   飽肚又健康 ~

7 點開餐   食完抖陣   8 點唔夠就去徑步   一如以往徑半個鐘   其實想 40 分鐘㗎   但無着外套好鬼凍 ~

番到屋企就大清潔廁所   沖埋涼就休息喇 ~

睇人煮嘢食  就算個人好飽都好想食嘢   所以又食啲健康零食呢 ~

11 點 20 分都瞓喇   算早啦   哈哈哈哈 ~